1 Hê porim ontrall ani prithvi ani tancher manddloleô soglleô vostu rochun toiar zaleô.
2 Apunn kortalo tem kam’ Devan satvea disa sompoilem; sogllem kam’ sompoilea uprant, satvea disa Devan visôv ghetlo.
3 Devan, satvea disacher axirvad ghalun, to dis povitr kelo; kiteak sogllem rochun zatôch, Devan tea disa visôv ghetlolo.
4 Ho zaun asa ontrallacho ani prithumecho oromb: tedna tim rochon ailim.Tedna Sorvespora Devan prithum’ ani ontrall rochlim.
5 Prithumer koslinch ran’votti jhilkuttam naslim ani zomnir koslench tonn kirlunk naslem, kiteak Sorvespora Devan prithumer paus dhaddunk naslo ani xetkamot korunk monis-ui naslo.
6 Punn prithumentlo êk vhall voir sortalo ani prithumechi soglli zomin ximptalo.
7 Tedna Sorvespora Devan zomniveli mati gheun mon’xak kelo ani Tannem tachea nakachea puddamnim jivitacho svas ghalo ani oso monis êk jivo pranni zalo.
8 Sorvespora Devan voinkuttant Udentê vatten êk bhag lailoli, tantum Tannem Apnnem rochlolea mon’xak ghalo.
9 Sorvespora Devan zomnintlim torê-torêchim, polleunk sobit ani khaunk ruchik, zhaddam kirlo-xim kelim; tea bhair, bagê modekot, jivit-dito rukh ani toxench borea ani vaittachi zannvai-dito rukh.
10 Voinkuttant êk nôd vhanvun, ti ak’khi bag ximptali; ani voinkutta mukhar tê nodiche char fantte zatale.
11 Poilea fantteachem nanv Pixon-nôd, ani ho fantto Havila ganvchê bhonvtim posorta.
12 Osol bhangar, motiam ani gomed-ui thoim mellta.
13 Dusrea fantteachem nanv Gihon-nôd; hi Kux ganva bhonvtim posorta.
14 Tisrea fantteak Tigris-nôd mhonnttat, ani hi Assirient pavlea; ani chovthea fantteak Eufrates-nôd mhonnttat.
15 Zomin rovunk ani ticho poramôs korunk, Sorvespora Devan mon’xak tea voinkuttachê bhagent ghalo.
16 Tedna Sorvespora Devan, mon’xak adnia ghali, mhonnun: Bhagent aslolea sogllea rukhanchim follam tujean khaum-ietat,
17 punn borea ani vaittachi zannvai ditea rukhachem foll mat khaum noiê, kiteak tem khaxi tea disa tum mortoloi.
’
18 Sorvespora Devan mhollem; Dadlo eklo aslolo borem nhoi; Hanv taka êk favo tosli sangatin kortolom.’
19 Sor-vespora Devan zomnivelim sogllim zonavoram ani ontrallavelim sogllim suknnim rochlolim; tankam koslim-koslim nanvam dita tem polleunk Sorvesporan tankam mon’xa-xim haddlim; dôr-ekak monis nanv ditolo aslo tench nanv tankam poddtolem aslem.
20 Sogllea pôspachea mon’-zatink, ontrallavelea sogllea suknneank ani sogllea ran’votti mon’zatink mon’xan nanvam dilim; punn apnnak sangat korpa-sarko taka konnuch mellunk na.
21 Mhonnttôch Sorvespora Devan mon’xak êk bori nhid ghali ani, to nhidlolo astana, tachi êk bôr kaddli ani tichê svater mas ghalem.
22 Ani uprant dadlea thaun kaddlolê borichi Sorvespora Devan êk bail keli ani tika dadlea-xim haddli.
23 Tedna dadlean mhollem:‘Xekim hi mhojea haddanchem hadd, ani mhojea masachem mas! Tika NARI mhonnttolim, kiteak NOR-hachi tika kaddlea.’
24 Heach pasot dadlo aplea avoibapaik sôddta ani êkê bailek ektthovta ani tim dogam-i zonnam êkuch kudd zatat.
25 Tim dogam-i, dadlo ani bail, vingllim aslim, punn tankam ekamekachi loz disonasli.
Utpoti Chapter 3
1 Sorvespora Devan rochlolea sogllea ran’votti zonavoram modem sorôp chôdd xidduk aslo; tannem bailek mhollem: ‘Bhagentlea sogllea zhaddanchim follam khai nakat mhonn Devan tumkam sanglam tem khorem?’
2 Bailen sorpak zobab dilo: ‘Bhagentlea rukham modekot êk rukh asa tachea folla vixim
3 Devan sanglam: tumi mornnak sampoddona zaunk, tea rukhachem foll khainakat, nhoi mhonn taka hat porian lainakat.’
4 Tedna sorpan bailek zobab dilo: ‘Hem khorem nhoi, tumi morchim nant;
5 jea disa tumi tem khaxat tea disa tumche dolle ugòddtole ani vaitt-borem vollkhun tumi Apnna bhaxen zatoleat mhonn Dev borem zanno.’
6 Mhonnttôch tea rukhachem foll khaunk ruchik ani polleunk sobit ani zannvai zôddun gheunk bhulovpi, oxem bailek dislem dekhun, tinnem tem foll kaddlem ani khelem; aplea ghovak-ui dilem ani tannem-i tem khelem.
7 Tedna tanche dogãiche-i dolle ukte zale ani apunn vingllim asant mhonn tankam gomlem; tea pasot tãnnim anjiranchea zhadda-chim panam xinvlim ani benddak bandunk penktta-rumal kele.
8 Sanjechem xitoll varem martana, Sor-vespor Dev bagent bhonvtalo tedna, tãnnim Tacho tallo aikolo ani bagentlea zhaddamnim dadlo ani tachi bail Sorvespora Devachê nodrê mukhavelim liplim.
9 Sorvespora Devan Adanvak ulo korun vicharlem: ‘Tum khoim asai?’
10 Tannem zobab dilo: ‘Tujea panvlan-cho avaz hanvem porsant aikolo ani hanv vingllo asam mhonn bhieun lip-lom.’
11 Devan vicharlem: ‘Tum vingllo asai mhonn tuka konnem sanglem tôr? Hanvem addvarlolea rukhachem foll tunvem kheleim kitem?’
12 Adanvan zobab dilo: ‘Tunvem mhojea sangatak bail dilolii; tinnem tea rukhachem foll mhaka dilem ani hanvem tem khelem.’
13 Tedna Sorvespora Devan bailek vicharlem: ‘Tunvem kitem mhonn keleim?’ Bailen zobab dilo: ‘Sorpan mhaka tallnent ghali dekhun hanvem tem khelem.’
14 Tedna Sorvespora Devan sorpak mhollem: ‘Hem tunvem keleim dekhun, sogllea ghorvaxi zonavoram, ani ran’vott zonavoram modem, tujer xirap poddum. Sogllea tujea jivitant, tujea pottar tum choltoloi, ani dhul’l khatoloi.
15 Tujê ani bailê modem, ani tujê sonsti ani tichê sonsti modem, dusman’kai ghaltolom; Ti tujem mostok maddoitoli, ani tum tichê khonttek chabtoloi.’
16 Magir bailek mhollem:Tuje ballonterache koxtt, Hanv khub vaddoitolom,ani koxttam-dukhimnim, tum bhurgeak zolm ditolii, ani tuji vondovonn, tuka ghova vatten ôddtoli, ani to tujê voir odhikar choloitolo.’
17 Uprant dadleak mhollem: ‘Ani Hanvem addvarlolea rukhachem foll tunvem kheleim dekhun,tuka lagun zomnicher xirap poddum.Sogllea tujea jivitant, koxttamnim zomin kamais korun, tujem pott bhôrtoloi;
18 Ti zomin tuka kantte-khuntte, ani kunsam utpon kortoli, ani xetantlem tonn tum khatoloi.
19 Ani tum zomnint porot vocho porian, tujea kopalacho gham’ varoun, tuzo dispotto gras zôddtoloi, kiteak têch zomnintlo tuka kaddlolo. Tum dhul’l , ani porot tum dhul’lint vetoloi.’
20 Dadlean aplê bailek ‘Jiv’ oxem nanv dovorlem, kiteak ti sogllea jiveanchi avoi.
21 Sorvespora Devan dadleak ani tachê bailek chambddeachim angvost-ram kelim ani tim tãnnim ghalim.
22 Tedna Sorvespora Devan mhollem: ‘Polle, vaitt-borem vollkhun, monis amchê sarko zala. Atam to aplea hatan jivitachea rukhachem foll kaddun khait ani oso sodam sorvodam jieunk sôdit.
23 Punn hem korunk taka diunchem nhoi.’ Sorvespora Devan jê zomnintlo mon’xak kaddlolo tich zomin kamais korunk voinkuttantlo taka bhair ghalo.
24 Mon’xak oso bhair ghaltôch jivitachea rukha-xim to vochona zaunk, ujeachi tolvar hatant gheun voinkutta mukhar kerobink dovorle.
Utpoti Chapter 4
1 Adanvan aplê bailê Evê kodde kuddicho ekvôtt kelo; ti gorbhest zali ani Kaìnak zolm dilo, mhonnun: ‘Sor-vesporachea adaran mhaka êk dadlea lingacho bhurgo mell’llo.’
2 Tea uprant tinnem Abelak, Kaìnachea bhavak, zolm dilo; Abel menddram rakhtalo ani Kaìn xetkamot kortalo.
3 Kãi vorsam uprant, Kaìnan zomnichem utpon kel’lem foll Sorvesporak bhe-ttoilem.
4 Ani Abelan bhettoilim aplea hinddantlim malgoddim menddram ani tanchi chorôb. Sorvesporak Abel ani tachi bhettovnni manovlim,
5 punn Kaìn ani tachi bhettovnni Taka manonk nant. Dekhun Kaìn ekdomuch ragan bhòrlo ani tachem mukhamoll sogllench bodòl’lem.
6 Tedna Sorvesporan Kaìnak mhollem: ‘Kiteak mhonn tum ragan bhòrlai ani tujem mukhamoll bodòl’lam?
7 Tunvem borem kel’lem zalear, tum manovcho nasloi? Punn vaitt korxi za-lear, êkê mon’zati bhaxen tuka girasunk patok tujea dara-xim lipun ravchem na? Punn tunvem taka domaunk zai.’
8 Kaìnan aplea bhava Abelak mhollem: ‘Ami bhair xetant vochum-ia.’ Ani ekdam xetant pavtôch, Kaìnan aplea bhava Abelak jivexim marlo.
9 Tedna Sorvesporan Kaìnak vicharlem: ‘Tuzo bhav Abel khoim asa?’ Tannem zobab dilo: ‘Hanv nokllom; hanv mhojea bhavacho rakhnno kitem?’
10 Sorves-poran mhollem: ‘Tunvem kitem mhonn keleim? Zomnir thaun tujea bhavachem rogot Mhaka ulo marta.
11 Atam tujer xirap poddum; ani jê zomnintlo tujeach hatantlem tujea bhavachem rogot gheunk tondd ugôddlam; têch zom-nintlo tum bhair poddum.
12 Tum zomin kamais kortoloi, punn ti tuka foll diunchi na. Prithumer tum parpoll ani pordexi koso bhonvtoloi.’
13 Kaìnan Sorves-porak mhollem: ‘Sonsunk zaina tosli mhoji khast.
14 Polle, aiz hê zomnivelo Tunvem mhaka dhanvddailoi ani Tujea mukhavelo hanvem lipunk zai; êk parpoll ani pordexi koso hanvem bhonvchem poddlem ani mhaka vatter melltat titlim-i mhaka jivexim marunk ietolim.’
15 Sorvesporan mhollem: ‘Na, oxem ghòddchem na; konn-ui Kaìnak jivexim marit, tacher sat pavttim odik khast poddtoli.’ Oxem konn-ui Kaìnak jivexim marunk ailear, tannem taka marina zaunk Sorvesporan Kaìnacher êk xik’ko marlo.
16 Kaìn Sorvespo-rachea fuddeantlo koddsorun gelo, ani voinkuttachê udentek, Nod mhonnttat tea ganvant tannem aplem thikann kelem.
17 Kaìnan aplê potini kodde kuddicho ekvôtt kelo ti gorbest zali ani Enokak zolm dilo. Kaìnan ek xar bandlem ani haka Enok aplea putachem nanv dilem.
18 Enokak Irad zolmolo ani Iradak Mehujael zalo. Mehujaelak Methushael zalo ani Methushaelak Lamek zalo.
19 La-mekak dogi bailô asleô, Ada ani Zilla.
20 Adan Jabalak zolm dilo, ani to tombumnim ravun bokddeô-kunkddam pôstat tancho mull-vhoddil zalo.
21 Tacho bhav Jubal; kin’nori ani pirluk vazoitoleancho mull-vhoddil.
22 Zillan Tubal-Kaìnak zolm dilo, ani ho pitull-lokhonddachim sogllea jin’sachim avtam kortalo. Ani Tubal-Kaìnachi bhoinn Naama.
23 Lamekan aplea potinink mhollem:‘Ada ani Zilla, mhojem aikun gheiat:Mhaka ghaiall kel’lea eka mon’xak hanvem jivexim marlo, mhaka dukhoil’lea eka tornnea-dhaktteacho hanvem jiv kaddlo.
24 Kaìnacho jiv kaddtolean satpett farikponn diunk zai, punn Lamekacho jiv kaddtolean soteat’tôr (77) pavtti ,farikponn diunchem poddtolem.’
25 Adanvan anink ekdam aplê bailê kodde kuddicho-ekvôtt kelo ani tinnem eka putak zolm dilo; Set mhonn tinnem taka nanv dilem, ‘kiteak tinnem mhollem Kaìnan Abelak marlo dekhun, tachê svater Devan mhaka anink êk bhurgo dilo.’
26 Setak êk bhurgo zolmolo tachem nanv Enosh. Tedna thaun monis Sorvesporachea nanvan prarthona korunk lagle.
Utpoti Chapter 5
1 Adanvachê von’xavôllichi hi volleri Devan mon’xak rochlo tedna, tannem Aplea sarkeacho kelo.
2 Dadlo-bail tankam rochlim, tancher axirvad ghalo, ani tea disa tankam ‘monis’ mhonn nanv dilem.
3 Adanv ekxem tis vorsanchê piraier astana, tacheach sarkeacho taka êk put zolmolo, ani haka Set nanv dilem.
4 Tea uprant, Adanv aninkui atthxim vorsam jielo. Taka aninkui put-dhuvô zolmoleô,
5 ani nnovxim tis vorsanchê piraier to melo.
6 Set ekxem panch vorsancho astana, tannem Enoshak zolm dilo,
7 magir aninkui atthxim sat vorsam to jielo. Taka aninkui put-dhuvô zolmoleô
8 ani nnovxim bara vorsanchê piraier to melo.
9 Enokak tacho put Kenan zolmolo tedna taka nnovod vorsam aslim,
10 uprant to aninkui atthxim pondra vorsam jielo. Taka aninkui put-dhuvô zolmoleô
11 ani nnovxim panch vorsanchê piraier to melo.
12 Kenan sot’tor vorsancho zalo tedna taka Mahalalel zolmolo,
13 uprant aninkui atthxim challis vorsam to jielo. Taka aninkui put-dhuvô zolmoleô
14 ani nnovxim dha vorsanchê piraier to melo.
15 Mahalalel pansotth (65) vorsancho zatôch, taka Jared zolmolo,
16 uprant to aninkui attxim tis vorsam jielo. Taka aninkui put-dhuvô zolmoleô
17 ani atthxim ponchannoi (895) vorsanchê piraier to melo.
18 Jared ekxem basôtth (162) vorsan-cho zalo tedna, taka Enok zolmolo
19 uprant to aninkui atthxim vorsam jielo. Taka aninkui put-dhuvô zolmoleô
20 ani nnovxim basôtth (962) vorsan-chê piraier to melo.
21 Enok pansôtth (65) vorsancho astana, tacho put Methusala zolmolo.
22 Uprant aninkui tin’xim vorsam to Deva mukhar jielo ani taka aninkui put-dhuvô zolmoleô.
23 Sogllem aplem tin’xim pansotth (365) vorsanchem jivit
24 tannem Devachea sangata sarlem, ani uprant to nanch zalo, kiteak Devan taka vhelo.
25 Methusala ekxem soteainxim (187) vorsancho zatôch, taka Lamek zolmolo,
26 uprant to aninkui satxim beainxim (782) vorsam jielo. Taka aninkui put-duvô zolmoleô
27 ani nnovxim ekunn sot’tor (969) vorsanchê piraier to melo.
28 Lamek ekxem beainxim (182) vorsan-cho zatôch, taka êk put zolmolo
29 ani tannem mhollem: ‘Sorvesporan jê zom-nir aplo xirap ghala, tech zomnir thaun ho bhurgo, amchea koxtt-vavra modem, amkam xanti-visôv haddtolo’; tea pasot taka Noah hem nanv dilem.
30 Lamek uprant aninkui painxim poncheannoi (595) vorsam jielo. Taka aninkui put-dhuvô zolmoleô
31 ani satxim soteat’tor (777) vorsanchê piraier to melo.
32 Noah painxim vorsancho zalo; ani Noahn Shem’, Ham’ ani Jafet hankam zolm dilo.
Utpoti Chapter 6
1 Atam prithvecher monis choddot- vaddot ravle, ani tankam dhuvô zaleô;
2 Devachea putamnim mon’-xancheô dhuvô sobit-sundor asat teô polleleô ani tankam avoddleô ani tanchê lagim te logn zale.
3 Tedna Sorvesporan mhollem: ‘Hanv atam mon’xak lamb auk diunchona; te eka disa morunk zai tem khorem. Hea fuddem, monis ekxem vis vorsam voir jieunchona.’
4 Tea kallar, zoxem magir-ui sonvsarant Nefilim’ asle, he chaltea ostoream ani purvilea ut’tom ani nanv’vostea mon’xanchi sonsôt zaun asat.
5 Prithumer mon’xachem khotteponn chodd vaddlam mhonn ani dis-rat tachea monant vaittoveô ievzonneô golltat mhonn Sorvesporan pollelem.
6 Apnnem mon’xak rochlo mhonn Sorvespor dukhi zalo ani tachem kalliz khontovlem.
7 Ani Sorvesporan mho-llem: ‘Hanvem rochla tea mon’xak hê prithumêvelo nanch kortolom; toxench zonavorank, zomnivelea jivanneank ani ontrallavelea suknneank, hankam-i nopoit kortolom. Tankam-i rochlim mhonn Mhaka dukh bhogta.’
8 Punn Noah Sorvesporak man’lolo.
9 Hi Noahchi kotha: Tea kallar Noah ekloch promannik, aplea kallachê pinddkê modem to chuki vinnem, Deva sangata jietalo;
10 Noah tegam putancho bapui aslo: Shem, Ham’, ani Jafet.
11 Prithumecher broxtta-char chol’la ani soglleak ot’teachar posorla, hem Devan pollelem.
12 Prithumever sogllo lôk khotteponn adarta tem polleun;
13 Devan Noahk mhollem, ‘Mon’xakullacho nas-korunk hanvem ievjilam. Tanchê vikottaiek-dharunnaiek lagon hanv tancho bhosm kortolom.
14 Tea pasot, gofer lankdda-chem ek tarum bandun kadd; tantunt bhitôr sobar kudd kôr, ani bhailean-bhitorlean dhamôr-dik taka lai.
15 Tin’-xim hat lamb, pon’nas hat rund, ani tis hat unch tem tarum zaum-di.
16 Voir taka pattos ghal, ani pattosa ani kuxim modem êk hat uktem dovor. Taka tin malle ghal ani kuxik dar asum-di.
17 Prithumever buddti dhaddun sorv jiv marun uddoitam. Soglle morun vetole,
18 punn tujêkodde êk koblat kortam. Tum ani tuji potin, tuje put ani tancheô potini hea tarvant bhitôr rigat.
19 Sogllea prannianche protek zatintlem ekek zoddem oxe do-don pranni tujea sangatak jivont urpak tarvant gheun io.
20 Sovnneanche protek zatintlem, zonavoranchê protek za-tintlem ani zom’nicher sorpott’tolea pranneanche dôr-êk zatintlem ek-ek zoddem, tankam jivont dovorchê pasot, tum gheun ietolo.
21 Khaunk zata toslem sogllê torechem jevonn haddun ektthaim korun dovor. Tem tujem ani tanchem jevonn-khann zatolem.’
22 Noahn toxem kelem. Sorvesporan taka jem kitem formailolem tem tannem sarkench pall’lem.
Utpoti Chapter 7
1 Tedna Sorvesporan Noahk mhollem: ‘Tujea kuttumbak gheun tarvant bhitôr sor, kiteak hê pinndkê modem Mhojea dolleam mukhar tum promannik mhonn Hanv zannom.
2 Sog-llea nitoll mon’zatintleô, dadlea ani strizaticheô, sat zoddiô ghe; mhellea mon’zatintleô, dadlea ani strizaticheô, don zoddiô;
3 ani ontrallavelea suk-nneantleô, dadlea ani strizaticheô, sat zoddiô; hê porim tanchi zat ak’khê prithumer nopoit zaunchi na.
4 Sat disam bhitôr challis dis ani challis rati Hanv paus ghaltolom ani prithumer Hanvem rochleant tea sogllea jivea pranniank nanch kortolom.’
5 Sorvesporachea utra pormannem Noahn sogllem kelem.
6 Prithumer Devan buddti dhaddli tedna Noahk soixim vorsam aslim.
7 Buddtechem udok vattavpak Noah aplea putank, potinik ani sunank gheun tarvant gelo.
8 Ani xud’dh ani oxud’dh zonavoram ani sovnnim ani zom’nicher sorpottun bhonvtole soglle pranni, hantuntle
9 nôr ani madi hê porim zoddiê-zoddien, Sorvesporan Noahk formailolem tea pormannem, tarvant Noah fuddeant gele.
10 Sat disam uprant buddtechea udkan prithum’ bhòrli.
11 Dusrea mhoineachea sotravea disa, Noahk soi’xim vorsam aslim tedna, somdiracheô soglleô zhori futtleô ani ontrollachim zonelam ugoddlim
12 Cha-llis dis ani challis rati, prithumer pavsache ghosgoxe votle.
13 Teach disa Noah ani tachi potin, tache teg put, Shem’, Ham’, ani Jafet ani hancheô potinim, tarvant bhitôr sorlim.
14 Ani tanchea sangata êk-êk zatiche soglle ranott prannim, protek zatichim ghoravi zonavoram, protek zatichim zom’nir sorpottun bhonvpi jivannim ani dôr êk zatiche uddpi prannim ani sorv zatinchim suknnim-sovnnim tarvant gelim.
15 Dhonian formailolem toxem, zhoddiê-zhoddien sorv torecho jiv, Noah sangatim bhitôr sorlo.
16 Devan Noahk adnia kel’li tea pormannem, mas ani jiv-prann aslolea pranneantlim ek-ek, nôr ani madi tarvant gelim. Tedna Sorvesporan tachem dar bond kelem.
17 Challis disanchea pavsan udok itlem choddlem, ki tem tarum udkacher ufetalem.
18 Ani udok disan’dis choddot-choddot gelem titlench tem tarum voir-voir sorlem.
19 Xekim, udok itlem choddlem, ki,
20 unchantlea unch dongram poros tem sumar pondra hat voir sorlem.
21 Tedna prithvecher halchal korpi soglle prannim mhonnche sovnnim, gorvam, ranantleô mon’zati, zom’nicher sorpottun bhonvpi sogllim jivannim ani soglle monis morun gele.
22 Zanchea nakam puddamnim jivita-cho svas aslo te soglle pranni sukê zom’nivoile morun gele.
23 Prithvecher aslolea mon’xancho ani zonavorancho, sorpotti jivanneancho ani ontrallantlea suknneancho sogllea jivea prannian-cho tannem nas kelo. Fokot Noah ani tachê borabor tarvant aslim titlim mat vanchun urlim.
24 Ani udok deddxem dis legun santthun urlem.
Utpoti Chapter 8
1 Sorvespor Noahk ani tachea sangata tea tarvant asloleank visrunk na; tôr tannem zonnzonnit varem dhaddlem ani udok denvunk laglem.
2 Ani khol somdirache zhore ani ontrallachim zonelam dhamplim ani hê vorvim pavs zhoddtalo to thamblo.
3 Pavs somplo, ani deddxem disam modem udok ilem-ilem denvun gelem.
4 Satvea mhoineachea sotravea disa, xekim, tem tarum Araratachea dongra-cher tharlem.
5 Udok denvot ravlem, ani dhavea mhoineachea poilea disa, dongrachim mathim disunk laglim.
6 Noahn tarvak ek zonel kelem; challis dis somptôch, tannem tem zonel ugôddlem
7 ani eka kavlleak sôddlo; to prithumêvelem udok suko porian hanga-thoim uddot ravlo.
8 Uprant prithumê-velem udok denvlam zalear polleunk, tannem eka parveak sôddlo;
9 punn khoinch aplo pãi dovrunk mellona zaun, to parvo portolo, kiteak ak’khê prithu-mer ozun udok aslem. Magir tannem tea parveak aplo hat bhair ghalun dhôrlo ani tarvant apnna-xim haddlo.
10 Magir, anink sat dis ravlea uprant, tannem anink ekdam tea parveak sôddlo.
11 Sanjê-vellar ho parvo portun ailo ani tonchint dhôrun ajetinachi êk jivi talli haddlli; mhonnttôch prithumevelem udok denvlam mhonn Noahk koll’lem.
12 Tori anink sat dis to ravlo; uprant, Noahn anink êk pavtt tea parveak sôddlo; hê pavtti to parvo anink portun ailoch na.
13 Hê porim Noahchea soixim-ek vorsachea, poilea mhoineant, poilê tarker, prithumê velem udok sarkem sukun gelem; ani Noahn tarvachem dhampnnem ugddun bhair polletôch, prithumechi zomin sarki sukloli taka dixtti poddli.
14 Dusrea mhoineachea sot’tavisavea disa, zomin purai sukloli.
15 Sorvesporan Noahk mhollem,
16 ‘Atam bhair sorat, tum ani tuji potin, tuje put ani tancheô potini.
17 ‘Tujê borabor asat tea sogllea sovnneank, zonavorank, zom’nicher sorpottun bhonvpi jivanneank ani mas aslolea sogllea pranneank bhair kadd; hê vorvim prithvecher tancho upoz zaum ani tim choddum ani vaddum.’
18 Tedna Noah aplea putank, potinik ani sunank gheun bhair sorlo.
19 Dôr ek zonavor, sorpottun bhonvpi protek prannim, ek-ek sovnnem ani prithvecher halchal korpi soglle jiv, tê tê zati pormannem, tarvantle bhair sorle.
20 Tedna Noahn Sorvesporak êk vedi bandli ani nitoll mon’zatintleô thoddeô mon’zati ani nitoll suknneantlim thoddim suknnim gheun vedicher hom’ bhettoile.
21 Sorvesporan tancho xitôll-svadik pormôll ghetlo. Tannem Apnna bhitôr mhollem: ‘Mon’xak lagun prithumecher Hanv anink kednanch xirap ghalcho na, kiteak tornneponnar thaun tachea kallzant vankddeô vondovnniô upzotat; mhonnttôch atam Hanvem kelam toxem, hea fuddem Mhojeô rochnna Hanv anink kednanch nopoit korcho na.
22 Prithum’ togo porian: rompnni ani lunvnni, thonddi ani gormi, unalle ani hinvalle, dis ani rat, kednanch na zaunchim nant.
Utpoti Chapter 9
1 Noahcher ani tachea bhur- geancher axirvad ghalun Devan tankammhollem: ‘Sufollzaiat ani va-ddon vochat ani prithum’ bhôrat.
2 Sog-llea ran’votti mon’zatink ani ontralla-velea sogllea suknneank, zomnicher sorpottun choltolea sorv jivanneank ani doriantlê sogllê masllek tumchem bhem ani bhirant asum; hea soglleank tumchê adhin keleant.
3 Bhaji-panam borabor zomnir bhonvtole soglle prannim tum-chem khann-jevonn zatole; hem sogllem Hanv tumkam ditam.
4 Fokot jiv aslo-lem, mhonngê rogot aslolem mas tumi khaum noiê,
5 kiteak tumchea rogta-cho, toxench jivacho, ixôb Hanv kho-rench ghetolom; dôr-eka zonavoracho, toxench mon’xacho Hanv hixôb ghetolom;
6 toxench zo aplea bhavacho jiv kaddta tea mon’xacho Hanv-ui jiv kaddtolom.Zo mon’xachem rogot varoita, tachem-i rogot monis varoitolo; kiteak Aplea sarkeacho, Devan mon’xak rochla.
7 Mhonnttôch tumi choddat, ani vaddon vochat, ani prithum’ bhôrat ani ticher dhoniponn choloiat.’
8 Noah ani tachea putam kodde Dev novean uloilo:
9 ‘Polleiat, tumchê kodde ani tumchê pattlean ietolê tumchê sonsti kodde Hanv korar kortam;
10 to-xench tumchê borabor asat tea jivea pranniam kodde, mhonngê suknnim, gorvam ani sogllim prithumêvelim zonavoram asat tanchê kodde korar kortam; ekach utran, tarvantlim bhair sorleant titleam-i kodde.
11 Mhonn-ttôch Hanv tumchê kodde korar kortam to ho: buddti dhaddun Hanv anink kednanch pranni rochnnecho bhosm korcho na; itlench nhoi, prithumechem nisontton korcheak Hanv anink buddti dhaddcho na.’
12 Devan anink-ui mhollem: ‘Mhojê ani tumchê modem ani tumchê borabor jietat tea sogllea pranniam modem pinddkechê pinddkek Hanv korar kortam
13 tachi khunna hi: kupamnim Mhojem ddondduball ghaltam ani Mhojê ani prithumê modem tem korarachi êk khunna zatolem.’
14 Jedna prithumê-voir Hanv kupam zomoitolom ani kupamnim ddonddubal dixtti poddto-lem,
15 tedna zo Mhojê ani tumchê ani sogllê torechê dôr-êkê jivê rochnnê modem korar kel’lo asa, tacho Hanv ugddas kortolom. Ani oxi anink kodinch udkachi buddti aschina, ani sogllim jivim rochnnam nattak zaunchim nant.
16 ‘Kupancher ddondduball dixtti poddtôch Mhojê modem ani prithumê voilea sogllea jiv-pranniam modem zal’lea, sodankal urpi koraracho ugddas Mhaka zatlo.’
17 Magir Devan Noahk mhollem: ‘Mhojê modem ani prithumê voilea sorv pranniam modem zo korar hanvem korun dovorla tachi hi khunna asa.’
18 Tarvantle bhair sorle te Noahche put he: Shem’, Ham’, ani Jafet. Ham’ ho Kanaancho bapui.
19 He Noahche teg put, ani tanchê vorvim soglli prithvi lokan bhôrli.
20 Noah xet-molle kamais kortalo, ani soglleam-poilo dakam-mollo tannem lailolo.
21 Êk dis, dakancho rôs pielea uprant taka to laglo, ani hea nadar vingllo aplim vostram kaddun to aplea tombunt add poddlo.
22 Haman hi aplea bapaichi gôt polleun, to gelo ani heram bhavank sanglem.
23 Hem aikun, ani aplea bapaichem vinglleponn pollena zauncheak, Shem’ ani Jafet hannim dogaimnim ek vostr ghetlem ani aplea bhuzancher patthlean lamboun, portea paiamnim cholun tombunt bhitôr sorle ani aplea bapaik pangurlo.
24 Soro nivllun sud’dhir ailea uprant aplea dhakttea putan kitem kelem tem Noahk koll’lem.
25 Tannem mhollem: ‘Kanaanacher xirap poddum, to aplea bhavancho chakrancho chakôr zatolo’
26 Ani mhollem: ‘Shemacho Sorvespor Dev sudoiv zaum, Kanaan tacho chakôr zaum.
27 Dev Jafetacho vistar korum, To Shemachea tombumnim ravum, ani Kanaan tacho, Chakor zaum.’
28 Noah sonvsar-buddttê uprant tin’xim-pon’nas vorsam jielo.
29 Noah nnovxim-pon’nas vorsam jielo ani uprant to somplo.
Utpoti Chapter 10
1 Shem’, Ham’, ani Jafet he Noahche put. Hankam buddtê uprant bhurgim zolmolim.
2 Jafetache put he: Gomer, Magog, Medes, Javan, Tubal, Meshek, ani Tiras;
3 Gomerache put Ashkenaz, Rifat, ani Togarma.
4 Javanacho put Elisha, Tarshish, Kit’tim’ ani Dadanim’
5 zun-veamnim ravtolea lokanche te purvoz zaun asat.He Jafetache put vegllea-veglleakullam, ganvam, ani bhas-uloitolea lokanchi ekuch sonsôt.
6 Hamache put he: Kush, Ejipt, Put ani Kanaan.
7 Kushache put he: Seba, Havila, Sabta, Raama, ani Sabteka. Ramache put he: Sheba ani Dedana.
8 Kushak Nimrod nanvacho êk put aslo, ani ho poilo sonvsarantlo nanv-vosto ganv-jikhnnar zalo.
9 Sorvesporachea adaran to êk motto xikari zaunk pavlo, hea khatir lôk aiz legun oxem mhonntta, ‘Sorvespor tuka, Nimroda porim, êk motto xikari korum!’
