Mark

Mark - Chapter :1

1    Devachea Puta, Jezu Kristachea Xubhvortomanachi survat.

2    Oxem Izaias provadiachea pustokar boroil’lem asa: Polle, tujê fuddem Hanv, Mhojea dutak dhaddtam; to tuji vatt toiar kortolo.

3    To oronneant oxem aroddtoleacho tallo: ‘Sorvesporacho marôg toiar korat, Tacheô vattô nitt korat.’

4    Juanv oronneant aslo, snan ditalo ani patkanchea bhogsonnea khatir jivit bodôlnnechem ek snan porgôtt’talo.

5    Ak’khea Judeiachea prantantlo ani acho sogllo lôk tachê-xim vetalo, ani apunn patki mhonn vollkhun gheun, Jordan nodint tachea hatantlem snan ghetalo.

6    Juanv unttachê lhonvechem angavlem nhestalo ani penkttak chamddeacho êk pott’tto bandtalo ani toll ani ran’vott mhonv khaun jietalo. Aplo updês ditana to oxem mhonnttalo:

7    Mhojê pattlean mhojê-vôn bollvont Konn-Eklo ieta; sorpôtt poddun Tachea vhannanchi vadi sôddunk mhaka favona.

8    Hanvem tumkam udkan snan dilam khorem, punn To ki tumkam Povitr Atmean snan ditolo.

9    Ani tea disamnim oxem zalem: Galileiachea Nazareta thaun Jezu ailo ani Juanvan Taka Jordanant snan dilem;

10    ani udkantlo voir sorona fuddem, sôrg ukto zal’lo ani Povitr Atmo parveachea rupan denvun Apnnacher tharlolo Jezun dekhlo.

11    Ani sorgar thaun oxi zap zali: Tum Mhozo Put, sogllê opurbaiecho; Tujer asa Mhojem dhadosponn.

12    Magir rokddoch Povitr Atmean Taka bhair kaddun vhorun oronneant pavoilo

13    ani challis dis To oronneant ravlo ani Soitan Tachi porikxa kortalo; zonavoram borabôr thõi To ravlo ani devdut Tachi seva kortale.

14    Juanvak dhôrun koidi kelea uprant, Jezu Galileiak gelo ani thõi Devachea Rajeachem Xubhvortoman oxem porgôttunk laglo:

15    Nemlolo kall bhòrlo ani Devachem Raj ieunchem zalem. Jivit bôdlat ani Xubhvortoman manun gheiat.

16    Ekdam To Galileiachea doriachê degechean cholot vetalo. Tea doriant Simanv ani tacho bhav Andre pageram martale, kiteak te kharvi asle: tankam Tannem dekhle.

17    Ani Jezun tankam mhollem: Mhojê pattlean ieiat ani tumkam Hanv mon’xank dhôrtat tosle kharvi kortolom.

18    Ani rokddech te, zallam thõich sanddun, Tachê pattlean gele.

19    Ani thõi thaun matso fuddem vochun, Zebedevacho put Jakob ani tacho bhav Juanv hoddear rampnnim sarkeô kortale te Tannem dekhle,

20    ani rokddech tankam apoile; ani Zebedevak, aplea bapaik, manaiam borabôr hoddear sanddun, te Tachê pattlean gele.

21    Te Kapernaumak gele ani rokddoch Son’vara disa devsthanant bhitôr sorun To tankam xikounk laglo.

22    Ani Tachê xikovnnê vixim lôk ojap zatalo, kiteak dhormxastriam bhaxen nhoi, punn odhikar aslolê porim To tankam xikoitalo.

23    Teach vellar mhello atmo boslolo êk monis tanchea devsthanant aslo, ani tannem bob marun mhollem:

24    Nazaretchea Jezu, amchê kodde tuka koslem kam’ asa? Amcho bhosm korunk ailai kitem? Tum konn to hanv zannom: Devacho Povitr Bhokt.

25    Punn Jezun taka dhomkaun mhollem: Ogo rav ani hea mon’xa velo bhair sor!

26    Ani mhello atmo taka foddfoddaun ani motti bob marun tachê velo bhair sorlo.

27    Sogllo lôk ojap zalo ani ekamekak vichartalo: Hem anink kitem? Novi xikovnn hi! Odhikaran To xikoita! Mhellea atmeank legun to hukum’ ghalta ani te tachem aikotat.

28    Ani rokddench Galileiachea ak’khea prantant sogllê kodden Tachem nanv gazlem.

29    Devsthanantlo bhair sorun, Jakoba ani Juanva sangatim To samko Simanv ani Andrechea ghora gelo.

30    Simanvachi sasu zoran antrunnar poddloli asli ani tãnnim Taka rokddich tichi khobor dili.

31    To lagim sorlo ani tichea hatak dhôrun Tannem tika utthoili, ani teach vellar ticho zôr poddlo ani ti tancho poramôs korunk lagli.

32    Sanz zatôch, dis dharir poddlea uprant, sogllea vaittakarank ani devchar bosloleank Tachê sorxem haddlim.

33    Tachea darar nogor-bhôr lôk zomun khêtt zali,

34    ani jin’sam bhasanchea khub boll’likarank Tannem borim kelim; zaite devchar-ui kaddle; torui Apunn konn to te zanno asle dekhun, tankam To ulounk dinaslo.

35    Dusrê sokallim, ozun kallôkh astana, utthun To bhair sorlo ani eka eksurea zagear vochun thõi magnnem kortalo.

36    Simanv ani tache sangati Taka sôdunk gele;

37    ani To melltôch, tãnnim Taka mhollem: Sogllo lôk Tuka sôdta.

38    Tannem tankam sanglem: Dusrê kodden, lagxilea ganvamnim ani nogramnim vochum-ia; thõisôr Hanvem xikounn diunk zai, kiteak heach pasot Hanv ailam.

39    Ani ak’khea Galileiant bhonvun To tanchea devsthanamnim updês ditalo ani devcharank dhanvddaitalo.

40    Êk koddkar Tachê sorxem upkar magunk ailo ani dimbier ravun tannem mhollem: Tuka khuxi asot zalear, tujean mhaka nitôll korunk zata.

41    Tache churchure dhôrun, Jezun Aplo hat vistarlo ani to taka lavun mhollem: Hôi, Mhaka khuxi asa; nitôll za.

42    Ani oxem mhonnona fuddem tachem kodd nanch zalem ani to nitôll zalo.

43    Jezun taka veginch dhaddlo

44    ani khoraien taka mhollem: Polle, konnakuch hem sangum naka; punn voch ani tujem ang iadnikak dakhoi; ani porjek tuji pekovnni ruzu korchê khatir, tum nitôll zalai mhonn Moizesan formail’lem dan bhettoi.

45    To gelo, punn hi khobor oxê bhaxen porgôttunk ani soglleank sangunk laglo, ki Jezuchean uktim khõicheach nogrant vochunk zaina zalem ani bhair, eksurea svatancher, Taka ravchem poddlem: tori astana sogllê koddecho lôk Tachê-xim ietalo.

---

Mark - Chapter :2

1    Thoddea disamnim Jezu novean Kapernaumant ailo tednam, To ghora asa mhonn khobor zali,

2    ani itlo lôk thõi ektthovlo, ki dara bhair porian tankam zago naslo. Tea lokak To updês ditastana

3    choug zann ar-zal’lea eka mon’xak uklun Tachê sorxem gheun aile;

4    punn lokak lagun tea mon’xak Tachê-xim haddunk zainaslem dekhun, Jezu aslo tea zagea voilo pattôs tãnnim ukto kelo ani, oxi vatt korun, add poddlolea arkara soit tachem antrunn denvoilem.

5    Tancho bhavarth polleun Jezun arkarak mhollem: Puta, tujim patkam bhògsolim.

6    Tednam thõi bosun aslole kãi dhormxastri aplea monant oxem chintunk lagle:

7    Ho oxem uloita tem kitem? Devninda korta ho! Devak ekleakuch sôddun, konnachean patkam bhogsunk zatat?

8    Te tanchê bhitôr oxem chint’tat mhonn Aplea monant rokddench vollkhun, Jezun tankam oxi zap dili: Oslim chintnam tumchea monant kiteak gholloitat tumi?

9    Hea donantlem khõichem arkarak mhonnunk odik sompem? ‘Tujim patkam bhògsolim!’, oxem mhonnunk, vô ‘tujem antrunn ukôl ani chol!’, oxem mhonnunk?

10    Punn, Mon’xachea Putak sonvsarant patkam bhogsunchi podvi asa mhonn tumchea monant rigounchê khatir

11    (Tannem arkarak mhollem:) Hanv tuka hukum’ ghaltam; utth, tujem antrunn ukôl ani tujea ghora voch.

12    To monis rokddoch utthlo ani aplem antrunn uklun soglleam hujir thõicho bhair sorun gelo. Sogllo lôk ojap zalo ani Devak vakhannun mhonnunk laglo: Oslem ami kednanch dekhlem na!

13    Dusrim To doriachê vellechean gelo; ani sogllo lôk Tachê sorxem ietalo, ani To tankam xikounn ditalo.

14    Fuddem vochun, manddvir boslolea Levik, Alfevachea putak, Tannem dekhlo ani taka mhollem: Mhojê pattlean ie! Ani to utthun Tachê pattlean gelo.

15    Ani oxem ghòddlem: tachea ghorant jevnnak boslolo astana, sobar dônddvosuldar ani patki mhonn lêkhlole monis-ui Jezu ani Tachea xisam borabôr jevnnak boslole; tôr zaite zann Tacho pattlav kortale.

16    Ani To dônddvosuldaram ani patkiam borabôr jevta-khata tem polleun, Farizêv pokxachea dhormxastriamnim Tachea xisank mhollem: Dônddvosuldaram ani patkiam sangatim tumcho Guru kiteak khata-pieta?

17    Hem aikun, Jezun tankam mhollem: Borim asat tankam nhoi, punn vaittakarank ki voizachi goroz; tôr Hanv sugunneank nhoi punn ogunneank apounk ailam.

18    Ekdam Juanvanche xis ani Farizev upas kortale tednam, kãi zannamnim ieun Taka mhollem: Juanvache xis ani Farizevanche xis upas kortat, punn Tuje xis korinant tem koxem?

19    Ani Jezun tankam sanglem: Lognachea pavnneamnim, novro tanchê sangatim aso porian, upas korunk zata zait? Tanchea sangata novro aso-sôr tanchean upas korunk zaina.

20    Punn novreak tanchê modlo kaddun vhorcho vêll pavtolo ani tednam, to dis ietôch, te upas kortole.

21    Pornnea vostrak konn-ui anvllonk-naslolea novea lugttacho kopo marit zalear, novo kopo pornnea vostrachim sutam oddun bhair sorta ani fallo odik vhoddlo zata.

22    Nhoi mhonn novo soro pornnea dabeamnim konn bhôrina; bhôrlo zalear, soro dabe fôddtolo ani soreacho ani tosoch dabeancho-i ibadd zatolo. Na, novea soreak nove dabe.

23    Ekdam oxem ghòddlem: Jezu eka Son’vara disa xetantlean vetalo, ani Tache xis cholot astana konnsam tôddunk lagle.

24    Tednam Farizevamnim Taka mhollem: Polle, Son’varachem korum nozo tem kam’ te kiteak kortat?

25    Ani Tannem tankam sanglem: Davidak ani tachea sangatiank goroz poddli ani bhuk lagli tednam, tannem kitem kelem tem tumi vachunk na kitem?

26    Mhonngê koxê bhaxen to, Abiatar porom’-iadnikachea kallar, Devachea ghorant bhitôr sorlo, ani iadnikam bhair konnakuch khaunk sot’tia nasli te Deva mukhar dovorlole undde tannem khele ani aplea sangatiank-ui dile, hi soglli khobor tumi vachunk na bi?

27    Ani Tannem tankam sanglem: Devan Son’var mon’xam khatir kela, mon’xank Son’vara khatir korunk nant.

28    Mhonnttôch Mon’xachea Putak Son’varacher-ui odhikar asa.

---

Mark - Chapter :3

1    Anink êk pavtt Jezu eka devsthanant bhitôr sorlo ani hatak ar zal’lo êk monis thõi aslo.

2    Tacher guneanv ghalchê pasot, Son’vara disa To tea mon’xak boro korit kai mhonn te Taka tellun asle.

3    Hatak ar zal’lea mon’xak Tannem mhollem: Utth, soglleam modem ubo rav.

4    Magir tankam vicharlem: Son’vara disa borem korum-ieta ki vaitt? Jiv vanchoum-iet ki kaddum-iet? Punn te ogech ravle.

5    Tednam ragan tancher nodor bhonvddaun, tanchea kallzachê darunnaiê pasot khontibhorit zaun, Tannem tea mon’xak mhollem: Tuzo hat sôdd! Tannem to sôddlo, ani tacho hat adlê bhaxen sarko zalo.

6    Torui Farizev bhair gele ani koxê bhaxen Taka nattak korcho tê vixim Herodichea pokxachea mon’xam borabôr rokddoch Tacher add guddmêll korunk lagle.

7    Jezu Aplea xisam borabôr doria lagim koddsorun gelo ani Tachê pattlean Galileiachea lokachi khêtt zali; tea bhair Judeia thaun,

8    Jeruzaleasun, Idumeia thaun, Jordanachê pelê toddi thaun, ani Tir ani Sidon hanchê bhonvtonnchea lokachi vhôdd urpônz, To kortalo tem aikun, Tachê-xim aili.

9    Tednam lokachi tanddi polleun, ti Apnnak chinrgottit mhonn Tannem Apnnak ek hoddem toiar dovrunk Tannem Aplea xisank sanglem.

10    To sobar lokak boro kori dekhun, vaittakaram aslim titlim-i Taka hat lavunk Tacher poddtalim;

11    ani mhelle atme, Taka pollena fuddem, Tachê mukhar pãiam poddun huiêl martale ani mhonnttale: Tum Devacho Put!

12    Punn Apnnak dakhoun dina zaunk To khoraien tankam xiddkaitalo.

13    Êk dis dongrar choddun Jezun Apnnak zai tankanch Apnna-xim apoile; ani te Tachê-xim gele.

14    Ani Apnna borabôr aschê pasot ani provochon korunk tankam dhaddchê khatir Tannem bara zann nemle,

15    ani devchar kaddunk-ui Tannem tankam podvi dili.

16    Mhonnttôch nemlole Bara Zann Te he: Simanv haka Pedru mhonn nanv ghalem ani Zebedevacho put,

17    Jakob ani Jakobacho bhav Juanv, hankam Boanerges, mhonngê Goddgoddeache Put, mhonn addnanv dilem;

18    Andre, Filip, Bartolomêv, Matêv, Tomas, Alfevacho put Jakob, Tadêv, Krantikar Simanv,

19    ani Tacho ghat ghetlo to Judas Iskariot.

20    Ekdam Jezu eka ghorant ailo ani novean itlo lôk thõi ektthovlo ki jevunk porian tankam fursôt nasli.

21    Ani Tachim soirim, hem aikolea uprant, Taka dhôrun haddunk bhair sorlim; kiteak tachi môt firlea, oxem tim mhonnttalim.

22    Ani ak thaun denvun ail’le dhormxastri oxem mhonnttale: Tacher Beelzebul bosla ani devcharanchea pordhana udexim to devchar kaddta.

23    Tankam Apnna sorxim apoun To voparimnim tankam sangunk laglo: Soitan koso mhonn Soitanak bhair ghaltolo?

24    Khõichea-i eka rajea bhitôr nagrikanche pongodd eka-mekacher uprasun zhuz korunk lagle zalear, tem raj ubem dhorom nozo;

25    ani eka kuttumbantlea vangddiam modem zhogddim zhuzam upraslear, tem kuttumb ubem urum nozo.

26    Toxench, Soitanachea rajeant-ui ekamekacher zhuztole pongodd asat tôr, tachem-i raj ubem urum nozo, tacho xevôtt pavlo.

27    Eka bollixtt mon’xachea ghorant konn-ui riglo tôr, tea bollixttak poilo bandlea xivai, tachean tacho mhal luttunk zaina; taka bandlea uprant mat tachem ghor luttunk zait.

28    Hanv tumkam khorench sangtam: mon’xanchea putam-dhuvank sogllim patkam bhògsotolim, devninda kortit titleô-i legun.

29    Punn Povitr Atmeacher devninda kortit tankam kednanch bhogsonnem mellchem na; tim sasnnak urta toslea patkachim guneanvkaram.

30    Mhello atmo tacher bosla, oxem te mhonnttale dekhun hem Tannem sanglem.

31    Jezuchi avoi ani Tachim bhavbhoinn pavun sorlim ani, bhair ravun, tãnnim Taka apounk dhaddlo.

32    Tachê bhonvtonnim khub lôk boslolo astana, oso Taka nirôp dilo: Polle, Tuji avoi ani Tujim bhavbhoinn bhair asat ani Tuka sôdtat.

33    Ani Tannem tankam oso portipall kelo: Mhoji avoi konn? Mhojim bhavbhoinn konn?

34    Ani Apnna bhonvtim bosloleancher nodor bhonvddaun Tannem mhollem: Him asat Mhoji avoi ani Mhojim bhav-bhoinn.

35    Devachi khuxi kortat tinch Mhozo bhav ani Mhoji bhoinn ani Mhoji avoi.

---

Mark - Chapter :4

1    Dusrim To doriachê dodder xikounk laglo; punn lokacho iedo vhoddlo zomo Tachê bhonvtim ektthovlo, ki To doriant aslolea eka hoddear choddun boslo, ani sogllo lôk dhodder doriachê vatten ravlo.

2    To tankam sobar vostu voparimnim xikounk laglo, ani xikoitam-xikoitam Tannem oxem mhollem:

3    Aikat! Êk vomp’pi vompunk gelo;

4    ani vomptana thoddem bim vattechê deger poddlem ani suknneamnim ieun tem khelem.

5    Dusrem zobôr-xi mati nasli toslê khoddpi zomnir poddlem; ani matiechi kholai na zaun, tem veginch kirlolem,

6    punn vot ietôch korpolem, ani mull na zaun suklem.

7    Dusrem kantteam modem poddlem; kantte vaddle ani tãnnim taka fugar kelem, ani pik zalem na.

8    Ani her bim borê zomnir poddlem; tem kirlolem ani vaddlem ani taka pik zalem; ekak tis, ekak satth ani ekak xembôr.

9    Ani Tannem mhollem: Aikunk kan asloleamnim aikunchem.

10    Ani To eklo aslo tednam, Baram borabôr Tachea sangata asloleamnim voparinchi somzonni Tachê kodde vicharli.

11    Ani Tannem oxem sanglem: Devachea Rajeacho gutt vollkhunk Devan tumkam dennem dilam; punn bhair asat tankam soglli xikounn voparimnim.

12    Oxem kiteak ‘polletam-polletam, tankam dischem nhoi, ani aikotam-aikotam, tankam somzochem nhoi, na zalear tim aplem jivit bodôltit, ani tankam bhogsonnem mellot.’

13    Magir Tannem tankam mhollem: Hi vopar tumi nokllot? Tôr her soglleô vopari koxeô zanno zatoleat?

14    Vomp’pi vompta tem, Utor.

15    Jim konn Utor vomplam tê vatter asat, tim him: tãnnim tem aikona fuddem, Soitan rokddoch ieta ani tanchê bhitôr vomplolem Utor kaddta.

16    Têch porim, khoddpi zomnir vomplolim mhollear him: Utor aikotôch rokddinch khuxalkaien tem ghetat,

17    punn tankam apnnam bhitôr pallam nant dekhun, tim chôdd vogôt togonant; Utrak lagun vign vô dhumallo iena fuddem, tim rokddinch bhavartha thaun koddsorun vetat.

18    Ani kantteam modem vomplolim tim-i asat; tim Utor aikotat,

19    punn hea sonvsarache huske, girestkaiechi bhul ani her vaitt vondovnniô bhitôr sorun Utor damun dhôrtat ani taka pik zaina.

20    Ani borê zomnir vomplolim-i asat: him Utor aikotat, tem manun ghetat, ani pik ditat: ekak tis, ekak satth, ani ekak xembôr.

21    Tannem oxem-i mhollem: Konn tori ponntti pailê pondak vô bajê tolla dovrunk haddta? Eka peddacher dovrunk nhoi?

22    Tôr uprant uktem zaunchem na toslem kãich atam liplolem na; ani tem gupit dovrunk na bogor magir uktem zaunchê pasot.

23    Aikunk konnank kan aslear, tãnnim aikunchem.

24    Ani tankam sanglem: Tumi aikotat tachi chotrai dhôrat. Tumi zôkxat teach mapan Dev tumkam porot zôktolo ani odik-ui ditolo;

25    kiteak asa tankam Dev anink ditolo ani na tanchê koddlem kitem asa tem-i To kaddun ghetolo.