10 Survatek tachi rajvôttki Babel, Erek, ani Akad him tinui Shinar desant aslim.
11 Hea desant thaun Asshur ailem ani Nineveh, Rehobot-Ir, Kala, ani Resen him xaram ubharlim.
12 Nineveh ani Kala hanchê modem Resen urta.
13 Ejipta thaun hi sonsôt upzoli: Lud, Anam’, Lehab, Naftuh,
14 Pathrus, Kaslu, ani Kapthor hanche Filistevkar upzole.
15 Kanaancho malgoddo put ho: Sidon ani tachê uprant Het.
16 Têch porim, Jebuzit, Amorit, Girgashit,
17 Hivit, Arkit, Sinit,
18 Arvadit, Zemarit, ani Hamathit hancho soglleancho Kanaan purvôz zaun asa. Kanaanchim vegllim-vegllim kullam zollim-mollim ximpoddlim,
19 ani xekim, Sidon thaun Gaza-xim Gerar porian pavlim, Sodom’, Gomorra, Adma ani Zeboiim, Lesha-xim porian pavlim.
20 Hi soglli Hamachi sonsôt zaun asa, vegllea-vegllea kullamnim, desamnim, raxttramnim, ani uloilolê-bhaxent ximpoddlolim.
21 Shemache put asle, Shem’, Jafetacho vhoddlo bhav, sorv Hebrev-porzancho bapui zaun asa.
22 Shemache put he: Elam, Ashur, Arpakshad, Lud, ani Aram’.
23 Arama-che put he: Uz, Hul, Gether, ani Mesh.
24 Arpakshad Shelacho bapui, ani Shela Eberacho bapui.
25 Eberak dog put asle: poilo Peleg, hachea kallar sonvsarantlo lôk fanttlo; ani tachea bhavak Joktan mhonnttale.
26 Joftanache put he: Al-modad, Shelef, Hazarmavet, Jera,
27 Ha-doram’, Uzal, Diklash,
28 Obal, Abi-mael, Sheba,
29 Ofir, Havila, ani Jobab.
30 Tancho dês Mesha thaun Sefar po-rian pavlolo, udentechea dongram-xim.
31 He soglle Shemache put, vegllea-vegllea desam ani raxttram uloilolê-bhaxê pormannem ximpoddloli.
32 Ani ho sogllo lôk Noahchi sonsôt zaun asa: Veglle-vegllea purvozam khal veglli-veglli desh-porza. Tanchê vorvim buddtê uprant, dusrea raxttramnim prithumecher orombh ghetlo.
Utpoti Chapter 11
1 Ak’khê prithumer êkuch bhas ani thoddinch utram aslim.
2 Udentê thaun to lôk bhair sorun Shi-nar ganvant pavlo tedna, tankam ek moidan mell’llem ani thoim tãnnim ap-lem tthikann kelem.
3 Tãnnim ekamekak mhollem: ‘Ieiat, ami vitt korun te ujeant bhazum-ia.’ To lôk fator vaporchê svater vitt vaportalo ani chuneachê bodlek damôr.
4 Tãnnim mhollem: ‘Ieiat, amkam ek xar ani sorgak tenkta titlo unch êk minar bandum-ia. Ami hê prithumer ximpoddchê adim amkam vhodd nanv zôddun dovrum-ia.’
5 Mon’xacheô put-dhuvô ek xar ani êk minar bandtaleô tem polleunk Sorves-por denvun ailo
6 ani Tannem mhollem: ‘Hi êkuch porza ani ti êkuch bhas uloita ani tim fuddarak kitem-kat korchim asat tachi hi survat; tim atam korunk sôdtat titlem-i tankam avghodd lag-chem na,
7 tim ekamekachem somzona zaunk ami sokol vochum-ia ani thoim tanchê bhaxecho gondhôll korum-ia.’
8 Mhonnttôch Sorvesporan ak’khê prithumê voir tankam ximpddailim ani xar bandpachem kam’ tãnnim bond dovorlem.
9 Tea pasot Babel mhonn tea xarak nanv poddlem, kiteak thoim Sorvesporan ak’khê prithumechê bhaxecho gondhôll kelo; thoim thaun Sorvesporan tankam ak’khê prithumê voir ximpddailim.
10 Hi Shemachi sonsôt: Don vorsam buddtê uprant, Shem’ xembor vorsan-chê piraiecho aslo tedna, tacho put Arpakshad zolmolo.
11 Magir anink painxim vorsam to jielo, ani aninkui bhurgim taka zolmolim.
12 Postis vorsanchê piraier, Arpaksha-dak tacho put Shela zolmolo;
13 uprant aninkui charxim tin vorsam to jielo, ani aninkui bhurgim taka zolmolim.
14 Shela tis vorsancho aslo tedna, tacho put Eber zolmolo;
15 uprant, anink charxim tin vorsam to jielo, ani aninkui bhurgim taka zolmolim.
16 Eber chovtis vorsancho astana, tacho put Peleg zolmolo;
17 uprant, anink charxim tis vorsam to jielo, ani anikui bhurgim taka zolmolim.
18 Tis vorsanchê piraier, Pelegak tacho put Reu zolmolo;
19 uprant, anink don’xim nnov vorsam to jielo, ani anikui bhurgim taka zolmolim.
20 Reu bot’tis vorsancho astana, tacho put Sarug zolmolo;
21 uprant, anink don’xim sat vorsam to jielo, ani anikui bhurgim taka zolmolim.
22 Serugak tis vorsanchê piraier tacho put Nahor zolmolo;
23 uprant, anink don’xim vorsam to jielo, ani anikui bhurgim taka zolmolim.
24 Nahorak ek’unntis vorsam aslim tedna, tacho put Tera zolmolo;
25 up-rant, anink ekxem ekunnis vorsam to jielo, ani anikui bhurgim taka zolmolim.
26 Tera sot’tôr vorsancho astana, to Abram, Nahor, ani Haran hancho bapui zalo.
27 Terachi sonsôt hi: Abram’, Nahor, ani Haran hancho to bapui. Haran Lotacho bapui.
28 Ani Haran aplea ganv-desant, Babiloniechea Ur xarant melo, tacho bapui ozunui jivo aslo.
29 Abram’ Sarai-kodde kazar zalo, ani Nahor Milka-kodde, hi Haranaichi dhuv; Iska ho-i Haranacho put.
30 Sarai avoi zait-xi nasli.
31 Teran aplea putak Abramak, natvak Lotak Haranachea putak, Saraik aplê sunek ani Abramachê potinik, apnna borabor gheun, Babiloniechem Ur xar sôddlem ani to Kanaan ganvant gelo. Tim gelim, ani Haran xarant tãnnim thikann kelem.
32 Thoim, don’xim panch vorsanchê piraier Tera melo.
Utpoti Chapter 12
1 Tea disamnim Sorvesporan Abra-mak mhollem: ‘Tuzo dês, tuzo ghorabo ani tujea bapaichem ghor-dar sôdd, ani Hanv tuka dakhoitolom tea desant voch.
2 Hanv tujê thaun êk vhôdd porza upzoitolom, tujer Hanv axirvad ghaltolom, ani tujem nanv itlem xrextt kortolom, ki axirvad ghalpak lôk tem nanv vapurtolo.
3 Tujer axirvad ghaltat, tancher Hanv-ui axirvad ghaltolom; tujer xirap ghaltattancher Hanv-ui xirap ghaltolom; prithumêvelim sogllim kullam, tujem nanv gheun, apnnancher axirvad magtolim.’
4 Sorvesporachea utrak pallo diun, Abram’ bhair sorlo ani Lot-ui tachê borabor gelo. Abram’ Haran ganvantlo bhair sorlo tedna, taka ponchat’tôr (75) vorsam aslim.
5 Abram’ Sarak, aplê bailek, toxench Lotak, aplea bhacheak, ani Haranant soglli girestkai ani porza zomoiloli titli-i gheun Kanaan’chê vattek laglo ani thoim pavlo.
6 Shekemchea povitr zagear porian, mhonngê Morechea xindur rukha porian, tim bhonvlim. Tea kallar tea gan-vant Kanaan’kar lôk ravtalo.
7 Abramak dixtti poddon Sorvesporan mhollem: ‘Ho dês Hanv tujê sonstik ditolom.’ Ani apnnak dixtti poddlolo tea Sorvespo-rachea manak Abraman êk vedi bandli.
8 Thoim thaun Betelchê udentik aslolê dongri talukê porian to gelo ani thoim tannem aplo tombu tannlo. Hea tom-buchê ostomtek Betel aslo ani udentik Ai. Thoim tannem Sorvesporak êk vedi bandli ani Sorvesporachem Nanv gheun Taka ulo marlo.
9 Thoim thaun provas korit-korit Abram’ Negeb porian pavlo.
10 Punn thoim vhôdd buk-dukôll podd-lo, ani Abram’ Kanaanchea dokhinnê-vatten fuddem-fuddem sorun xekim to Ejiptant pavlo, ani thoddo kall thoim jielo.
11 Ejiptachê ximer pavchea adim tannem Sarak aplê potinik mhollem, ‘Tum êk sobit ostori.
12 Ejiptantlo lôk, tuka polleun, mhoji potin mhonn sumar kortole, ani hea pasot mhozo jiv kadd-tole.
13 Tum mhoji bhoinn oxem tankam sang; hê porim, mhaka sôddun, te tuka borem dekhtole.’
14 Thoim bhitôr soro-na fuddem, Ejiptantlea lokan Sarachi sobitai dekhli.
15 Ani kãi rajmhalantlea opxalamnim tichi khobor Faraohk sangli; ani xekim tika Faraohchea rajmhalant vheli.
16 Ani tika lagon, Faraohn Abra-mak borean lekhlo ani menddram-bokddeanche, gai-boilanche, gaddvam-unttanche hindd taka dile, ani zaite chakor tachea tabeant kele.
17 Punn Faraohn Sarak apli potin korunk vhel’li dekhun, Sorvesporan Faraohk, tachea ani rajmhalantlea lokak piddê-vaittachi borich khast laili.
18 Hem vollkhun, Faraohn Abramak apoun vhelo, ani mho-llem, ‘Kiteak mhonn mhojê sovem oxem keleim? Tuji potin mhonn mhaka kiteak sanglem naim?
19 Tika mhoji potin hanvem kori-xem, ti tuji bhoinn mhonn kiteak mholleim? Atam tujê potinik ghe ani hangasorlo matso koddsor!’
20 Pat-xaian aplea mon’xank hukum’ dilo, ani tãnnim Abramak, tachê potinik, ani tachem tem sogllem taka diun, tachê vatter ghalo.
Utpoti Chapter 13
1 Ejiptantlo bhair sorun, aplê potinik, ani aslem-naslem titlem-i gheun, Abram’ ut’torechê vatten, mhonngê, Kanaanchê dokhi-nnê-vatten gelo; tachê borabor Lot-ui aslo.
2 Abram’ bhov grest aslo; tachê kodde aslim khub gorvam, rupem ani bhangar.
3 Zagear thaun zagear aplem thikann bodlit aslo, hê porim to adlea thikannak, mhonngê, Bethel ani Ai hea xaram modem gelo.
4 Hanga tannem adim vedi bandlolich asli; tacher Sorvesporak nomoskar kelo.
5 Abrama sangatim Lot bhonvtalo. Tachim-i khub menddram aslim, gorvam ani tombu.
6 Dogank-ui ektthaim jieunk to ganv pavonaslo, kiteak tanchi girest-kai vaddloli ani oxem dog-ui borabor ravunk tankam avgodd zatalem.
7 Abra-machea ani Lotachea rakhnneam modem zhogddim pettunk laglim (tea bhair tea kallar Kanaan’kar lôk ani Peruzit lôk tea ganvant ravtale).
8 Hea khatir Abraman Lotak sanglem: ‘Polle, tujê ani mhojê modem, toxench tujea rakh-nneam ani mhojea rakhnneam modem, tontto ascho nhoi, kiteak ami bhav-bhav.
9 Sogllo ganv tujê mukhar mekllo na? Tum mhojê sorxilo kuxin sor; tum davê vatten vexi zalear hanv uzvê vatten vetolom, ani tum uzvê vatten vexi zalear hanv davê vatten vetolom.’
10 Tedna Lotan apli dixtt marun Jordanachê bhonvtonnchi soglli zomin polleli; ti soglli udkan borich ximploli asli. Sorvesporan Sodom’ ani Gomorra hanchem nisontton korchê adim, ti soglli Zoar porian Sorvesporachê bagê porim vô Ejiptachea desa sarki asli.
11 Mhonn-ttôch Lot Jordanachê bhonvtonnchim sogllim xetam-moidanam apnnak vinchun-kaddun udenti vatten gelo. Oxem tãnnim ekamekacho nirôp ghetlo.
12 Abraman Kanaanant vosti keli; Lotan tea falkeachea xaramnim vosti keli ani Sodoma porian aple tombu tannle.
13 Sodomacho lôk ekdom’ khotto aslo ani Sorvesporacher bhov vhodd oprad kori.
14 Lot Abrama sorxilo kuxin sortôch, Sorvesporan Abramak mhollem: ‘Tuje dolle ubarun tum asai thoim thaun ut’torik ani dokhinnek, ostomtek toxem udentik polle.
15 Tuka dixtti poddta to ak’kho dês Hanv tuka ani tujê sonstik sasnnak ditolom.
16 Zomnichê matie-chea konniam bhaxen Hanv tuji sonsôt vaddoitolom; konnachean zomnichê matiecheô konniô mezunk zait tôr, tuji sonsôt tachean mezunk zatolem.
17 Utth, hea desachi lambi ani rundi bhonvun polle, kiteak to Hanv tuka ditolom.’
18 Tôr Abraman aple tombu ubarun Hebronant aslolea Mamrecha xindur rukha-xim pennem kelem ani thoim tannem Sorvesporak êk vedi bandli.
Utpoti Chapter 14
1 Chovg patxai, Babiloniecho Amrafel, Ellasaracho Ariok, Elamacho Kedorlaomer, ani Goiimacho Tidal,
2 panch patxaiam add zhuzak gele. Te he: Sodomacho Bera, Gomorra-cho Birsha, Admacho Shinab, Zeboiim-cho Shebemer, ani Balacho (vô Zoara-cho) patxai.
3 Hea panchui zonnamnim vangdda ravun, Siddimchea Gholant aplim loskoram punzailim hea gholak atam Mel’lo Doria mhonnttat.
4 Bara vorsam Kedorlaomerak raji zaun te chol’-le, punn teravea vorsa te tacher kolpole.
5 Chovdavea vorsa, Kedorlaomer ani tache pokx aplim loskoram ghevun aile ani zoit vhelem, hê porim: Refaimacher Ashterot-Karnaim’ ganvant, Zuzimacher Ham’ ganvant, Emimacher Kiriathaim moidanaver,
6 ani Horitesacher Edo-machea dongram modem; ani te Elparan pavo-sor ani oronneant tankam dhanv-ddai pasun tanchi patth sôddlina.
7 Ma-gir te Kadesh porot aile (tea kallar Enimisfat mhunnot) ani Hazazon - Tamararit aslolea Amalekit ani Amorit porzanche ganv tãnnim jikhun ghetle.
8 Uprant, Sodom’, Gomorra, Adma, Ze-boiim, ani Bela hangachea patxaiamnim apleô fouji Siddimachea Gholant ektthaim keleô ani
9 Elam, Goiim, Babi-lonia, ani Ellasar hangachea patxaiam add zhuzle panch zonn chovgam add.
10 Hea gholant, veta thoim, dhambra-che ondde asle; ani Sodom ani Gomo-rrache patxai pollapôll kaddunk sôdtale tedna tea onddeamnim poddle, bakiche teg dongrancher dhanvle.
11 Tea chov-gamnim Sodom ani Gomorrantlem sogllem, jevonn-khann legun luttun vhelem.
12 Tôr, Lot Abramacho bhacho Sodomant aslo, haka-i tãnnim koidi kelo ani sogott tachem luttlem.
13 Punn konn-eklo thoincho suttun gelo, ani soglli khobor Abramak sangli. Ho zori-i êk Hebrev (Hebronacho), ani Mamre ani tache bhav Eskol ani Aner (soglle Amorit) tori-i tãnnim ekuch pokx ghoddlolo.
14 Aplea bhacheak koidi kela mhunn Abramak gomtôch, tannem rokddoch aplea pokxak ulo marlo, ani mahalant asle title-i zhuzari, soglle mhunnon tin’xim otthra (318), sottasott ekttovle, ani Dan porian vochun tea chovgam Faraohnchi patth ghetli.
15 Hanga, aplea mon’xank zo-meam-zomeamnim ektthaim kele, ani ratichea bharar aplea dusmanank dhadd ghali. Tanche virudh zoit vhelem, ani Damask xarachê ut’torek pavo-sor, Hobah mhunnttat thoim, tankam borech dhopttile,
16 ani luttun vhel’lem titlem-i kaddun ghetlem. Ani Lotak ani tachem kitem aslem titlem-i, sogllea stri-lokak ani heram koideank portun haddle.
17 Abram’ Kedorlaomer ani heram patxaiam virudh zoit jikhun ailo tedna, Sodomacho patxai taka Shavechea Gho-lant (Patxaiacho Ghol oxem-i mhonnttat) ievkar diunk gelo.
18 Tea disamnim Melkizedekan, Salemachea razan, unddo ani soro haddlo; to Bhov Vortea Deva-cho iadnik aslo.
19 Tannem axirvad ghalun oxem mhollem: ‘Bhov Vorto Dev, sorga ani prithumecho Rochnnar, Abramacher axirvad ghalum.
20 Ani tujea dusmanank tujê adhin kele dekhun Bhov Vortea Devak vakhann’-nni!’ Ani Abrahaman aplê dhon-girest-kaiecho dhavo vantto taka dilo.
21 Sodomachea Faraohn Abramak mhollem, ‘Luttun vhel’lo mhal sogllo tukach dovor, punn mhojê porjek mhojea tabeant kôr.’
22 Abraman taka zobab dilo, ‘Bhou Vortea Deva, sorga ani sonvsarachea Rochnnara mukhar tuka khoreponnim sangtam,
23 Jem tujem tantlem kãich, ek sut nhoi ani vhannan-chi êk vadi legun mhaka naka. Hea pormannem tujean kedinch mhunnunk zaunchem na, Mhaka lagon Abram’ girest zala.
24 Tujê koddchem hanv kãinch gheunchona, bogor mhojea mon’xank lagu zata titlench. Punn mhojea vangdda asloleank, Aner, Eskol, ani Mamre hankam soglleank tancho vantto favo zaum.’
Utpoti Chapter 15
1 Oxem ghòddlem: eka dorxonant Sorvesporachem utor Abramak kollit zalem:‘Abrama, bhieum naka, Hanv tuzo ddhal; tuka vhoddlem inam’ melltolem.’
2 Abraman zobab dilo: ‘Mhojea Deva, Tum mhaka kitem diunk sôdtai? Mhaka bhurgem-ball kãi na, mhojea ghora-daracho daiji Damaskacho Eliezer zatlo, tôr tum mhaka kitem ditlo?’
3 Uprant Abraman mhollem: ‘Polle, Tunvem mhaka kãich sonsôt diunk naim, mhojea ghoranneantlo êk sevôk mhozo daiji zatolo.’
4 tedna Sorvesporachem utor oxem tachea kanar sadlem: ‘To tuzo daiji zauncho na, punn tujeach rogta-masacho zolmotolo to tuzo daiji zatolo.’
5 Uprant Sorvesporan Abramak bhair vhelo ani mhollem: ‘Voir sorgak dolle mar ani tujê lagim ghòddta zalear tim sogllim noketram mêz.’ Tea fuddem uloun mhollem: ‘Hêch porim tuji sonsôt zatoli.’
6 Abraman Sorvesporacher visvas tthevlo ani dekhun Sorves-poran taka promannik kelo.
7 Tannem sanglem: ‘Hanv To Sorves-por, hea desacho daiji tuka korunk Kaldeiantlea Ur Nograntlo tuka bhair kaddla To.’
8 Abraman portipall kelo: ‘Mhojea Sorvespora Deva, hem mhojem daiz zatolem mhonn mhaka koxem kolltolem?’
9 Sorvesporan taka sanglem: ‘Tin vorsanchem ek chitall, tin vorsan-chi êk bokddi, tin vorsancho êk menddro, êk kovddo ani êk lhan parvo tum Mhaka haddun di.’
10 Hem sogllem tannem haddlem ani ordan-ord korun tankam katorlim ani don-ui ordam ekamekachea fuddeant dovorlim; punn suknneanchim mat ordam kelim nant.
11 Tedna tea melolea zonavoranchem mas khaunk tancher gid denvun aile, punn Abraman tankam dhanvddaile.
12 Atam dis dharir poddtam-poddtam, Abramak borich jem’ poddli ani rat mathear pavli dekhun to bharim akantlo.
13 Sorvesporan taka mhollem, ‘Tuji sonsôt bhailea ganvant pordexi zaun astoli; charxim vorsam ti gulamponn ani piddapidd bhôgtoli.
14 Punn tankam gulam’ korta tê dês-porjek hanv motti xikxa laitolom, ani tim ho bhailo ganv sôddun ietana, thoinchi vhôdd girestkai ghevun tim ganvantlim bhair sortolim.
15 Tum mhatar-pirai porian jietoloi, sovostkaien mortoloi, ani tuka te matiek laitole.
16 Ani tuji sonsôt hanga porot ie-sor char pinnka sortoleô, ani Amorit-lokak hanv hangasorle bhair dhanv-ddaunchona, ani tanchem khotteponn vhôdd zatôch te bhair poddtole.’
17 Itlean suria poddlo ani boroch kallôkh zalo; ani ek dhunvortem agttem dixtti poddlem ani tea jivim marlolea zonavo-ranchea don-ui ordam modlean uzo gelo.
18 Tea disa Sorvesporan Abrama kodde êk korar kelo, oxem mhonnun: ‘Ho dês, Ejiptachê nodi thaun, tem Eufrates hê vhoddlê Nodi porian, tujê sonstik Hanv ditam.’
19 Tech porim, Kenit, Kenizzit, Kadmonit,
20 Hittit, Perizit, Refaim’,
21 Amorit, Kanaanit, Girgaxit, ani Jebuzit hea sogllea lokanche ganvui tichea tabeant kortam.’
Utpoti Chapter 16
1 Abramachê potinin Sarain taka ek punn bhurgem diunk naslem, punn Agar nanvachi êk Ejipt-karn daxi tanger asli.
2 Sarain Abramak mhollem: ‘Atam aik, Sorvesporan mho-jea kusveak foll diunk na mhonnttôch, tum mhojê daxê-xim voch. Tichê vorvim ghoddiê mhaka bhurgem mellot.’Sarain sanglolem tem Abraman manun ghetlem.
3 Hê bhaxen, Abraman Kanaan’chea desant dha vorsam vosti kelea uprant, Sarain Agarak, aplê Ejiptkarn daxek, ghetli ani aplea poti Abramak tachi bail koxi dili.
4 Mhonnttôch to tichê-xim gelo ani ti gorbhest zali ani, apunn gorbhest zalea mhonn tika gomlea uprant, ti aplê dhoninik kikont korunk lagli.
5 Sarain Abramak mhollem; ‘Mhaka kel’lo ho opman tuka buzum. Hanvench mhojê daxek tujê-xim dhaddloli, punn atam apunn gorbest zalea mhonn tika gomlam ani dekhun ti mhaka kikont korta. Tujê ani mhojê bhitôr Sorvespor zhôddti korum.’
6 Abraman Saraik mhollem: ‘Borem tôr, tuji daxi tujea hatant asa. Tuka borem dista tem tika kôr.’ Sarai tika itle tras diunk lagli ki ti tichê sorxili pollun geli.
7 Shurachê vatter oronneant êk zhôr asli; hê zhori-xim Sorvesporachea dutak ti mell’lli.
8 Tannem tika mhollem: ‘Agar, Saraichê daxê, khoim thaun aileai ani khoim vetai? Tinnem zobab dilo: ‘Hanv mhojê dhonini Sarai sorxili pollun vetam.’
9 Sorvesporachea dutan tika mhollem: ‘Portun tujê dhonini-xim voch ani tichea hata khal rav.’
10 Ani Sor-vesporachea dutan tika anink sanglem: ‘Hanv tuji sonsôt itli vaddoitolom ki ti mezunk zaunchi na:’
11 Uprant dutan tika mhollem: ‘Atam tum gorbhest asai, ani eka putak zolm ditolii, ani Ishmael mhonn, tum taka nanv dovortolii, kiteak Sorvesporan tuji khont pollelea.
12 Ran-gaddva sarko monis to zatolo, tache hat soglleancher virudh, ani soglleanche hat, tacher virudh astole. Ani sogllea aplea bhavam hujir, to aplo tombu tanntolo.’
13 Hagaran apnnach bhitôr mhollem, ‘Hanvem tôr Dhoniak pollela, ani tachi khobor sangunk ozunui jivim asam?’ Hea pasot, tachê kodde uloitolea Dho-niak tannem nanv dilem ‘Polletolo Dev.’
14 Ani heach khatir, Kadesh ani Bered hanchê modem êk baim asa tika lôk ‘Jieta To Mhaka-dekhta-tachi Baim’ hem nanv dita.
15 Hagaran Abramak êk put dilo ani Hagarak zolmol’lea putak Abraman Ishmael mhonn nanv dovorlem.
16 Hagaran Ishmaelak zolm dilo tedna Abramak xaimxim (86) vorsam aslim.
Utpoti Chapter 17
1 Abramak nnoveannov (99) vorsam aslim tedna Sorvespor taka dixtti poddlo. Tannem taka mhollem: ‘Hanv Sorvespor. Mhojea dolleam mukhar chuki-vinnem chol,
2 ani Mhojê ani tujê modem Hanv êk Korar sthaptolom ani tuji sonsôt khub vaddoitolom.’
3 Abram’ zomni porian sokla bagvolo ani Devan taka mhollem:
4 ‘Ho polle Hanv tujê lagim korar kortam. Ixôb-naslolea raxttrancho tum bapui zatoloi.
5 Fuddarak tuka Abram’ mhonnchim nant; tujem nanv zatolem Abraham’ , kiteak Hanv tuka ixôb-nas-lolea raxttrancho bapui kortam.
6 Tuka Hanv bhov sufôll kortolom, tujê thaun Hanv raxttram upzoitolom ani tujê sonstintle raza utpon zatole.
7 Mhojê ani tujê modem, ani Mhojê ani tujê pattlean ietolê tujê sonsti modem, pinddkechê pinddkent togpacho Hanv Mhozo korar sthapun dovortolom, êk sasnnacho korar:
8 oso Hanv tuzo ani tujê uprant ietolê tujê sonsticho Dev zatolom. Tuka ani tujê uprant ietolê tujê sonstik tum biradd korun asai to dês Hanv ditolom, mhonngê Kanaan’cho sogllo dês, sodankal to tumi bhôg-cheak; ani Hanv tumcho Dev zatolom.’
9 Devan Abrahamak sanglem: ‘Tum Mhozo Korar samballtoloi, tum ani tujê pattlean ietoli ti tuji sonsôt pinddkechê pinddkent.
10 Mhojê ani tujê pattlean ietolê tujê sonsti modem tumi korar samballunk zai to ho: tumchê modem dadlea lingachea soglleanchi sunôt korunk zai.’
11 Ani atanch thaun ho kaido lagu zata: cheddo zolmotôch, atthvea disa tachi sunôt kortoleat; tumchea chakrank zolmol’lea che-ddeank toxem vikte ghetlolea purus-chakrank ho kaido lagta. Hi, hanvem tujê kodde kelolea korarachi êk khunna zaun astoli.
12 Ani atanch thaun ho kaido lagu zata: cheddo zolmotôch, atthvea disa tachi sunôt kortoleat; tumchea chakrank zolmol’lea che-ddeank toxem vikte ghetlolea purus-chakrank ho kaido lagta. Hi, hanvem tujê kodde kelolea korarachi êk khunna zaun astoli.
13 ‘Tujea ghorant zolmol’-leachi ani tunvem duddu diun vikto ghetloleachi sunôt korunkuch zai. Hê vorvim mhojê kodden zal’lea xasvot korarachi khunna tumchea angar sodankal urtoli.
14 Sunôt korunk naslolo purus mhojê porjentlo nhoi oso taka lekhtole, kiteak tannem mhozo korar samballunk na’
15 Devan Abrahamak mhollem: ‘Tujê potinik Saraik hea fuddem tum anink Sarai mhonncho naim, punn Sara.
16 Hanv ticher axirvad ghaltolom ani ti tuka êk put ditoli. Hanv ticher axirvad ghal-tolom ani tichê thaun raxttram utpon zatolim; porzanche raza tichê thaun upzotole.’
17 Abraham’ saxttangim poddlo ani hansun apnnach bhitôr mhonnunk laglo: ‘Xembor vorsanchea dadleak bhurgem zaunk xokta ani nnoi vorsank pavloli Sara atam gorbhest zait?’
18 Ani Abrahaman Devak mhollem: ‘Ishmael Tujê mukhar jielear puro!’
19 Punn Devan taka sanglem: ‘Na, Sarak tujê bailek êk put zolmotolo ani Izak mhonn tum taka nanv dovortoloi. Tachê kodde Hanv êk Korar kortolom, sasnnak togta toslo Korar, ani Hanv tacho ani tachê uprant ietolê sonsticho Dev zatolom.
20 Ishmaela vixim-i Hanvem tujem magnnem aikolam: Hanv tacher axirvad ghaltam ani taka sufôll korun tachi sonsôt vaddoitolom. To bara kunvrancho bapui zatolo, ani Hanv ta-chem ek vhodd raxttr kortolom.
21 Punn fuddlea vorsa heach somoiar Sara Izakak zolm ditoli, ani tachê kodde Hanv Mhozo Korar kortolom.’
22 Abrahama kodde uloun zatôch, Sorvespor tachê sorxilo koddsorun voir gelo.
23 Tedna Abrahaman aplea Ishmael putak, aplea ghorant zolmol’lea ani vikte ghetlolea sogllea chakor-manaiank, mhonnche aplea ghorchea sogllea dadleank haddun, Devan taka sanglo-lem tea pormannem, teach disa tanchi sunôt keli.
24 Abrahaman aplich sunôt korun ghetloli tedna taka nnoveannov (99) vorsam aslim,
25 ani tachea putak Ishmaelak tera vorsam.
26 Abrahamachi ani tachea puta Ishmaelachi ekach disa sunôt keli, teach disa, Abrahamachea sogllea chakranchi.
27 Ani tachea ghorant zolmol’lea ani porkeam kodden vikte ghetlolea mhonnche tachea ghorchea sogllea dadleanchi sunôt tachê borabor keli.
Utpoti Chapter 18
1 Mamrechea Xindur rukha-xim Abrahamak Sorvespor dixtti poddlo. Abraham’, disachea chôdd-chôdd gormechea vellar, tombuchea darar boslolo aslo.
2 Voir polleun apnna boglek teg monis ube asat mhonn tannem pollelem. Tankam pollena fuddem tombuchea darailo utthun to tankam mellunk dhanvlo ani dhornnir sorpottun tannem mhollem:
3 ‘Saiba, hanv tuka manovlam zalear, tujea chakra sorxilo koddsorum naka mhonn hanv prarthtam.
4 Mhaka ilem-xem udok haddum-di: tumi tumchê pãi dhuat ani rukha pondak add poddat.
5 Ilo unddo haddtam: tumi fuddem vechê adim to khaun ghottai gheiat. Heach pasot tumchea chakrachea ghora-xim tumi pavleat.’ Tãnnim mhollem: ‘Borem, tuka zai toxem kôr.’
6 Mhonnttôch Abraham’ Sara ravtali tea tombu-xim tika sangunk soddsoddit gelo; tannem mhollem: ‘Sott-korn pittachim tin mapam môll ani bhakriô kôr.’
7 Uprant gorvam-xim dhanvun tannem êk tonntonnit ani borem-xem paddkulem ghetlem ani sevoka lagim dilem. Tannem tem rokddench randlem.
8 Tedna dhõi, dud, ani randlolem paddkulem gheun, tannem tim tanchê mukhar manddlim. Te jevunk lagle ani to tanchê-xim rukha boglek ubo ravlo.
9 Tãnnim taka vicharlem: ‘Sara, tuji bail khoim asa?’ Tannem zobab dilo: ‘Ti bhitôr asa.’
10 Tedna pavnnean mho-llem: ‘Fuddlea vorsa chukoinastana Hanv tumger portun ietolom; tedna Sarak, tujê ghorkarnik, êk bhurgo zatolo.’ Tombuchea dara-xim Abrahama pattlean ravun Sara hi gozal aikotali.
11 Abraham’ ani Sara zanntim zal’lim ani utar piraier pavlolim ani Sarak mhoinea-chem zaupachem bond zal’lem.
12 Sara hansli ani apnnach bhitôr mhonnunk lagli: Hanv utar piraier pavloli astam, atam mhaka kuddicho bhôg anink melltolo? Mhozo ghôv-ui mhataro zala.’