26    Anink-ui Tannem mhollem: Devachem Raj oxem: êk monis aplea xetant bim vompta;

27    rat ani dis, to nhidlolo asum vô zago asum, bim kirlota ani vaddta; hem koxem tem to kãich nokllo.

28    Zomin apnna osttongim foll dita, poilim palo, magir konnos ani xekim konnsant gulgulit gotto.

29    Ani xet piktôch, luvnni pavli mhonnun rokddoch to villo laita.

30    Tea bhair Tannem mhollem: Devachem Raj kiteak sôr korum-ia? Vô kosli vopar ghalun tem chitarum-ia?

31    Tem sansvachea konnea porim b; to zomnir vomptat tednam, sonvsarant asat titlea-i biam poros supurlo,

32    punn vomplea uprant vaddta ani porsantlea sogllea zhaddam poros vhôdd zata; ani taka iedeô vhoddleô khandiô futt’tat, ki varea velea suknneank tachê savllê tolla asro gheunk mellta.

33    Tanchean aikun gheunk zata toslea sobar voparimnim To tankam Aplo nirôp ditalo;

34    voparim xivai tanchê kodde uloinaslo, punn kuxin astana Aplea xisank sogllem fôddun sangtalo.

35    Teach disa, sanz zatôch, Tannem tankam sanglem: Poltoddi ia.

36    Ani tea lokak sôddun, Taka aslo toso hoddeant vhelo; Tachê borabôr anink-ui hoddim aslim.

37    Tednam êk motto zhoddpo suttlo ani tannem lharam hoddeacher futt’talim ani hoddem udkan bhoronk pavlem.

38    Ani To Apunn verea-xim uxeacher nhidlolo. Tãnnim Taka utthoun mhollem: Guruji, ami mortanv tem Tuka kãich poddunk na?!

39    Utthun Tannem vareak bexttailo ani doriak mhollem: Gopchip! Thôndd za.! Ani varem thamblem ani vhôdd thonddai zali.

40    Magir Tannem tankam mhollem: Tumi itle bhezudd kiteak? Ozun-ui tumkam bhavarth koso na?

41    Tednam te zobor bhiele ani eka-mekak mhonnunk lagle: Ho konn mhonn zait? Tôr varo ani doria porian Tachem aikotat!

---

Mark - Chapter :5

1    Te doriachê pelê toddi Geraze-nanchea mulkant pavle.

2    Ani Jezu hoddeantlo bhair sortôch, mhello atmo boslolo êk monis somadhim modlo bhair sorun rokddoch Taka mellunk ailo.

3    Tannem somadhim modem aplem biradd kel’lem ani sankllimnim legun konnachean taka bandunk zainaslem,

4    kiteak sobar pavtti taka khoddeamnim ani sankllimnim bandlolo, punn tannem sanklli tôddloleô ani khodde môddun uddoil’le. Konnachean taka domaunk zainaslem.

5    Sogllea vellar, disacho toso ratcho, to somadhim modem ani dongrancher astalo, ani huieli marun apnnakuch fatramnim ghave kortalo.

6    Pois thaun Jezuk polleun to dhanvun ailo, Tachê mukhar sorpottlo

7    ani vhoddlean bob marun tannem mhollem: Jezu, Bhov Vortea Devachea Puta, mhojê kodde tuka koslem kam’ asa? Devachean, tujê lagim hat zôddun magtam: mhaka dogdainaka!

8    Kiteak Jezu taka mhonnttalo: Mhellea atmea, hea mon’xa velo bhair sor!

9    Ani Jezun taka vicharlem: Tujem nanv kitem? Ani tannem Taka zap dili: Mhojem nanv Loskor, kiteak ami khub zann.

10    Ani apnnak mulka bhair ghalinaka mhonn to Tachê kodde laleun magtalo.

11    Thõi dongra lagim dukrancho êk vhôdd hindd chortalo; ani devchar Tachê lagim oxem magunk lagle:

12    Amkam tea dukramnim dhadd; tanchê bhitôr amkam rigum-di.

13    Jezun tankam rojia dili ani te mhelle atme bhair sorun dukramnim rigle, ani sumar don hozar dukrancho to ak’kho hindd koddxea velean doriant xevttolo ani buddun melo.

14    Tanche rakhnne pollun gele ani nogrant ani kheddea ganvamnim tãnnim hi khobor kollit keli. Ani lôk kitem zalem tem polleunk ailo;

15    ani Jezu sorxem ieun, devchar koxttaitalo to monis mhonngê, zacher Loskor boslolem toch angavlim nhesun ani toklen sarko zal’lo thõi bosla to polleun, tim bhielim.

16    Zãnnim devchar bosloleak kitem ghòddlem ani dukram vixim kitem zalem tem dekhlolem, tãnnim herank sanglem.

17    Tednam to lôk aplea mulkantlo bhair sorun voch mhonn Jezu kodde magunk laglo.

18    Ani To hoddear choddtana, devchar boslolo to monis apnnak Tachea sangata ravunk di mhonn magunk laglo,

19    punn Jezun dilem na, ani taka sanglem: Tujea ghora ani tujea loka-xim voch ani Sorvesporan tujê khatir kedeô vhoddleô vostu keleô ani koxi Tannem tuji doia keli, tem tankam sang.

20    To gelo ani Jezun apnna khatir kedeô  vhoddleô kornniô keleô teô Dha Nogranchea mulkant porgôttunk laglo; ani sogllim ojap zatalim.

21    Jezu novean hoddear choddun doriachê pelê toddi vetôch, lokachi vhôdd urpônz Tachê sorxem ektthovli; ani To doriachê dhodder aslo.

22    Tednam Jairus nanvacho eka devsthanacho odhikari ailo ani Taka polleun Tachea pãiam poddlo,

23    ani Tachê kodde oso laleun magtalo: Mhoji dhuv mornnachê tonnir pavlea; ie ani ticher tuje hat dovor, tika bori kôr, tika vanchum-di.

24    Ani To tachê borabôr gelo; puskôll lôk Tachê pattlean vetalo ani Taka chênchtalo.

25    Bara vorsam rogt-pat zal’li thõi êk bail asli;

26    sobar voizanchem vokhod kortana zaitem sõsun-ui ani sogllo aplo duddu khorchun-ui tika kãich gunn poddunk naslo, punn tichi gôt odik paxtt zal’li.

27    Jezuchi khobor aikun ti loka modlean geli ani Tachea avoronnak pattlean tinnem hat lailo.

28    Tachea vostrankuch hat lain zalear, hanv borim zatolim, oxem ti chint’tali.

29    Ani ovchituch tichea rogtachi zhôr sukli ani apunn piddentli bori zali mhonn tichea angant tika bhòglem.

30    Apnna bhitorlo gunn bhair sorlo mhonn ovchit Apnnachêch bhitôr zanna zaun, Jezun loka vatten vollon vicharlem: Mhojea vostrank konnem hat lailo?

31    Ani Tachea xisamnim mhollem: Lôk Tuka chênchta mhonn Tum tôr polletai, ani torui ‘Mhaka konnem hat lailo’ oxem vichartai?

32    Punn konnem hem kelam tem polleunk To nodor bhonvddaun ravlo.

33    Tednam apnnak kitem ghòddlem tem zanno asli dekhun, ti bail bhieun ani kampun lagim aili ani Tachea pãiam poddli ani sogllem sot tinnem Taka sanglem.

34    Tannem tika mhollem: Dhuvê mhojê, tujea bhavarthan tuka bori keli. Xantin voch atam ani tujê piddentli meklli rav.

35    To uloita thõich astana devsthanachea odhikariager thaun dhaddlole monis pavle; tãnnim mhollem: Tuji dhuv bhair poddli; Gurujik anink tras kiteak dita

36    Punn tãnnim mhonnlolem tem aikun Jezun devsthanachea odhikariak sanglem: Tum bhienaka; bhavarth mat dhôr!

37    Ani Pedru, Jakob ani Jakobacho bhav Juanv, hanchê bhair Tannem konnakuch Apnna borabôr ieunk dilem na.

38    Devsthanachea odhikariachea ghorant bhitôr sortôch Jezun gollbôll zata to dekhlo, ani vhoddlean roddtalim ani zaitem sangun vilaptalim tim Tannem pollelim.

39    Bhitôr vochun Tannem mhollem: Tumi kiteak mhonn gollbolltat ani roddtat? Cheddum morunk na, tem nhidlam.

40    Ani lôk Taka hansunk laglo. Punn tankam soglleank bhair ghalun, cheddvachea bapaik ani avoik ani Aplea sangatiank gheun, cheddum aslem thõi To gelo.

41    Ani cheddvachea hatak dhôrun Tannem mhollem: Talitha, kum’!mhonngê: Cheddva, tuka sangtam, utth!

42    Ani rokddench cheddum utthun bhonvunk laglem. Taka bara vorsam aslim. Ani lôk ojap zaun bharim thottaklo.

43    Ani konnakuch hem gomoina zaunk Tannem zoddzoddit formailem. Ani cheddvak khaunk diat mhonn sanglem.

---

Mark - Chapter :6

1    Ani thõi thaun bhair sorun To Aplea ganv-ghora gelo ani Tache xis-ui Tachê borabôr gele.

2    Ani Son’var pavtôch To devsthanant xikounk laglo. Ani sobar zannam Taka aikun Tachê xikovnnê vixim ojap zaun mhonnttalim: Hem sogllem haka khõichem ailem? Ani taka dil’li asa ti zannvai kosli? Ani tachea hatamnim oslim vismitam ghòddtat tim koxim?

3    Ho thovoi nhoi a? Ho Mariecho put nhoi? Jakob, Joset, Judas ani Simanv hancho bhav nhoi to? Tacheô bhoinni-i hanga amchê modem ravtat nhoi? Ani tim Taka manun gheunk kobul naslim.

4    Jezun tankam sanglem: Eka provadiak fokot aplea khaxa ganvant, aplea soireamdhaiream modem ani aplea ghorabeant man na.

5    Ani thõi koslench vismit korunk Taka mon zaina zalem, ani thoddeanch vaittakarancher mat hat dovrun Tannem tankam borim kelim.

6    Ani tankam bhavarth na mhonn Taka ojap dislem. Bhonvtonnchea gramamnim vochun To xikovnn ditalo.

7    Magir Tannem Bara Zannank Apnna-xim apoile, ani mhellea atmeancher tankam podvi diun, dogam-dogank To dhaddunk laglo.

8    Ani Tannem tankam formailem: Eka danddea bhair, vattek kãich vhoronakat, nhoi khann-jevonn, nhoi bhuti, nhoi mhonn penkttak duddu;

9    pãiank vhannô ghalat; eka bhair dusrem anglem vhorum nakat.

10    Ani tankam sanglem: Khõisor-ui eka ghorant tumi bhitôr sorxat, tea gramantle bhair sorun vocho porian thõich ravat;

11    ani khõicho-i ganv tumkam ievkar dina zait ani thõicho lôk tumchem aikunk kobul nasot, tankam êk xiddkavnni diunchê khatir, tê svatê vele bhair sortana, tumchea pãianchi dhul’l zhaddun uddoiat.

12    Mhonnttôch te vochun jivit bôdlat mhonn lokak ulo kortale

13    ani khub devchar kaddtale ani sobar vaittakarank-ui tel lavun borim kortale.

14    Jezuchem nanv gaztalem dekhun Herod razak Tachi khobor pavli. Kãi zannam mhonnott: Juanv Batist mel’leantlo jivont zala, dekhun hachê lagim vismitam zatat.

15    Punn konn-konn mhonnott: To Elija. Anink-ui her mhonnott: To êk provadi, provadiantlo eklo.

16    Tem aikun Herodin mhollem: Zachem hanvem xins kapunk lail’lem toch Juanv novean jivo zala.

17    Tôr teach Herodin Herodias nanvachê aplea bhava Filipachê bailek apli bail kel’li; tika lagun tannem monis dhaddun Juanvak dhôrlolo ani bondkhonnint ghal’lo.

18    Karonn Juanv Herodik mhonnttalo: Tujea bhavachê bailek tujean tuji bail korun dovrum nozo.

19    Punn Herodiasichea kallzant tacho rag xiztalo ani ti taka jivexim marunk sôdtali, punn tika toxem korunk mellonaslem.

20    To êk promannik ani bhoktivont monis mhonn zanno zaun, Herod Juanvak bhietalo ani taka rakhtalo. To sangta tem aikun pattim-fuddem sortalo, ani tori khuxê-monan taka kan ditalo.

21    Oxem astam, bori êk sondi sampoddli: Herodin aplea vadd-disa aplea odhikariank, aplea subedarank ani Galileiachea vhodd-vhodd mon’xank ek vhoddlem ratchem jevonn kelem.

22    Ani têch Herodiasichi dhuv bhitôr sorun nachli, ani Herodik ani tachê sangatim jevtoleank man’li; tednam tannem cheddvak mhollem; Tuka zai tem mhojê kodde mag ani hanv tuka ditolom. Ani taka oso soput dilo: Magxi titlem-i ditolom, mhojê razvôttechem ord zalear legun.

24    Bhair vochun cheddvan avoi kodde vicharlem: Kitem magum? Tinnem zobab dilo: Juanv Batistachem xins.

25    Vegim-vegim raza sorxim bhitôr ieun, cheddvan oxem maglem: Eka tattar Juanv Batistachem xins atanchê-atanch mhaka di: hem mhaka zai!

26    Razacher vhôdd sontap ailo; punn aplea soputank lagun ani hajir aslolea pavnneam pasot, cheddvak dil’lem utor môddunk taka khuxi na zali.

27    Dekhun razan rakhonndarak dhaddlo ani Juanvachem xins eka tattar haddunk lailem. Tannem vochun bondkhonnint tachi tokli kapli,

28    ani xins tattar ghalun haddlem ani cheddvak dilem, ani cheddvan tem aplê avoik dilem.

29    Hem aikun, Juanvache xis aile ani tachi kudd vhorun tãnnim ti êkê somadhint ghali.

30    Dhormdut Jezu-xim ektthovle ani apnnem jem kel’lem ani aikol’lem, titlem-i tãnnim Taka kollit kelem.

31    Tednam Tannem tankam sanglem: Êkê eksurê svater tumi ekvodde ieiat ani matso visôv gheiat. Kiteak ietim-vetim itlim zannam aslim ki jevunk legun tankam fursôt nasli.

32    Ani hoddear choddun te êkê eksurê svater kuxin gele.

33    Te vetat mhonn polleun, sobar zannamnim khõi tem parkilem ani pãi-vatten sogllea nogram thaun thõi tim vegim-vegim gelim ani tanchê adim pavlim.

34    Ani hoddeantlo bhair sortana Jezun êk vhoddli urpônz dekhli ani gonvlli-naslolea xelliam porim aslim dekhun, kallzant thaun tanche Taka churchure disle ani sobar vostu To tankam xikounk laglo.

35    Chôdd uxir zalo mhonn polleun, Tachea xisamnim lagim ieun mhollem: Hi svat eksuri ani zobôr uxir zalo;

36    bhonvtonnchea molleamnim ani gramamnim vochun apnnank jevonn-khann viktem gheunchê khatir tankam dhadd.

37    Ani portipallun Tannem tankam sanglem: Tumich tankam jevunk diat. Ani tãnnim mhollem: Tôr vochun don’xim dinaranche undde vikte gheun ami tankam khaunk diunchem kitem?

38    Ani Tannem tankam vicharlem: Tumchê kodde kitle undde asat? Vochun polleiat. Ani chovkoxi korun tãnnim sanglem: Panch undde ani don maslliô.

39    Soglleank chombeam-chombeamnim hirvea tonnacher jevnnak bosunk laiat mhonn Tannem tankam formailem.

40    Mhonnttôch tim xemboranchea ani pon’nasanchea zomeamnim kuxin-kuxin boslim.

41    Tednam Tannem panch undde ani don maslliô hatant gheun ani sorgak dolle ubarun Devak dhin’vaslo, magir undde môddle, ani te lokak vanttunk To te xisam kodde diit aslo; toxeôch don maslliô Tannem soglleank vanttleô.

42    Sogllim jevlim ani dhadoxi zalim.

43    Unddeanche ani masllianche urlole kuddke-tukdde ektthãi korun tãnnim bara panttliô bhôrleô.

44    Undde khel’le te dadlech panch hozar asle.

45    Magir Apunn lokak dhaddta mhonnosôr, Jezun Aplea xisank vegim, hoddear choddun, Apnna adim poltoddi Bethsaidê lagim vochunk laile.

46    Ani tankam dhaddtôch, Apunn dongrar magnnem korunk gelo.

47    Ani tin’san zatôch hoddem doriant modem pavlem ani To ekloch dhodder aslo;

48    ani portem varem martalem dekhun te tanddunk koxttovtale mhonn polleun, fantea pahrar doriacher cholun To tanchê-xim ailo, ani tanchê fuddem vochunk kori.

49    Punn konn doriacher cholta tem polleun, bhut mhonn somzun, tãnnim killônch marli;

50    kiteak soglleamnim Taka dekhlolo ani tancher akant ail’lo. Punn rokddoch tanchê lagim uloun Tannem mhollem: Dhir dhôrat, Hanv to! Bhieum nakat!

51    Ani To tanchê sorxim hoddear choddlo ani varem thamblem. Ani te apnnam bhitôr ekdomuch thottakle,

52    kiteak, zodd monache zaun, vaddoil’lea unddeancho ôrth tankam mellunk naslo.

53    Doria utrun te poltoddi Genezaretak pavle; thõi tãnnim hoddem lailem.

54    Ani te hoddeantle bhair sorona fuddem, lokan rokddoch Jezuk vollkholo;

55    ani ak’khea prantant dhanvim-dhanvim vochun, To khõi asa ti khobor aikun, thõi vaittakarank antrunnar ghalun haddunk laglim.

56    Ani To veta thõisôr, zaum gramamnim, zaum nogramnim, zaum molleamnim, vaittakarank moidanar dovortalim ani Tachea vostrachê degek punn hat launk di mhonn tim Tachê lagim magtalim; ani Taka hat laitalim titlim-i borim zatalim.

---

Mark - Chapter :7

1    Farizev ani kãi dhormxastri ak thaun ieun Tachê sorxem ektthovle,

2    ani Tachea xisantle kãi zann mhellea hatamnim, mhonnchê hat dhuinastana, jevtat mhonn tãnnim pollelem.

3    Farizev ani soglle Judev, purvileanchê chali pormannem, bogor-bogor hat borekorn dhulea xivai jevinant;

4    ani tinttear thaun ietôch, nhalea-dhulea xivai jevunk-khaunk bosonant; ani sobar her samballcheô chali tãnnim ghetloleô asat: patram, kollxe ani kãxeachim aidonam dhuvpa vixim.

5    Mhonnttôch Farizevamnim ani dhormxastriamnim Tachê lagim vicharlem: Zannteanchê chali pormannem tuje xis kiteak cholonant, punn mhellea hatamnim kiteak jevtat-khatat?

6    Tannem portipallun tankam sanglem: Izaiasan tumam ddhongiam vixim adinch sangun dovorlam tem sarkem; tôr oxem boroun asa: ‘Hi porza onttamnim Mhaka vakhannta, punn tanchem kalliz Mhojê-sun pois asa.

7    Tôr mon’xamnim kel’le kaide, xastram koxim xikoun, ti Mhoji polki puza korta.’

8    Devachi adnia sanddun, mon’xancheô chali tumi palltat.

9    Ani tankam mhollem: Aplich chal samballchê khatir, Devachi adnia kuxin kaddunk kitle mhonn huxar tumi!

10    Tôr Moizesan sanglam: ‘Tujea bapaik ani avoik man di, ani bapaik vô avoik xirapta to morun vochum.’

11    Punn tumi sangtat: ‘Konn-ui bapaik vô avoik oxem mhonnott zalear: ‘Mhojê koddlem kitem-i tuka upkartem tem hanvem ‘korban’a kelem (mhonnchê Devak bhettoilem);’

12    tea uprant aplea bapai vô avoi pasot tumi taka kãich korunk dinant;

13    hea vorvim tumchê modem pallon ail’lê tumchêch chalik lagun Devachem utor tumi nirfoll kortat. Ani osleô zaiteô her vostu tumi kortat.