13 Tedna Sorvesporan Abrahamak mhollem: ‘ Hanv mhatari astam eka bhurgeak zolm diin? oxem mhonnun, Sara kiteak hansli?
14 Sorvesporak kitem avghodd mhonn asa? Fuddlea vorsa Hanv tumger portun ietolom tedna Sarak êk bhurgo zatolo.’
15 Saran nakarun mhollem: ‘Hanv hansunk na.’ Kiteak ti bhieloli. Punn Sorvespo-ran zobab dilo: ‘Na, tum hansleach.’
16 Mamre thaun bhair sorun te dadle Sodom’ dixtti poddta thoim gele ani tankam vatt dakhounk Abraham’ tanchê pattlean gelo.
17 Sorvespo-ran mhollem: ‘Abrahamachem vhodd-lem raxttr zatolem ani tachem nanv gheun sonvsarantlim sogllim raxttram apnnancher axirvad magtolim mhonn-ttôch, hem Hanv korunk vetam tem Abrahamak lipoun dovrum?
18 Sorvespo-ran mhollem: ‘Abrahamachem vhodd-lem raxttr zatolem ani tachem nanv gheun sonvsarantlim sogllim raxttram apnnancher axirvad magtolim mhonn-ttôch, hem Hanv korunk vetam tem Abrahamak lipoun dovrum?
19 Aplea bhurgeamnim ani kuttumban proma-nnikponnan ani nitin Sorvesporachi vatt samballunk tannem hukum’ ghal-cheak Hanvem taka vinchun kaddla. Hê bhaxen Abrahamak Apnnem bhasailam tem Sorvespor ghoddon ie-xem kor-tolo.’
20 Tôr Sorvesporan mhollem: ‘Sodomachi ani Gomorrachi bobatt bhôv vhôdd!
21 Tanchem patok bhov vhodd! Mhojê-xim bob pavlea tea pormannem tãnnim khorench tem sogllem kelam vô na tem polleunk Hanv sokla denvtolom: hachi khobor Hanvem gheunkuch zai.’
22 Mhonnttôch te dadle thoim thaun Sodomachê vatten gele, punn Abra-ham’ Sorvespora mukhar thoinch ubo ravlo.
23 Tachê boglek vochun tannem mhollem: ‘Khottea borabor promannik mon’xacho-i Tum khorench ibadd kortoloi?
24 Hea xarant aslolea pon’nas promannik mon’xam astit: khorench hanchem Tum nisontton kortoloi? Hea xarant aslolea pon’nas mon’xank lagun tem xar Tum vattauncho naim?
25 Osli vost korunk chintinaka: khottea borabor promannik mon’xak-ui marop mhollear promannik ani khotteak êkêch toren vagoilolê bhaxen zalem. Oslem korunk chintunkuch naka! Ak’khê prithumecho Mon’subidar nit korcho na?’
26 Sor-vesporan mhollem: ‘Sodom’ xara bhitôr pon’nas promannik mon’xam Mhaka mell’llear, tanchê khatir Hanv sogllea ganvak bhogxitolom.’
27 Abrahaman zobab dilo: ‘Hanv dhul’l ani gobôr zaun-ui, Sorvespora mukhar oxem ulounk fuddem sortam.
28 Ghoddiê pon’nasant panch zannam unnim astit. Panch zannank lagun ak’khea xarachem Tum nisontton kortoloi?’ Tannem mhollem: ‘Na! Thoim ponchê-challis mell’lear, Hanv nisontton korcho na.’
29 Abrahaman anink êk pavtt mhollem: ‘Ghoddiek Tuka challisuch melltit.’ Sor-vesporan mhollem: ‘Hea challisam khatir Hanv nisontton korcho na.’
30 Abrahaman mhollem: ‘Hanv anink-ui uloin zalear, mhojea Sorvesporak vaitt dischem na mhonn patietam: thoim ghoddiek tisuch astit.’ Tannem mhollem: ‘Hea tisam khatir Hanv nisontton korcho na.’
31 Abrahaman mhollem: ‘Sorves-pora lagim anink ulounk hanv fuddem sortam: thoim ghoddiek visuch astit.’ Sorvesporan zobab dilo: ‘Hea visam khatir Hanv nisontton korcho na.’
32 Abrahaman mhollem: ‘Hanv anink êkuch pavtt uloilear mhojea Sorves-porak vaitt dischem na mhonn mhaka bhorvanso asa: ghoddiek thoim dhach astit.’ Sorvesporan mhollem: ‘Hea dha zannam khatir Hanv xarachem nisontton korcho na.’
33 Abrahama kodde uloun zatôch, Sorvespor gelo ani Abraham’ aplea ghara portolo.
Utpoti Chapter 19
1 Sanjechea vellar, te dog dut Sodom-xarant pavle tedna, Lot xarachea darvonttea-xim bosun aslo. Tankam polleun to rokddoch utthlo ani ievkar diunk gelo. Tanchê samkar dhornnir sorpottun poddlo
2 tannem mhollem, ‘Saibamnô, tumchi seva-mann-sugi korunk hanga ravlam. Upkar korun, mhojea ghorant ieiat. Tumche paim bi dhuun hanga vostek ravat. Faleam bhov sokallim utthun tumchean fuddli vatt kaddum-iet.’ Punn tãnnim zobab dilo, ‘Na, xarachê chouker ami rat sartoleanv.’
3 Punn tannem tankam zaito agro kelo, dekhun te tachea sangatak tachea ghora gele; tannem tanchê khatir jevonn toiar kelem ani bekhomir bhakreô bhazleô, ani te jevle.
4 He soire nhidunk vechea adim, Sodomchea dadleamnim Lotachea ghorak vheddo ghalo. Xarantle soglle dadle, nentte toxe zantte thoim asle.
5 Lotak ulo marun, tãnnim mhollem, ‘Tujê-xim vostek ravunk aileat te monis khoim asat? Tankam amchê-xim bhair ghevun ie! Sodomache monis pozodd-ponnak lobdol’le, tôr te hea soireank boxttaunk ievjitale.
6 Lot, apunnuch, bhair sorlo ani dar dhamplem.
7 Ani sanglem: ‘Bhavamnô, oslem vaitt kortub korinakat!
8 Mhojeô dogi dhuvô asat, ani dog-ui ankvar. Jem mannsugechem ani sobta tem tumi korat. Punn hea monxanchê vatten vochum nakat; te mhoje soire, ani tankam rakhunk ho mhozo kaido.’
9 Tãnnim portipall kelo, ‘Tum hanga êk pordexi! Ami kitem korchem tem sangunk tum konn? Amkam addaunk tum hanga ravum naka, na tôr, tanchê poros tuka ogllem noxtt kortoleanv.’ Ani tãnnim Lotak lottun pois uddoilo, ani dar foddunk gele.
10 Tedna tea mon’xamnim hat bhair ghalun Lotak ghora bhitôr ôddun haddlo ani dar bond kelem.
11 Ani ghorachea dara lagim zomlolea lhan-vhodd mon’xank tãnnim kudd’dde korun sôddle, magir te dar sôdun-sôdun thokle.
12 Tea dogam mon’xamnim Lotak mhollem, ‘Tuje put zanvoim, vô dusre konnui soire hanga asat zalear, tankam hangasorle vegim bhair kadd,
13 kiteak hea xaracho ami bhosm korun sôdd-tanv. Sorvesporan hea loka add mare-kar xinn aikoleat, ani Sodomacho nas korunk tannem amkam hanga dhadd-leat.’
14 Uprant Lot aplea dhuvan-chea nhovream-xim gelo, ani tankam mhollem, ‘Veginchea-vegim hangache bhair sorat, kiteak Sorvespor hea xarachem nisontton kortolo.’ Lot moskoreô korta mhonn te somzole.
15 Fantem futtlem tedna, devdutamnim Lotak agro korun mhollem: ‘Utth, tujê bailek ani hanga asat tea tujea dogam-i dhuvank ghe; na zalear xarachê khastint tujem nisontton zatolem.’
16 To pattim-fuddem sortalo dekhun ani Sorvesporak tache churchure disle mhonn, tea mon’xamnim tachea hatak dhôrlo, ani tachê bailek, tachea dhuvank ani taka kaddun xara bhair vhorun dovorlim.
17 Taka bhair vhortana tantlea eklean taka mhollem: ‘Tuzo jiv rakhunk khoinsor-ui pollun voch. Pattlean polleum naka, na mhonn xetant khoinsoruch thambonaka. Dongrar voch, na zalear tujem nisontton zatolem.’
18 Lotan mhollem: ‘Na, mhojea Dhonia;
19 hanv tujê lagim upkar korun magtam. Tuzo sevôk tuka manovta ani mhozo jiv rakhun tunvem mhojê thaim vhodd bholeponn dakhoileim. Punn noxtt ani moronn ieunchê adim hanv dongrar pavcho na.
20 Hê-thoim dixtti poddta tem xar ekdom’ lagim asa: thoim pollun vochunk zata; ani tem lhan asa. Thoim mhaka pollun vochum-di lhan nhoi tem? ani oso mhozo jiv vanchtolo.’
21 Sorvesporan zobab dilo: ‘Ho-i upkar Hanv tuka kortam ani tum sangtai tea xarachem nisontton zaunchem na.
22 Chol vegim, ani thoim pollun voch, kiteak tum thoim pavo porian Mhojean kãich korunk zaina.’ Dekhunuch tea xarak Zoar mhonn nanv dilem.
23 Suria udetôch Lot Zoarak pavlo.
24 Sorvesporan Sodomacher ani Gomo-rracher sorgar thaun gondhofacho ani ujeacho paus dhaddlo.
25 Oxem tea xaranchem ani tea ak’khea falkeachem ani thoim ravtolea soglleanchem ani thoim utpon zatali tê vonospotichem tannem nisontton kelem.
26 Lotachê bailen pattlean pollelem ani ti êk mittacho khambo zali.
27 Sokallim utthun, Abraham’ apunn Sorvespora mukhar ravlolo tea zagear gelo
28 ani Sodomacher ani Gomo-rracher ani sogllea moidanacher tannem nodor marli ani agtteantlea dhunvra sarko zomnintlo dhunvôr bhair sorta to tannem pollelo.
29 Hê bhaxen, tea falkeachea xaranchem Devan nisontton kelem tedna, Sorves-poran Abrahamacho ugddas kelo, ani Lot ravtalo tea xarachem nisontton kelem tedna, Sorvesporan Lotak nivarlo.
30 Lot Zoar xarant aplem thikann korunk bhielo, dekhun voir dongrancher vochun to ekê dholint riglo.
31 Tachê malgoddê dhuven aplê bhoinnik mhollem, ‘Amcho bapui atam mhataro zata, ani amchê kodde logn zaun bhurgim utpon korunk khoinso-ruch dadle nant.
32 Chol, taka soro pieunk dium-ia, ami tachê-xim nhidum-ia, hê porim amchea bapaicho vounx cholounk ami xoktoleanv.’
33 Tãnnim tê rati aplea bapaik soro pivoilo ani vhoddli dhuv tachê-xim vochun nhidli; punn ti kedna nhidli ani kedna utthli hem taka koll’lem na.
34 Dusrea disa vhoddlên dhakttek mhollem: ‘Polle, kal rati hanv bapai-xim nhidleam; aichei rati ami taka soro pieunk divum-ia, magir tum tachê-xim vochun nhid; hê porim ami amchea bapaicho vounx choloum-ia.’
35 Tê-i rati tãnnim bapaik soro pivoilo ani dhaktti dhuv utthun vochun tachê-xim nhidli. Punn ti kedna nhidli ani kedna utthli hem taka koll’llem na.
36 Hê toren Lotacheô dog-ui dhuvô bapaichê vorvim gorbhest zaleô.
37 Vhoddlek ek put zalo; taka Moab hem nanv dovor-lem. To aichea Moabit lokancho mull-purus.
38 Ani dhakttê-kui êk put zalo. Taka Ben-Ammi hem nanv dilem. To aichea Ammonit lokancho mullpurus.
Utpoti Chapter 20
1 Ani thoim thaun Abraham’ Kanaanchê dokhinnê vatten gelo ani Kadesh ani Shur hea xaram modem ravlo. Magir, Gerar-xarant astana,
2 tannem aplê potini Sara vixim apli bhoinn mhonn sanglem. Hea porma-nnem, Abimelek, Gerarchea Faraohn Sarak apounk dhaddli.
3 Punn ekê rati, Sorvespor taka sopnnant dixtti poddlo, ani mhollem, ‘Atam tum mortoloi, kiteak tunvem ostorek vheleai ti êk kazari-bail.’
4 Punn Abimelek ozun tichê-xim vochunk naslo, ani tannem mhollem, ‘Dhonia, niropradi mon’xacho Tum jiv kaddtoloi?
5 ‘ Ti mhoji bhoinn mhonn tannech mhaka sangunk na? Toxench to mhozo bhav mhonn tinnench mhonnunk na? Hanvem nitoll ontos-kornnan ani nitoll hatamnim hem kelem.’
6 Tedna Devan taka sopnant zobab dilo: ‘Tunvem nitoll ontoskornnan hem kelaim mhonn hanv zannom. Ani mhojê add tunvem patok korina zaunk Hanvench tuka vattailo; tea pasot tika hat launk legun Hanvem tuka diunk na.
7 Tôr, atam, tika tichea poti-xim portun dhadd. To êk provadi, ani tum morona zauncheak to tujê khatir magtolo. Punn zanno za, tika porot dhaddina zalear, tum ani tuzo sogllo lôk khoreaninch mortolo.’
8 Sokallim fuddem, utthun, Abimelekan Aplea sevokank apoun vhele ani kitem ghoddlem tem tankam sangtôch, te monis thorthorle.
9 Uprant, Abimelekan Abrahamak apoun vhelo, ani mhollem, ‘Kitem mhonn tunvem amkam keleim? Hanvem tuka koslem vaitt kel’lem hê porim mhojer ani mhojê rajvôttkecher oslo guneanv haddunk? Korunk favo na tosli vost tunvem mhaka keli.
10 Ani Abimelekan Abrahamak mhollem: ‘Kiteak mhonn tunvem hem keleim?’
11 Abrahaman zobab dilo, ‘Devachê bhiranticho monis hanga konnuch aschona oxem hanv somzolom, ani mhojê potini khatir, mhaka poilo marun uddoitole oxem hanvem chintlem.
12 Ti khoreponnim mhoji ek khas bhoinn: mhojea bapaichi dhuv, punn mhojê avoichi nhoi; hanv tichê kodde logn zalam.
13 Tôr, Devan mhaka bapaichea ghorantlo bhair kaddun pordesant dhaddlo, tedna hanvem tika sanglem, Ek borem kortub tunvem mhojê sovem korunk zata, ami veta thoinsor ‘Hanv tuzo bhav’ mhonn soglleank sang.
14 Tedna Abimelekan Abrahamak menddram, gorvam ani chakor-manaim - chakornim dileô. Ani Sarak Abraha-machê adhin keli.
15 Ho sogllo ganv mhozo, tuka zai thoim jie’ Abimelekan mhollem.
16 Ani Sarak tannem mhollem, ‘Tujea sangati-ghorcheank ruzu kor-cheak, ki tuzo kosloch guneanv na, hanv tujea bhavak rupeache êk hozar nanne ditam; tunvem kãich vaitt korunk naim mhonn soglleank gom-tolem.’
17 Magir Abrahaman Deva-kodden maglem; ani Devan Abimelekak boro kelo ani tachê bailek ani tachea chakornink boreô keleô. Uprant tankam bhurgim zaunk laglim.
18 Karonn, Abrahamachê potinik, Sarak lagun Sorvesporan Abimelekachea ghora-nneantlea soglea bailanche kusve vanztte kel’le.
Utpoti Chapter 21
1 Sorvesporan sanglolê porim to Sarak bhettlo ani tika bhasailolê porim tichê sovem Tannem purem kelem.
2 Ti gorbhest zaun, Abrahamak mhatarê piraier Devan nemlolea kallar êk put zolmolo.
3 Abra-haman taka Izak nanv dilem,
4 ani atth disancho astana, Devan formailolem tê porim Abrahaman Izakachi sunôt keli.
5 Izak zolmolo tedna Abrahamak xembor vorsam aslim.
6 Ani Saran mhollem: ‘Devan mhaka hansum-xi keli; zo konnui hem aikotolo, to mhojê borabor hanstolo.’
7 Tinnem aninkui mhollem: ‘Abrahamak konnui sangot, Sara bhurgeank dud diunk pavot mhonn konn mhonnot aslo? Toripunn tachê mhatarê piraier, Hanvem tachea putak zolm dila.’
8 Bhurgo vaddtôch, tachem dud bond kelem tea disa Abrahaman ek vhodd jevonn dilem.
9 Aplea puta Izaka borabor Hagar Ejiptkarnnik zolmololo to bhurgo khellta to Saran pollelo.
10 Tinnem Abrahamak mhollem: ‘Tê chakornik ani tichea putak dhanvddai. Mhojea puta Izaka borabor chakorni-chea putak daizant vantto mellpacho na.’
11 Aplea putak lagun Abraham’ ekdom’ dukhaborit zalo,
12 punn Devan taka mhollem: ‘Tujea putak ani tujê chakornik lagun tum dukhabhorit zaum naka. Sara tujê lagim magta titlem-i tika di, kiteak Izaka vorvim tuka sonsôt melltoli.
13 Punn chakornichea putachem Hanv ek vhodd raxttr upzoitolom, kiteak to-i tuzo put.’
14 Sokallim fuddem utthun Abrahaman ilem jevonn ghetlem ani chamddeachê potient udok ghalem ani tem Hagara kodde dilem, bhurgeak tichea bhuzar ghalo ani tika dhadli. Ti Beershebachea oronneantlean bhonvli.
15 Udok somplem tedna, bhurgeak eka jhilkutta pondak dovrun,
16 ti fuddem geli ani bann poddta titleak vochun bosli ani apnnach bhitôr oxem mhonnunk lagli: ‘Melolem bhurgem mhojean polleum nozo.’ Oxi ti pois vochun bosli ani roddunk lagli; bhurgo kinvchiô marun roddunk laglo.
17 Punn Sorvesporan bhurgeachem roddnnem aikolem ani sorgar thaun Devachea dutan Hagarak ulo marun mhollem: ‘Hagar, kitem zalam? Bhieum naka. Tunvem dovorlai tea zagear thaun Devan bhurgeachem roddnnem aikolem.
18 Utth, tea bhurgeak ghe ani taka hatant dhôr, kiteak tachê thaun Hanv ek vhodd raxttr upzoitolom.’
19 Devan Hagarache dolle ugôddle ani tinnem êk bãi polleli. Vochun tinnem chamddeachi poti udkan bhôrli ani bhurgeak pieunk dilem.
20 Dev tea bhurgea borabor aslo. To vaddlo ani tannem oronneant aplem tthikann kelem. Ani to bhalekar zalo.
21 To Paranachea oronneant vosti korun ravlo ani tachê avoin taka Ejiptantli êk bail sôdun kaddli.
22 Abimelek ani Fikol, tachê foujecho senapoti Abrahama lagim uloile ani taka mhollem, ‘Sara jem kitem tum kortai tantunt Dev tujea sangata asa.
23 ‘Tôr tum atam hanga Devachem nanv ghevn, zanv mhaka, zanv mhojea putak vô mhojê fuddlê pillgek ghat korchona mhonn soput di. Ani zoso hanv tujê lagim visvaxi mogan vaglam, toxench tum mhaka ani tum ravtai tea desak konvallai dakhoitoloi mhonn utor di.’
24 Abrahaman mhollem: ‘Hanv hi bhas ditam.’
25 Magir, Abimelekachea chakramnim udkachi ek bãi zobordosten aplea tabeant ghetlea tê vixim Abrahaman Abimelekak tapoilo.
26 Tedna Abime-lekan mhollem: ‘Hem kam’ konnem kelam ti khobor mhaka na; tunvem mhaka hem kodinch sangunk na; ani hanvem-i hem aikunk na, punn aizuch aikotam.’
27 Magir Abrahaman mendd-ram ani boil haddun Abimelekak dile ani tãnnim dogaimnim aplê bhitôr êk korar kelo.
28 Abrahaman hinddantleô sat kenkreô veglleô kaddun dovorleô.
29 Tedna Abimelekan Abrahamak vicharlem: ‘Tunvem sat kenkreô veglleô kaddun dovorleat hacho orth kitem?’
30 Ani tannem mhollem: ‘Tunvem heô sat kenkreô mhojea hatantleô ghenv-cheô, mhonnche hi bãi hanvem marloli mhonn teô mhaka sakxi ditoleô.’
31 Tea dogaimnim thoim korar korun soput ghetlolo dekhun tê suvatek tãnnim Beersheba nanv dilem.
32 Beershebant tea dogaincho korar zalea uprant Abimelekh ani tacho senapoti Fikol utthun Filistevkaranchea desant porot gele.
33 Uprant Abraha-man Beershebant zhau nanvachem zhadd lailem ani Sorvesporak, sasnna-chea Devak tannem ulo marlo.
34 Ani Abraham’ Filistevkaranchea desant zaite dis pordexi zavn ravlo.
Utpoti Chapter 22
1 Hea ghoddnneam uprant, Devan Abrahamachi porikxa korunk mhollem: ‘Abraham’, Abraham’!’ Tannem zap dili: ‘Ho polle hanga asam.’
2 Devan mhollem: ‘Tujea ekleach opurbaiechea putak, Izakak, ghe ani Moria anvant voch; thoim Hanv tuka dakhoitolom tea dongrar tum Mhaka tacho iôdn bhettoitoloi.’
3 Dusrea disa bhov sokallim utthun, Abrahaman aplem gaddum toiar kelem ani apnna borabor dogam sevokank ani aplea putak Izakak ghetle. Tannem iôdn bhettounk zollôv fôddlo ani Devan dakhoilolê svater vochun to vattek laglo.
4 Tisrea disa Abrahaman dolle ubarle ani pois thaun ti svat dekhli.
5 Tedna Abrahaman aplea sevokank mhollem; ‘Gaddvak gheun tumi hangach ravat; hanv ani mhozo put matxe mukhar vetanv ani thoim Devak bhôzun tumchê-xim portotanv.’
6 Uprant iôdn bhettounk zollôv zai aslo to gheun Abrahaman Izakacher dilo; magir aplea hatamnim uzo ani suri ghetli ani dog-ui borabor vattek lagle.
7 Vatter Izakan aplea bapai Abrahamak mhollem: ‘Pai!’ Ani pain vicharlem: ‘Kitem zai, puta?’ Putan mhollem: ‘Polle, uzo ani zollôv tôr amchê lagim asat; punn iôdn bhettounk menddro khoim asa?’
8 Abrahaman zobab dilo: ‘Mhojea puta, iôdn bhettounk Dev êk menddro mello-so kortolo.’
9 Magir dog-ui apli urloli vatt tankunk lagle. Devan apnnak dakhoilolê svater pavtôch, Abrahaman thoim êk vedi toiar keli ani tacher zollôv manddlo. Uprant tannem aplea putak, Izakak, bandlo ani taka vedicher zollva voir dovorlo.
10 Magir aplea putacho iôdn korunk hatant suri ghetli.
11 Tednanch Sorvesporachea dutan sorgar thaun ulo marun mhollem: ‘Abraham’! Abraham’!’ Tannem zap dili: ‘Ho polle hanga asam.’
12 Devdutan mhollem: ‘Tujea bhurgeacher hat uklum naka, ani taka kãich vaitt korum naka, kiteak tum Devak khorench bhietai mhonn atam Mhaka sarkem gomlem; karonn tujea ekleach putak Mhaka bhettounk tum pattim sorlo naim.’
13 Tedna Abrahaman apli tokli voir kaddli ani pattlean eka menddreak dekhlo; tachim xingam eka jhilkuttak xirkololim. Mhonnttôch Abrahaman tea menddreak dhôrlo ani aplea putachê svater tacho iôdn korun vomplo.
14 Tê svatek Abrahaman Yahve Yire, mhonngê Dev dita, mhonn nanv dilem; tea pasot aiz porian oxem mhonnttat: ‘Dongrar Dev dita.’
15 Aniekdam Sorvesporachea dutan sorgar thaun Abrahamak ulo marun,
16 mhollem: ‘Mhojeach Nanvan Hanv soput ditam oso uloita to Sorvespor tunvem hem keleim ani tujea ekleach putak Mhaka bhettounk pattim sorlo naim dekhun,
17 tujer Hanv axirvad ghaltolom ani ontrallavelea noketram porim ani doriachê veller asa tê renvê porim tuji sonsôt Hanv vaddoitolom ani tuji sonsôt aplea dusmananche dar-vontte aplea tabeant kortoli;
18 ani tunvem Mhoji adnia pall’lii dekhun tujê sonsti vorvim prithvechea sorv raxttran-cher Hanv axirvad ghaltolom.’
19 Abraham’ aplea sevokam-xim portolo ani te soglle borabor Beershebak vochunk bhair sorle ani Abrahaman Beershebant tthikann kelem.
20 Hea ghoddnneam uprant Abrahamak oxi khobor mell’lli: ‘Khorench tujea Nahor bhavak Milkah vorvim bhurge zaleat.
21 ‘Uz tacho malgoddo put, tacho bhav Buz, ani Aramacho bapui Kemuel,
22 ‘Kesed, Hazo, Pildax, Jidlap ani Bethuel.’
23 Ani Bethul Rebekacho bapui. Abrahamachea Nahor bhavak Milkah vorvim he atth put zale.
24 Taka Reumah nanvachi dovorloli bail asli ani tika him bhurgim zolmolim: Tebah, Gaham’, Tahash ani Maakah hankam zolm dilo.
Utpoti Chapter 23
1 Sara ekxem-sot’tavis vorsam jieli.
2 Kanaan desant, Kiriat-arba vô Hebron ganvant ti meli, ani Abraham’ tichem dukh korun roddlo.
3 Moddea sorxilo utthun Abraham’ Hiti-tanchea putam kodde uloilo.
4 Tannem mhollem: ‘Hanv êk pôrko monis ani tumchê modem hanvem tthikann kelam. Mhojê mel’lê bailek vhorun purunk, mhojê nodrê pois tumchê modem êk purpachi svat mhaka diat.’
5 Tedna Hititkaramnim Abrahamak zap diun mhollem:
6 ‘Dhonia, amchem aik. Tum amchê modem êk podvedar rajkunvôr. Amchê boreantlê borê purpachê suvater tum tujea mel’leak matiek lai. Tujea mel’leak purpak tuka khasgi fondd diunk amcheantlo konnuch tuka addkhôll haddcho na.’
7 Tedna Abrahaman utthun tea desachea lokank Hititkarank noman kelem.
8 Ani tannem tankam mhollem: ‘Mhojea mel’leak mhojê nodre pois purpak tumchi itsa asa zalear, mhojem aikat, ani Zoharachea putakodde, Efronakodde mhojê khatir vinonti korat.
9 Makpelacho Onddo mhaka vik mhonn Efron, Zoharchea putak sangat; ho Onddo tachea xetachê ekê degek asa. Hanga tumchea fuddeant, zomnichem sogllem mol farik kortam mhonn taka sangat; hê porim, purpak mhoji khas zomin astoli.’
10 Xarachea darvonttear, Hittit zomtat thoim Efron tanchê modem bosun aslo; soglleank aikunk ieta toxem tannem mhollem,
11 ‘Aik, saiba; to Onddo asa tem akhench xet tuka ditam. Atanch, mhojea lokachea fuddeant tujê potinik purunk, hanv tem tuka diun kaddtam.’
12 Tedna Abrahaman tea desachea lokank noman kelem;
13 ani tea desachea lokank aikunk-ie sarkem tannem Efronak sanglem: ‘Tum tem mhaka dita zalear, mhojem matxem aik. Hanv tea xetache duddu farik kortam te tum ghe ani thoim hanv mhojea mel’lea mon’xak nikhipitolom.’
14 Efronan Abrahamak mhollem,
15 ‘Saiba, tê zomnichem mol fokot rupeache charxim shekel, ani amchê modem hem mol kitem! Tujê potinik thoim purun kadd.’
16 Abraham’ kobul zalo, ani Efronan sanglolem tem mol, rupeache charxim shekel, soglleanchea fuddeant mezun taka dile.
17 Hê jin’xim, Mamrechê udentek urta tem, Makpelachem Efronachem bhatt Abrahamachea tabeant zalem. Ak’khem xet, thoincho Onddo ani xim’ porian aslim tim sogllim zhaddam.
18 Hê zomatik hajir aslolea sogllea Hittit-lokan tem bhatt Abrahamachem mhonn mandun ghetlem.
19 Hea uprant Kanaan’chea desant Makpelachea xetant Mamre fuddean tannem aplê bailek somadhint nikhipili.
20 Mhonn-ttôch, tem Hittit-lokachem xet mel’leank purpa khatir, Hetachea putamnim koblat korun, Abrahamak dilem.
Utpoti Chapter 24
1 Atam Abraham’ mhataro zal’lo ani tachi pirai borich chôdd zal’li sogllê vatten Devan tacher axirvad ghal’lo. Aplea ghorant sorvam modlea mhatarea sevokak, aplea sogllea astê-mhalachea karbhariak,
2 tannem sang-lem: ‘Tuzo hat mhojea zanglla pondak dovor,
3 atam hanv ravtam tea Kanaan’-kar lokachea dhuvam modli mhojea putak bail vinchun kaddcho naim mhonn Sorvesporachean, sorginchea Devachean ani prithumechea Deva-chean, tunvem soput ghetlolo mhaka zai.
4 Portench zalear, mhojea desant ani mhojeach ghorannea-xim voch ani mhojea puta Izakak êk bail vinchun kadd.’
5 Sevokan zobab dilo: ‘Ghoddiê ti bail hea ganvant mhojê borabor ieunk kobul na zait; toxem zalear jea desa thaun tum ailai tea desant tujea putak hanvem portun vhorcho?’
6 Abraha-man taka mhollem: ‘Polle, mhojea putak thoim kednanch vhorum naka.
7 Sor-vesporan, sorginchea Devan ani prithumechea Devan, mhojea bapaichea desantlo ani kuttumbantlo mhaka bhair kaddlo ani ho dês mhojê sonstik ditolo mhonn tannem soput ghetlo.
8 Atam thoinsorli mhojea putak êk bail tunvem vinchun kaddunk, To tujê mukhar Aplea dutak dhaddtolo. Ani ti bail tujê borabor ieunk kobul na zalear, mhojea soputantlo tum sutt’toloi. Kitem-i zaum, mhojea putak mat thoim porto vhorum naka.’
9 Tôr, tea chakran Abrahamachea zanglla pondak aplo hat dovrun, aplea dhoniak, Deva mukhar utor dilem.
10 Ho chakôr aplea dhoniachim dha unttam gheun, Nahor ravtalo tea xarant, Mesopotamiachê ut’torek gelo.
11 Thoim pavlo tedna don’par zaun gel’lo. Hea vellar, vaddeantleô ostoreô udkak bhair sortaleô. Tannem aplea unttank, xarachea darvonttea bhair êk bãi asli thoim visôv gheunk dilo.
12 Ani tannem oxem magnnem kelem, ‘Sorvespora, mhojea dhonia Abrahamachea Deva, Aiz mhojem kam’ iesesvi kôr. Mhojea Dhonia Abrahamacher tum proson’n za.
13 Xarantleô tornneo-dhaktteô ostoreô udok vhoddunk ietoleô tê bãi-xim hanv atam asam.
14 Tantlê eklek hanv oxem mhonnttolom, Tuka mandta zalear, mhaka udok pieunk tuzo kollso matxe sokla kadd. Zôr ti mhunnott, Zai titlem pie, ani tujea unttankui pieunk udok kaddun ghaltam, ti tujea sevoka-Izakak tunvem vinchun kaddloli hokol ti zaum. Oxem ghoddot zalear, mhojea dhoniak tuvem konvallai dakhoili mhonn mhaka kollun ietolem.’
15 Hem tachem magnnem sompchea adinch, Rebeka, aplea khandar êk kollso gheun, thoim pavli. Ti Bethuelachi dhuv, Nahor ani Milka hanchi nat, ani Nahor tôr Abrahamacho bhav.
16 Rebeka bhou sobit tornni-dhaktti ostori ani khoin-cheach dadlean tika vollkhunk nasli. Ti baint sokla geli ani aplo kollso bhôrun, voir ail’li.
17 Teach borabor Abrahama-cho chakôr tichê-xim dhanvun gelo, ani tika mhollem, ‘Kurpa korun, tujea kollxeantlem mhaka ilem udok pieunk di.’
18 Tinnem mhollem: ‘Pie, mhojea dhonia.’ Tinnem rokddoch khandavoilo kollso kaddun hatant dhôrlo ani taka udok pieunk dilem.
19 Taka pieunk dilê uprant tinnem mhollem: ‘Tujea unttan-kui, tãnnim pott bhor pieupa itlem, udok hanv kaddun ditam.’
20 Magir tinnem soddsoddit kollxeantlem udok kollom-bent rokoilem, ani anink udok kaddunk baincher dhanvot geli. Oxem tinnem soglea unttank udok pivoilem.
21 Tedna to dadlo ojapun gopchup tika pollet ravlo. Sorvesporan aplo provas sufôll kela vô na kai mhonn to chintunk poddlo.
22 Unttam udok pielea uprant tea mon’xan ordshekel voznachi bhangrachi êk nôt tichea nakak ghali ani tichea hatant ghalpa khatir dha shekel voznachim don kanknnam ghatlim,
23 ani tannem mhollem: ‘Bai, tum konnachi dhuv? Tujea bapaichea ghorant, aichi rat sarunk amkam il’li suvat mellot zalear upkar korun sangxi?’