14    Ani novean lokak apoun Tannem sanglem: Sogllim tumi, Mhojem aikat ani somzun gheiat:

15    mon’xam bhailem kitench tanchê bhitôr vochun tankam mhellim korunk xokona; punn mon’xam bhitorleô vostu bhair sorun ietat teôch mon’xank mhellim kortat. b

17    Ani lokak sanddun, ghorant bhitôr ietôch, Tachea xisamnim hê vopari vixim Tachê kodde vicharlem.

18    Ani Tannem tankam mhollem: Tumi-i ginean naslole mum? Bhailem kitench mon’xam bhitôr vochun tankam mhellim korunk xokona;

19    tem tanchea kallzant rigona; tem pottant veta ani xekim bhair kakusant veta mhonn tumi somzonant? (Oxem sogllem khann nitoll mhonn Tannem khochit sanglem.)

20    Ani Tannem mhollem: Mon’xam-bhitorleô bhair sortat teôch vostu mon’xank mhellim kortat.

21    Kiteak bhitôr thaun mon’xanchea kallzantlem bhair sorta tem hem: vaitt chintnam, pozoddponn, choriô, khun,

22    pordvar, apsvarth, khotteponn, fottkirponn, kamchar, nirdukai, ninda, gorv, murkheponn.

23    Him sogllim vaittam bhitôr thaun bhair sortat ani mon’xank mhellim kortat.

24    Ani thõicho utthun To Tirachea ani Sidon’chea prantant gelo; thõi To eka ghorant bhitôr sorlo. Hem konnak gomlolem Taka naka aslem, punn Tachi khobor lokak kollonastana urli na.

25    Tachê vixim aikona fuddem, êk bail bhitôr aili ani Tachea pãiam poddli; ozun lhan aslolê tichê dhuvecher mhello atmo boslolo.

26    Ti bail Grik asli ani zolman Sirofenisiekarn; ani aplê dhuvê velo devchar kadd mhonn ti magtali.

27    Tannem tika zap dili: Bhurgeank poilim dhadoxi zaum-di; kiteak bhurgeancho unddo kaddun petteank ghalop sarkem nhoi.

28    Punn tinnem portipallun Taka mhollem: Hôi, Saiba; punn pette-i meza tolla bhurgeanche poddtat te kuddke-tukdde khatat, na

29    Ani Tannem tika mhollem: Hea tujea utra pasot, borê bhaxen voch, tujê dhuvê velo devchar bhair sorlo.

30    Ani ghora voch zalear tika bhurgem antrunnar add poddlolem mell’llem, ani tachê velo devchar gel’lo mhonn gomon ailem.

31    Novean Tirachea prantantlo bhair sorun, Sidon’chê vatten, Dha-Nogranchea mulka modlean Jezu Galileiachea Doria-xim ailo.

32    Tednam konneklea zôdd jibechea bhereak Tachê sorxem haddlo ani tacher hat dovor mhonn lokan Jezu kodde maglem.

33    Ani loka modlo taka kuxin vhorun Jezun tachea kanamnim Aplim bottam ghalim ani Apli thimpi kaddun tachê jibek laili.

34    Magir sorgak dolle ubarun, Tannem suskar sôddlo ani mhollem: Ef ’fatha!,c mhonnchê: Tuje kan ukte zaum!.

35    Mhonntta mhonnosôr tache kan ugòddle ani tachê jibecho bandpas suttlo ani to sarko ulounk laglo.

36    Ani konnakuch sanginakat mhonn Jezun tankam formailem. Punn jitlo To tankam formaitalo, titlim odik tim porgôtt’talim

37    ani sangum nozo titlim thottakun mhonnttalim: Hannem sogllem borem kelem; Tannem bhereank kan dile ani moneank jib dili.

---

Mark - Chapter :8

1    Ekdam anink êk pavtt lokachi vhôdd tanddi asli ani jevunk-khaunk tanchê kodde kãich naslem. Dekhun, xisank apoun haddun, Jezun tankam sanglem:

2    Hea lokak polleun churchureamnim fòddta Mhojem kalliz! Kiteak, polleiat, az tin dis zale tim Mhojê sangatim asat ani jevunk-khaunk tanchê kodde kãich na;

3    ani upaxim tankam aplea ghora Hanv dhaddin zalear, vatter thokun poddtolim, tôr tanchê bhitorlim kãi zannam pois thaun ail’lim asat.

4    Ani xisamnim Taka oso zobab dilo: Hangasôr, hea padd zagear, khõiche mhonn undde haddun tankam dhadoxi korunk zatolem?

5    Ani Tannem vicharlem: Tumchê kodde kitle undde asat? Tãnnim sanglem: Sat.

6    Tannem lokak dhornnir bosunk lailo ani sat undde gheun ani, Devak dhin’vasun, Tannem te môddle ani vanttun loka fuddem dovrunk Aplea xisam kodde dile; ani tãnnim te vanttun loka fuddem dovorle.

7    Thoddim bovxim-i tanchê kodde aslim. Tancher-ui axirvad ghalun, tim vanttunk lailim.

8    Ani lôk jevlo ani dhadoxi zalo; ani urlolea kuddkeam-tukddeancheô sat panttliô tãnnim bhôrun kaddleô.

9    Jevlolo lôk sumar char hozar aslo; ani Tannem tankam dhaddlim

10    ani rokddoch Aplea xisam borabôr hoddear choddun To Dalmanuta prantant gelo.

11    Ekdam Farizev bhair sorle ani Jezu lagim vad korunk lagle; ani Tachi porikxa korunk Tachê kodde sorga veli êk khunna magtale.

12    Ani kallzant thaun suskarun Tannem mhollem: Hi pinddka kiteak mhonn khunna sôdta? Hanv tumkam khorench sangtam, hê atanchê pinddkek Dev khunna diunchoch na.

13    Ani tankam sanddun To novean hoddear choddlo ani pelê toddi gelo.

14    Xis undde vhorunk visorlole: hoddear tanchê kodde êkuch unddo aslo.

16    Te ekamekak mhonnunk lagle: Amchê kodde undde nant, dekhun To oxem uloita.

17    Hem zanno zaun Jezun tankam mhollem: Undde nant mhonn tumi kiteak tumchê modem uloitat? Ozun porian tumkam vollokh na? gineanui na? Ozun porian tumchê motik uzvadd na?

18    Dolle asun tumkam dixtti poddona, ani kan asun tumkam aikona vô ugddas dhorona kai?

19    Panch undde panch hozar lokak môddun dile tednam, kuddkeancheô kitleô panttliô tumi bhôrun kaddleô? Tãnnim mhollem: Bara.

20    Ani sat undde char hozar lokak dile tednam, urlolea kuddkeancheô kitleô panttliô tumi bhôrun kaddleô? Ani tãnnim Taka sanglem: Sat.

21    Ani Tannem tankam mhollem: Tôr ozun porian somzonant tumi?

22    Jezu ani Tache xis Bethsaidê pavle. Thõi eka kudd’ddeak Tachê sorxem haddlo ani taka hat lai mhonn maglem.

23    Kudd’ddeachea hatak dhôrun Tannem taka grama bhair vhelo ani tachea dolleancher thimpi uddoili, tacher hat dovorle, ani kitem tori dixtti poddta kai mhonn vicharlem.

24    Taka nodor ieunk lagloli; tôr tannem oxem mhollem: Mon’xam mhaka disunk ietat; mhaka tim zhaddam koxim distat, punn bhonvtat.

25    Tednam Jezun novean Aple hat tachea dolleancher dovorle, ani taka sarki nodor aili, to boro zalo ani sogllem taka nitoll disunk laglem.

26    Ani taka ghora dhaddun Tannem mhollem: Gramant bhitôr sorunkuch naka.

27    Jezu xisank gheun Filipachea Sezareiachea gramamnim bhair sorun gelo. Vatter Tannem Aplea xisank oxem vicharlem: Hanv konn mhonn lôk Mhaka dhôrtat?

28    Ani tãnnim portipallun mhollem: Konn-konn Juanv Batist, konn-konn Elija, ani konn-konn provadiantlo eklo, oxem mhonnttat.

29    Tednam Tannem tankam vicharlem: Tôr tumi, Hanv konn mhonn tumi sangtat? Pedrun zobab diun mhollem: Tum Krist.

30    Tednam Apnna vixim konnakuch sanginakat mhonn khoraien Tannem tankam hukum’ ghalo.

31    Magir Jezu xisank oxem xikounk laglo: Devachê khuxê pormannem, Mon’xachea Putan zaitem sõschem asa: zannte, mukhel iadnik ani dhormxastri Taka nakartole; te Taka jivexim martole; ani tin dis zatôch Dev Taka punorjivont kortolo.

32    Heô vostu Tannem spoxtt sangleô. Tednam, Taka kuxin vhorun, Pedru Taka bhexttaunk laglo.

33    Punn, vollon ani Aplea xisank polleun, Jezun Pedruk oxem mhonnun bobatt keli: Mhojê mukhavelo voch, Soitana! Kiteak tujem chintop mon’xanchem, tem Devachem nhoi.

34    Ani lokak ani Aplea xisank borabôr apoun Jezun tankam mhollem: Konnank Mhojê pattlean ieunchi khuxi asa zait, tãnnim apnnachêch khuxechi vatt sôddchi, aplo khuris ukôlcho ani Mhojê pattlean ieunchem.

35    Aplo jiv samballun dhôrunk sôdtat tim aplo jiv hogddaitolim; punn Mhojê khatir ani Xubhvortomana khatir aplo jiv hogddaitat tim aplo jiv samballun dhôrtolim.

36    Sogllo sonvsar zôddit ani aplo jiv ibaddit zalear, mon’xak koslo adav? Mk.

38    Hê baskôll ani patki pinddkê modem Mhoji ani hea Mhojea utranchi konnank loz disot zalear, Mon’xachea Putak-ui, Aplea bhagevont dutam sangatim Aplea Bapachê mhoimen To ietolo tednam, tanchi loz distoli.

---

Mark - Chapter :9

1    Ani Tannem mhollem: Hanv tumkam khorench sangtam: hanga ubim asat tantlim kãi zannam Devachem Raj podven ail’lem dekhlea bogor morchim nant.

2    Sov dis uprant, Jezu Pedruk, Jakobak ani Juanvak Apnna borabôr gheun ekvodde aschê khatir eka unch dongrar gelo, ani tanchê mukhar Tannem Aplem rup bodôl’lem.

3    Tachim vostram loklokit ani sonvsarant moddvolla lagim dhovim korunk zainant titlim dhovim-ful zalim.

4    Ani Moizesa borabôr Elija tankam dixtti poddlo ani te Jezu lagim uloitale.

5    Tedna Pedrun uloun Jezuk mhollem:"Rab'bi (mhonngê ‘Guruji’), ami hangasoruch aslear borem; tôr tin tombu korum-ia, êk Tuka, êk Moizesak ani êk Elijak."