24 Tedna tinnem taka sanglem: ‘Milkahchea pottant Nahorak zolmololea Bethuelachi dhuv hanv.’
25 Tinnem taka aninkui sanglem: ‘Amger tonn ani korodd zaitem asa, ravpak zagoi asa.’
26 Tedna tea mon’xan apli tokli bagaun Sorvesporak nomoskar kelo.
27 Ani tannem mhollem: ‘Mhojea dhoniacho, Abrahamacho Sorvespor Dev sodoiv zanv. Tannem mhojea dhoniacher Apli doia diupachem zanv Aplem khoreponn dakhovpachem sôddun diunk na. Sorvesporan mhaka nitt vatt dakhovn mhojea dhoniachea bhavachea ghorant pavoilo.’
28 Tedna tê cholien dhanvun vochun aplê avoichea ghorcheank ti ghoddloli khobor sangli.
29 Rebekak Laban nanvacho êk bhav aslo. To bainchê lagim aslolea tea mon’xa kodden dhanvot gelo.
30 Tannem nôt ani aplê bhoinnichea hatantlim kanknnam pollelim ani ‘mhaka tea mon’xan oxem oxem sanglam’ him utram Rebekachea tonddantlim aikolim tedna to tea mon’xa fuddeant ailo. To baim-kodde aplea unttam boglek ubo aslo.
31 Tedna tannem mhollem: ‘Sorvesporacho axirvad aslolea, bhitôr ie; bhair kiteak ubo asa? Hanvem tujê khatir ghor ani tujea unttam pasot zago toiar kela.’
32 Magir to monis ghorant ailo; Labanan unttam voilem samonn denvoilem ani tankam tonn ani korodd ghalem, ani taka ani tachê borabor aslolea mon’xank paim dhuunk udok dilem.
33 Tachea fuddeant jevonn vaddun dovorlem tedna to uloilo: ‘Hanv kiteak ailam tem sangchê poilim hanv jeuncho na.’ Ani tannem sanglem: ‘Uloi.’
34 Tannem mhollem: ‘Hanv Abrahamacho chakôr’.
35 ‘Sorvesporan mhojea dhoniak axirvadan bhôrla. To vhoddlo zala; Tannem taka gorvam, menddram, bhangar, rupem, chakor-chakornim, unttam ani gaddvam dileant.
36 ‘Mhojea dhoniachi bail Sara. Tika mhatarponnar tachê vorvim êk put zalo; ani taka tannem apnnakodden asa titlem-i dilam.
37 ‘Ani mhojea dhonian mhaka soput diunk laun sanglam: ‘Jea Kanaananchea desant hanv ravtam tanchea choliantlê konnakui mhojea putachi potin korun haddchona;
38 ‘punn tum mhojea bapaichea ghora voch ani mhojea soiream-dhaiream bhitôrli êk hokol mhojea putak sôdun hadd.’
39 ‘Tedna hanvem mhojea dho-niak mhollem: ‘Ghoddiê ti bail mhojê borabor ieunk kobul zaina zalear?’
40 ‘Punn Tannem mhaka sanglem: ‘Sorves-por mhojea samkar asa oxem somzun hanv choltam; To aplea dutak tujea sangatak dhaddun tuzo provas sufôll kortolo. Hê vorvim mhojea putak mhojea kullantli ani mhojea bapaichea ghora-nneantli hokol haddunk tum pavtolo.
41 ‘Tum mhojea soiream-dhaireanger pavtoch mhojea soputantlo tum mekllo zatolo; zôr tãnnim choli dina mhollear-ui tum mhojea soputantlo sutt’ttolo.’
42 ‘Hanv aiz te baim-kodde pavlom tedna uloilom’ ‘Mhojea dhoni Abrahamachea Sorvespor Deva, hanvem zo provas kela to sufôll korpacho asa zalear,
43 ‘ho polle, hanv udkachê baimchê boglek ubo asam; ani oxem ghoddun ieum: udok vhorunk ji choli ietli tika hanv mhonnin, ‘upkar korun tujea kollxeantlem thoddem udok mhaka pieunk di.’ ’
44 ‘Ani tinnem mhaka sangot: ‘tum pie ani hanv tujea unttankoi udok haddttam’ tôr tich mhojea dhoniachea putak Sorvesporan nirmiloli potin zaum.’
45 ‘Mhojea monantlea monant hanv mhonnttalom tem sompchê adinch Rebeka khandar xidi gheun thoim aili ani baint denvun udok bhôrlem. Ani hanvem tika mhollem: ‘mhaka il’lem udok pieunk di.’
46 ‘Tinnem rokhddich khandavoili xidi kaddun hatant dhôrli ani mhollem: ‘Tum pie ani tujea unttankui pieunk hanv udok ditam.’ Tedna hanv udok pielom ani tinnem unttankui udok pieunk dilem.
47 ‘Magir hanvem tika vicharlem: ‘Bai, tum konnachi dhuv?’ Tinnem sanglem, ‘Nahora vorvim Milkahk zal’lea Bethuelachi dhuv hanv.’ Tedna han-vem tichea nakak nôt ani hatank kank-nnam ghalim.
48 ‘Saxttangim poddun hanvem Sorvesporak nomoskar kelo ani Sorvesporak, mhojea Dhonia Abraha-machea Devak, hanvem vakhannlo, kiteak Tannem mhojea dhoniachea putak tachea bhavachê dhuvek vin-chun kaddunk boreponnan mhaka pavoilo.
49 Atam mhojea dhoniak boreponn ani bholeponn dakhounk toiar asai zalear mhaka sang; na zalear na mhonn sang, ani kitem korunk zai tem hanv polletolom.’
50 Labanan ani Betuelan zobab dilo: ‘Hem Sorvespora thaun ieta; hôi vô na mhonnunk amchea hatant na.
51 Polle, Rebeka tujê mukhar asa. Tika ghe ani chol; Sorvesporan formailam toxem, tujea dhoniachea putachi ti bail zaum.’
52 Abrahamachea sevokan tanche he sobd aikole tedna zom’nir sorpottun poddun Sorvesporak noman kelem.
53 Magir tea sevokan rupeache ani bhan-garache dagine ani vostram bhair kaddun Rebekak dilim. Tannem tichea bhava-kui ani tichê avoi-kui moladik vostu dileô.
54 Magir to ani tachea sangatak aslole te monis jevle ani piele ani ti rat thoinch kaddli. Sokallim te utthle, ani tannem sanglem: ‘Mhaka porot mhojea dhoniager vochunk di.’
55 Tichea bhavan ani avoin mhollem: ‘Choliek amchea fuddeant thodde dis, dha dis punn asum-di; magir tichean vochum ieta.’
56 Magir tannem tankam sanglem: ‘Mhaka addainakat. Sorvesporan mho-zo provas sufôll kela, dekhun mhaka mhojea dhonia-xim vochunk diat.’
57 Ted-na tãnnim mhollem: ‘Ami choliek apovn ti kitem mhonntta tem vicharum-ia.
58 Tãnnim Rebekak apoili ani vicharlem: ‘Hea mon’xa borabor vochunk tum toiar asai?’ Tinnem mhollem: ‘Hôi, asam’
59 Mhonnttôch tãnnim aplê bhoinni Rebekak, tiche nôrxi borabor ani Abra-hamachea sevoka ani tachea mon’xam sangatim vochunk dili.
60 Rebeka-cher tãnnim hea utramnim axirvad ghalo: ‘Amchê bhoinni, hozaranchea hozaramnim, tum choddon-vaddon voch! Tujeô pinddka, aplea dusmananche darvontte, aplea tabeant korunk pavum!’
61 Rebeka ani tichim chakram ubim ravlim ani unttancher bosun tea mon’xa pattlean gelim. Rebekak gheun sevôk aplê vattek laglo.
62 Izak Negebant jietalo. Ekdam to Lahai-Roiki bãi asa tea oronneant ailo.
63 Sanjechea vellar xetant bhonvddi martalo tedna tannem apli nodor ubarli ani unttam ietat tim dekhlim.
64 Rebekan dolle ubarun Izakak pollelo. Aplea unttaveli tinnem uddki marli
65 ani sevokak vicharlem: ‘Xetantlean amkam mellunk ieta to konn?’ Sevokan zobab dilo: ‘To mhozo dhoni.’ Tedna ti-nnem rumalan aplem tondd dhamplem.
66 Sevokan Izakak soglli khobor sangli
67 ani Izakan Rebekak aplea tombunt vheli ani tika apli bail korun ghetli; ani tannem ticho môg kelo. Ani hê bhaxen aplê avoichea mornnan taka dukh bhòglolem tachê svater taka buzvonn mell’lli.
Utpoti Chapter 25
1 Abrahaman anink ek potin haddli, tichem nanv Ketura.
2 Ani tichê vorvim taka Zimran, Jok-shan, Medan, Midean, Ishbak ani Shua he put zolmole.
3 Jokshanak Sheba ani Dedan he zolmole. Ani Dedanache dhu-put Ash’shurim’, Letushim’, ani Leu-mim’ lôk.
4 Midianache put Efa, Efer, Hanok, Abida ani Elda. Hi soglli Keturechi sonsôt.
5 Abrahaman aplem sogllem Izakak dilem.
6 Punn Abrahaman apleô do-vorloleô bailô asleô tanchea bhurgeank denngeô dileô; ani apunn jivo astanach aplea Izak puta sorxile tankam veglle korun udentê vatten purvdesant dhaddun dile.
7 Abraham ekxem ponchat’tôr (175) vorsam jielo.
8 Uprant Abrahaman prann soddlo. Bhov mhatarê piraier to somplo ani aplea purvozanchea lokank vochun mell’llo.
9 Izak ani Ishmael hea tachea putamnim, Zoharacho put Hititacho Efron-hachea Mamre sam-karachea xetantlea Makpelachea bhuimarant purlo.
10 Hem xet Abra-haman Hititam kodden viktem ghet-lolem. Thoinch Abrahamak ani tachê Sara bailek matiek lailim.
11 Abraha-machea mornna uprant Devan tachea putak Izakak axirvadan bhôrlo. Izak tea somoiar Lahai-Roii nanvachê bainchê lagim ravtalo.
12 Sarachi chakorn Ejiptkarn Hagar hichê vorvim Abrahamak Ishmael nanvacho put zalo tachi sonsôt hi:
13 Ishmaelachea putanchim nanvam, tanchea zolmachê manddavolli por-mannem, him asat: Nebaiot ho Ishmae-lacho malgoddo put, ani magir Kedar, Adbil, Mibsam’,
14 Mishma, Dumah, Mas’sa,
15 Hadad, Tema, Jetur, Nafix ani Kedemah
16 He Ishmaelache put; tan-chea ganvam velean ani tanchea tom-bum pormannem tankam poddlolim nanvam him; te ap-aplea bara kullanche rajput asle.
17 Ishmael ekxem sat’tis (137) vorsam jielo. To melo ani aplea purvozanchea lokank ektthaim zalo.
18 Tachea vounxache lôk Havilah thaun Shur desa poriant vosti korun ravle. Ho dês Ejipta samkar asun Assiriakodden vetana mellta) Ani to aplea sogllea bhavam hujir melo.
19 Hi Abrahamachea putachi Izakachi vonxavôll. Abrahaman Izakak zolm dilo.
20 Izak challis vorsancho zalo tedna Rebeka hichê lagim logn zalo. Rebeka Paddan-Aramantlea Siriechea Bethuel hachi dhuv, Aramiechea Laban hachi bhoinn.
21 Izakan aplê potini khatir Sorvesporakodden vinonti keli, kiteak ti vanzddi asli; Sorvesporan tachem mag-nnem aikolem ani tachi potinn Rebeka gorbhest zali.
22 Tichea kusveant bhurgim ekamekakodden zhogddunk laglim tedna tinnem mhollem: ‘Mhoji oxi doxa zalear hanvem jievchem tôr kiteak?’ Hem kitem asot tem zanna zaupak ti Sorvespora lagim vicharunk geli.
23 Sorvesporan tika sanglem: ‘Tujea kusveant don raxttram asat. Tujê kuddintleô don porza, doxim zavn bhair sortoleô, Êk porza dusrê von chodd bollixtt zat’li, Ani malgoddo, dhaktteachi seva kortolo.’
24 Tiche dis bhoron ti ballont zaupacho vêll ailo tedna tichea kusveant zonvlle bhurge asat mhonn koll’llem.
25 Poilo zolmolo to tambddo ani sogllem ang kamblli sarkem lhonven bhorlolem. Dekhun taka Esau hem nanv dovor-lem.
26 Uprant tacho bhav bhair ailo. Tacho hat Esauchê khontek dhôrun aslo dekhun taka Jakob mhonn nanv dilem. Tinnem tankam zolm dilo ten’na Izak satth vorsancho aslo.
27 Esauk bhair ravunk borem distalem ani to êk huxar xikari zalo; punn Jakob thondd monis aslo ani ghorant ravtalo.
28 Izak Esauchi opurbai kortalo kiteak to xikarechem mas haddttalo tem to khatalo punn Rebeka Jakobachi opurbai kortali.
29 Ekdam Jakoban dall randloli, Esau xetant thaun thôkun ailo.
30 Tedna Esaun Jakobak mhollem ‘Tem tamb-ddem kitem randlam tatuntlem tho-ddem mhaka khavpak di. Hanv samko thoklam.’ Dekhun taka Edom’ mhonnunk lagle.
31 Jakoban sanglem: ‘Tujea malgoddeponnacho hok’k mhaka vik.’
32 Ani Esaun mhollem: ‘Polle, hanv mornnachê tonnir pavlam. Mhojea malgoddeponnachea hok’ka-cho mhaka koslo faido?
33 Jakoban mhollem: ‘Toxem zalear tum mhaka atanch soput di’. Tannem soput dilo ani aple malgoddeponnacho hok’k Jakobak viklo.
34 Tedna Jakoban Esauk unddo ani mosurdallichem vornn dilem. To khaun-pieun utthlo ani aplê vatten gelo. Hê porim Esaun aplea malgoddepo-nnachea hok’kachi beporva keli.
Utpoti Chapter 26
1 Adim Abrahamachea kallar dukôll poddlolo toso dukôll atam desant poddlo. Ani Izak Gerarant Filistevkaranchea Abimelekh raza-kodden gelo.
2 Tedna Sorvesporan taka dixtti poddun sanglem: ‘Tum Ejiptant vocho-naka. Hanv tuka sangtolom tea desant tum rav.
3 ‘Hea desant tum rav, ani Hanv tujê borabor astolom ani tujer axirvad ghaltolom; ho sogllo dês Hanv tuka ani tujê sonstik ditolom ani tujea bapaik, Abrahamak Hanvem soput dila to Hanv palltolom.
4 ‘Hanv mollbantlea nokhetram itli tuji sonsôt vaddoitolom; he soglle dês tujê sonstik ditolom ani prithvêvoilim sogllim raxttram tujê sonsti vorvim axirvad zôddtolim;
5 ‘Kiteak Abrahaman mhojea utrak man dilo, mhojem sangnnem aikolem, mhoje up-des, mhoje nem’ ani mhoje kaide pall’lle.’
6 Tedna Izak Gerarant vosti korun ravlo.
7 Thoinchea dadleamnim tachê bailê vixim tachêkodden choukoxi keli. Tedna tannem sanglem: ‘Ti mhoji bhoinn’, karonn ‘ti mhoji bail’ oxem mhonnpak taka bhirant disli; tannem aplea monant mhollem: ‘Rebeka sundor asa. Tika lagun hangache lôk mhozo jiv kaddit.’
8 To thoim zaito kall ravlo. Êk dis Filistevkarancho raza Abimelek, zonelantlean bhair polletana Izak aplê bailêkodden mogache lag kortana taka dixtti poddlo.
9 Tedna Abimelekan Izakak apoun haddun mhollem: ‘Duba-vaviret ti tuji bail. Tôr ‘ti mhoji bhoinn’ mhonn tuvem kiteak sanglem?’ Ani Izakan mhollem: ‘ ‘tika lagun mhaka marit’ mhonn bhieun hanvem toxem mhollem.’
10 Tedna Abimelekan mho-llem: ‘Tunvem amchêkodden oxem kiteak kelem? Hea lokantlo konnui eklo vêll lainastana tujê bailêkodden nhidot aslo ani tum amkam guneanvkari korit aslo.’
11 Magir Abimelekan aplê sogllê porjek oso hukum’ dilo: ‘Zo konn hea mon’xak vô tachê bailek hat lait taka mornnachi khast favo zatoli.’
12 Uprant Izakan tea desant vomplem ani taka teach vorsa xemborpôtt pik mell’lli; ani Sorvesporan taka axirvad dilo.
13 To girest zaunk laglo ani tachi udorgôt zait ravli ani xekim to vhodd xrimont zalo.
14 To menddram-bok-ddanchea ani gorvanchea hinddancho ani zaitea chakôr-chakornicho dhoni zalo; tedna Filistevkarank tachi nosai zali.
15 Tachea Abraham’ bapaichea jivitant tachea chakramnim jitleô baiom marloleô titleoi Filistevkaramnim matien bhôrun kaddleô.
16 Ani Abimelekan Izakak sanglem: ‘Amchê sorxilo tum voch, kiteak tum amchê-von chôdd podvedar zala.’
17 Tedna Izak thoincho gelo ani Gerarachê gallint tombu ghalun ravunk laglo.
18 Ani tachea bapaichea Abra-hamachea jivitant jeô baiom marloleô ani jeô tachea mornna uprant Filistev-karamnim puroiloleô teô tannem portun ukteô keleô, ani tachea bapain jim nanvam dil’lim tinch tannem tankam portun dilim.
19 Izakache chakor tê gallint khonn-ttana thoim tankam nitôll udkacho zhoro sampoddlo.
20 Tedna Gerarantle gorvam-rakhnne Izakachea gorvam-rakhnneakodden zhogddim korun ‘hem udok amchem’ mhonn sangunk lagle. Dekhun tannem tê bainchem nanv Esek dovorlem.
21 Uprant tannem dusri ek bãi marli; ani tãnnim tichê khatirui zhog-ddim kelim. Dekhun tannem tika Sitnah hem nanv dilem.
22 To thoinchean fuddem gelo, ani thoinsor tannem anikui ek bãi marli; tedna te tichê khatir zhog-ddunk nant, dekhun tannem tichem nanv Rehobot dovorlem kiteak ta-nnem mhollem: ‘Sorvesporan amchê zom’nicho vistar kela; atam hea desant amchi vadd zatoli.’
23 Thoinchean to fuddem Beershebant gelo.
24 Têch rati Sorvesporan taka dorxon diun mhollem: ‘Hanv tujea Abraham’ bapaicho Dev. Bhienaka, karonn hanv, tujê borabor asam. Hanv Abraham’ Mhojea sevoka khatir, tujer axirvad ghaltolom ani, tuji sonsôt choddoitolom ani vaddoitolom.’
25 Tedna tannem thoinsor êk vedi bandun kaddli ani Sorvesporachem nanv gheun magnnem kelem; thoim tannem aplo tombu ubarlo, ani thoim Izakachea sevokamnim êk bãi marli.
26 Te uprant Abimelek aplea ixttak, Ahuzzath haka gheun ani aplea senapoti Fikolak sangatak gheun Gerara thaun tachêkodden ailo.
27 Tedna Izakan tankam mhollem: ‘Tumi tôr mhozo dusvas kortat, ani mhaka tumi tumchê modlo dhanvddaun dila. Oxem astam atam tumi mhojê kodden kiteak aileat?’
28 Tãnnim mhollem: ‘Sorvespor tujê borabor asa hem amkam spoxtt disun ailem. Dekhun ami ievjilam ‘tujê ani amchê bhitôr soputa khal êk koblat korum-ia’.
29 ‘Ami tuka kainch vaitt korunk na. Ami tujem borench kelam ani tuka surokxit dhaddun dila. Dekhun tum amkam kainch vaitt kori-naka; atam tujer Sorvesporachi sasai asa.’ ‘
30 Tedna tannem tankam jevonn dilem ani tanchem khavop-jevop zalem.
31 Tãnnim fanteaparar utthun ekme-kan-xim soput diun utor dilem; magir Izakan tankam nirôp dilo ani te tachê sorxile solamoti gele.
32 Teach disa oxem zalem: tache chakor ji bãi martale tika udok poddlam mhonn tãnnim khobor haddli.
33 Tannem tichem nanv Sheba dovorlem; tichê velean tea nograk Beersheba nanv poddlem.
34 Esau challis vorsancho zalo tedna tannem Beeri Hittit hachi dhuv Judit ani Elon Hititachi dhuv Basemat, hankam apleô bailô keleô;
35 Teô Izak ani Rebeka hanchea monank dukh diupa sarkeô zaleô.
Utpoti Chapter 27
1 Izak mhataro zal’lo ani tache dolle itle osokt zal’le ki tachean anink polleunk zai naslem. Aplea vhoddlea puta Esauk apoun tannem mhollem: ‘Mhojea puta!’ Tannem zobab dilo: ‘Ho polle asam.’
2 Uprant Izakan mhollem: ‘Polle, hanv mhataro zalam ani hanv kedna moronn tem nokllom.
3 Tujim hatiaram ghe, tujem potem ani bann ani ranant vochun mhaka êk bori xikar marun hadd.
4 Mhojê ruchichem jevonn korun mhaka hadd. Tem khatam ani morchê adim tujer axirvad ghaltam.’
5 Izak aplea puta Esau lagim uloitana, Rebeka aikotali. Esau aplea bapaik xikar haddunk ranant gelo tedna,
6 tinnem Jakobak mhollem, ‘Tuzo bapui Esau mhonnttana hanvem atanch aikolam,
7 ‘Êk xikar haddun mhaka ti randun di. Hanvem khelea uprant, hanv morchea adim, Sorvespora mukhar tuka mhozo axirvad ditam.
8 Tôr, puta, Rebekan mhollem, ‘mhojem aik, ani hanv sangtam toxem kôr.
9 tam hindda-xim voch ani thoinchim don mottim-xim bokuddlim hadd. Tujea bapaik borem lagta tê porim hanv tuka randun ditam.
10 Magir tum vhorun taka khaunk di, ani to tuka, morchê adim, aplo axirvad ditolo.’
11 Punn Jakoban aplê avoik mhollem, ‘Esau soglloch lonven bhorlolo, ani hanv sarko sullsullit hem tum zannoi.
12 Ghoddiê mhozo bapui mhaka sans-pun polletolo, ani hanv taka fosounk sôdtam mhonn taka gomtolem; hê porim, mhojer tacho axirvad poddchê suvater, hanv xirap ôddun haddtolom.’
13 Tachê avoin mhollem, ‘Xirap poddta to sogllo mhojer poddum, mhojea puta; fokot hanv sangtam toxem kôr, chol voch, ani ti bokuddli gheun ie.’
14 Tannem ha-ddun dilim, ani tinnem tachea bapaichê ruchi pormannem randlem.
15 Tinnem ghorant aslolim aplea malgoddea puta Esauchim moladik angavlim ghetlim ani tim Jakobak aplea dhakttea putak nhesoilim.
16 Tache hat ani pãi ani manichi gulgulit svat bokuddleachê katin pangurlim
17 ani apnnem toiar kel’lem ruchichem jevonn ani unddo aplea putachea hatant dilim.
18 Aplea bapai-xim vochun tannem mhollem: ‘Bapa!’ Pain zobab dilo: ‘Ho polle asam. Tum konn, mhojea puta?’
19 Jakoban aplea bapaik mhollem: ‘Hanv tuzo malgoddo put Esau. Tunvem sangloleim toxem hanvem kelam. Utth ani bos ani hanvem haddlea ti xikar kha ani tuzo axirvad mhaka di.
20 Izakan aplea putak mhollem: ‘Mhojea puta, itlê vegim tuka koxi xikar mell’lli?’ Tannem mhollem: ‘Sorvespora tujea Devan ti mhojê-xim ieunk nirmilem.’
21 Izakan Jakobak mhollem: ‘Ie, lagim sor, tum khoroch mhozo put Esau zalear mhaka hat laun polleum-di.’
22 Jakob aplea bapai Izaka-xim ailo. Izakan taka hat lavun mhollem; ‘Tallo Jakobacho, punn hat mat Esauche hat.’
23 Tannem taka vollkhunk na, kiteak aplea bhava Esau bhaxen tachea hatank lonv asli; ani tannem tacher axirvad ghalo.
24 Tannem mhollem: ‘Tum khoroch mhozo put Esau?’ Tannem zobab dilo: ‘Hôi, hanvuch to.’
25 Uprant Izakan mhollem: ‘Lagim sor, tuji xikar khaun mhaka tujer axirvad ghalum-di.’ Tannem jevonn tachê-xim haddlem ani tannem tem khelem; ani tannem taka soro-i dilo ani to pielo.
26 Izakan, tachea bapain, mhollem: ‘Mhojea puta, lagim ie ani mhaka tuzo umo di.’
27 Tachê boglek vo-chun tannem aplea bapaik umo dilo, ani hannem tachea angacho vas ghetlo. Ta-cher axirvad ghalun bapain mhollem: ‘Hôi, mhojea putacho pormôll Sorvesporan axirvad ghalun, sufoll kel’lea xetachea pormolla sarko.
28 Dev tuka ontrallavelo dôv dium, ani prithumechi sufollai, bhorpur orôv ani soro!
29 Raxttram tujê mukhar, sorpott poddum ani porza tuji seva korum!Tujea bhavancho tum dhoni za; tujê avoichim bhurgim tuka nomoskar korum! Tujer xirap ghalta tacher xirap poddum, tujer axirvad ghalta tacher axirvad poddum!’
30 Izakan axirvad diun, Jakob thoincho bhair sorona fuddem, Esau xikar korun porot ailo.
31 Hannem-i bapaichê ruchichem mas randun tem taka diunk haddlem. Tannem mhollem, ‘Pai, utth, ani haddlam tantlem ilem mas khaun mhaka tuzo axirvad di.’
32 ‘Ani tum konn?’ oxem Izakan vicharlem, ‘Hanv tuzo malgoddo put Esau’, tannem zobab dilo.
33 Izak koddkoddun soglloch halunk laglo, ani xekim tannem mhollem, ‘Tôr, apnnem xikar marun mas haddlam oxem sangun mhaka tem khaunk dilem to konn? Tum ieunchê adim mhaka dil’lem mas hanvem khaun, mhozo nimanno axirvad taka sasnnak diun kaddlo.’
34 Hem aikun, Esau arôdd ghalun himtteamnim roddlo, ani tannem mhollem, ‘Pai, mhaka-i tuzo axirvad di!’
35 Izakan taka zobab dilo, ‘Tuzo bhav naddponn korun ailo ani tuka mellpa-cho to axirvad apunn gheun gelo.’
36 Esaun mhollem, ‘Hi dusri pavtt, tannem mhaka adim fosoil’lo. Dubav na, hea pasot tachem nanv Jakob. Lhan asta-na, malgoddea putache hok’k tannem kaddun ghetle, ani atam mhozo axirvad-ui gheun gelo. Mhaka mhonn tuvem ekui axirvad dovrunk na?’
37 Izakan taka zobab dilo, ‘Hanvem taka tujever dhoni korun dovorla, ani soglle tache ghorche-soire tache sevok zaun astole. Orov ani soro tachea tabeant kela. Ani atam, puta, tuka divunk mhojêkodde anink kãich urunk na!’
38 Esau aplea bapaik porath’toch ravlo, ‘Pai, tujêkodde ekuch axirvad aslo? Mhaka-i tuzo axirvad di, pai!’ Ani to roddunk laglo.
39 Magir Izakan taka mhollem: ‘Polle, prithvêvoilê pikall zom’ni voir, Voilean mollbantlo dôv poddta, thoim legun, Tuji vosti astoli.
40 ‘Tum aplê torsadi bollar jietolo; Tum aplea bhavachi seva kortolo.Tori oxem ghoddon ieit ki tum ucham-boll zatolo tedna Tujê manê voilem tachem zum tum kaddun uddoitolo.’
41 Esau Jakobak zôllunk laglo, kiteak bapain taka aplo axirvad dilo. Esaun aplea monant mhollem, ‘Mhozo bapui atam mornnak tenkla; tachem dukh korun somptôch, Jakobak jivexim martolom.’
42 Punn hi tachi ievzonn Rebekak kollun ietôch, tinnem Jakobak apoilo ani mhollem, ‘Aik, tuzo bhav Esau tuka jivexim marun sudd gheunk sôdta.
43 Tôr, puta, hanv sangtam toxem kôr. Atanchea-atam tum Haran ganvant mhojea bhava Labanachê sorxim voch,
44 ani tujea bhavacho rag nivllosor thoinch rav.
45 Tunvem kelaim tem tuzo bhav visortôch, tuka porot haddunk konnakui dhaddtam. Ekach disa tumkam dogainkui hanvem kiteak vogddaiche?
46 Rebekan Izakak mhollem, ‘Esauchea porkea bailanchi mhaka ubgovnn ailea. Jakob-ui hea Hittit cheddvam kodde kazar zait zalear, hanv mel’leach porim zatolem, hem odik borem.’
Utpoti Chapter 28
1 Izakan Jakobak apoun axirvad dilo ani taka formailem, ‘Ka-naanit ostorê lagim logn zaum naka,
2 ‘Tum utth ani Padan-Aram’ hanga tujê avoichea bapaichea Bethuel hachea ghorant voch ani tujea Laban mamachea dhuvantlê eklek tuji potin kôr.
3 Hea tujea ekvottacher Sorvpodvedar Dev aplo axirvad ghalum ani tuka zaitim bhurgim dium, hê porim tum sobar dês-porzancho bapui zaunk pavtoloi!
4 To tuka ani tujê borabor tujê sonstik, Abrahamak dil’lo to axirvad dium; Devan Abrahamak dil’lo to dês, zantunt tum pordexi zaun ravta tum vosoum.’
5 Hem sangun Izakan Jakobak nirôp dilo ani to Padan-Aramant Siriechea Bethuelachea puta Labana-xim gelo, zo Jakob ani Esauchê avoicho Rebekacho bhav aslo.
6 Izakan Jakobak axirvad diun Padan-Aramant thoinchi potin haddunk dhaddla, ani axirvad dinvchea vellar taka ‘Kanaanchê ostoream bhitorlê konnakuch tuji potin korinaka’ mhonn adnia dilea mhonn Esauk koll’llem;
7 Jakob aplea avoi-bapaichi adnia manun Padan-Aramant gela mhonnunui taka gomlem.
8 Kananit cheddvam aplo bapui Izak manun ghena mhonn Esauk somzolem.
9 Tedna Esau Abra-hamachea putakodden, Ishmaela-kodden gelo, ani Ishmaelache Mahalat dhuvêkodden Nebaiotachê bhoinni-kodden logn zaun tika aplea her bailant samil keli.
10 Beersheba sôddun Jakob Ha-ran’chê vattek laglo.
11 Eka zagear pavtôch, dis dharir poddlolo dekhun tannem thoim rat sarli. Thoim aslolea fatram modlo êk fator gheun tannem aplem uxem kelem ani to add poddlo.
12 Tedna taka ek sopon poddlem: thoim êk nisônn asli; ti zomnir thaun sorgak tenktali; ani Devache dut ticher choddta-denvtale
13 ani tichê voir Sorvespor aslo ani To mhonnttalo: ‘Hanv Sorvespor, tujea bapa Abrahamacho Dev ani Izakacho Dev. Tum add poddlai to dês tujê sonstichê adhin Hanv kortolom.
14 Tuji sonsôt dhul’lichea konniam porim vaddtoli; ani tum, ostomtek ani udentik, ut’torik ani dokhinnek, vaddon vetoloi; tujê udexim ani tujê sonsti udexim prithumechea sogllea kullancher axirvad poddtolo.
15 Polle, Hanv tujea sangata asam; tum vetai thoinsor Hanv tuka samballtolom, ani tuka porto hea desant haddtolom, kiteak Hanvem bhasailam tem xarti pavoilea xivai Hanv tuka sôddcho na.’
16 Tedna aplê nhidentlo utthun Jakoban mhollem: ‘Khorepo-nnim hea zagear Dev asa, punn hachi mhaka khobor nasli.’
17 Bhieun tannem mhollem: ‘Kitli bhirankull hi svat! Hem khoreponnim Devachem ghor! Ho sorgacho darvontto!’
18 Bhov sokallim utthun Jakoban uxem kelolo to fatôr ghetlo ani iadgiri koso to thoim ubo korun dovorlo ani tachea mathear tel ôtlem.
19 Tea zageak Bethel mhonn tannem nanv dilem, punn tea xarak adim Luz mhonnttalim.
20 Jakoban oso soput ghetlo: ‘Dev mhojea sangata asot zalear ani hê vatten choltana mhaka samballit zalear, mhaka jevunk-khaunk ani nhesunk-pangrunk diit zalear ani
21 hanv surokxit mhojea bapaichea ghora porton zalear, Sorves-por zatolo mhozo Dev.
22 Ani êk khambo koso hanvem ubo korun dovorlolo ho fatôr Devachem ghor zatolo ani mhaka dilai tantlo êk dhavo vantto hanv tuka jerul porot ditolom.’
Utpoti Chapter 29
1 Jakob porot aplê vattek laglo, ani Udentê vatten to choltoch ravlo.
2 Ovchit to ekê baim-xim pavlo, ani tichê bhonvtim menddranche tin hindd add poddlole. Menddrank hê baim-xim haddit ani tankam udok ditale, ani baimchem tondd ekê vhoddlê fatrin dhamplolem aslem.