6    Kitem mhonnchem tem toch nokllo aslo; te bhieun kamplole.

7    Ani eka kupan tancher savlli ghali. Ani kupantli oxi êk zap zali: Ho Mhozo Put, sogllê opurbaiecho. Tachem aikat.

8    Ovchit bhonvtonnim nodor marun, Jezu bogor apnna borabôr anink konn tankam dixtti poddlo na.

9    Dongra vele denvtana, dekhlam tem Mon’xacho Put mel’leantlo punorjivont zai-sôr konnakuch sanginakat mhonn Tannem tankam hukum’ ghalo.

10    Tãnnim hi adnia apnnam bhitôr samball’li, punn punorjivont zai-sôr hea utracho ôrth te apnna modem borabôr sôdtale.

11    Ani tãnnim Tachê lagim oxem vicharlem: Elija poilo ieunk zai, oxem dhormxastri kiteak mhonnttat?

12    Tannem oso zobab dilo: Hôi, sogllem novean manddun haddunk Elija poilo khorem ieta. Tori astana, Mon’xachea Putan zaitem sõsunk zai mhonn ani mon’xamnim Tachi beporva korunk zai mhonn koxem boroil’lem asa tôr?

13    Punn Hanv tumkam sangtam: Elija nhoich ailo, punn, tachê vixim boroil’lem aslem tea pormannem, tãnnim apnnank zai aslem toxem tachê sorim kelem.

14    Xisam sorxem pavle tednam, tanchê bhonvtonnim lokachi vhôdd urpônz ektthovloli ti ani dhormxastri tanchê kodde vivad kortale te tãnnim dekhle.

15    Ani Jezuk pollena fuddem sogllo lôk ojap zaun thottaklo, ani Taka noman korunk dhanvun ailo.

16    Ani Tannem tanchê lagim vicharlem: Tanchê kodde tumcho koslo vivad zatalo?

17    Portipallun lokantlea eklean mhollem: Guruji, mono devchar boslolea mhojea putak Tujê sorxim hanvem haddla;

18    to taka dhôrta titlê-i pavtti taka dhornnir uddoita; ani to tonddantlean fenno kaddta, dant korkoraita ani tann zata. Ani taka kaddun uddoiat mhonn hanvem Tujea xisank sanglem, punn tanchean nozo zalem.

19    Tannem portipallun mhollem: Bhavarth-nasloli pinddka tumi! Kedna porian tumchê borabôr Hanvem aschem? Kedna porian Hanvem tumkam sôschim? Taka Mhojê sorxem haddat.

20    Ani tãnnim taka Jezu-xim haddlo. Ani Jezuk dekhona fuddem devcharan taka foddfoddailo ani to dhornnir poddun tonddantlean fenno kaddtalo ani addvo udharo lolltalo.

21    Ani Jezun tachea bapaik vicharlem: Taka kedna-thaun oxem zaun ieta? Tannem zap dili: Bhurgeponnar thaun;

22    ani tacho nas korunk, devchar taka bogor-bogor ujeant ani udkant uddoita. Punn tujean kitem zata zalear, amche churchure dhôrun amkam pav!

23    Punn Jezun taka sanglem: ‘Tujean zata zalear’, oxem sangtai? Bhavarth dhôrta tachean sogllem zata.

24    Rokddoch cheddeachea bapain dukam golloun vhoddlean mhollem: Bhavarth dhôrtam. Mhojea unnea bhavarthak adar di.

25    Apnna-xim lotton ietolea lokak polleun, Jezun mhellea atmeak oxem mhonnun bhenkddailo: Monea-bherea atmea, Hanv tuka hukum’ ghaltam: tachê velo bhair sor ani hea fuddem tacher ienaka!

26    Bob marun ani bharim taka foddfoddaun to tachê velo gelo; ani to cheddo itlo mel’lo koso zalo, ki sobar zannamnim mhollem: To melo!

27    Punn Jezun tachea hatak dhôrun taka ubo kelo ani to ubo ravlo.

28    To ghorant bhitôr sortôch Tachea xisamnim kuxin ieun Tachê lagim vicharlem: Amchê kodde kiteak taka kaddunk zalem na?

29    Tannem tankam sanglem: Osli zat konnachêch podven kaddun uddounk zaina, bogor magnneachê podven.

30    Thõiche bhair sorun te Galileiantlean vetale, punn hem konnakuch gomlolem Taka naka aslem,

31    kiteak To Aplea xisank xikovnn ditalo ani tankam sangtalo: Mon’xachea Putak mon’xanchea hatant ghalcho asa ani te Taka jivexim martole, ani Taka martôch tin disam uprant Dev Taka punorjivont kortolo.

32    Punn To sangtalo tem te somzunk nant ani Tachê lagim vicharunk-ui te bhietale.

33    Te Kapernauma pavle, ani ghora ietôch Tannem tankam vicharlem: Vatter koslo vivad kortaleat tumi?

34    Te ogech ravle; kiteak tanchê bhitôr konn vhoddlo kai mhonn vatter ekameka kodde vad-vivad kortale.

35    Tednam bosun Tannem Bara Zannank apoile ani tankam sanglem: Konnak poilo zaunchi khuxi aslear, to soglleam poros nimanno ani soglleancho chakôr zauncho.

36    Magir eka bhurgeak dhôrun, taka tanchê modem ubo kelo; ani taka vengent gheun tankam sanglem:

37    Mhojê khatir oslea bhurgeantlea ekleak ghetat tim Mhaka ghetat, ani Mhaka ghetat tim Mhaka nhoi, punn Mhaka dhaddla Taka ghetat.

38    Juanvan Taka mhollem: Guruji, amcho pattlav korinaslolo êk monis Tujea nanvan devchar kaddtana ami dekhlo; ani amcho pattlav korina mhonnun, taka ami mona kelo.

39    Punn Jezun mhollem: Taka mona korum nakat; kiteak Mhojea nanvan vismit kortit tim kednanch rokddim Mhojer vaitt ulounchim nant.

40    Tôr amcher add nant tim amchea bhaga asat.

41    Hanv tumkam khorench sangtam: tumi Kristachim pattlavdaram mhonn konn-ui tumkam êk pelo-bhôr udok pieunk ditit zalear, tanchi mozuri tankam mellonastana urchi na.

42    Punn bhavarth dhôrtolea hea lhanam modlea ekleak ho bhavarth sôddunk konn-ui ôddun vhortit tôr, gaddum ôddta toslem ek danteachem pedd tanchea golleak bandun tankam doriant uddoilear odik borem zatolem.

43    Ani tumcho hat patok korunk tumkam ôddun vhorta zalear, to katrun uddoiat; don hat asun iemkonddant, palovna-toslea ujeant, vechê poros, lunddim zaun Jivitant bhitôr sorlear tumkam odik borem.

45    Ani tumcho pãi patok korunk tumkam ôddun vhorta zalear, to katrun uddoiat; don pãi asun iemkonddant tumkam uddoil’lê poros, thonttim zaun Jivitant bhitôr sorlear tumkam odik borem. a

47    Ani tumcho dollo bi patok korunk tumkam ôddun vhorta zalear, to bhair uddoiat; don dolle asun iemkonddant tumkam uddoil’lê poros êkuch dollo gheun Devachea Rajeant bhitôr sorunk tumkam odik borem.

48    Thõi iemkonddant poddloleank khata to kiddo moron morona ani uzo kednanch palovna.

49    Mitta vorvim ghòddta toxem, ujea vorvim Dev zonneklea mon’xak xud’dh korun samballtolo.

50    Mitt êk bori vôst, punn mittachi kharsann geli tôr, kitea vorvim tumi taka portun kharsann ditoleat? Tumchê modem mitt asum-di, ani ekameka lagim xanti vosum-di.

---

Mark - Chapter :10

1    Thõi thaun vochun Jezu, Judeiant Jordanachê pelê toddi ailo, ani novean lokacheô urponji Tachê bhonvtim ektthovleô. Ani Aplê sonvoiê pormannem To tankam dusrim xikounk laglo.

2    Kãi Farizevamnim lagim sorun, Taka kosak lavunk, Tachê kodde oxem vicharlem: Ghovan aplê bailek sôddun dium-ieta?

3    Tannem tankam portun vicharlem: Moizesan tumkam koslo hukum’ ghala?

4    Tãnnim sanglem: Logn-môddneachem potr boroun diun, tika sôddun diunk Moizesan rojia dilea.

5    Tednam Jezun tankam oso zobab dilo: Tumi apleach vadeache dekhun, tumkam hi adnia tannem boroun dili.

6    Punn rochnnechea orombak thaun ‘Devan tankam dadlo ani bail kelim.

7    Hea pasot monis aplea bapaik ani avoik sôddtolo [ani aplê potinnik ektthovtolo,]

8    ani tim dogam-i êk zatolim.’ Dekhun tim hea fuddem dogam nhoi, punn êkuch.

9    Mhonnttôch Devan ektthãi kelam tem mon’xan doxim korum noiê.

10    Ghorant novean bhitôr sortôch xisamnim hê vixim dusrim Taka vichar kelo.

11    Ani Tannem tankam sanglem: Aplê bailek sôddun diun, dusrê kodde logn zait to poilê bailecher add pordvar korta;

12    ani êk bail aplea potik sôddun dusrea kodde logn zait zalear, ti-i pordvar korta.

13    Tannem dhakttulea bhurgeank hat lavchê khatir, lôk tankam Tachê sorxem haddtalo. Xisamnim tankam bobatt keli.

14    Hem polleun, Jezu tiddkelo ani Tannem tankam mhollem: Supurlea bhurgeank Mhojê sorxem ieunk diat; tankam addainakat, kiteak Sorginchem Raj tosleanchench.

15    Hanv tumkam khorench sangtam: lhan bhurgea porim Devachem Raj manun ghenant tim tantum bhitôr sorchim nant.

16    Uprant Tannem tankam vengent gheun ani tancher Aple hat dovrun tankam axirvad dilo.

17    To vattek lagchea vellar êk monis dhanvun ailo. Tachê mukhar dimbi môddun tannem Jezu kodde vicharlem: Borea Guruji, Sasnnik Jivit mhojem daiz korun gheunchê khatir hanvem kitem korunk zai?

18    Jezun taka mhollem: Mhaka boro kiteak mhonnttai? Ekleach Devak kaddun konnuch boro nhoi.

19    Tum adnia zannoi: ‘Jivexim marum noiê; pordvar korum noiê; chorum noiê; lottik govai dium noiê; peleak fosoum noiê; tujea bapaik ani avoik man di.’