3 Soglle hindd ekttãi zatôch rakhnne ti fator kuxin kaddit ani udok ditale. Ani porot ti fatôr aplea zagear dovortale.
4 Jakoban thoim aslolea rakhnneank mhollem, ‘Ixttamnô, tumi khoinche?’ - ‘Ami Haranche’, tãnnim zobab dilo.
5 ‘Tôr tumi Labanak, Nahorachea putak vollkhotat?’ tannem tankam vicharlem. ‘Hôi, ami taka voll-khotanv’, oso tãnnim zobab dilo.
6 ‘Ani to boro asa?’ Jakoban vicharlem. ‘Hoi, to boro asa’, tãnnim mhollem, ‘Hi, polle, tachi dhuv Rakel aplea hinddak ghevun ieta.’
7 Jakoban mhollem, ‘Ozu-nui boro uzvadd asa, ani hinddak porot ghotteant vhorpacho vêll zaunk na, tôr, tankam atam udok diun, kiteak chorvak tumi vhoronant?’
8 ‘Soglle hindd hanga pavlea xivai amchean ti fatôr kaddunk zaina; soglle ietôch toxem kortoleanv.’ tãnnim oso taka zobab dilo.
9 Hê porim Jakob tanchê kodde uloi-tana, Rakel aplea bapaichea hinddak gheun thoim pavli, kiteak ti hinddak rakhtali.
10 Jakoban Rakelak aplê mamachê dhuvek ani aplea mamachea hinddak pollena fuddem, to baim-xim lagim sorlo, ani ti fatôr portun mendd-rank udok dilem.
11 Uprant, tannem Rakelak umo dilo ani vhoddlean roddlo.
12 Ani tannem Rakelak sanglem, ‘Hanv tujea bapaicho êk soiro, ani Rebekacho put.’ Hem aikun ti aplea bapaik sangunk dhanvli;
13 Ani Jakobachi khobor aikona fuddem, Laban aplea bhacheak mellunk dhanvun ailo, taka vengoilo, umo dilo ani taka aplea ghora haddlo. Jakoban kitem ghoddlem tem sogllem Labanak sanglem,
14 ‘Hôi’, Labanan mhollem, ‘khorench tum mhojem hadd ani mas.’ Sogllem kitem ghoddlolem tem Jakoban Labanak sanglem. Jakob Labanager êk mhoino ravlea uprant,
15 Labanan Jakobak mhollem, ‘Tum mhozo soiro dekhun tunvem funkott mhojem kam’ korchem mhonn na. Tôr, tuji mozuri kitli?’
16 Labanak dogi dhuvô asleô: vhoddlechem nanv Lea, ani dhakttêchem Rakel.
17 Leache dolle osokt, punn hichê poros Rakel anglottin ani rupan sundor diso.
18 Ja-kob Rakelachea mogan poddlolo dekhun tannem mhollem: ‘Tujê dhakttê dhuvê, Rakela khatir hanv sat vorsam tuji chakri kortolom.’
19 Labanan taka zobab dilo, ‘Dusrea-konnak porkeak dil’lea poros, ticho hat tukach diin; tum mhojê-xim rav.’
20 Ani Rakelacho hat zoddchê khatir, Jakoban sat vorsam Labanachi chakri keli, ani Rakelacho khub mog taka aslo dekhun him sat vorsam thoddech dis zal’lea porim sorlim.
21 Uprant, Jakoban Labanak mhollem, ‘Mhojê sevecho kall somplo, mhoji potin mhaka di; hanv tichê lagim logn zatam.’
22 Magir Labanan thoinchea sogllea lokank apoun jevonn dilem.
23 Punn tê rati, Rakelak tachê adhin korchê suvater, tannem Leak tachea tabeant keli, ani Jakob tichea sangata nhidlo.
24 Ani Labanan Leachê chakornik Zilpa - hika tichê sevê-chakrek dili.
25 Dusro dis udesor, Lea apnnak dilea mhonn Jakobak matui khobor nasli. Punn hi khobor taka kollun ietôch, to Labana-xim gelo ani taka mhollem, ‘Kiteak mhonn tunvem mhaka oxem keleim? Rakela khatir hanvem tuji seva kel’li. Atam mhaka kiteak mhonn fosoiloi?’
26 Labanan mhollem: ‘Vhoddlê poilim dhakttê kodden logn korpachi chal am-chea desant na.
27 ‘Tichem lognachem suman purem kôr, ani tunvem anink sat vorsam mhoji seva-chakri kelear ami tuka dusri-i ditanv.’
28 Jakoban toxem kelem; ani tichea lognacho satollo somptôch, tannem Rakel aplê dhuve-kui taka tachi potin koxi dili.
29 Labanan Bilha aplê chakornik aplê Rakel dhuvechi chakorn koxi zaunk dili.
30 Uprant Jakob Rakelaxim-i nhidlo ani to Lea-on Rakelacho chodd mog korunk laglo. Ani tannem anink sat vorsam Labanachi chakri keli.
31 Jakob Leacho môg korina tem polleun, Sorvesporan Leacho kusvo ugôddlo ani tinnem aplea putak Reubenc nanv dilem, punn Rakel vanzddi urli.
32 Lea gorbhest zali ani eka putak zolm dilo. Tinnem mhollem, ‘Sorvesporan mhojem odruxtt pollelem, ani atam mhozo poti mhozo môg kor-tolo’.
33 Porot ti gorbhest zali ani eka putak zolm dilo. Tinnem mhollem: ‘Mhozo môg korina mhonn Sorves-poran aikolem dekhun mhaka ho put dilo’, hea khatir Simeon taka nanv di-lem.
34 Porot ti gorbhest zali ani anieka putak zolm dilo. Tinnem mhollem, ‘Atam mhozo poti mhaka ekvott’tolo kiteak hanvem taka teg put dile’, hea khatir tinnem taka Levi hem nanv dilem.
35 Chovthê pavtt ti gorbest zali ani eka putak zolm dilo. Tinnem mhollem, ‘Hê pavtti hanv Sorvesporak vakhanntolim’, hea khatir tachem nanv Juda. Uprant tika anink bhurgim zaunk nant.
Utpoti Chapter 30
1 Apnnem ozun Jakobak bhur- gem utpon kelem na dekhun Rakelak aplê bhoinnichi nirddukai zali, ani tinnem Jakobak mhollem, ‘Mhaka bhurgim dinaim zalear hanv mortolim.’
2 Jakob Rakelacher boroch ragar zalo ani tannem mhollem, ‘Hanv kitem Deva svater asam? Tannench tuzo kusvo sufôll korunk na.’
3 Tedna tinnem Jakobak mhollem, ‘Hi, polle, mhoji chakorn Billah; tika ghe ani tichê-xim nhid, ani taka bhurgem zait tem mhojem. Hê porim tachê udexim hanv avoi zaunk pavtolim.’
4 Tedna tinnem aplê Billah chakornik dovorloli bail koxi taka dili ani Jakob tichê-xim gelo.
5 Billah Jakoba vorvim gorbhest zavn taka êk put zolmolo.
6 Rakelan mhollem, ‘Dev mhaka proson zalo. Tannem mhojem magnnem aikolem, ani mhaka êk put favo kelo’, hea khatir taka Dan hem nanv dilem.
7 Billah aniek pavtt avoi zali ani Jakobak dusro put dilo.
8 Rakelan mhollem, ‘Mhojê bhoinni add hanv borim zhuzlim ani jikhlim’, hea khatir taka Naftali hem nanv dilem.
9 Lean apnnak bhurgim zainant tem polleun, aplê chakornik, Zilpak potin koxi Jakobak dili.
10 Hachê udexim Jakobak êk put zolmolo.
11 Lean mhollem, ‘Mhojem noxib ugoddlem’, hea pasot taka Gad hem nanv dilem.
12 Zilpak aniek put zolmolo,
13 ani tannem mhollem, ‘Kitlim sukhi nhoi hanv? Atam ostoreô mhaka sukhest mhonnpachartoleô’, hea pasot tachem nanv Asher .
14 Gonvachê lunvnnê disamnim Reuben xetant gelo. Thoim taka putdatrichim follam mell’llim. Tim haddun tannem aplê avoik Leak dilim. Tedna Rakelan Leak mhollem: ‘Putdatrichim zhaddam tujea putan haddleant. Tantuntlim thoddim mhaka di.’
15 Tedna tinnem tika mhollem: ‘Tunvem mhojea ghovak vhela tem puro nhoi mhonnun tum mhojea putan haddlolim zhaddam-i vhorunk sôdta?’ Ani Rakelan mhollem: ‘Tujea putan haddlolea putdatrichea zhaddam bod-la, ghov aiz rati tujê lagim nhidtolo.’
16 Sanjêvellar Jakob xetantlo ghora ailo tedna Lean tachê-xim vochun taka sanglem: ‘Tunvem aiz mhojê-xim ieunk zai. Mhojea putan haddlolim tim putdatrichim zhaddam diun hanvem tuka khoreponnim bhaddeak ghetla.’ Tedna tê rati to tichê lagim nhidlo.
17 Devan Leachem magnnem aikolem, ani ti avoi zaun Jakobak panchvo put dilo.
18 Lean mhollem, ‘Hanvem mhojê chakornik Jakobachea tabeant keli dekhun, Devan mhaka mhoji mozuri dili’, hea khatir tachem nanv Issakar.
19 Lea aniek pavtt avoi zali, ani Jakobak sovo put dilo.
20 Tinnem mhollem, ‘Devan mhaka ek nazuk dennem dilam. Atam mhozo poti mhaka lagim kaddtolo, kiteak hanvem taka sov put utpon keleat’, hea pasot tachem nanv Zebu-lun.
21 Uprant tika êk dhuv zolmoli ani tika Dina hem nanv dilem.
22 Xekim Devan Rakelacho ugddas kelo, ani tichem magnnem aikun, tika bhurgim zatat toxem kelem.
23 Ani ti gorbhest zaun tika êk put zalo, ani tinnem mhollem: ‘Mhojer zatalo to opman Devan pois kelo.’
24 Mhonnun tinnem tachem nanv Juze dovrun mhollem: ‘Sorvespor mhaka anikui êk put ditlo.’
25 Jedna Rakelan Juzek zolm dilo, tedna Jakoban Labanak mhollem, ‘Mhaka atam mhojea desant mhojea ghora vochun mhaka ravum-di.
26 Mhojea potinink ani bhurgeank gheun hanv vetam, kiteak tanchê khatir hanvem tuji visvasan chakri kelea.’
27 Labanan taka mhollem, ‘Zôr hanvem kitem kelam tem tuka mandlam zalear mhojê-xim rav. Tukach lagon Sorvesporan mhojer axirvad ghatla, hem mhaka disun ailam.
28 Tum sangtai ti mozuri tuka ditam.’
29 Jakoban taka zobab dilo, ‘Tuji hanvem koxi chakri kelea, ani mhojea hata-vavra khal tuje hindd koxe posorle tem tum borem zannoi.
30 ‘Hanv ieunchê adim tujê kodde jem kitem aslem tem thoddem ani atam tem khub vaddlam; hanv ailam tedna thaun Sorvesporan tuka axirva-dan bhôrla. Tôr atam hanv mhojea ghoradarachem kedna polletolom?’
31 Tannem (Labanan) taka mhollem: ‘Hanv tuka kitem farik kortolom?’ Jakoban sanglem: ‘Tum mhaka kãich farik korinakai. Zôr tum mhojê khatir hem ek korxi zalear hanv portun tujea hinddank choroitolom ani rakhtolom.
32 ‘Aiz hanv tujea sorv hinddam modem firun xelliantleô xirbeô ani chittialleô, gobra rongache menddre, tech porim bokddantlim xirbim ani gobra rongachim bokddam kuxin kaddin; hich mhoji mozuri.
33 ‘Faleam tum mhoji mozuri diunk hixôb kortana mhojea promannikponnachi tuka govai melltoli. Zôr bokddiam modem xirbeleô ani gobreô nhoi tosleô ani menddream modem gobre nhoi tosle mhojê kodden mell’lear tim zonavoram choriechim mhonn somoz.’
34 Tedna Labanan mho-llem: ‘Borem. Tujea mhonn’nnea pormannem zatolem.’
35 Tedna teach disa sogllê xirbê ani chittialle menddre, matxeô dhovsar asloleô soglleô xirbeô ani chittialleô bokddeô ani menddream bhitôr aslole soglle gobre pelean ka-ddun teô mon’zati aplea putam tabeant dileô.
36 Magir tannem apnna ani Jakoba modem tin disanchê vattechem ontor dovorlem; ani Jakob Labanachea urlolea hinddank choroit ravlo.
37 Uprant Jakoban hivor, bodami ani ormon hea zhaddancheô tornneô pachveô boddiô kaddun haddleô ani tancheô dhoveô sali kaddleô. Ani tea boddianchem bhitorlem dhovem ang uktem kelem.
38 Teô sol’loleô boddiô hinddam mukhar kholliamnim, tanchea udok pieupachea konnllbeamnim dovorleô; te udok pieunk ietale tedna follot.
39 Tea boddiam samkar te hindd gabhnne zaun pattanchim, xirbim, chittialim pilam kaddttale.
40 Tedna Jakoban kenkreank veglle kele ani Laba-nachea hinddant aslolea pattanchea ani gobrea bokddeam-menddram votten hinddanchim tonddam kelim; tannem aple hindd veglle dovorle, Labanachea hinddant dovrunk nant.
41 Bollixtt xelliô-bokddeô jedna follunk ietaleô tedna tanchea dolleam mukhar kholliamnim Jakob teô boddiô dovortalo, tankam polleun teô gabhnneô zanvchê khatir.
42 Punn osokt xelliô-bokddeô aslear to teô boddiô tanchea mukhar dovornaslo. Oxem korun osokt asloleô mon’zati Labanacheô ani ghott-mutt teô Jakobacheô zaleô.
43 Hê jin’xim to monis bharim girest zalo. Tannem zaite hindd, chakor, chakornim, unttam ani gaddvam aplea tabeant kelim.
Utpoti Chapter 31
1 Labanache put mhunnot ‘Jakoban amchea bapaichem tem sogllem burddun vhelem. Amchea bapaichea kustar, tannem apli girestkai punzailea’ hem sogllem Jakobachea kanar poddlem.
2 Labanui atam, adlê porim doiall-moipaxi nhoi aslo.
3 Tedna Sorvesporan taka mhollem, ‘Atam tum purvozanchea ganv-ghora voch, hanv tujea sangata astolom.’
4 Mhonnttôch, Rakel ani Lea, dogaimnim xetant hindd asat thoim apnnak mellchem mhonn Jakoban tankam utor dhaddlem.
5 Tannem mhollem, ‘Tumcho bapui atam mhojê sovem adlê porim moipaxi nhoi, hem hanv zannom; punn mhojea bapaicho Dev mhojea sangata asa.
6 Mhojem-boll-takot tumchea bapaichea vavrak hanvem khorchilam, hem tumi dogam-i borem zannot.
7 Tori astana tannem mhaka fosoilo, ani mhaka dita mhollem tem dha pavtti bodol’lem; punn mhaka vaitt korunk Devan taka diunk na.
8 ‘Jedna tannem mhollem: ‘Chittialle kenkre tuji mozuri tharailea’ tedna sogllea hinddamnim chittiallech kenkre zale; jedna tannem mhollem: ‘pattancheô bokddeô tujeô’, tedna sogllea hinddamnim pattanchinch pilam upzunk laglim.
9 ‘Hê porim Devan tujea bapaichim zonavoram kaddun mhaka dilim.
10 ‘Xelliô-bokddeô gabhnneô zaupa vellar hanvem nodor voir korun sopnant pollelem ki xellian-cher uddpi menddre pattanche, chittiale ani gobrea xibanche asle.
11 ‘Tedna sopnant devdutan mhaka ‘Jakob’ mhonn ulo marlo. Hanvem taka mho-llem: ‘Polle, hanv hanga asam.’
12 ‘Ani tannem mhollem: ‘Atam tuje dolle voir kaddun polle; xelliancher uddpi soglle menddre pattanche, chittialle ani gobrea xibanche asat; kiteak Laban jem kitem tuka korta tem sogllem Hanvem pollelam.
13 ‘Bethel hangasor tuka dixtti poddlolo to Dev hanv. Thoim tun-vem to khambo makhun Mhaka êk bhasavnni kel’li. Atam utth, hea ganvantlo bhair sor ani tujea zolm-ganvant voch.’ ’
14 Tedna Rakelan ani Lean uloun taka sanglem: ‘Amchea bapaichea ghorant atam amcho kosloi vantto zanv daiz amkam urlam kai?
15 To amkam porkim koxim lekhina? Tannem tôr amkam vikun sôddlim, ani amcho duddui tannem khalo.
16 Amchea bapaichea hatantli kaddun ghetlea ti soglli girestkai am-chich ani amchea bhurgeanchi. Devan tuka sanglam toxem kôr.
17 Magir Jakoban utthun aplea bhur-geank ani aplea bailank unttancher bosoilim.
18 Aplim sogllim poslolim zonavoram, zoddlolem sorv dhon ani Padan-Aramant melloilolim gorvam-menddram gheun to aplea Izak bapai kodde Kaanan desant vochpak bhair sorlo.
19 Laban aplea menddranchi lonv tasunk gel’lo, ani ho pois astana, Rakelan aplea bapaiche ‘dev’ (murteô) chorun haddleô.
20 Jakoban, apunn veta mhonn kãich sangonastana Labanak fosoilo.
21 21 Aslem titlem-i gheun to taktin bhair sorlo. Eufrates nôd utrun, Gilead dongri-ganvchi vatt tannem dhôrli.
22 Tin disam uprant, Jakob gelo mhonn Labanak khobor mell’lli.
23 Aplea mon’xank gheun tachea pattha-patth gelo, ani sat disam uprant, xekim, Jakobak Gilead ganvant sampddailo.
24 Devan Siriechea Labanak ratcho sopnant ieun sanglem: Sambhall, Jako-bak borem vô vaitt tum kãich uloinaka.
25 Laban Jakoba-xim pavlo tedna Jakoban dongrar aplo tombu ghatlolo; Labananui aplea bhavam borabor Gilead dongrar tombu ubarlo.
26 Labanan Jakobak mhollem, ‘Mhaka kiteak fosoiloi, ani loddaien sampddai-lolea lokak vhortat tê porim mhojea dhuvank kiteak gheun ailoi?
27 Kiteak mhaka fosoiloi ani mhaka sango nastana gop-chup kiteak geloi? Mhaka sanglo-leim zalear, hanv tuka dhol-kin’nareô laun sontosachea lharar dhaddtolo aslom.
28 Mhojea dhuvank ani natrank tunvem umo legun dilonaim! Hi tuji êk motti pisai.
29 Tuka vaitt korpachi tank mhaka asa, punn kal ratim tujea bapaichea Devan mhojê kodden ulovn mhaka sanglam: Sambhall, Jakobak borem vô vaitt tum kãich uloinaka.
30 Ganv-ghora vochunk tuka humxik lagloli mhonn hanv zannom, punn kitea pasot mhojea ghorantle ‘dev’ chorun vhelei?’
31 Jakoban Labanak zobab dilo, ‘Tujea dhuvank pois lipoun dovorxi mhonn hanv bhielom.
32 Punn tuje ‘dev’ mhunnttai te, hanga konna-i lagim mellot zalear taka jivexim marcho. He amche monis govai zaun astole, tujem amchê-kodde kitem asa tem polleun kadd, ani tujem tem vhor.’ Rakelan te chorun haddlole mhonn Jakobak kho-boruch nasli.
33 Tedna Laban Jakoba-chea tombunt, Leachea tombunt ani tea don chakornichea tombunt gelo, punn taka kãich sampddunk na. Magir to Rakelachea tombunt gelo.
34 Rakelan te vhel’le ani unttachea môv boskent ghal’le ani tacher apunn bosloli. Sogllo ticho tombu sôdun, bapaik kainch mellunk na.
35 Rakelan aplea bapaik mhollem, ‘Saiba, mhojer ragar zaum naka, kiteak tujea fuddeant hanv ubim ravunk na, mhojean nozo, bailank jem zata tem mhaka zalam.’ Soglleak sôdun, Labanak te mell’llech nant.
36 Jakob tedna boroch tikxelo, ‘Koslem vaitt hanvem adarlam?’ tannem vicharlem, ‘Hê porim mhojê patthik lagunk hanvem koslo opradh kela? Hanvem koslem patok kelam?’
37 Ani atam tunvem soglleak sôdleim, ani amchea vostumnim tujem kitem asa? Tem hanga haddun dovor, tujea ani mhojea mon’xam mukhar, ani konna-cho guneanv hem tankanch sangum-di.
38 Vis vorsam hanv tujea sangata aslom; tujeô bokddeô-menddram vaddun gelim, ani tujea hinddantlo êk legun menddro hanvem khaunk na.
39 Ran’-votti monzatin tujea hinddantlem kitem-i khelem zalear hanv tem mhojea angar ghetalom. Mhozo guneanv na mhonn tuka dakhounk tujê-xim tem haddunk na. Disa vô rati kitem chorun vhelem zalear, tachem farikponn magtaloi.
40 Disachea votan ani ratichea hinvan hanv akull-pikull zatalom; mhojea dolleanchi nhid uddun vetali. Oxi mhoji doxa zal’li.
41 Ani sogllim him vis vorsam oxem hanvem bhôglam. Chovda vorsam, tujea dhuvancho hat zôddun gheuncheak vavurlam; magirlim sôv vorsam tuje hindd rakhleat. Mhaka mozuri dita mhonnlli ti dha pavtti bodol’leai.
42 Mho-jea purvozancho Dev, Abrahamacho ani Izaakacho Dev mhojea sangata naslo zalear tum ritea hatamnim mhaka ganv-ghora dhaddtolo asloi. Hanvem kitem kelam ani sonslam tem sogllem Devan dekhlam, ani kal-rati formonn marlam.’
43 Labanan zobab dilo, ‘Him cheddvam mhojeô dhuvô; tanchim bhurgim sogllim mhojim; ani he hindd mhojech. Kho-rench, hangasor asa titlem-i mhojem. Punn mhojea dhuvank ani tanchea bhurgeank tujê sorxilim pois dovrunk mhojean kainch korunk zaina,
44 Tôr io, tum ani hanv êk korar korum-ia; to tujê ani mhojê modem êk govai zaum-di.’
45 Jakoban êk fator ghetlo ani to ugddasak ubo kelo.
46 Fator-lobram haddun êk ras korat mhonn aplea mon’xank sanglem. Hê fatranchê rasi-xim te jevle.
47 Labanan tê rasik Jegar Sahadutha nanv dilem, punn Jakoban Galeed nanv dilem.
48 Labanan Jakobak mhollem, ‘Hi fatranchi ras amkam dogaim-ki êk ugddas zaun astoli.’ Hea khatir tea zageak Galeed nanv poddlem.
49 Labanan hem-i mhollem, ‘Ami dog-ui eka-meka sorxile koddsorlole asanv tedna Sorvespor amchi zoton korum-di.’ Hea porma-nnem, tea zagear Mizpah hem-i nanv dilem.
50 ‘Tuvem mhojea dhuvank dukh dilem vô tanchê xivai dusreô bailô keleô zalear sambhall; zori tujea ani mhojea sangata polleupak konnui monis naslo legun zalear, tori, tujê ani mhojê modem Dev sakxi asa.!’
51 Uprant Labanan Jakobak mhollem: ‘Polle, tujê ani mhojê modem hi ras, ho khambo, hanvem ubo kela.
52 Hi fatranchi ras toso ho ugddasacho fatôr amkam monant haddtolim, ki, tujê add hê raxi fuddem sorchona, ani tum-i mhojê add tichê fuddem vô hea fatra fuddem vechonaim.
53 Abranvacho Dev ani Nahoracho Dev amchê modem nit korum.’ Uprant, jea Devak tachea bapain Izaakan man-nomoskar dil’lo, tachea nanvan Jakoban, hi bhas pallunk, êk angovnn keli.
54 Jakoban dongrar iodn kelo ani aplea mon’xank jevnnak apoile. Ani tãnnim jevonn korun ti rat dongrar kaddli.
55 Dusrea disa bhov sokallim, Laban utthlo; tannem aplea natranche ani dhuvanche ume gheun tankam axirvad dilo. Magir Laban vatt dhôrun aplea zagear porot gelo.
Utpoti Chapter 32
1 Jakob aplê vatten vetana, taka dev-dut bhettle.
2 Tankam polleun, Jakoban mhollem, ‘Hem Devachem pennem’, hea khatir tê suvatek Mahanaim hem nanv dilem.
3 Adim-fuddench, Jakoban aplea bhava Esau-xim, Edom’ ganvant, ek nirôp diun aple monis dhaddle.
4 Tankam dil’lo nirôp ho, ‘Hanv, Jakob, tuzo khalto chakôr, mhojea dhoniak Esauk kollit kortam, ki Labana sorxim hanvem mhoje dis kaddle, ani hanga porot ieunk aiz pasun lamboilem.
5 Mhojêkodde gorvam, gaddvam, menddram, bokddeô ani chakram asat. Saiba, tujem borem mon zoddchê khatir ho nirôp dhadd-tam.’
6 He, nirop-gheun gel’le te monis Jakoba-xim porot ietôch, tãnnim mho-llem, ‘Tujea bhava-xim ami geleanv, ani tuka mellunk to bhair sorloloch asa. Tachea sangata charxim monis asat.’
7 Tedna Jakob samko bhielo ani kacha-bul zalo; ani apnna borabor aslolo hindd ani gorvam don pongddamnim vanttlim.
8 Tannem chintlem, ‘Eka zomeak to dhôrit zalear, dusro tori sutt’tolo.’
9 Magir Jakoban mhollem: ‘He Sorvespora, mhojea Abraham’ bapaichea Deva, mhojea Izak bapai-chea Deva, Tunvem mhaka ‘tujea desant ani tujea daijeanger voch ani Hanv tujem borem kortolom’ mhonn sanglo-lem.
10 Tuvem mhaka, tujea sevokak, dakhoilãi tem sogllem bholeponn mhaka favo nhoi. Vetana, mhojea hatant êk danddo ghevun hanv Jordan-nodi poltoddi sorlam, ani atam porot ietana, don urponjimnim hanv asam.
11 Upkar korun, mhaka Esauchea hatantlo nivar. Atam mhojer akant suttla, to mhojê add ieta ani soglleacho, bailancho ani bhur-geancho legun to bhosm kortolo mhonn hanv bhielam.
12 Tujê bhasavnnecho ugddas kôr, ki, sogllem borem zatolem ani mhoji sonsôt konnachean mezunk zaunchi na, doria-degechê renvechea konniam porim ti zatoli.’
13 Thoim êk rat sartôch, Esauk êk sagvad koxi, aplea hinddantlim tannem vinchun kaddlim: don’xim bokddeô ani vis bokdde, don’xim menddram ani vis menddre, tis dudachim unttam ani tanchim poram, challis gaieô ani dha padde, vis stri-gaddvam ani dha purus-gaddvam.
14 Thoim êk rat sartôch, Esauk êk sagvad koxi, aplea hinddantlim tannem vinchun kaddlim: don’xim bokddeô ani vis bokdde, don’xim menddram ani vis menddre, tis dudachim unttam ani tanchim poram, challis gaieô ani dha padde, vis stri-gaddvam ani dha purus-gaddvam.
15 Thoim êk rat sartôch, Esauk êk sagvad koxi, aplea hinddantlim tannem vinchun kaddlim: don’xim bokddeô ani vis bokdde, don’xim menddram ani vis menddre, tis dudachim unttam ani tanchim poram, challis gaieô ani dha padde, vis stri-gaddvam ani dha purus-gaddvam.
16 Tanche tannem kherit-kherit hindd kele ani êk-êk hindd eka-eka chakra kodde dilo. Tankam mhollem, ‘Mhojea adim tumi vochat, ani eka ani dusrea hindda modem ilo-ilo zago dovrat.’
17 Poilea chakrak tannem hukum’ dilo, ‘Mhozo bhav Esau tuka mellta, ani Tuzo dhoni konn? Tum khoim vetai? Him vhortai tim gorvam konnachim? oxem vi-charta tedna,
18 tunvem taka sangunk zai, Tim tujea sevoka Jakobachim. To aplea dhonia-Esauk êk sagvad koxi tim dhaddta. Jakob amchê-soglleanche patthlean asa. ’
19 Hêch porim tannem dusreakui, ani sogllea hindd-vhorto-leank sanglem: ‘Esau tumkam melltôch, oxench tumi sangunk zai.
20 Tumi mhunnunk zai, Hôi, tuzo sevôk-Jakob soglleam patthlean ieta. ’ Jakob aplech bhitôr chint’talo, ‘Heô sagvadi diun hanv tachem mon bodoltolom, ani taka melltôch ghoddiê to mhaka bhogxitolo.’
21 Tannem tankam aplea adim dhaddle, ani ti rat tannem aplea tombunt sarli.
22 Têch rati Jakob utthlo ani aplea dogam bailank ani aplea dogam chakornink ani aplea ikra bhurgeank gheun tannem Jakobacho vhall utorlo.
23 Tannem tankam poltoddi dhaddlim ani uprant aplem aslem-naslem titlem-i dhaddlem.
24 Ani apunn ekloch ravlo.Uzvaddo porian konn eklo tachê kodde loddai korun aslo;
25 ani Jakobacher zoit vhorunk zaina tem polleun, tannem tachea zangllak hat ghalo. Ani tachê kodde loddai kortana, Jakobachea zangllachem hadd bhair sorlem.
26 Ted-na tannem mhollem: ‘Atam mhaka vochum-di, kiteak dis uzvaddlo.’ Punn Jakoban zobab dilo: ‘Tunvem mhojer axirvad ghalea bogor hanv tuka vochunk diuncho na.’
27 Tea mon’xan taka vicharlem: ‘Tujem nanv kitem?’ Tannem zobab dilo: ‘Jakob.’
28 Tea mon’xan mhollem: ‘Tuka hea fuddem Jakob mhonnchim nant, punn Israel, kiteak Deva lagim zhuzun tunvem apunn bollixtt mhonn dakhoileim ani mon’xan-cher-ui tum zoit vhortoloi.’
29 Tedna Jakoban oxi vinoti keli: ‘Upkar korun tujem nanv mhaka sang.’ Punn tannem zobab dilo: ‘Tum mhojem nanv kiteak vichartai?’ Ani thoinch tannem axirvad ghalo.
30 Jakoban tea zageak Peniel mhonn nanv dovorlem, ‘kiteak hanvem Devak rup-rup pollela ani tori hanv jivo urlom’, oxem tannem mhollem.
31 Suria udelo ani zangllak lagun to kunttit-kunttit Penielantlo bhair sorlo.
32 Heach pasot Israelit aiz porian zangllachea xiranto-rachem mas khainant, kiteak tannem Jakobachea zangllachea xirantorak hat ghal’lo.
Utpoti Chapter 33
1 Esau charxim mon’xank gheun ieta tem polleun, Jakoban aplea bhurgeank choxim kelim: Lea, Rakel ani dogi bailô hanchê kodde ilim-ilim dilim.
2 Dogam bailank ani hanchea bhurgeank sogllea fuddem dovorlim, magir Lea ani hichea bhur-geank, ani xekim, Rakel ani Juze xevottak.
3 Jakob tanchê-soglleanchê adim gelo, ani aplea bhava-xim lagim-lagim pavtam, sat pavtti to dhornir sorpottlo.
4 Punn Esau tachê-xim dhan-vun gelo ani tachea golleak veng marun taka umo dilo. Ani te dog-i roddtale.
5 Esaun ostoreank ani bhur-geank polleun vicharlem, ‘Ho sogllo tuje bori asa to lôk konn?’ ‘Him, saiba, Devan aplea boleponnan mhaka dileant tim bhurgim’, tannem mhollem.
6 Magir tacheô dogi chakorni aplea burgeank gheun aileô, ani taka noman kelo;
7 Tea uprant Lea ani hichim bur-gim, ani xekim Juze ani Rakel ieun taka noman kelem.
8 Esaun vicharlem, ‘Zomeam-zomeam-nim ail’le te konn? Ani tachi somzonni kitem?’ Jakoban mhollem, ‘Tem sog-llem tujem borem mon jikhun gheun-cheak.’
9 Punn Esaun taka sanglem, ‘Puro titlem tujêkodde asa, bhava mhojea; tujem tukach dovor.’
10 Jako-ban mhollem, ‘Na, tujêkodde upkar magtam, tujea fuddeant hanv mandlam zalear hem mhojem dennem ghe. Tujem tondd polleun hanvem Devachench tondd pollelem-xem zalem, ani atam tum mhojê sovem itlo moipaxi mell’lai.
11 Upkar korn, hanvem tuka haddlam tem ghe; Dev mhojê sovem doiall zala, ani mhaka goroz titlem-i tannem dilam.’ Jakoban itlem porathlem dekhun tannem tem ghetlem.
12 Esaun mhollem, ‘Atam ami vochpachi toiari korum-ia. Hanv fuddem vetam.’
13 Jakoban zobab diun mhollem, ‘Bhurgim lhan-osokt asat, toxench gorvam-bokddeô ani tanchim poram, mhojean tankam ôddun vhorum nozo; ekuch dis legun tim oxem gelear, tim vatteruch morun vetolim.
14 Upkar magtam, tum mhojê adim voch, ani sovkas patth-lean ietam, magir ilê taktin ani tum Edom’ pavo pasun tuji patth dhôrtam.’
15 Esaun mhollem, ‘Hanv vetam, tôr; punn thoddea mhojea mon’xank tujea sangata dovortam.’ Punn Jakoban mhollem, ‘Tachi goroz na, mhaka fokot tujem borem mon zai.’
16 Mhonnttôch, tea disa, Esau Edom’ vechê vattek laglo.
17 Punn Jakob Sukkoth gelo, ani apnnak ravunk tannem ek ghor bandlem, ani gorvank ghotte. Hea khatir tea zageak Sukkoth mhonnttat.
18 Magir Jakob Padan-Arama thaun bhair sorlo to Kanaan desantlea Shekem’ nogrant solamoti pavlo. Nogra bhair tannem aplo tombu ubo kelo.
19 Hamor, Shekemchea bapaichê sonsti koddsun tannem tem xet xembor rupeachea duddvank viktem ghetlem.
20 Thoim tannem êk vedi ubarli, ani El, Israelachea Devak to bhettoilo.
Utpoti Chapter 34
1 Eka disa Jakoba vorvim Leak zal’li dhuv Dina tea prantantlea ostoreank bhettunk geli.
2 Tedna tea desachea Hamor nanvachea Hivit raj-kunvrachea Shekem’ putan tika polleli; to tika ghevn gelo ani tichê kodden nhi-dun tika bhoxttaili.
3 Punn magir tichea mogan poddlo ani cheddvachoi-i moi-pas zôddunk to vavurlo.
4 Tannem aplea bapaik mhollem, Hê choliek mhoji potin korun di.
5 Jakobak hi khobor gomli, punn tache put xetant gorvam patthlean asle dekhun, te porot ie porian tannem kãich kelem na.
6 Shekemcho bapui Hamor Jakobak mellunk ailo,
7 heach vellar Jakobache put xetant-thaun porot ietale. Hannim ti khobor aikoli, ani te thottakle ani teach borabor ragabhorit zale, kiteak Shekeman Israel porjek ani Jakobachê dhuvek oslo okman kelo.
8 Hamoran Jakobak mho-llem, ‘Mhozo put Shekem’ tujê dhuve-chea mogan poddla. Taka kazar zaunk hukum’ di.
9 Amchê ani tumchê porjê modem kazaram korum-iet oxi ami ek koblat tharaum-ia.
10 Magir, tumchean amchea sangata hea ganvant raum-iet, tuka zai thoim rav, ani amchean eka-meka bhitôr veapar-dhondo korunk zatolem.’
11 Shekeman Dinahchea ba-paik ani bhavank mhollem, ‘Ho upkar mhaka korat, ani hanv tumkam zai tem diin.
12 Koslem vordan tumkam zai tem sangat, ani hoklek hanvem kitem farik korchem asa tem kitlem-i unch zaum-di; tumi magtat tem ditam punn kazar zaunk mhaka hukum’ diat.’
13 Aplê bhoinnik Dinahk Shekeman oslo beman kel’lo dekhun, Jakobachea putamnim Shekemak ani tachea bapaik Hamorak êk naddbudhicho zobab dilo.
14 Tãnnim mhollem, ‘Jea mon’xachi sunôt korunk na, taka amchê bhoinni kodde kazar zaunk amchean hukum’ dium nozo; hem amkam kanttalleachem.
15 Tumi soglle, amchê porim, sunôt korun ghexat tednach amchean hem kazar manun gheum-iet. Tumchea sogllea purusanchi sunôt korunk zai,
16 ani magir, amchê ani tumchê bhitôr kazar korum-iet. Tedna ami tumchea ganvant thikann korun astoleanv, ani tumchê borabor ami-i ekuch porza zato-leanv.
17 Punn amchi suchovnni tum-kam manona ani tumi sunôt korinant zalear, amchê bhoinnik gheun ami hangache bhair sortoleanv.’
18 Hamorak ani tachea putak Shekemak tanchi ievzonn man’li,
19 ani ti xarti pallunk Shekeman anink vêll lailona, kiteak to Jakobachê dhuvechea mogan poddlolo. Ani tanchea kuttumbant to mhotvacho zaun aslo.
20 Hamor ani Shekem’ ganvche zoma-tichea zagear vô xarachea darvonttean gele ani aplea ganv-valeank mhollem,
21 ‘He monis moipaxi, tankam amchê modem hea ganvant ravum-di, ani zai toxe bhonvum-di. Ani amcho ganv vhodd, tankam-i zago asa. Tanchea dhuvam kodde amchea dadleank kazar
zaum-di, ani amchea-i dhuvam kodde tanchea dadleank kazar zaum-di.
22 Punn he monis amchê modem ravunk ani amchê borabor êk porza zaunk kobul asat, zôr ami-i sunôt korun gheun tanche sarke zatanv.
23 Tanchêkodde itle sogott hindd asat te ani tanchem sogllem daiz amchem-i zaunchem na? Tôr, hea khatir, te magtat tem korunk ami kobul zaum-ia.’
24 Xarantlo sogllo lôk Hamor ani Shekem’ sangtale tem korunk kobul zalo, ani sogllea dadleanchi sunôt keli.
25 Tisrea disa, he ghai zodd zatat tedna, Simeon ani Levi, Jakobachea putamnim ani Dinahchea bhavamnim, apleô torvari gheun ani konnakuch dubav dinastana, sogllea dadleank jivexim marun uddoile.
26 Hamor ani tacho put Shekem he-i mele. Uprant, tãnnim Dinahk Shekemachea ghorant-lem bhair kaddun vhelim.
27 Marun somptôch, Jakobachea heram putam-nim, aplê bhoinni khatir farikponn gheuncheak, sogllem xar luttlem.
28 Tã-nnim tanche hindd chorun vhele, menddram, gorvam, gaddvam, xarant ani xetant aslem titlem-i.
29 Soglleô molacheô vostu vhorcheô vhorun, tanchea bailank ani bhurgeank legun dhôrun vhelim.
30 Jakoban, Simeon ani Levi hankam mhollem, ‘Tumi atam mhaka sonkottant ghalo; Kanaanit, Perizzit ani ganvcho urlolo lôk, soglle mhozo dvês kortole. Mhojê kodde chodd monis nant; ani te soglle ekttãi zaun mhojê add ieun dhadd ghaltit zalear, sogllem amchem kuttumb nanch zaun vetolem.’
31 Punn tãnnim nibraien zobab dilo, ‘Ekê naikinik kortat tê porim, amchê bhoinnik korunk amchean tankam sot’tea dium nozo.’
Utpoti Chapter 35
1 Devan Jakobak oxem sanglem: ‘Hangasorlo bhair sor ani Bethelant voch ani thoim tthikann kôr. Tujea bhava Esau koddcho tum pollun vetaloi tedna tuka dixtti poddlolo tea Devak thoim êk vedi band.’
2 Jakoban aplea kuttumbak ani apnna borabor aslolea soglleank oxem sang-lem: ‘Tumchê modem asat tea porkea devank bhair uddoiat; nhavon xud’dh zaiat, ani tumchim angavlim bôdlat.
3 Ami atam bhair sorun Bethelant vochunk zai. Hanv dolldirponnak sampoddlolom tedna mhaka dixtti podd-lolo ani hanvem tanklea ti vatt cholunk mhaka adar dilolo tea Devak thoim hanv êk vedi bandtolom.’
4 Tãnnim apnnan-chê adhin asle te soglle porke dev Jakoba kodde dile ani toxench apunn ghaltalim tim kanantlim dilim. Shekema lagim eka sindur-rukha pondak Jakoban tim purlim.
5 Jakob ani tache put thoin-che bhair sorun vetale tedna, degê-merechea lokacher bhirant aili, ani tanchê patthik te laglenant.
6 Jakob ani tachê borabor aslolim tim sogllim Kanaan’chea desant Luzak, mhonngê Bethelak, pavlim.
7 Hanga tannem êk vedi ubarli ani tê svatek El Bethel nanv dilem, kiteak, to aplea bhava sorxilo pollun vetana, Dev taka hea zagear dixtti poddlolo.
8 Deborah, Rebekachi nors mortôch tika dokhinn Bethelant eka asnnachea mullak purloli. Tea pasot taka ‘Dukhacho Asonn’ hem nanv dilem.
9 Jakob Padan-Aramant thaun portun ietoch, aniek pavtt taka Dev dixtti poddlo ani taka axirvad dilo.
10 Devan taka mhollem, ‘Tujem nanv Jakob, punn hea fuddem tem Israel zatolem.’ Tôr Devan taka Israel oso nanvaddlo.
11 Ani mhollem, ‘Hanv Sorvpodvedar Dev. Tuka zaitim bhurgim zaum. Dês-porza tuje-thaun utpon zatoleô, ani tum Faraohcho vhoddil zaun astoloi.
12 Abranvak ani Izakak dil’le te ganv tuka, ani tujê uprant, tujê sonstikui ditolom.’
13 Magir Dev thoincho koddsorlo.
14 Hanga, Dev uloilolo tea zagear, Jakoban ugddasak êk fatracho khambo ubharlo, ani tacher soro ani tel votoun to Devak bhettoilo.
15 Hea zageak tannem Bethel nanv dilem.
16 Uprant tim Bethelantlim bhair sorun cholunk laglim. Efratha pavpak thoddi vatt astana Rakelak porsutponnacheô kolli ieunk lagleô, ani ticho ballonter trasancho zalo.
17 He tiche koxtt vaddon vetoch, voijinin tika mhollem, ‘Rakel, tum bhieum naka, tuka aniek put zolmola’
18 Punn ti mornnacheô odi sôddtali astana, tinnem bhurgeak Benoni hem nanv dilem, punn ta-chea bapain taka Benjamin nanvaddlo.
19 Melea uprant, Rakelak Efrata vetolea rosteachê kuxik purli, hê suvatek atam Bethlehem mhonnttat.
20 Tichea ug-ddasak Jakoban thoim êk fator ubharun dovorlo ani aiz pasun Rakelacho fondd oxem dokhol korta.
21 Jakob thoincho koddsorlo, ani Ederachem minar asa tachea dusrea ordan aple tombu marle.
22 Jakob hea ganvant jietana, Reuben Bilhah-xim nhidlo, hi tachea bapaichi dusri bail. Jakob, hi khobor aikotoch, boroch tiddlo. Jakobak bara put zolmole.
23 Leache he: Reuben (Jakobacho malgoddo), Simeon, Levi, Juda, Isaakar, ani Zebulun.
24 Rakelache he: Juze ani Benjamin.
25 Bilhah, Rakelachê chakorniche: Dan ani Naftali.
26 Zilpa, Leachea ravoiloleache: Gad ani Asher. He soglle Padan-Aramant zolmole.
27 Jakob Mamre-ganvant, Hebrona lagim, aplea bapai-xim gelo. Hanga Abraham ani Izak jiel’le.
28 Izak borê mhatarêpiraier, ekxem’oixim vorsancho melo; 29 ani Esau ani Jakob, tachea putamnim taka purlo.
Utpoti Chapter 36
1 Esau, dusrea nanvan Edom, hachi sonsôt oxi:
2 To Ka-naanchea bailam kodde kazar zal’lo; ekechem nanv Adah, Elonchi dhuv (ho Hittit); dusrechem nanv Oholibamah, Anahchi dhuv, ani ho Zibeon (ho Hivit) hacho put;
3 ani tisri Basemath, Ish-maelachi dhuv, ani Tebaiothachi bhoinn.
4 Adahk zolmolo: Elifaz; Basemathak zolmolo: Reuel;
5 ani Oholibamahk zolmole: Jeush, Jalam, ani Korah. He soglle put Esauk Kanaanchea ganvant zolmole.
6 Magir, Esau aplea putank, dhuvank, ani bakichea ghorabeak; toxench tachim gorvam-hindd ani urloli bhanddavôll Kanaan-ganvant zoddlolem tem gheun, aplea bhava Jakoba sorxilo koddsorlo.
7 Kiteak ho, Jakob ani apunn ravtalo to ganv doganchea udarposonnak pavo-naslo; tanchim gorvam-hindd itlim vaddlolim, ki dogank boro udeog naslo.
8 Mhonnttôch, Esau eka dongri-ganvant, Edom’ mhonnttat thoim gelo.
9 Esau Edomit-porjecho vhoddil, ani tachi sonsôt oxi:
10 Adah udexim Elifaz-putak zolm dilo.
11 Ani Elifazak panch put zolmole: Teman, Omar, Zefo, Gatam, ani Kenaz;
12 Elifazachê dusrê bailen, Timnan, eka putak Amalekak zolm dilo.
13 Basemath-hichê udexim taka êk put, Reuel zolmolo; ani Reuelak choug put zolmole: Nahath, Zerah, Shammah, ani Mizzah.
14 Oholibama hichê udexim taka teg put zolmole: Jeush, Jalam, ani Korah. Hi bail Zibeonchea Anahchi dhuv.
15 Ani Esauchê sonstichim kullam him:Tacho malgoddo Elifaz: Teman, Omar, Zefon, Kenaz,
16 Korah, Gatam, ani Amalek hea sogllea kullancho vhoddil zaun asa, ani tim Adah udexim Esaun utpon kelim.
17 Tacho put Euel: Nahath, Zerah, Shammah, ani Mizzah hea kullancho vhoddil, ani tim Basematha udexim tannem utpon kelim.
18 Xekim, Jeush, Jalam, ani Korah him sogllim kullam Oholibamah (Anah-chi dhuv) hichê udexim tannem utpon kelim.
19 Ani hi soglli Esauchi sonsôt.
20 Edom-ganvcho mulki-lôk ap-aplea kullam pormannem: Lotan, Shobal, Zibeon, Anah,
21 Dishon, Ezer ani Dishan him sogllim Seir-sun, ho ek Horit, oromb ghetat.
22 Lotan: Hori ani Heman hancho vhoddil (Lotanchi bhoinn Timna).
23 Shobai: Alvan, Ma-nahath, Ebal, Shefo, ani Onam hancho vhoddil.
24 Zibeonak dog put asle: Aiah ani Anah (hea Anahk, oronneant, gorom’ udkacheô zhori mell’lleô, tannem aplea bapaichea gaddvank chorvak vhel’lim tedna).
25 Anah: Dishonacho bapui, Ani Dishon:
26 Hemdan, Eshban, Ithran, ani Kheran hea kullancho vhoddil. Ani Oholibamah hi Anahchi dhuv.
27 Ezer: Bilhan, Zaavan, ani Akan hea kullancho vhoddil.
28 Dishan: Uz ani Aran hea kullancho vhoddil.
29 Ani Edomchea ganvant, Horit porje-chim kullam him: Lotan, Shobai, Zibeon, Anah
30 Dishon, Ezer ani Dishan.
31 Israel lokancher konnui razan raj korchê poilim Edom’ desant jea razamnim raj kelem te-he:
32 Bourachea putan Belan Edomant raj kelem. Tachê rajdhanichem nanv Dinhaba aslem.
33 Bela mortokoch Bosrachea Jerohacho put Iobab tachea zagear raza zalo.
34 Iobab mele uprant Temanean-chea desant ravpi Husham’ tachê su-vater raza zalo.
35 Husham’ mortokoch Bodadacho put Hodad tachea zagear raza zalo; hannem Moab moidanar Mi-deaneancher ghuri ghal’li; tachê raj-dhanichem nanv Ovit aslem.
36 Hodad melea uprant Masrekacho Samla ta-chea zagear raza zalo.
37 Samla mor-tokoch nhõichê dege-voilea Rohoboth nograntlo Shaul tachê svater rai zalo.
38 Shaul sorle uprant Akboracho put Bal-Hanan tachea xinvasonar boslo.
39 Akboracho put Bal-Hanan somp-tokoch tachea zagear Hadar raza zalo; tachê rajdhanichem nanv Pau; hi Matredachi dhuv ji Mezahabachi dhuv asli.
40 Esaua vounxantlea sordaranchim nanvam, tanchea kuttumbam ani gan-vam pormannem, him: sordar Tim’na, sordar Alva, sordar Ieteth,
41 sordar Kenaz, sordar Teman, sordar Mibzar,
43 sordar Magdiel, ani sordar Iram’; Edom’ vounxantleamnim zo dês aplo kelo, tantuntlea tanchea vosteam pormannem tanche te sordar asle. Edomit lokancho mullpurus Esau.
Utpoti Chapter 37
1 Aplo bapui vosti kortalo teach desant - Kanaan desant - Jakob ravlo Ani Juzechi kotha hi:
2 Ani Jakobachi pillga hi: Juze, sotra vorsancho, êk tornno-dhak-tto. Aplea bhavam sangata, mhonnche, Bilha ani Zilpa hea tachea bapaichea dusrea bailanchea putam sangata to hindd rakhtalo tedna Juzen, aplea bhavanchê vaitt chalichi khobor bapaik laun dili.
3 Israelak Aplea heram sogllea putam poros, Juzecho odik môg aslo, kiteak to tachê mhatarê piraier zolmololo, ani tannem taka ek vivid rongachem anglem kel’lem.
4 Aplea sogllea putam-von bapui Juzecho ogllo môg kortalo tem polleun, dusre bhav taka zolltale ani taka te borê bhaxen dekho-so korinasle.
5 Juzek, êk pavtt, sopon poddlem, ani hem tannem aplea bhavank kôllit kortôch, tacho te odikuch dvês korunk lagle.
6 Tannem mhollem, ‘Mhojem sopon kitem tem aikat.
7 Ami soglle xetant asleanv ani gonvache bhore bandtaleanv. Tedna mhozo bhoro sott korn utthun ubo ravlo, ani tumche bhore, mhojea bhorea bhonvtim ba-govle.’
8 Tachea bhavamnim vicharlem, ‘Tum raza zaun amchê voir podvi choloitoloi oxem bi tuka dista?’ Uprant, hea sopnam ani tannem kitem mhollem tea khatir te tacho dusvas korunk lagle.
9 Juzek aniek sopon poddlem, ani hem-i tannem aplea bhavank kollit kelem, ‘Hanv anink sopnelom, ki suria, chond-rim’ ani ikra noketram mhojêxilean bagovlolim hanvem dekhlem.’
10 Hem sopon tannem aplea bapaikui sanglem, ani hannem taka bobatt keli: ‘Koslem hem tujem sopon? Tuji avoi, tuje bhav, ani hanv tuka noman korunk ietoleanv mhonn chint’tai?’
11 Tache bhav tacher virudh ravle, punn tacho bapui hem sogllem aplea monant samballtolo.
12 Soglle bhav aplea bapaicho hindd chorounk Shekem’ gel’le astam,
13 Israe-lan Juzek sanglem: ‘Tuje bhav Shekem’ hinddak gheun geleat; aik, hanv tuka tanchê sorxim dhaddtam.’ Juzen mhollem, ‘Vhoddê khoxen’
14 Bapain taka sanglem, ‘Tujea bhavanchi matxi sôd ghe ani magir mhaka khobor di.’ Hebronachea Gholant thaun bapain taka dhaddlo. Juze Shekem’ pavlo.
15 Ani ievtten-tevtten firtalo tedna eka mon’xan taka polleun vicharlem, ‘Are, tum konnak sôdtai?’
16 ‘Hanv mhojea bhavank sôdtam; te hanga aplo hindd rakhtat’, Juzen zobab dilo, ‘Te khoim asat tem tum zannoi?’
17 Tea mon’xan mhollem, ‘Te hangasorle gele. Dothan vetanv oxem kitem tãnnim mhollem hanvem aikolam.’ Mhonnttôch Juze aplea bhavanchê sôdik gelo ani te taka Dothan ganvant mell’le.
18 Pois thaun tãnnim taka dekhlo ani, to tanchê sorxim pavchê adinch, tacho jiv kaddunk tharailem.
19 Tãnnim ekamekak mhollem: ‘Ho polleiat sop-nekar ieta;
20 ieiat, tacho prann kaddum-ia ani khoichê-i êkê khonnint taka uddoun ami magir sangchem: Êkê nixttur mon’zatin taka giraslo. Tedna tachim sopnam khoim pavtat tim polleunchem.’
21 Punn hem aikotôch Reubenan tan-chea chopkeantlo taka vattailo. Tannem tankam sanglem: ‘Tacho prann ami kaddcho nhoi.’
22 Tanchea chopkeant-lo taka vattaun, porot taka aplea bapai-chê svadhin korchea nimitan Reubenan novean tankam somzaile: ‘Tachem rogot varoinakat; hea oronneant êk khonn asa, tantum taka uddoiat, punn tacher tumche hat ghalinakat.’
23 Aple bhav asle thoim Juze pavtôch, tachem vivid rongachem anglem tãnnim kaddlem
24 ani taka dhôrun êkê paddê baint uddoilo. Ti baim sukloli, udok tantum naslem.
25 Magir te jevnnak bosle. Tedna kãi Ishmaeli lôk Galaad thaun ietalo to tãnnim pollelo; gom’, pormoll ani rejin unttancher ghalun te Ejiptak vhortale.
26 Judan aplea bhavank sanglem: ‘Amchea bhavak jivo marun, ani tachea rogtan bhizun amkam kitem mellta?
27 Odik borem, ami taka tea Ismaelitank vikum-ia, punn kãi vaitt taka ami korchem nhoi. Kitlo-i zalear, to amchea rogta-masacho bhav.’ Ani tache bhav kobul zale.
28 Uprant kãi Midiani veapari thoin-sorlean vetale, tãnnim taka tê khonnintlo voir kaddlo ani Ismaelitank rupeachea vis nanneank viklo, ani hãnnim Juzek Ejiptak vhelo.
29 Reuben bãi-xim ailo ani taka Juze thoim mell’lona dekhun tannem khontin aplim vostram pinzlim!
30 Aplea bhavam-xim ieun tannem mhollem ‘Bhurgo thoim na! Hanv kitem korum?’
31 Hea khatir tãnnim êk bokddi marli ani tichea rogtant tachem angvostr buddoi-lem.
32 Ani tem vhorun tãnnim bapaik dilem, ‘Polle, hem amkam mell’llam. Tujea putachem bi tem zait?’
33 Tannem tem rokddench vollkholem, ani mhollem, ‘Hôi, tachench tem. Ran’votti mon’zatin taka giraslo. Mhojea puta Juzeche kuddkean kuddke kele.
34 Ani Jakoban dukhi-khontin aplim vostram pinzlim ani komor gonnan pangurlem. Ani boroch kall tannem tachem dukh kelem.
35 Sogllim tachim bhurgim taka buzvonn ditalim, punn ti taka melloch nasli. Ani tannem mhollem, ‘Mhojea putachem dukh korun hanv pathallant pavtolom.’ Hê porim Juzek vilapun ravlo.
36 Tea Midianachea veapareamnim Ejiptant vhorun taka Putifarak, patxaia-chea eka opxalak viklo. Ho opxal rajmhalachea rakhonndaracho mukheli aslo.
Utpoti Chapter 38
1 Tea kallar Juda aplea bha- vank sôddun vochun Hira nanvachea Adullamitager ravunk laglo.
2 Thoim Shua nanvachea eka Kananit mon’xachi dhuv Judak dixtti poddli; to tichê kodden logn zaun tichê sorxim nhidlo.
3 Ti gorbhest zali ani tika êk bhurgo zolmolo; haka Er nanv dilem.
4 Ti dusrê patt gurvar zaun tika êk put zolmolo, ani hachem nanv Onan.
5 Tisrê pavtti tika bhurgo zolmolo ani haka Shela nanv dilem. Ho bhurgo zal’lo tedna ti Kezib ganvant asli.
6 Malgoddea putak Erak Judan êk bail haddli, tichem nanv Tamar.
7 Punn Judacho malgoddo, Er vaitt margan choltalo, hem Sorvesporak man’lem na dekhun Tannem taka marun uddoilo.
8 Judan tedna Erachea bhavak, Onanak mhollem, ‘Chol, tujea somplolea bhava-chê bailê lagim ekvôtt kôr. Tichea poticho bhav koso ho kaido tichê sovem pall, ani sonsôt tujea bhavak utpon kôr.’
9 Sonsôt zalear apli zaun-china mhonn Onan zanna aslo; dekhun to, apnna vorvim aplea bhavak daiji zavcho nhoi mhonn, aplê vhoniê sorxim nhidtalo titlei pavtti to aplem bim zom’nir otoitalo.
10 Hem tachem kortub Sorvesporak chodd vaitt dislem, ani haka-i Tannem marun uddoilo.
11 Tedna Judan Tamarak, aplê sunek, mhollem, ‘Atam tum bapaichea ghora voch, ani mhozo put Shela vhodd zaisor, tujea vidvêponnachea bhesar rav.’ Oxem tika sanglem, kiteak, heram putam bhaxen Shelahchoi jiv vochot mhonn to bhielo. Ani Tamar geli ani aplea bapaichea ghora ravli.
12 Anink zaitea kallan Shuachi dhuv, Judachi bail meli. Tichi dukh korun somptôch, to ani tacho Adullamacho ixtt Hira Timna-ganvant gele, hanga tachea menddrank tastale.
13 Ticho sasro, menddrank tasunk, Timnah veta mhonn tika konnem sanglem.
14 Tedna tinnem aplim vidvêponnachim vostram kaddlim; ani aplem rup lipounk tonddar êk vev ghalun, Enaimachea mukhar Timnah vetea rostear ti bosli. Shela, Judacho dhaktto put atam boro vhaddla mhunn ti zanno asli, toriastana tika tachêkodde kazar kelina.
15 Tinnem aplem mukh dhamplolem mhonn Judan tika vollkhunk na, tannem ti ek naikinn mhonn tika dhôrli.
16 To rosteachê deger tichê-xim gelo, ani tannem mhollem, ‘Polle, mhaka tujê-xim nhidum di.’ Apli sun mhonn to noklloch aslo. ‘Tujê-xim nhidunk, tum mhaka kitem dixi?’ tinnem vicharlem.
17 Judan mhollem, ‘Mhojea hinddantlo êk bo-kuddlo.’ ‘Borem tôr, punn ho bokuddlo mhaka mello-sor, atanch mhaka koslo-i isaro di.’
18 Tannem mhollem: Tujêko-dden hanv kitem jamin dovrum? Tinnem mhollem: Tuji utrachi mudi, gof ani hatantlo danddo. Tedna tannem teô vostu tika dileô ani to tichê-xim nhidlo. Ani ti gorbhest zali.
19 Tamaran him addechim vostram sôddun, aplim vidveponnachim vostram nhesli.
20 Judan to bokddo divun Hirak aplea ixttak tichê-xim dhaddlo, ani jamin koxeô dovorloleô vostu tichê koddleô porot hadd mhonn taka sanglem. Hirak ti mell’lich na.
21 Magir tannem thoin-chea dadleank vicharlem: ‘Enaimant, rostea kuxik êk naikinn asli ti khoim asa?’ Tannim sanglem: ‘Hê suvater ekui naikinn nasli.’
22 To porot ailo, ani Judak mhollem, ‘Ti mhaka mellunk na. Ani ekui naikin thoim nanch mhonn ganvchea dadleamnim-i sanglem.’
23 ‘Teô vostu tikach dovrum-di. Ami atam kenn’neancho mhal zaunchi goroz na. Ti tumkam mellunk na khori, punn hanvem tika bokddo dhaddlolo.’
24 Hê ghoddnnê uprant sumar tin mhoine zale tedna konnem Judak sanglem: Tuji sun Tamar naikin koxi ravun pordvar adharlea ani ti gorbhest zalea. Tedna Judan hukum’ ghalo: Tika bhair haddat ani tika lasun marat.
25 Tika bhair kaddun haddli tedna tinnem aplea sasuk sangunk dhaddlem: Tea dadleacheô heô vostu asat zachê vorvim hanv gorbhest zaleam. Aninkui tinnem sanglem: Heô vostu mudi, gof ani danddo konnacheô teô tharaiat.
26 Judan teô vostu vollkholeô, ani mhollem, ‘Ti promannik ani hanvem chuk keli. Hanvench tika bhong kelem. Shelak mhojea putak ticho poti korunk hanvem dilem na. Ani Judan anink tichê lagim kuddicho ekvott kelo na.
27 Ticho porsut zauncho vêll pavtôch, tika zonvlle zatat mhonn koll’llem.
28 Sutt’tali tedna eklean aplo hat bhair ghalo; voijinin hea hatak dhôrun ek tambddem lal sut bandlem, ani mhollem, ‘Ho poilo zolmola.’
29 Punn tannem aplo hat bhitôr vhelo, ani tacho bhav poilo zolmolo. Ani voijinin mhollem, ‘Koslem mhonn dar tunvem tukach uktem kelem!’ Hea pasot taka Perez nanv dilem.
30 Magir tacho bhav zolmolo, tachea hatak tambddem sut aslem, tea pasot taka Zera nanv dilem.
Utpoti Chapter 39
1 Ismaelitamnim Juzek Ejiptant vhelo. Potifaran taka Ismaelit-karam koddlo vikto ghetlo. Ho êk Ejipt-kar, Faraoh patxaiacho êk opxal ani rakhonndarancho mukheli.
2 Sorvespor Juzechea sangata aslo, ani sogllea ta-chea kamamnim taka borem ies mellta-lem. To aplea dhoniachea ghorant jietalo.
3 Ani Sorvespor Juze sangata asa mhonn ani Sorvespor Juzen kel’lim sorv kamam iesvont korta mhonn tachea dho-niak khobor asli. Heach khatir
4 Potifarak to man’lo ani tannem taka aplo khas adhari sevôk kelo, hea pasot aplem ghor ani sogllem daiz tachea hatant sôddlem.
5 Tannem aplem ghor-dar ani sorv kitem aslem tem tachê svadhin kelem tedna thaun Juze khatir Sorvesporan tea Ejiptkarachea ghor-darachem koleann kelem; tachea ghorant ani xetant jem jem aslem tea soglleacher Sorvesporacho axirvad aslo.
6 Potifarak aplea ghora-daracho kosloch husko naslo, sogllem Juze kortalo, tannem fokot ieun jeunchem. Juze akaran sundor ani rupest aslo.
7 Ani thoddeach kallan, tachea dhoniachi potin Juzecher nodor ghalun taka anvddeun anvddeunk lagli, ani taka mhollem, ‘mhojê sorim nhid.’
8 Ta-nnem tika sapuch nakarun mhollem, ‘Polle, hanv hanga asam dekhun, mhojea dhoniak ghora-daracho kosloch husko na. Tannem sogllem mhojea hatant sôddlam.’
9 Hea ghorant mhojê poros vhodd konn na; ani tum tachi potin dekhun tuka sôddun her kitem-i mhojê svadhin korinastana dovrunk na. Oxem astana iedem vhoddlem noxtteponn korun kiteak mhonn Deva add hanv pap adarum?
10 Ani oxem ghoddtalem: ti dôr disa Juzek sangtali, punn to tichê lagim nhidunk, vô tichê sorxim ravunk raji zainaslo.
11 Eka disa, Juze ekloch ghorant aslo ani aplo vavr korunk gelo; anink ghorant vaur korpi konn bhitôr nasle;
12 tedna tinnem Juzechea angvostrak dhôrun mhollem, ‘Mhojê-xim nhid.’ Punn Juzen aplem vostruch tichea hatant sôddun apunn bhair dhanvlo.
13 Vostr aplea hatant sôddun ani to bhair dhanvla tem polleun,
14 tinnem heram chakrank ulo marun apoile ani mho-llem, ‘Hem polleiat! Mhojea potin ghorant haddla to Hebrev oslo beman korta. To mhojea kuddant mhojê sorim nhidunk ailo, dekhun hanvem killonch marli.
15 Hi aikun tannem bhair dhanv marli punn tachem vostr mhojê lagim urlem.’
16 Ani hem tachem vostr, aplo poti iesor tinnem apnna kodde dovorlem.
17 Taka-i tinnem tich kanni sangli, ‘Tunvem hanga haddlai to Hebrev mhojea kuddant ailo ani tannem mhaka motto beman kelo.
18 Punn hanvem bob marli tedna, hem vostr mhojê kuxik sanddun to bhair pollun gelo.
19 Juzecho dhoni, aplê bailechim utram aikun: ‘hê toren tujea chakran mhaka kelam’, to ekdom’ ragabhorit zalo.
20 Juzechea dhonian taka dhôrun bondkhonnint uddoilo; thoim to, patxaiachea her koideam sangata urlo.
21 Punn Sorvespor Juze sovem aslo ani taka aplo visvaxi môg dakhoitalo; hea khatir bondkhonnichea rakhonndarak Juze bhovuch man’lo.
22 Tannem heram koideank Juzechea hatant ghale ani thoim kitem ghoddtalem tacho taka zobabdar kelo.
23 Ani hi zobabdari to pallta vô na tem topasunk rakhonndarak huskoch zainaslo kiteak Sorvespor Juze sovem aslo ani to korta titlea-i kamam-nim Sorvespor taka iesvont ani subhagi kortalo.
Utpoti Chapter 40
1 Anink thoddea kallan, Ejipta-chea patxaiachea bottleran ani poderan aplea dhoniacher, Ejiptachea patxaiacher opman kelo.
2 Aplea dogaim opxalancher ragabhorit zaun, Faraohn tankam dogankui bond kele;
3 ani hankam rajmhalachea rakhonndaran-chea mukheleachea ghorant, Juze aslo tê bondkhonnint dovorle.