20    Tea mon’xan Taka oso zobab dilo: Guruji, mhojea bhurgeponnar thaun hem sogllem hanv pallun ailam.

21    Tednam chitan tacher nodor ghalun Jezuk tachi opurbai disli, ani Tannem mhollem: Ek tuka unnem; voch, tujê kodde asa titlem-i vik ani goribank di, ani tuka sorgar tthevo melltolo; magir ie ani Mhozo pattlav kôr.

22    Punn him utram aikun tachea tonddar kallôkh poddlo ani khontibhorit zaun to koddsorlo, kiteak tachê lagim khub girestkai asli.

23    Jezun Apnna bhonvtonnim nodor marun Aplea xisank mhollem: Girestkai asloleank Devachea Rajeant bhitôr sorunk kitlem kotthin!


24    Him utram aikun xis thottakle. Punn Jezun novean uloun mhollem: Mhojea bhurgeamnô, Devachea Rajeant bhitôr sorunk kitlem mhonn kotthin!

25    Eka girest mon’xak Devachea Rajeant bhitôr sorchê poros, eka unttak suiechea bidd’ddeantlean vochunk odik sompem.

26    Te odik thottakle ani ekamekak mhonnunk lagle: Toxem zalear, konnak mhonn taronn mellot?

27    Jezun tancher dolle lavun tankam sanglem: Mon’xam kodde tem ghoddona; punn Deva kodde toxem nhoi, kiteak Deva lagim sogllem ghòddta.

28    Pedrun tondd ghalun oxem Taka mhollem: Polle, ami sogllem sanddlam ani Tuzo pattlav kela.

29    Jezun zobab dilo: Hanv tumkam khorench sangtam: konnui Mhojê pasot ani Xubhvortomana pasot ghor-dar, vô bhav, vô bhoinnim, vô avoi, vô bapui, vô bhurgim-ballam, vô xetam-bhattam sanddtit zalear,

30    tim atam, heach kallant, ekak xembôr ghetolim ghoram-daram, bhav, bhoinni, avoiô, bhurgim-ballam ani xetam-bhattam punn dhumallo-i bhôgtolim, ani ieta tea kallant Sasnnik Jivit zôddtolim.

31    Poilim asat tim sobar zannam nimannim zatolim ani nimannim asat tim poilim zatolim.

32    Te ak choddun vetale; Jezu xisam fuddem choltalo; xis ghaborlole ani pattlean vetalim tim bhiel’lim. Bara Zannank novean lagim gheun, Apnnak ghòddchem aslem tê vixim oxem To tankam sangunk laglo:

33    Polleiat, ami ak choddun vetanv; ani Mon’xacho Put mukhel iadnikank ani dhormxastriank poradhin zauncho asa; te Tacher mornnachem formonn martole ani Taka videxianchê adhin kortole;

34    ani te Tacheô kenddnniô kortole, Tacher thimpi uddoitole, Taka jerbond ditole ani jivexim martole; ani tin disam uprant Dev Taka punorjivont kortolo.

35    Zebedevache put Jakob ani Juanv Tachê sorxem aile ani tãnnim Taka mhollem: Guruji, Tunvem amkam êk upkar kel’lo amkam zai.

36    Tannem tankam mhollem: Hanvem tumchê khatir kitem kel’lem tumkam zai?

37    Tãnnim mhollem: Tujê mhoiment ekleak Tujea uzvea hatak ani dusreak Tujea davea hatak amkam bosunk di.

38    Jezun tankam mhollem: Tumi kitem magtat tem tumich nokllot. Hanvem pieunchem asa tea patrantlem tumchean pieunk zait? vô Hanvem gheunchem asa tem snan tumchean gheunk zait?

39    Tãnnim Taka zobab dilo: Amchean zata. Jezun tankam sanglem: Hanvem pieunchem asa tea patrantlem tumi pietoleat ani Hanvem gheunchem asa tem snan tumi ghetoleat khore;

40    punn Mhojea uzvea vô davea hatak bosunk diunk Mhojea hatant na; tem Devan nirmun dovorlam tankam.

41    Bakiche dha zann hem aikun Jakobacher ani Juanvacher chiddle.

42    Dekhun tankam Apnna sorxem apoun, Jezun mhollem: Videxiam modem tanche odhikari mhonnlole apli podvi tancher zobordosten choloitat mhonn ani toxench tanche vhoddil aplê sot’tiecho bhar tancher ghaltat mhonn tumi zannont.

43    Tumchê modem toxem zaunchem nhoi. Tumchê bhitôr konn vhôdd zaunk sôdit to tumcho sevôk zauncho,

44    ani tumchê modem poilo zaunk sodit to soglleancho gulam’ zauncho.

45    Kiteak Mon’xacho Put Apunn-ui herank Aplê chakrek lavunk ieunk na, bogor heranchi chakri korunk ani Aplo jiv somestanchê soddvonnê pasun diunk aila.

46    Te Jerikeak pavle; ani Jezu Aplea xisank gheun ani lokachea vhôdd zomea borabôr Jerikeak thaun bhair sortalo tednam, Bartimêv, mhonngê Timevacho put, mhonnlolo êk kudd’ddo rosteachê deger bhikek bosun aslo.

47    Nazaretkar Jezu tevxilean veta mhonn aikotôch, to oxi bob marunk laglo: Jezu, Davidachea Puta, mhoji kaklut kôr!’

48    Sobar zannamnim taka bobatt keli ani ogo rav mhonn sanglem, punn to odik vhoddlean bob marit ravlo: Davidachea Puta, mhoji kaklut kôr!

49    Jezu thamblo; Tannem tankam mhollem: Taka hanga apoiat. Tãnnim tea kudd’ddeak apoilo ani taka sanglem: Dhir dhôr; utth; To tuka apoita.

50    Aplo zhubo sanddun ani uddun-uddun to Jezu sorxem ailo.

51    Tednam Jezun mhollem: Hanvem tuka kitem kel’lem zai? Kudd’ddean Taka oso zobab dilo: Rab’boni (mhonngê ‘Guruji’), mhaka novean nodor iexi kôr.

52    Jezun taka mhollem: Voch, tujea bhavarthan tuka boro kela. Ani rokddich taka nodor aili ani Jezu vetalo tê vatten to Tachê pattlean gelo.

---

Mark - Chapter :11

1    Te Jerusalea lagxim ietam, ietam, Betfage ani Betania nogram kodde, Zoitunanchea Dongra sorxem pavtôch, Tannem xisam bhitorlea dogank dhaddle

2    ani tankam sanglem: Tumchê samkar asa tea gramant vochat ani, tumi thõi bhitôr sorona fuddem, konnuch ozun tacher bosunk naslolem gaddvachem ek xingrum bandlolem tumkam melltolem; taka sôddat ani hanga haddat.

3    ‘Hem kiteak kortat tumi?’ oxem tumkam konn vicharit zalear, ‘Somiak tachi goroz asa ani To taka rokddoch hanga portun dhaddtolo’ mhonn sangat.

4    Te gele ani ek gaddvachem xingrum eka dara mukhar, bhair nakear, bandlolem tãnnim dekhlem ani taka sôddlem.

5    Thõi ubim aslolea kãi zannamnim tankam mhollem: Tea xingrak sôddun tumi kitem kortat?

6    Jezun sanglolo zobab tãnnim tankam dilo. Ani tea mon’xamnim tankam vochunk dilem.

7    Ani xingrak tãnnim Jezu sorxem haddlem. Tacher tãnnim aplim avoronnam ghalim, ani To tacher boslo.

8    Sobar lokan aplim avoronnam vatter patllailim ani dusrim kãi zannam xetam-molleamnim khandiô khatrun teô rostear ximpddaitalim.

9    Ani fuddlean ani pattlean vetalim tim oxi bob martalim: zôi! zôi! Sorvesporachea nanvan ieta Tacher axirvad!

10    Amchea Bapa Davidachem raj ieta tacher axirvad! Bhov Vortea Devak zôi! zôi!

11    Jezu Jeruzalant bhitôr sorlo ani Devmondirant gelo. Tannem sogllem chotraien polleun kaddlem; punn uxir zaun gelo dekhun, To Bara Zannank gheun Betaniê gelo.

12    Dusrea disa Betaniê thaun ietana Taka bhuk lagli.

13    Pois thaun Tannem ek palel’lem anjirachem zhadd dekhlem ani kitem-i foll mellot kai mhonn To polleunk gelo, punn panam bogor kãich Taka mell’llem na; tôr to anjirancho kall nhoi aslo.

14    Ani Tannem anjirachea zhaddak mhollem: Hea fuddem kednanch tujem foll konnuch khaunk pavona zaum. Ani To oxem uloitana Tache xis aikotale.

15    ak pavtôch To Devmondirant gelo ani thõi viktale-ghetale tankam bhair ghalunk laglo; vattav-dinnaranchim mezam ani parve viktoleanchim asonam Tannem omtun uddoilim;

16    ani Devmondirantlean kitench haddunk-vhorunk To dina zalo.

17    Ani Tannem tankam xikovnn diun oxem mhollem: Mhojea Ghorak sogllea porzank magnneachem Ghor mhonn nanv poddtolem, oxem Povitr Pustokar boroilolem asa nhoi? Punn tumi tem choranchi dhôl kelea.

18    Hem mukhel iadnikanchea ani dhormxastrianchea kanar poddlem ani koxê bhaxen Taka nattak korcho kai mhonn te sôdtale; punn te Taka bhietale, kiteak lôk Tachê xikovnnek lobdol’lo.

19    Ani sanz zatôch Jezu ani Tache xis xarantle bhair gele.

20    Dusrê sokallim, tevxilean vetana, tem anjirachem zhadd pallam thaun suklolem tãnnim dekhlem.

21    Pedrun ugddas korun Jezuk mhollem: Polle, Rab’bi (mhonngê Guruji), Tunvem xiraplolem anjirachem zhadd sukun gelem.

22    Jezun zap dili: "Devacher bhavarth dovrat.

23    Hem Hanv tumkam khorench sangtam: konn aplea kallzant dubhav dhorinastana, apunn mhonnttat tem zatolem mhonn bhavarth dhôrun, hea dongrak mhonnttit: ‘Hangasorlo utth ani doriant voch’, tem tanchê sorim ghòddtolem.