4 Tea mu-khelean Juzek tanchê chakrek dovorlo ani tãnnim zaito kall bondkhonnint sarlo.
5 Ekê rati bondkhonnint aslolea Ejiptachea patxaiachea bottlerak ani poderak, dogainkui ek sopon poddlem, ani zonn-ekleachea sopnak êk-êk somzonni asli.
6 Sokallim, Juze tanchê-xim ailo tedna tanchim mukhamollam dukhest aslolim pollelim.
7 Juzen bond-khonnint, aplea dhoniachea ghorant, aplea sangata aslolea Faraohchea opxalam kodde vicharlem, ‘Aiz kiteak tumi chintest asat?’
8 Tãnnim zobab dilo, ‘Amkam dogankui ek-ek sopon poddlam, ani hem sopon kitem zait tem parkhunk hanga konnuch na.’ ‘Sop-nanchi somzonni diuncho gunn ekleach Devacho to nhoi?’ oxem Juzen tankam mhollem, ‘Tôr tumchim sopnam kitem tim mhaka sangat.’
9 Mukhel bottleran, aplem sopon Juzek sangun, mhollem, ‘Mhojea sopnant hanvem mhojea fuddeant êk dak-vel dekhli
10 tika tin fantte asle. Ti vel palena fuddem ti ful’li, ani xekim dakan-che ghons pikle.
11 Hanv Faraohchi soreachi kals dhôrun aslom; tôr hanvem teô dakô kaddun Faraohchê kopant pill’lleô ani kals Faraohchea hatant dili.’
12 Juzen mhollem, tachi somzonni oxi: Tin fantte mhollear tin dis zaun asat.
13 Anink tin disamnim patxai tuji tokli voir kaddtolo ani tuka adlê zhuttiek portun dovortolo. Tacho mukhel bottler tum adim asloi tech porim atam-i taka ti kals tum ditoloi.
14 Punn tujem sogllem borem zatôch, mhozo-i matso ugddas kôr, ani mhaka-i hangasorlo bhair kaddunk patxaia mukhar ek borem utor ghal.
15 Mhaka tôr Hebrevanchea gan-vantlo bhair kaddlolo, ani hanga-i Ejiptant mhaka bondkhonn favo zaunk, hanvem kãich korunk na.’
16 Mukhel bottlerak Juzen taka faideak poddta tosli somzonni dil’li polleun, mukhel poderan-ui aplem sopon taka kollit kelem; tannem Juzek mhollem, ‘Mhaka-i sopon poddlem: hanv un-ddeancheô tin panttleô mhojea mathear ghevun vetalom.
17 Voilê panttlent Faraoh khatir bhazlolem sogllea jin’sanchem jevonn aslem; punn mhojê matheavoilê tê voilê panttlentlem jevonn sovnneamnim khalem.
18 Juzen taka zobab dilo, ‘Hi tachi somzonni: Teô tin panttleô mhollear tin dis zaun asat.
19 Anink tin disamnim Faraoh tuji tokli voir kaddtolo ani eka zhaddar tuka gollar martolo ani suknnim ieun tujem mas khatolim.’
20 Tisrea disa, Faraohcho zolm-dis aslo. Tannem sogllea aplea opxalank ek vhoddlem jevonn dilem; ani aplea opxalanchea fuddeant aplea mukhel bottlerachi ani mukhi poderachi tokli voir kaddli.
21 Tannem aplea mukhel bottlerak adlê zhuttiek portun dovorlo ani tannem Faraohchea hatant kals ghatli;
22 punn aplea mukhi poderak gollar marlo, Juzen tankam somzonni dilolê porim.
23 Toruipunn tea mukhel bottleran Juzecho mat punn ugddas kelo na, ani taka visorlo.
Utpoti Chapter 41
1 Don vorsam bolanddlea uprant, Faraohk ek sopon poddlem. To Nil nhõichê deger ubo aslo,
2 tedna Nil nhõitleô sat sundor ani ttunttunit gaieô voir sorleô ani choronk lagleô.
3 Uprant, anink sat voir sorleô, heô kurup ani barik asleô. Heô Nil nhõintleô aileô ani heram satam kuxik Nil nhõichê deger ravleô,
4 ani hea barik satamnim tea mottea satank ghirasun uddoileô. Uprant Faraoh nhidentlo zago zalo.
5 To porot nhidlo ani taka aniek sopon poddlem. Ekech nolliek sat zhun ani bhorlolim konnsam voir sorlim.
6 Uprant polle, sat barik ani udentechea varean suklolim konnsam bhair sorlim.
7 Ani hea suklolea konnsamnim tea mottea satank girasun uddoilim. Uprant Faraoh zago zalo ani apunn sopnetalo mhonn taka kollun ailem.
8 Dusrê sokallim tachem mon uchamboll zalem, ani tea sopnanchi somzonni gheuncheak Ejiptantlea sogllea mont-reank ani zannar mon’xank tannem apoun haddle. Aplim sopnam kitem tim tankam Faraohn sanglim, punn ekleanui tanchi somzonni dilina.
9 Tedna tea mukhel bottleran Faraohk mhollem, ‘Aiz hanv mhozo guneanv monant haddtam.
10 Faraoh patxai tujea chakrancher ragar zalo tedna tannem mhaka ani mukhel poderak rakhonndar-mukhe-leachea ghorant bond kele.
11 Ekê rati amkam dogankui ek-ek sopon poddlem, ani tankam veg-veglli somzonni asli.
12 Thoim êk torno-dhaktto Hebrev, rakhonndar-mukheleak êk chakôr aslo. Amchim sopnam taka sanglim, ani tannem amkam tanchi somzonni dili.
13 Ani tannem sanglolem tech porim sogllem ghoddun ailem: tunvem mhaka adlê zhuttiek portun dovorloi, punn tea poderak gollar marlo.’
14 Tedna Faraohn Juzek bondkhonnint thaun apounk dhaddlo ani tannim vegim-vegim taka thoincho kaddlo. Tachem khadd kaddtôch ani vostram bodoltôch, to Faraohchea fuddeant ailo.
15 Faraohn Juzek mhollem, ‘Mhaka ek sopon poddlam, ani konnacheanuch tem parkhunk zaina. Tum sopnanchi somzonni ditai mhonn hanvem aikolam.’
16 Juzen zobab dilo, ‘Mhaka tank na, punn Dev Faraoh patxaiak tuka upkarta ti somzonni ditolo.’
17 Tedna Faraohn Juzek mhollem, ‘Polle, mhojea sopnant hanv Nil-nhõichê deger ubo aslom.
18 Ovchit sat sundor ani ttunttunit gaieô nhõitleô voir sorleô ani thoim choronk lagleô.
19 Uprant, anink sat kurup ani barik gaieô, kednanch hanvem Ejiptant polleunk nant tosleô udkantleô voir sorleô.
20 Hea kurup ani barik gaieamnim tea poilea sat puttputtit gaieank girasun uddoileô,
21 punn tankam giraslea uprant ko-nnakuch tem kollchem naslem, kiteak teô adlê porim barikuch urleô. Itlean hanv zago zalom.
22 Magir anieka sopnant hanvem pollelem: Ekech nolliek sat dhoddim ani borim konnsam bhair sorlim.
23 Uprant polle, tanchê fattlean sat suklolim, barik ani udentechea varean korpololim konnsam bhair sorlim.
24 Ani hea barik konnsamnim tea dhodd konnsank girasun uddoilim. Hanvem hem sogllem parkheank sanglem, punn eklechean-ui mhaka tachi somzonni diunk zalem na.’
25 Juzen Faraohk mhollem, Faraohchem sopon ekuch Dev kitem kortolo tem Faraohk Tannem adim fuddench dakhoi-lam.
26 Sat boreô gaieô sat vorsam zaun asat; ani sat borim konnsam, toxench, sat vorsam; sopon ekuch.
27 Ani magir voir sorloleô sat barik ani kurup gaieô mhonngê sat vorsam ani sat pokim, udentechea varean korpololim konn-sam mhonngê dukhollachim sat vorsam.
28 Hanvem Faraohk sanglam toxem, ‘Dev kitem korunk sôdta tem Tannem tuka adim fuddench dakhoilam.’
29 Ejip-tachea ak’khea ganvant sufôll ani upôtt pikêchim sat vorsam ietolim.
30 Tea uprant, dukôll-bukhechim sat vorsam uprastolim, tea vorvim adli sufollai soglle visortole, kiteak hê bukhent sog-llo ganv padd zaun vetolo.
31 Fuddem marekar dukôll poddttolo ani hê vorvim adim sukôll aslo mhonn konnak ugddas legun ascho na. Kiteak to dukôll bhov marekar zatolo.
32 Faraohchem sopon dupett. Tacho ôrth mhollear, Devan hem sogllem tharailam ani To veginch ghoddon ie-xem kortolo.
33 Tôr, atam tunvem êk boro somjik ani budhvont monis vinchun kaddunk zai. Tachea hatant Ejiptacho dês astolo.
34 Tunvem aninkui zaite opxal vinchun kaddunk zai, ani sufollaiechea sat vorsam pottim vorsachea pikacho êk panchvo vantto kuxinuch dovorunk zai.
35 Hea ietolea borea vorsancho Jevnna-khannacho sogllo orôv tãnnim Faraoh-chea hukuma khal ektthaim korcho, ani ho kuxin kaddlolo orov xarantlea sogllea gudanv-koddeamnim bhôrun dovorcho ani to zagrutaien rakhcho.
36 Hê porim, Ejiptacher ietolea dukôll-bukhechea sat vorsam pottim Ejiptant goroz titlo samball’lolo orôv astolo ani desacho lôk bukhen morchona.’
37 Faraohn ani sogllea tachea opxalam-nim Juzechi ievzonn-manddavôll manun ghetli,
38 ani Faraohn aplea opxalank mhollem, ‘Juze poros purto monis amkam khoinsoruch mellchona, kiteak Devacho atmo ani boll tachê thaim asa.’
39 Ani Faraohn Juzek mhollem, ‘Devan tuka hachi soglleachi vollôkh dilea mhonnttôch, tujê sarko viveki ani xanno monis dusro konnuch na.
40 Tôr mhojea ganvcho karbhari tum zatoloi ani soglli mhoji porza tujea hukumank pallo ditoli. Hê sodrech khatir hanv tujê-on vhôdd.
41 Faraohn Juzek mhollem: ‘Hanv atam tuka ak’khea Ejipta voir rajpal nemtam.’
42 Faraohn aplea hatantli mudi kaddli hê mudiecher patxaiachi mhôr asli ani ti Juzechea bottak ghali. Tachea angak barik sonniechem vostr ghalem ani golleant bhangarachi sorpolli.
43 Apli dusri raj-gaddi Juzek cholounk-bhon-vunk dili, ani tache man-rakhonndar fuddem vochun aroddtale, ‘Dimbi môddat!’ Hê porim ak’khea Ejipta voir Juze rajpal zalo.
44 Ani Faraohn Juzek mhollem, ‘Hanv Faraoh patxai punn ak’khea Ejiptant, tujea hukuma bhair, konnuch hat vô paim halounchona.’
45 Ani Faraohn Juzechem nanv Zafenath - Paneah dovorlem. Ani tannem On ganvchea iadnikachi Potiferachi dhuv Asenat taka tachi bail korun dili. Ani Juzen ak’khea Ejiptant bonvddi marunk suru kelem.
46 Faraoh, Ejiptachea razachê sevek Juze vochun ubo ravlo tedna to tis vorsancho aslo. Ani Juze Faraohchea mhoreantlo vochun sogllea Ejiptant bhonvunk laglo.
47 Sufollaiechea sat vorsam pottim Ejiptant bhorpur pikavôll zali.
48 Ani satui vorsanchem sogllem pik tannem ekttãim kelem ani xaramnim bhôrun dovorlem. Eka-eka xarant sorv-bhonvtichea xetanchem pik tannem bhôrun dovorlem.
49 Ani Juzen itlo orov ektthailo - doriachê renvê sarkho ki Juzen to mapcho legun sôddlo, karann to khorench mezunk zainaslo.
50 Dukôll-bukhechem voros suru zaunchê adim Juzek Asenathiche - On ganvchea iadnikachê dhuveche dog put zolmole.
51 Tannem mhollem, ‘Soglle mhoje upodre-koxtt ani mhojea bapai-chem kuttumb Devan mhaka sarkhench visorxem kelem’, hea pasot tannem aplea malgoddeak Manasseh nanv dilem.
52 Tannem oxem mhollem, ‘Mhojea odruxttachea desant Devan mhaka bhurgeamnim sufôll kelo’, hea pasot tannem dusrea putak Efraim nanv dilem.
53 Ejiptant borem pik zal’lem tim sat vorsam somplim,
54 ani dukollachim sat vorsam suru zalim, Juzen sangun dil’lem tea pormannem. Sogllea bhailea desamnim bukh poddli, punn Ejiptachea desant sogllê suvater jevonn-khann melltalem.
55 Ejiptachea desant dukôll poddlo tedna, lôk Faraoh kodde jevunk-khaunk magunk laglo. Punn Faraohn Ejiptkarank sanglem: ‘Juze-xim vochat ani to tumkam sangta tem korat.’
56 Ak’khê prithumer dukôll poddlolo. Juzen aple gudanv ugôddle ani Ejiptachea lokak orôv dilo. Ejipt desant dukôll vaddon gelo.
57 Ak’khea sonv-sarantlo lôk Juze koddlo orôv vikto gheunk Ejiptak vetalo, kiteak ak’khê prithumecher marekar dukôll poddlolo.
Utpoti Chapter 42
1 iptant orôv viktat mhonn Ja- kobak gomtôch, tannem aplea putank mhollem, ‘Kitem mhonn tumi ekamekak polletat?’
2 Ejiptant orôv asa mhonn hanvem aikolam; bhuken mor-chê suvater, thoim tori vochun ilo orôv vikto gheiat.
3 Mhonnttôch, Juzeche dha bhav Ejiptant orôv ghevunk gele,
4 punn Jakoban ekleakuch Juzechea khas-bhavak, Benjamink tanchea borabor dhaddlona, kiteak to oxem chint’talo: ‘Taka koslench vaitt zaunchem nhoi!’
5 Kanaan’chea desant-ui dukôll poddlo dekhun, her loka borabor Israelache put orôv gheunk aile.
6 Ak’khea desant Juze razvôtt choloitalo ani toch soglleank orôv viktalo. Juzeche bhav gele, ani tachê mukhar saxttangim poddun tãnnim taka nomoskar kelo.
7 Juzen, pollena fuddem, tankam vollkhole punn tankam vollkhonaslea porim borich nibrai dakhoili. Hê porim, tannem vicharlem, ‘Tumi khoim thaun aileat?’ Tãnnim zobab dilo, ‘Ami orôv gheun-chê khatir, Kanaan-ganvant thaun aileanv.’
8 Juzen tankam vollkhole, punn tachea bhavamnim taka vollkholo na.
9 Jim tanchê vixim sopnam taka poddlolim, tancho ugddas korun tannem mhollem, ‘Tumi bhedi; amchea ganvchi topasnni korunk tumi hanga aileat.’
10 ‘Na, saiba’, tãnnim zobab dilo, ‘Tuje chakor jevnna-khannacho mhal vikto gheunk ami hanga aileanv.
11 Ami soglle ekach mon’xache put, ami bhedi nhoi, Saiba, ami satvik monis.’
12 ‘Na!’ Juzen mhollem, ‘khoreponnim tumi amchea ganvchi topasnni korunk hanga aileat.’
13 ‘Saiba’, tãnnim mhollem, ‘Ami tuje chakor soglle bara bhav asleanv; amcho bapui ekuch, Kanaan ganvcho. Sog-lleam poros lhan to atam bapai-xim asa ani amcho êk bhav somplo.’
14 ‘Han-vem mhollam toxench tem’, Juzen zobab dilo, ‘Tumi soglle bhedi.
15 Mhonn-ttôch, hanv tumchi atam porikxa kor-tolom: ‘Faraoh Patxaiachea nanvan soput ghevun tumkam sangtam, tumchea soglleam-on dhakttea bhavak mhojê-xim haddlea xivai tumi hangasorle vechena.
16 Tumchea bhavak hadd-cheak tumchê bhitorlea ekleak dhaddat; bakiche soglle pareachea xipaia khal bond urtole; hech porim tumchea sangnnean sot asa vô na tem topasunk zatolem. Na tôr, Faraoh patxaiachea nanvan soput gheun sangtam: ‘tumi soglle bhedi-lôk mhonn mhaka thavem.’
17 ani tankam tin dis bond dovorle.
18 Tisrea disa Juzen tankam mhollem: ‘Hanv sangtam tem tumi korat ani tumi jive urtoleat, kiteak hanv-ui Devak bhietam toslo monis.
19 Tumi promannik monis zalear, tumchê modlea eklean hanga bondkhonnint ravchem poddto-lem; punn heramnim orôv gheun dukollak sampoddlolea tumchea kuttumbank pavunk vochum-ieta.
20 Punn tumchea dhakttea bhavak mhojê-xim tumi haddunk zai: hê bhaxen tumchim utram khorim mhonn gom-tolem ani tumi morche nant.’ Ani tãnnim toxem kelem.
21 Tãnnim ekamekak mhollem: ‘Amchea bhavak lagun ami khorench guneanvkar; apli doia korat mhonn to amchê lagim magtalo tedna, kallzant to kitlo dukhest zal’lo tem ami pollelam; tori ami tachi kaklut keli na dekhun, atam hem dukh amcher ailam.’
22 Ani Reubenan tankam zobab dilo: ‘Bhurgeak vaitt korinakat mhonn hanvem tumkam sangunk naslem? Punn tumi aikunk na dekhun, atam tachea rogtacho ixôb ami diuncho poddlo.’
23 Te uloile tem Juzek somzolem mhonn tankam kollunk na, kiteak tanchê modem somzonni diupi konneklo aslo.
24 Juze tanchê sorxilo koddsorlo ani roddlo; ani porto ieun tanchê kodde uloilo; tannem tan-cheantlea Simanvak kaddun tanchê hujir taka bandlo.
25 Juzen tanchea sakamnim orôv bhôrunk ani tãnnim farik kel’le te duddu zonn-ekleachea sakant portun ghalunk, ani tankam vattek jevonn-khann diunk, hukum’ dilo.
26 Bhavamnim orôv ghet-lolo to aplea gaddvancher ghalo ani te gele.
27 Tãnnim rat sarli tea zagear, eklean gaddvak khavôdd ghalchê khatir, aplo sak ugoddlo ani saka voiruch tannem aple duddu pollele.
28 ‘Hanvem duddu farik kel’le te mhaka porot dileat’, oxem tannem aplea bhavank mhollem, ‘He polleiat, mhojea sakant asant.’ Tanchim kallzam sontapan virun koxim gelim, ani tãnnim bhirantin ekamekak polleun mhollem, ‘Devan mhonn amkam anink kitem favo kelem zait?’
29 Te Kanaant Jakob aplea bapai-xim pavtôch, kitem ghoddlolem tem sogllem taka tãnnim sanglem:
30 ‘Ejiptacho rajpal bhouch nibraien amchê kodde uloilo, ani ami bhedi koxe tea desant aileat mhonn tannem mhollem.’
31 ‘Ami bhedi nhoi, ami sanglem, Ami satvik monis.
32 Ami soglle bara bhav, ekach bapaiche put. Eklo bhav melo, ani dhaktto to Kanaan-ganvant amchea bapai-xim asa.’
33 Tea desachea rajpalan amkam mho-llem, ‘Tumi satvik monis zalear mhaka oxem gomtolem: ‘Tumchea bhavantlea ekleak mhojê-xim dovrat; bakiche tumi bhuken vollvolltolea tumchea soireank orôv ghevun vochat.
34 Punn tumchea dhakttea bhavak mhojê-xim gheun ieat. Tednach ki tumi bhedi nhoi punn satvik mhonn mhaka kollun ietolem. Tumchea bhavak hanv porot tumchea tabeant kortolom, ani tumchean hanga ravun hea desant veapar-dhondo korunk zatolem.’
35 Tãnnim sakantlo sogllo orôv ôtlea uprant, zonnekleak aplea sakan aple duddu mell’le, ani duddvancheô potiô polleun, te ani tancho bapui bhiele.
36 Tedna Jakob tanchea bapain mhollem, ‘Sogllim mhojim bhurgim mhojê koddchim tumi kaddun vhortat, Juze na zalo, Simeon na zalo; ani atam tumi Benjaminank-ui vhorunk sôdtat. Hem sogllem sõstam to hanv.’
37 Tedna Reubenan aplea bapaik mhollem, ‘Hanv Benjaminak porot hanga haddina zalear, mhojea dogam putancho jiv kadd. Taka mhojea tabeant kôr, ani hanv taka porot haddtam.’
38 Punn tannem zobab dilo: ‘Mhozo put tujea borobor vechona; tacho bhav melo, ani atam to ekloch urla. Vatter taka kitem-i vaitt zait. Hanv mhataro zalam, ani hem dukh mhaka samkhench fonddant pavoitolem.’
Utpoti Chapter 43
1 Kanaan desant dukôll anikui paxtt zalo;
2 ani Ejiptant thaun danno gotto haddlolo to tannim sompoilea uprant, tannem aplea putank mhollem, ‘Porot vochun amkam thoin-cho ilo orôv ghevun ieat.’
3 Punn Ju-dan aplea bapaik mhollem, ‘Amchea bhavak ghevun gelea xivai ami tachea fuddeant paim dovorchoch nhoi oxem amkam tea mon’xan xiddkaileat.
4 Amchea bhavak amchê borabor vho-runk tum kobul zatai zalear, ami thoim orôv haddunk vetanv.
5 Punn tum taka dhaddunk kobul zainai zalear, ami thoim vochpache nant; kiteak tea mon’xan amkam ukteponnim xiddkailea: tum-chea bhavak tumchê borabor haddinant zalear tumi mhojem tondd polleche nant. ’
6 Tedna Israelan mhollem: ‘Anink êk bhav asa mhonn tea mon’xak sangun mhojer hem orixtt kiteak mhonn tumi haddlem?’
7 Tedna tãnnim mho-llem: ‘Tea mon’xan amchê vixim ani amchea ghorannea vixim barkaien vicharit ravlo: Tumcho bapui ozun jivo asa? ani Tumkam anink êk bhav asa? Tachea prosnancheô zapô amkam divcheô poddleô. Tumi tumchea bhavak haddat’ oxem to amkam sangot mhonn amkam adinch koxem kollpa-chem? ’
8 Judan Israelak aplea bapaik mhollem, ‘Mhojea tabeant korun taka dhadd, ani ami thoim rokddech vetanv; oxem kelem zalear ami ani tum ani amchim bhurgim-ballam vanchtolim, morchim nant.
9 Hanv mhakach êk khatri koxi ditam. Taka hanv boreponnim porot haddina zalear, hanv sodankal guneanv-kari zaun vetolom.
10 Ami itlo vêll ibaddunk naslo zalear, thoim vochun ami don pavtti portotole asleanv.’
11 Tedna tanchea bapain Israelan mho-llem, ‘anink dusro upai nanch zalear, tumi oxem korat: amchea ganvcheô boreantleô boreô thoddeô vostu ek dennem koxem tea mon’xak vhorat: ilem gom’, mhonv, sambhar, bieô ani bodo-mam.
12 Dupett duddu tumchê kodde asum-di, kiteak tumchea sakamnim mell’leat te duddu portun diat; chuk bi konnachi zalea astoli.
13 Tôr atam tumchea bhavakui borabor ghevn tea mon’xa kodden porot vochat.
14 Sorv-podvedar Dev tea mon’xachem kalliz movallaum, ani to tumchea dusrea bhavak ani Benjaminak tumchê adhin korum. Bhurgeanchem hanv dukh korun urlom zalear urlonch!’
15 Tôr, tãnnim tem dennem ani dupett duddu ghevun, Benjamina sangata Ejiptachi vatt dhôrli. Thoim pavtôch, Juzechea fuddeant gele.
16 Benjaminak pollena fuddem Juzen aplea ghorantlea mukhel karbhareak sanglem, ‘Hea mon’xank bhitôr vhor. Aiz te mhojea sangata jevtole. Tôr eka zonavorak mar ani jevonn toiar kôr.’
17 Ani Juzechea hukuma pormannem, tea mon’xan kelem, ani tankam Juzechea ghorant bhitôr kaddle.
18 Tankam Juzechea ghorant bhitôr vhortana te bhieun asle, ani tannim mhollem: ‘Poilê pavtt amchea sakamnim mell’llolea duddvam khatir amkam bhitôr haddleat. Sott korn amkam abghat kortole, ani amchim gaddvam bi ghevun amkam-i tanche gulam kortole.’
19 Dara-xim pavona fuddem, tãnnim Juzechea mukhel karbhareak mhollem,
20 ‘Saiba, poilê khepek orôv vikto gheunk ami hanga ailole;
21 Ami vatter pennem kelem tedna, amche sak ugoddtôch, soglleank ap-aplea sakant duddu mell’lle farik kel’le title-i. Tuka porot diunk ami te atam haddleat.
22 Ani orôv gheunk-ui amchê kodde anink duddu asat. Amchea sakamnim te amche duddu konnem ghaleat hi amkam khobor na.’
23 Tea mukhel kar-bharean mhollem, ‘Xant ravat. Bhieum nakat. Tumchea Devan, tumchea bapaichea Devan, to thevo tumchea sakamnim ghala asot. Tumi farik kel’le te duddu mhaka pavle.’ Uprant tannem Simeonak tanchê-xim haddlo.
24 Ani tea mon’xan tankam bhitôr vhele. Paim dhuvunk tankam udok dilem, ani tanchea gaddvankui khavôdd ghali.
25 Tãnnim aplim dennim bhair kaddlim. Ani Juze don’param ieta tedna taka tim diunk toiar dovorlim, kiteak tanchea sangata to jevtolo mhonn tannim aikololem.
26 Juze ghorant bhitôr sortôch, apnna lagim aslolim dennim tannim taka dilim ani tachea fuddeant te sorpottle.
27 Tannem tanchê bholaikechi khobor ghetli ani mhollem, ‘Tumchea mhatarea bapaichi khobor tumi adim mhaka sangloli. To boro asa mum? Ozun jivo asa to?’
28 Tãnnim zobab dilo, ‘Tuzo khalto chakôr, amcho bapui, ozun jivo ani bholaiken boro asa. Ani tokleô bagaun tannim taka noman kelo.
29 Ani Benjaminak aplea bhavak, aplê avoichea putak polleun, Juzen mhollem, ‘Tôr, ho to tumcho bhav lhan mhunnot to. Dev tuka aplo axirvad dium, mhojea puta.’
30 Sott korn Juze thoincho koddsorlo kiteak aplea bhava khatir tachem kalliz sogllench virlem. Ani sanvrona zaun to aplea bhitorlea kuddant gelo ani boroch roddlo.
31 Magir, tondd-bi dhuun ani somadhan zaun tannem formailem: ‘jevonn kaddat.’
32 Juze kuxin eka mezar jevtalo, ani tache bhav dusrea. Bakiche Ejiptkar jevnnak boslole te kuxinuch asle, kiteak Hebrevam sangata jevunk tanchean zaina. Oxem korunk mhollear tankam êk kanttallo.
33 Tache bhav Juzek fuddo korun mezar boslole, zonn-eklo ap-aplê piraiê pormannem, vhoddlo tem dhaktto porian. Hê porim tankam bosoil’le dekhun, te eka-mekak polleun thottakle.
34 Magir tannem aplea samkarcheô jevnna-vostu kaddun-kaddun tankam vaddunk dhaddleô, punn Benjaminak heram poros panch-pott vaddlem. Oxe te tachea sangata piele ani khuxal zale.
Utpoti Chapter 44
1 Juzechea ghorachea mukhel karbhariak tannem oso hukum’ dilo: ‘Tanchean vhorunk zata titlo orôv tanchea sakamnim bhôr, ani te ditat te duddu porot tanchea sakant voiruch ghal.
2 Mhojem pieunchem rupeachem kop, duddvam borabor dhaktteachea sakant ghal.’ Ani Juzen formail’lem toxem tannem kelem.
3 Dusrea disa bhov sokallim, mhal tanchea gaddvancher ghalun tankam vochunk sôddle.
4 Xarantle te chodd-xe fuddem pavlenant, tedna Juzen aplea mukhel karbhariak mhollem, ‘Vegim chol, tea mon’xanchi patth dôr. Ani tuka te mellttôch, vichar: Tumkam borem kelea uprant kiteak mhonn tumi vaittan farik kortat?
5 Kitea pasot mhojea dhonia-chem, pieunchem rupeachem kop tumi chorun vhelam? Hea kopan to nhoinch pieta, bogor tantun to parkhita Tumi oxem korun, chodd vaitt kelem! ’
6 Tannem tankam addaun dhortôch, taka dhonian sanglolem titlem-i mhu-nnon kaddlem.
7 Tãnnim mhollem, ‘Kitem mhonnttai, Saiba; hê porim tum kiteak uloitai? Toslem kortub adarunk tujea chakranchea monant kednanch ieunchem na.
8 Amchea sakamnim amkam mell’lle te duddu ami Kanaan thaun hanga portun haddle. Tôr, koxê porim ami tujea dhoniachea ghorantleô rupea vô bhangaracheô vostu chorto-leanv?
9 Saiba, tuka ti vost konna-i tujea chakram kodde mellot zalear, taka moronn favo ani bakiche soglle ami tuje gulam’ zatoleanv.’
10 Tannem zobab dilo, ‘Borem asa, tumi sangtat toxem zaum di, punn zachê kodde tem kop mellot, toch eklo mhozo chakôr za-tolo, bakiche soglle tumi xantin vochat.’
11 Hem aikun, tãnnim zonn eklean ap-aple sak sokla denvoile ani ek-eklean ap-aplo sak ukto kelo.
12 Tannem sak topasle, vhoddleacho sak poilo ani xekim nimanneacho, ani tem kop Benjaminachea sakant mell’lem.
13 Ted-na bhavamnim, dukhi-khontin aplim vostram pinzlim, ani samonn gaddvan-cher ghalun te xarant portole.
14 Juda ani tache bhav Juzechea ghora pavle tedna, to thoinch aslo. Te tachê mukhar zomnir sorpottle.
15 Ani Juzen vicharlem, ‘Hem anink tumi kitem kelem? Mhaka parkhunk tank asa mhonn tumi nokllo asleat?’
16 ‘Saiba, tuka amchean anink kitem mhonnum-ieta’, oxem Judan mhollem, ‘Amchean koxi uzôt korum-iet? Koslo zobab divun amchean suttum-iet?’ Devanuch tujea chakrancho gu-neanv sobhemazar ukto kela. Ami soglle, zache thaim tem kop mell’llam toch nhoi, bogor soglle ami tuje chakor zatanv!’
17 Juzen mhollem, ‘Na, toxem nhoi! Toxem hanv kednanch korchona! Fokot zachê thaim tem kop mell’lam toch eklo mhozo chakor zatolo. Bakiche tumi soglle, xantin tumchea bapai-xim portun vochat.’
18 Juda Juzê-xim lagim sorlo ani tannem mhollem, ‘Saiba, upkar magtam, ragar zaum naka. Mhojea monant asa tem tuka sangum-di; tum Faraoh sarko.
19 Saiba, tuvem amkam oso vichar kel’loi, Tumcho bapui, vô tumkam aniek bhav asa?
20 Ani ami zobab dil’lo, Amcho bapui asa punn to zantto zala, ani amkam êk lhan bhav asa ani ho taka mhatar piraier zolmola. Tacho bhav mela ani ho ekloch tachê avoicho bhurgo ozun jivo asa; ani tacho bapui tachi chôdd opur-bai korta.
21 Saiba, tuji nodor tacher ghalchê khatir taka hanga haddunk, tunvem amkam sangleim,
22 ani ami Saiba tuka mhollem: ‘bapaik sanddun tachean ieum nozo; to taka sanddun ailear tacho bapui mortolo.
23 Tedna tuvem mholleim, Tumchea dhakttea bhavak hanga haddinant zalear, tumkam mhojea fuddeant ieunk mellchem na.
24 Amchea bapai-xim vetôch, tunvem amkam sangloleim titlem-i taka kollit kelem.
25 Magir tannem amkam porot orôv haddunk vochat mhonn sanglem.
26 Taka ami zobab dilo, Amchean vochunk zaina; amchea dhakttea bhavak amchea sangata vhelea xivai, tea mon’xachea fuddeant amkam gheunche nant. Amcho dhaktto bhav amchea sangata asot tednach amchean thoim vochum-iet.
27 Amchea bapain amkam mhollem, Tumi zannot, mhojê potinnin mhaka fokot dog put uzvadda haddle.
28 Eklo mhaka sanddun gelo. Taka ran’votti mon’zatimnim pisddun khelo astolo, kiteak to gel’lo to anink porot ieunkuch na.
29 Ani haka tumi vhorun, kitem-i taka ghoddlem zalear, hê mhojê mhatarê piraier tachê khontin hanv mortolom.
30 Ani atam Saiba, Judan mhollem, hea bhurgeak ghenas-tana hanv mhojea bapai-xim vochun zalear,
31 bhurgo mhojea sangata na tem polleun tacho jiv vetolo. Tacho jiv bhur-geachea jivant guttlovn asa, ani to itlo mhataro zala, ki tacho jiv kaddunk hi khont puro zatoli.
32 Tea bhair, bhurgea vixim hanvem mhojea bapaik khatri dilea. Zôr hanv taka porot tujê kodden haddina tôr hanv sodankal mhojea bapaichea mukhar opradhi zatolom.
33 Ani atam, Saiba, bhurgeachea zagear hanvuch tuzo chakôr koso ravtam; taka aplea bhavam sangata vochum di.
34 Karonn, zôr ho bhurgo mhojea san-gatak nasot zalear, mhojea bapai-xim hanv koso mhonn vetolom? Mhojea bapaik vaitt zatolem tem mhojean matui polleunk zaunchem na.’
Utpoti Chapter 45
1 Juzechean aplea chakram hujir, apnnak kitem bhogtalem tem sanvraunk zaina zalem, dekhun thoinche bhair sorat mhonn tankam sanglem. Apunn konn to Juzen aplea bhavank uktem kelem tedna tachê-xim konn naslo.
2 Ani to vhoddlean roddunk laglo; tem Ejiptkaramnim aikolem ani Faraohchea ghorcheancheai kanar poddlem.
3 Tea vellar Juzen aplea bhavank mho-llem: ‘Hanv to Juze; mhozo bapui ozun jivo asa?’ Punn tache bhav taka zap diunk xoklenant, kiteak te tachê hujir sarkhech ghaborlole.
4 Tedna Juzen tankam mhollem, ‘Matxe lagim sorat.’ Ani tãnnim toxem kortôch, tannem mhollem, ‘Hanv Juze tumcho bhav zaka tumi Ejiptant viklolo.
5 Punn tumi atam udas zainakat, vô mhaka viklo dekhun tumcho guneanv korum nakat. Khore-ponnim Devanuch, porjecho jiv sam-ballchê khatir, mhaka hanga dhaddlo.
6 ‘Hea desant dukôll ailear atam don vorsam zalim; anikui oslim panch vorsam ieunchim asa, tedna nangrop-lunvop khainch zavchem na.
7 Tumcho jiv hea sonvsarant rakhunk ani tumchê sonstintleant jivim samballunk, tumchea adim Devan mhaka hanga dhaddla.
8 Mhonnttôch tumi mhaka hanga dha-ddunk na, bogor Devan; ani Tannem mhaka Faraohcho bapui-so korun, tachea ghora-daracho dhoni ani sogllea Ejipt desacho rajpal kela.
9 Atam tumi vegim mhojea bapai-xim vochat, ani taka kollit korat, ‘tuzo put Juze oxem mhonntta: Devan mhaka akhea Ejiptacho rajpal kela; vegim mhojê-xim ie.
10 Tujean Goshen pran-tant ravunk zata, ani tum mhojê-xim la-ginch astoloi tum, tujim bhurgim, tujim natram, tujim menddram, ani bokddeô, tujim gorvam, ani tujem asa titlem-i ghevun hanga ie.
11 Thoim mhojean tuzo samball korunk zatolem. Bukhê-dukollachim anink panch vorsam urleant; tum ani tujem kuttumb ani sogllem tujem tem durbollkaien jiel’lim mhaka naka.
12 ‘Ani atam tumi soglle, ani tum Benjamin legun, hanv khore-ponnim tumchê lagim uloitam mhonn tumich pollelam.
13 Ejiptant mhaka kitlo man asa, ani tumi dekhlam titlem-i mhojea bapaik sangat. Ani vegim taka gheun hanga ieat.’
14 Tannem Benjaminachea golleak veng marli ani roddlo; ani Benjamin-ui tachea buzar roddlo.
15 Ani tannem ekan-ek sogllea aplea bhavank umo dilo ani ek-ekleacher poddun roddlo. Hachê uprant, tache bhav tachê kodde ulounk lagle.
16 ‘Juzeche bhav aileat’ hi khobor Faraohchea rajmhalant pavli. Ti aikun Faraoh ani tache chakor khuxal zale.
17 Faraohn Juzek mhollem: ‘Tujea bha-vank sang, Oxem korat: Tumchim zonavoram ladun Kanaan desant vegim vochat.
18 Tumi tumchea bapaik ani tumchea ghorcheank gheun mhojê-xim ieiat; hanv tumkam Ejipt desantli boreantli bori zomin ditolom, ani tum-kam hea desantlean ut’tom ani bhorpur jevonn khaunk melltolem.
19 Tanchea bailam-bhurgeank haddunk, Ejiptantleô gaddieô-ghodde vhorat mhonn tankam hukum ghal, ani tanchea bapaik gheun hanga ieiat.
20 Ani tumchea pattim urlolea vostum sovem husko kaddum nakat, kiteak Ejiptant asa tem boreant-lem borem tumchem zatolem.’
21 Sanglolem tê porim Israelachea putamnim kelem, ani Juzen tankam gaddiô-ghodde, Faraohchea hukuma khal ani vattek-ui jevonn dilem.
22 Ani sogllea bhavank, bodli korpak, tannem novim vostram dilim; punn Benjaminak tannem tin’xim rupeache-nanne dile, tech porim panch torechim novim vostram.
23 Tea bhair, Ejiptantlo boreantlo boro mhal dha gaddvancher aplea bapaik dhaddun dilo; anink dha stri-gaddvancher orôv, undde ani vattek tachea bapaik jevonn-khann ghalem.
24 Ani tache bhav bhair sorle tedna, tannem tankam mhollem, ‘Atam tumi vatter bextte zhogddum nakat.’
25 Te Ejiptantle bhair sorun aplea bapai Jakoba-xim Kanaan ganvant aile.
26 ‘Juze ozun jivo asa!’ tãnnim bapaik sanglem, ‘Ani atam to ak’khea Ejiptacho rajpal!’ Jakob nin’novlea porim zalo ani tanchem sotmaninaslo.
27 Punn Juzen kitem mhollem tem taka kollit kortôch ani ghodde-gaddiô ani itlo mhal haddlolo polleun, Jakob tachea bapaicho jiv bhorlo.
28 ani Israelan mhollem: ‘Hench puro mhaka! Mhozo put Juze ozun jivo asa! Morchê adim, thoim vochun, hanv taka polletolom.’
Utpoti Chapter 46
1 Jakoban aplem kitem aslem titlem-i manddun, to Beersheba ganvant gelo; hanga aplea bapai-Izaakachea Devak bhettô keleô.
2 Ani Devan taka, ‘Jakob, ê Jakob!’ hê porim ulo marun tachêkodde to uloilo. ‘Polle, hanv hanga asam’, tannem zap dili.
3 Tannem mhollem, ‘Hanv Dev, tujea bapaicho Dev. Ejiptant vochunk tum bhieum naka; tujê sonstik hanv thoim ek vhodd raxttr kortolom.
4 Hanv tujea sangata Ejiptant vetolom, ani hanvuch tujê sonstik thoinchi porot hea ganvant haddun pavoitolom. Tujea nimannea vellar Juze tujê kuxik astolo.’
5 Tedna Jakob Beershebantlo bhair sorlo; ani taka haddpa khatir Faraohn dhaddlolea gaddeamnim Israelachea putamnim aplea bapaik Jakobak, aplea bhur-geam-ballank ani bailank bosoun vheleô.
6 Te aplim menddram-bokddam ani Kanaan desant melloiloli dhon-girestkai gheun Ejipt desant aile. Hê porim Jakob ani tachi soglli sonsôt Ejipt desant aili.
7 Tannem apnna borabor aplea putank-dhuvank, natvank-natink, ani sogllê aple sonstik Ejiptant haddli.
8 Ejiptant pavlolea Israelachea putan-chim nanvam him: Jakobachem ku-ttumb, tachea borabor, Ejiptant gelem tem sogllem hem: tacho malgoddo put Reuben.
9 Reubenache put: Hanok, Pallu, Hezron ani Karmi.
10 Simeonache put: Jemuel, Jamin, Ohad, Jakin, Zohar ani Shaul ho nimanno êkê Kanaanit bailecho.
11 Leviche put: Gershon, Kohat ani Merari.
12 Judache put: Shela, Perez ani Zera. (Er ani Onan, Kanaan ganvant mele.) Perezache put Hezron ani Hamul.
13 Issakarache put: Tola, Puva, Jashub ani Shimron.
14 Zebulunache put: Sered, Elon ani Jabeel.
15 He soglle Padam-Aranamt, Leahn Jakobak utpon kele; tea bhair tachi dhuv Dina; sogllim mellun tache put ani dhuvô mhollear tet’tis.
16 Gadache put: Zifion, Haggi, Sheuni, Ezbon, Eri, Arodi ani Areli.
17 Ashe-rache put: Imna, Ishva, Ishvi, Beria, ani hanchi bhoinn Sera. Beriache put: Heber ani Malkiel.
18 Him solla zannam, Zilpachê udexim Jakobachi sonsôt Zilpa: Labanachi chakornn, ani Leahchê, aplê dhuvechê chakrek tem dil’lem.
19 Jakobak Rakela udexim dog put zolmole: Juze ani Benjamin.
20 Ejiptant Juzek dog put zolmole: Manasse ani Efraim, ani hanchi avoi Asenat, Potifera, On ganvchea eka iadnikachi dhuv.
21 Benjaminache put: Bela, Beker, Ash-bel, Gera, Naman, Ehi, Rosh, Muppim’, Huppim’ ani Ard.
22 Him chovda, Rakela udexim Jakobachi sonsôt.
23 Danache put: Hushim’.
24 Naftaliche put: Jazzeel, Guni, Jezer ani Shillem’.
25 He sat, Bilha udexim Jakobachi sonsôt Bilha: Labanachi êk chakornn ani aplê dhuvê-Rakelachê chakrek dil’li.
26 Jakobachea kuttumbantlim jim mon’xam Ejiptant gelim tim, Jakoba-chea putanchea bailank sôddun, sog-llim mellun sãsotth (66) zonnam aslim.
27 Ani Juzeche put je Ejiptant zolmole te dog. Jakobachea kuttumbantle soglle vangddi Ejiptant gele te sot’tôr.
28 Juzen Goshen prantant apnnak mellchê khatir, Jakoban Judak fuddem dhaddlo. Te thoim pavona fuddem,
29 Juze aplê gaddient bosun, bapaik mellunk Goshen gelo. Taka bhettun tachea golleak tannem veng marli ani tachê maner apli man dovrun zaito vêll roddlo.
30 Tedna Israelan Juzek mhollem: ‘Tum ozun jivo asa, dekhun tujem sukh hanvem pollelem; atam mhaka khuxal morum-di.’
31 Magir Juzen aplea bhavank ani aplea bapaichea ghorcheank mhollem: ‘Hanv vochun Faraohk khobor ditam ani taka sangtam: Kanaan desant aslole mhoje bhav ani mhojea bapaichim ghorchim mon’xam mhojê-xim aileant.
32 Te gonvlli, menddram-bokddam pospi; te aplea menddranche, bokddanche ani gorvanche hindd ani apnna kodden aslolem titlem sogllem gheun aileat.
33 Faraoh tumkam apoun vichartolo: Tumcho dhondo koslo?
34 Tedna tumi sangat: Bhurgeponnar thaun aiz legun ami tumche chakor gorvam-menddram pôstat; amcho ani amchea purvozancho dhondo hoch. Oxem sanglear tumi Goshen prantant ravunk pavtole, karonn Ejiptkarank sogllea gonvlleancho kanttallo dista.’
Utpoti Chapter 47
1 Oxem Juze Faraoh-xim gelo ani taka mhollem, ‘Mhozo bapui ani mhoje bhav, Kanaant thaun, aplea gorvam-hinddank ani aslem titlem-i gheun hanga pavleat, ani atam te Goshen prantant asat.’
2 Tannem aplea bhavant-lea panch zonnank vhorun Faraoh mukhar tankam ube kele.
3 Faraohn tachea bhavank vicharlem, ‘Tumcho vavr-dhondo kitem?’ ani tãnnim Faraohk zobab dilo: ‘Ami tuje chakor gorvam-rakhnne; amche purvoz toch dhondo korun aileat.’
4 Ani tea fuddem tãnnim Faraohk mhollem, ‘Kanaan ganvant itlo dukôll poddla, ki tujea chakranchea hinddank thoim chorôv melloch na, dekhun ami hanga ravunk aileanv. Tôr, upkar korun Goshen prantant pennem korunk tujea chakrank maneatai di.’
5 Tedna Faraohn Juzek mhollem, ‘Goshen prantant tankam ravum di, ani tanchê modle konnui ikmotin huxear monis asat zalear tanchê adhin mhozoch hindd ghal.’
6 Ho Ejiptacho ganv tumchea dolleam mukhar asa. Borem tôr, tankam Goshen borea-xea zagear aplem thikann korum-di. Ani tujea bhavam modem bore huxar rakhnne ani poramos kortat tosle asat zalear, mhojea zonavoranche mukhel rakhnne korun dovor.
7 Uprant Juzen aplea bapaik vhorun Faraohk dakhoilo, ani Jakoban taka axirvad dilo,
8 ani Faraohn vicharlem, ‘Tuji pirai kitli?’
9 Jakoban Faraohk zobab dilo, ‘Hanga-thoim firun hanvem kaddleant tim vorsam sogllim ekxem-tis, mhojea purvozamnim kaddleam titlim nhoi; tanchê poros thoddim punn kotthin vorsam tim zaun aslim.’
10 Jakoban Faraohk aplo axirvad dilo ani Faraoh sorxilo koddsorun gelo.
11 Tea uprant, Juzen aplea bapaik ani bhavank Ejipta-chea boreantlea borea zagear, Faraohn hukum’ dil’lo tea pormannem, Rameses prantant tankam zomin dili.
12 Aplea bapaik, bhavank ani urlolea ghorabeak, bhou lhan aslim tankam legun, jevnna-khannachi soglli toiari Juzenuch keli.
13 Ak’khea sonvsaracher bukh-dukôll itlo koddok zaun gelo, ki jevonn khoinsoruch mellonaslem, ani Ejiptantlo ani Kanaantlo lôk bhuken bhagun osokt zalo,
14 Orôv vikun punzailole soglle duddu Juze Faraohchea rajmhalant pavte kori.
15 Ejiptantle toxe Kanaantle soglle duddu somple tedna, Ejiptantlo lôk Juzê-xim ieun porath’talo, ‘Amkam jevunk-khaunk di, tujea dolleam mukhar amkam upaxim morunk sôddum naka. Amche soglle duddu somple.’
16 Juzen tankam sanglem, ‘Tumchê kodde duddu nant zalear, tumchim zonavoram diat. Tachê bodlek hanv tumkam jevonn-khann ditam.’
17 Hê porim tãnnim aplim zona-voram haddlim, ani Juze tankam, tan-chea ghoddeam, menddram, bokddeam, gorvam ani gaddvam pormannem jevnna-khannacho mhal ditalo. Tea vorsa tannem tanchea zonavoranche bodlek tankam orôv dilo.
18 Tem voros somplem tedna fuddlea vorsa te tachê kodden ieun mhonnunk lagle: ‘hi gozal amchea dhonia koddchi amchean lipoun dovrunk zaina. Sot tem hem, amcho sogllo duddu somplo. Am-chea zonavoranche hindd dhoniachea tabeant asant. Atam dhonia mukhar dovorpak amchea kuddim ani amchê zomini bhair amchê lagim anik kainch urlolem na.
19 Ami morum na zaunk ani amchim xetam padd zaina zaunk, jevnna-khanna bodlek ami amkanch ani amchi zomin ditanv. Hê porim ami Faraohche chakor zatoleanv ani amchi zomin ta-chea tabeant zatoli. Amcho jiv samba-llunk ani nhoi morunk ani zomin padd zaina zaunk ilem bim amkam di.’
20 Faraohchea nanvan, Juzen Ejiptantli soglli zomin vikti ghetli. Sogllea Ejipt-karamnim aplim xetam vikun kaddlim, kiteak bukheche zall vhaddot ravle; ani soglli zomin Faraohchea tabeant zali.
21 Ejiptachê ekê ximer thaun dusrê ximer, Juzen sogllea lokak chakor korun sôddle.
22 Fokot iadnikanchea hatant asli ti zomin Juzen vikti ghetlina. Tannim tanchi zomin vikchi-i poddlina, kiteak Faraohn tanchea udarposonnak kaim tori pensanv tharailolem ani Faraohn dil’lea pensanvantle te jietale.
23 Juzen porjek mhollem, ‘Atam hanvem tumkam ani tumchi zomin, Faraohchea nanvan, viktim ghetleant. Tumchim xetam vosounk, hem asa tumchem bim.
24 Pikachea vellar tumi Faraohk êk panchvo vantto diunk zai. Bakiche char vantte tumchim xetam rovunk, biak ani tumkam, tumchea ghoranneank ani tumchea bhurgeank jevnna-khannak dovrat.’
25 Lokan zobab diun mho-llem, ‘Tunvem amcho jiv rakhloi; tuka man’ta zalear , Saiba, ami Faraohche chakor zatoleanv.’
26 Mhonnttôch, ak’khea Ejiptant, pikacho êk panchvo vantto Faraohk diunk, Juzen êk kaido porgôttlo. Ho kaido ozun porian chalu asa. Fokot iadnikanchi zomin Faraoh-achea tabeant zalina.
27 Oxem Israelachi sonsôt, Ejiptant, Goshen prantant jieli; hanga ti don-girestkaien bori vaddli ani bhurgeam-ballamnim sufôll zali.
28 Jakob Ejiptant sotra vorsam jielo ani oxem tachi soglli pirai ekxem-sot’techallis vorsam.
29 Mornnak lagim pavlolo tedna Israelan aplea putak Juzek apoun vhelo ani mhollem, ‘Tum tor khorench mhozo môg kortai, tuzo hat mhojea zanglla pondak dovor, ani visvaxi mogan mhaka lekhtoloi ani mhaka Ejiptant purchonaim mhonn soput di.
30 Hanv mortoch ani mhojea purvozank ekvott’tôch; mhaka Ejip-tantlo bhair vhor ani tanchea tombunt mhaka pur.’ Juzen taka zobab dilo, ‘Tuka zai toxem hanv kortolom.’
31 Jakoban mhollem, ‘Mhaka soput di.’ Juzen soput dilo, ani Jakoban aplea polongachea uxear apli man bhagoili.
Utpoti Chapter 48
1 Thoddea kalla uprant konnem Juzek sanglem: ‘Polle, tuzo bapui boro na’; tedna tannem aplea dog putank Manasse ani Efraim’ hankam borabor ghetle.
2 Ani Jakobak konnem sanglem: ‘Polle, tuzo put Juze tujê xim aila’; ani Israel boll ghevn utthun khatticher boslo.
3 Jakoban Juzek mhollem, ‘Sorvpodvedar Dev Kanaan-ganvchea Luz xarant mhaka dixtti poddlo ani tannem mhaka axirvad dilo.
4 Tannem mhaka mhollem, Hanv tuka zaitim bhurgim ditolom, ani hanchi sonsôt sobar dês-porza zaunk pavtoli; ani ho dês, sodankal tichem daiz koxem, tika ditolom. ’
5 Jakoban tea fuddem mhollem, ‘Juze, hanv hanga Ejiptant ieunchê adim tuka dog put zolmoleat te-i mhojech; Reuben ani Simeon mhoje put tech porim Manasse ani Efraim’ mhojech.
6 Tanchê uprant jim bhurgim tuka zolmoleant tim tujim zatolim ani tanchem daiz tanchea bhavanchea nanvan choltolem.
7 Hanv Padana thaun ietana, Kanaan desant vatteruch tuji avoi Rakel mhojea nirbhagak meli; laginch aslolea Efra-thache mhonngê Bethlehemachê vatter hanvem tika purli.’
8 Israelan Juzechea putank polleun mhollem, ‘He konn?’
9 Ani Juzen aplea bapaik sanglem: ‘He mhoje put; te Devan mhaka hê suvater dileat.’ Tedna tannem mhollem: ‘Tankam mhojê lagim hadd. Hanv tankam axirvad ditam.’
10 Vorsanchê piraien Israelachi nodor osokt zal’li tea pormannem taka borem diso naslem. Juzen tankam lagim haddle, ani Israelan tankam umo dilo ani veng marli.
11 Tedna Israelan Juzek mhollem, ‘Tuka porot polletolom mhonn hanv kednanch ravonaslom, ani polle tujea bhurgeankui polleunk Devan mhaka favo kelem.’
12 Magir Juzen tankam Israelachea dhompram modle kaddle ani dhortorer sorpottlo.
13 Uprant, Juzen tea dogank, Efraimak aplea uzvea hatan mhonngê Israelachea davean ani Manassek aplea davea hatan mhonnche Israelachea uzvean oxe dhôrun tachea fuddeant tankam vhele.
14 Punn Israelan tanchê tokler aple hat dovortana, tannem te khursan dovorle; hê porim dhaktteachê toklecher Efraimacher tacho uzvo hat dovorlo ani malgoddeacher, Manassecher tacho davo hat.
15 Magir tannem Juzek axirvad dilo mhonnun: ‘Dev, zachê mukhar mhoje purvoz, Abraham ani Izaak chol’le, Jea Devan mhaka zolma meren, to aiz pasun choloun vhela, toch Dev hea bhurgeancher, aplo axirvad ghalum!
16 Sorv vaittantlo, Dutan mhaka nivarla, toch hancher-ui axirvad ghalum! Mhojem nanv, toxench mhojea purvozanchem, Abrahamachem ani Izakachem nanv, sodankal hea bhurgeancher asum! Te bhurgea-ballamnim sufoll zaum, Ani hê prithver, tanchi sonsôt vaddum!’
17 Aplea bapain aplo uzvo hat Efraimachê tokler dovorla tem polleun Juzek borem disunk na ani Efraimache toklê voilo aplea bapaicho hat kaddun Manassechê tokler dovorcho mhonn tannem to dhôrlo.
18 Dekhun tannem bapaik mhollem, ‘Bapa, toxem nhoi; ho mhozo malgoddo put, tuzo uzvo hat tachê tokler dovor.’
19 Tachea bapain kan dilona, ani mhollem, ‘Hanv zanna, puta, hanv zanna, Manassechi-i sonsôt vhôdd porza zatoli. Punn tacho dhaktto bhav tachê poros vhodd zatolo ani tachi sonsôt vhodd raxttram zaunk pavtoli.’
20 Oxem tea disa, tannem tancher axirvad ghalo, ani mhollem: ‘Tumchim nanvam ucharun, Israel porza sodankal axirvad ditoli, mhonnun: Devan tumkam Efraima, ani Manasse porim korum! ’Mhonnttôch, Israelan Efraimak Manasse adim mukhar dovorlo.
21 Uprant Israelan Juzek mhollem, ‘Mhojea mornacho vêll atam lagim pavla, punn Dev tujea sangatak astolo, ani tujea purvozanchea desant tuka porot vhorun pavoitolo.
22 Shekemcho sufôll ganv, zo hanvem mhojê torvarin ani ddonddubalan Amorit porjê koddcho jikhun ghetla to tuka, tujea bhavank nhoi, hanv ditam.’
Utpoti Chapter 49
1 Jakoban aplea putank apoun mhollem, ‘Mhojê bhonvtim ektthaim zaiat, ani tumchea fuddara vixim kitem ghoddtolem tem sangun ditam:
2 Jakobachea putamnô, ektthaim ieun aikat. Israel, tumchea bapaik, kan diat.
3 Reuben, mhojea malgoddea, tum mhojem boll, ani mhojea dadleaponnachem, poilem foll, soglleam-on bhov vorto, ani bollan ut’tom.
4 Tum udka porim vhanvpi dekhun, Tum soglleam-on xrextt zauncho naim. Karonn tum tujea, bapaichê bajer choddlo; Tunvem ti bhoxttaili.
5 Simeon ani Levi he bhav, zobordostechim hatiaram, tancheô torsadi.
6 Tanchea mondollant, hanv bhitôr sorchona, nhoi mhonn, tanchê zomatik boschona. Kiteak ragan tãnnim, mon’xank marleat, ani khottê vonddavnnen tãnnim, boilancheô pottreô katorleat.
7 Xirap poddum tanchea ragar, kiteak to krur; Ani tanchea krodhacher, kiteak to nixttur! Hanv tankam, Jakoba bhitôr doxim kortolom, Ani Israelant ximpddaitolom.
8 Juda, tuka vakhanntole bhav tuje. Dusmanank dhôrun, pilltai tanche golle. Bhav tuje, tujê-mukhar sorpott’tole.
9 Juda xinvacho petto; Mhojea puta, tum xikar korun voir gelo. To xinva sarko bagovta ani gottheta; Ani xinva porim , taka konn zagoitolo?
10 Judachea hatant astoli rajkatti, tachi sonsôt sodanch raj choloitoli. Raxttram ietolim ghevun dondd-potti, sorpottun tachê mukhar zatolim khaltim.
11 Aplea lhan gaddvak, to dak-valik bandta, ani gaddvachea porak, tê ut’tom dak-valik. Sorean aplim vostram dhuta. Dakhanchea rosan aplim angvostram.
12 Tache dolle sorea porim tambdde, Ani tache dant duda porim dhove.
13 Zebulun jietolo doria-deger. Tachi tôdd zatoli tarvank bondir. Sidon porian pavtoli tachi xim’.
14 Issakar ek bollixtt gaddum, menddram-bokddeam, modem nhidta toslem.
15 Ho zago visôv gheunk boro, ani ganv sogllo sukha-sontosacho mhonn zanno zaun, Samonn vhorunk, tannem aplo konno baghailo. Ani hea koxtti vavrak to gulam’ zalo.
16 Dan Israelachem ek kull zaun, Aplê porjechi nit kortolo.
17 Dan rostea-degechea, sorpa porim zatolo, êk vikhallo sorop soglleanchê vatter. Ghoddeachê khonttek, to ghans martolo, Ani ghoddear bosla to xevtton pattlean poddtolo.
18 Sorvespora, hanv tujea, taronnak axetam.
19 Choranchi urponz Gadacher akromonn kortoli, punn to tanchê sorxilean vôllun tankam duspottaitolo.
20 Asherachea ganvant, pik zalam tem borem: razank to boreantlim, borim jevnnam ditolo.
21 Naftali, eka merva porim, vegan dhanvta, ani sobit poram kaddta.
22 Juze êk follabhorit khando, Zori boglek aslolo sufoll fantto; Tache bel durgavoilean vetat.
23 Dhonurdhoramnim krurponnan tacher akromonn kelem, aple bann marle ani tacho dusvas kelo.
24 Punn tache dhonnu ghott asle, Ani Jakobachea, Sorv bollixttachea hatamnim, Tache bavlle bollixtt kele. (Gonvlleachea nanvan, Israelachem khoddop),
25 Tujea bapaicho Dev tuka adar ditolo, Sorvpodvedar Dev, tujer axirvad ghaltolo, Sorgavelea axirvadan, ani zomni-pondak, khôl-khôl udkachea axirvadan. Axirvad tanam ani kusveam udexim,
26 Axirvad bhorpur orova, ani fulam vorvim, Axirvad purvilea porvotam thaun, Grestkai hea sasnnachea dongranchi. He soglle axirvad Juzechea mathear, bhavam modlea ekleak, vinchun kaddloleachea, kopolar, denvum.
27 Benjamin ek giraspi landdgo, To sokallcho xikar girastolo, Ani sanjecho luttiche vantte kortolo.’
28 Heô soglleô Israelacheô bara kulliô, ani tanchea bapain nimanno axirvad ditana tankam sogllem sangun dovorlam tem. Ek-ekleak favo to aplo axirvad dilo.
29 Uprant, Jakoban aplea putank hukum’ dilo, ‘Atam hanv mel’leam modem vetam, mhojea purvozam sangata, Efron-Hittit hachea xetantlea Dholint mhaka purat.
30 Kanaan-ganvant, Makpela Mamrechê udentek to urta. Abrahaman ho onddo ani Efronachem xet, moddim purchê khatir, viktim ghetleant.
31 Thoim, Abrahaman Sarak aplê potinik purli; thoim Izaakak ani tachê potinik Re-bekak purli; ani thoinch hanvem Leak purli.
32 Hem xet ani onddo Hittit-porjê koddchim viktim ghetlolim. Hea zagear mhaka purat.’
33 Jakoban aplea putank hi budh-xikovnn dilea uprant, to add poddlo ani melo.
Utpoti Chapter 50
1 Tedna Juze aplea bapaichea mukhamollar poddun roddlo ani taka ume dile.
2 Magir Juzen aplea bapaichi kudd pormollamnim bhôrunk tachê sevek aslolea voizank formailem.
3 Israelak voizamnim pormollamnim bhôrlo. Ani tanchê sodanchê chali pormannem, ti kudd toiar korunk challis dis lagle.
4 Ani Ejiptantlea lokan sot’tôr dis tachem dukh kelem. He dukhache dis somplea uprant, Juzen Faraohchea ghorcheank mhollem, ‘Tumi mhojê sovem moipaxi zalear, matso ho mhozo nirôp Faraohk vhorat:
5 Morchê adim mhojea bapain mhojê koddcho oso êk soput ghetla: ‘Hanv morunk pavlam, tôr Kanaan-ganvant hanvench mhaka toiar korun dovorlolea fonddant purtoloi. Tôr, mhojea bapaik purunk mhaka thoim vochum-di, uprant hanv porot ietam. ’
6 Faraohn mhollem, ‘Tujea bapaik tunvem soput dilai tê porim taka purunk tum voch.’
7 Juze aplea bapaik purunk gelo. Ani tachea sangata, Faraohche soglle opxal, rajmhalantle vhoddle-vhoddle monis, ani Ejiptantle manache monis mornnak gele.
8 Juzechem kuttumb, tache bhav, ani bapaichem urlolem kuttumb tachê borabor gelim. Fokot tanchim supurlim bhurgim, ani tanchim gorvam-mendd-ram Goshen ganvant ravlim.
9 Tachea sangata roth ani goddesvar gele; lokancho ho mell boroch vhodd aslo.
10 Te Jordanachê poltoddi pavtôch, Atadachea mollunchea khollar, tãnnim vhoddlean dukh kelem, ani sat dis aplea bapai khatir Juzen ho dukhacho sonskar choloilo.
11 Hê porim Atadachea mo-llunchea khollar dukh kel’lem polleun, Kanaanchea lokan mhollem, ‘Ho Ejiptantlo lôk kitlea dobajean dukh kortat! Hea khatir, tê suvatek Abel Mizraim hem nanv poddlem. Ti svat Jordan nodi poltoddi.
12 Tôr Jakobachea putamnim bapaichea hukuma pormannem tachem moronn kelem.
13 Taka Kanaan-ganvant vhelo ani Makpelachea Onddeant, Mamrechê udentek, Abrahaman Efron Hittita kodde apnnak fondd koso viktem ghetlolea xetant purlo.
14 Aplea bapaik purun zatôch, Juze Ejiptant porot ailo; tachê borabor tache bhav ani tachea bapaichea mornnak gel’lo to sogllo lôk.
15 Bapaichea mornna uprant, Juzeche bhav eka-mekak mhunnot, ‘Atam Juze amcho dusvas kortolo, ani ami taka kel’leachem farikponn ghet zalear kitem?’
16 Hea monan tãnnim Juzek êk nirôp dhaddlo: ‘Amcho bapui morchea adim,
17 tannem ho upkar tujê mukhar ghalunk amkam sanglam, Tujea bhavamnim tuka vaitt kelam tem matxem tankam bhôgsun kadd. Atam ami ho upkar tujê kodde magtanv: Tujea bapaichea devachea sevokamnim tuka vaitt kelam tem amkam bhogos.’ Ho nirôp Juzek pavtôch to roddlo.
18 Uprant, tache bhavuch Juzê-xim ieun dhornir sorpottle, ani tãnnim mhollem, ‘Tuje chakor ami soglle hanga asanv.’
19 Juzen tankam mhollem: ‘Bhienakat, hanv kitem Deva zagear asam?
20 Tumi soglle mhaka vaitt korunk mhojer uprasle, punn hench vaitt Devan zaitea zonnancho jiv hea dukolla modem sam-ballunk vapurlem.
21 Hanv sangtam, tumkam koslich bhirant na, hanv tum-cho ani tumchea bhurgeancho samball kortolom.’ Hi khatri tankam dilea uprant tanchea kallzak ghottai mell’li.
22 Juze, aplea bapaichea kuttumba borabor Ejiptant jietalo. To melo tedna taka ekxem-dha vorsam aslim.
23 Ta-nnem Efraimachea bhurgeank ani nat-rank pollelim. Manassechea putachim, Makir-hachim-i bhurgim tachea kuttum-bant ailolim dekhlim.
24 Tannem aplea bhavank mhollem, ‘Mhojea mornnacho vêll lagim pavta, punn Dev, dubav nastana, tumcho samball kortolo, ani tannem Abrahamak, Izaakak ani Jakobak sobhemazar bhasailam tê porim, tumkam hea ganvantle bhair kaddun vhortolo.’
25 Ani tedna Juzen aplea ghorcheam kodde êk bhas magli, ‘Dev tumkam hangache bhair kaddta tedna, mhojim haddam hangachim kaddun tim tumchê borabor vhortoleat mhonn mhaka bhas diat.’
26 Tôr, Juze ekxem-dha vorsanchê piraier Ejiptant melo. Tachi kudd pormollamnim fugovn-bhôrun, tãnnim ti ekê kaxint ghali.