24    Dekhun Hanv tumkam sangtam: tumi prarthun magxat titlem-i tumkam mell’lem mhonn bhavarth dhôrat, ani tem tumchench zatolem.

25    Ani tumi magnnem korunk ubim ravtat tednam, konnacher add tumkam asot titlem-i bhôgsat ani tumcho Sorgincho Bap tumcheô-i chuki bhôgxitolo.

27    Te portun ak aile ani Jezu Devmondirant bhonvtastana mukhel iadnik, dhormxastri ani zannte Tachê sorxem aile.

28    Tãnnim Taka mhollem: Oxem tunvem korpak koslo odhikar asa tuka? Vô oxem korpak tuka sot’tia konnem dilea?

29    Jezun tankam mhollem: Hanv tumchê kodde ek vichartam; Mhaka zobab diat, ani tednam koslea odhikaran Hanv oxem kortam tem tumkam sangin:

30    Juanvachem snan khõi thaun ailem? Sorgar thaun ki mon’xam thaun? Sangat, polleum-ia.

31    Ani te apnnam bhitôr oxem chintunk lagle: ‘Sorgar thaun’, oxem ami mhollem zalear, to vichartolo: ‘Tôr tumi kiteak tacher bhavarth tthevlo na?’

32    Punn ‘mon’xam thaun’, oxem amchean mhonnunk zata? Te lokak bhietale, kiteak sogllo lôk Juanv khoro provadi mhonn man’talo.

33    Dekhun tãnnim mhollem: Ami nokllonv. Ani Jezun tankam mhollem: Koslea odhikaran Hanv heô vostu kortam, tem Hanv-ui tumkam sangina.

---

Mark - Chapter :12

1    Ani voparimnim tanchê lagim oso To ulounk laglo: Eka mon’xan dakancho mollo lailo, tachê bhonvtim addo ghalo, khonnun êk kollombi toiar keli, êk gopur bandlo ani, to mollo kullvaddiank kumlleak diun, apunn poixilea ganvak gelo.

2    Ani kall pavtôch, molleachea pikacho aplo vantto kullvaddiam lagcho gheunchê khatir, tannem eka chakrak tanchê-xim dhaddlo.

3    Tãnnim taka dhorun mar dilo ani rikamo portun dhaddlo.

4    Dusrê pavtt anink eka chakrak tanchê-xim dhaddlo; ani tãnnim tachi tokli fôddli ani taka beman kelo.

5    Novean tannem dusrea ekak dhaddlo, ani tãnnim taka jivexim marlo; ani anink-ui dhaddlolea sobar zannantleank tãnnim thoddeank boddoile, dusreank jivexim marle.

6    Taka ozun eklo urlolo: to tacho chôdd mogacho ekloch put. ‘Mhojea putak tori te man ditole’, oxem chintun tannem xekim putak tanchê-xim dhaddlo.

7    Punn kullvaddiamnim ekamekak mhollem: ‘Ho tacho daiji; ieiat, taka jivexim marum-ia ani daiz amchem zatolem.’

8    Ani tãnnim taka dhôrlo, tacho jiv kaddlo ani taka mollea bhair kaddun uddoilo.

9    Atam molleacho dhoni kitem kortolo? Ietolo, kullvaddiancho nas kortolo ani mollo dusreank ditolo.

10    Povitr Pustokar oxem boroil’lem asa: ‘Zo fatôr, bandpiamnim sôddun dil’lo, toch zalo konnxea-sondhicho fatôr. Hem Sorvesporanuch, ghoddun haddlam!’ Tem polleun ami thottak zaleanv.

12    Te Taka dhorunk sôdtale, kiteak Tannem hi vopar apnnank laun sangli mhonn te bore somzole, punn lokak bhiele; ani Taka sanddun gele.

13    Magir, Jezuk utrak sampddaunk, Farizevantlea ani Herodichea pokxantlea kãi zannank Tachê-xim dhaddle.

14    Tãnnim lagim sorun Taka oxem mhollem: Guruji, tum sotan choltai ani tuka konnachich bhidda na mhonn ami zannonv; kiteak mon’xanchem tondd polleun tum uloinãi ani Devachi vatt sotan xikoitai. Tôr Somrazak dôndd farik korum-ieta ki na? Ami to farik korcho ki na?

15    Tanchem ddhongeponn vollkhun Tannem tankam mhollem: Tumi kiteak Mhaka ho fas manddunk sôdtat? Êk dinar Mhaka haddun diat, polleum-ia.

16    Tãnnim Taka êk haddun dilo. Ani Tannem mhollem: Hem rup konnachem? ani hem nanv konnachem? Tãnnim mhollem: Somrazachem.

17    Portipallun Jezun tankam sanglem: Borem tôr, Somrazachem tem Somrazak diat, ani Devachem tem Devak diat! Ani Tacho zobab aikun te ojap zale.

18    Uprant Saduki, punorjivontponn na mhonnttat te, Jezu-xim aile ani Tachê kodde tãnnim vicharlem:

19    Guruji, Moizesan amkam oxem boroun dovorlam: ‘Bhurgem-ball nastana konnekleacho bhav aplê bailek pattlean dovrun morot zalear, hachea bhavan tachê bailê lagim logn zaunchem ani aplea bhavak sonsôt utpon korchi.’

20    Tôr sat bhav asle. Poilo êkê bailê lagim logn zalo ani sonsôt nastana melo.

21    Ani dusro tichê lagim logn zalo ani melo; taka-i sonsôt na zali. Ani tosoch tisro.

22    Tê jin’xim satui zannamnim bhurgem-ball dovrunk na. Soglleam uprant bailui meli.

23    Tôr satui zannanchi ti potinn zal’li mhonnttôch, punorjivontponnant, mel’lim mon’xam novean jivont zatolim tednam, tanchê bhitorlea konnachi potinn zatoli ti?

24    Ani Jezun portipallun tankam mhollem: Povitr Pustokam, nhoi mhonn Devachi podvi, tumi nokllot dekhun, tumi oxe chuktat nhoi?

25    Punorjivontponnachea somoiar dadle logn zainant ani bailank logn korun dinant, punn tim sorgar astea devdutam sarkim zatat.

26    Mel’leanchea punorjivontponna vixim polleum-ia: ‘Abrahamacho Dev, Izaakacho Dev, Jakobacho Dev Hanv’, oxem Devan Moizesak sanglem mhonn tachea pustokar, to jhilkuttachi khobor korta thõi, tumi vachunk na bi?

27    Mel’leancho nhoi, bogor jivim asloleancho Dev To! Tumi bhov chuktat.

28    Ani dhormxastriantlea eklean, tanche vad-vivad choltat te aikun ani Jezun kai borê bhaxen zobab dilo tem polleun, Tachê kodde vicharlem: Soglleam bhitôr poili adnia khõichi?

29    Jezun taka zap dili: Poili adnia hi: Aik, Israela! Sorvespor amcho Dev eklo Sorvespor,

30    ani Sorvespora tujea Devacho sogllea tujea kallzan, sogllea tujea jivachea bollan, sogllea tujea monan, ani sogllê tujê xoktin tum môg kortoloi.

31    Dusri adnia hi: Tuzoch môg kortai toso tujea peleacho tum môg kortoloi. Hanchê poros vhôdd anink adnia na.

32    Ani dhormxastrian Taka mhollem: Xabas, Guruji! Tunvem sanglãi tem khorem: To Eklo, ani Tachê bhair dusro na!

33    Khorench, sogllea kallzan, sogllea monan, sogllea jivachea bollan, sogllê xoktin ami Tacho môg korunk zai, ani amchoch kortanv toso amchea peleacho ami môg korunk zai: hem sogllea homam ani iodnam poros ekdom’ odik vortem.

34    Tannem xanneponnan portipall kelo mhonn polleun, Jezun taka mhollem: Tum Devachea Rajea thaun pois nãi. Ani tea fuddem kosloch prosn Taka ghalunk konnakuch kalliz zainaslem.

35    Ani Devmondirant xikoitana Jezun vicharlem: Krist Davidacho Put, oxem dhormxastri mhonnttat tem kitem?

36    Tôr Povitr Atmeachea preronnan uloun toch David oxem mhonntta:‘Mhojea Somiak, Sorvesporachem utor hem: Mhojea uzvea hata bos; tujea dusmanank Hanv, Tujea pãiam tolla ghaltam.’

37    Mhonnttôch toch David taka aplo ‘Somi’ mhonntta; toxem zalear, to tacho put koso zata? Ani lokacho vhôdd zomo khuxê-monan Taka kan ditalo.

38    Ani Aplê xikovnnent Jezu tankam mhonnttalo: Dhormxastriam vixim chotur ravat; lamb-lamb angavlim ghalun bhonvunk, tinttear apnnank manan kel’le lokache solam’ gheunk,

39    devsthanamnim voileam-poileam zageancher bosunk, ani jevnnank poileô svatô dhôrunk tankam zoboruch borem lagta;

40    lamb magnneanchem song gheun vidvanchim ghoram-daram te khaun uddoitat. Tankam soglleam-von odik khôr zhôddti astoli.

41    Devmondirant dhormdananchê pettê mukhar bosun, lôk koso pettent duddu ghalta tem Jezu polleun aslo. Ani sobar girest mon’xam khub duddu ghaltalim;

42    tednam êk gorib vidva aili ani tinnem don lepton tantum ghale, mhonngê êk pav as’sarion

43    Aplea xisank apoun haddun Tannem mhollem: Pettent duddu ghaleat tea soglleam poros hê gorib vidven odik ghalam;

44    tôr soglleamnim apnnank ogllem aslem tantlem ghalem; punn hinnem aplea goribponnantlem kaddun aslem titlem-i ghalem, aplea jivak zai aslem tem porian.

---

Mark - Chapter :13

1    Ani To Devmondirantlo bhair sorun vetastana, Tachea xisantleam eklean Taka mhollem: Guruji, kede vhoddle fator polle ani kedeô bandavolli!

2    Zap diun Jezun taka mhollem: Heô vhoddleô bandavolli tum polletai nhoi? Tancho fatrar fatôr urcho na, sogllem ghorttann zatolem!

3    Ani Zoitunanchea Dongrar, Devmondira samkar To bosun astana, Pedru, Jakob, Juanv ani Andre Tachê-xim kuxin asle; tãnnim Tachê lagim vicharlem:

4    Hem kedna ghòddtolem tem amkam sang. Ani hea sogllea ghòddnniancho vêll pavlo mhonn vollkhunk kosli khunna?

5    Ani portipallun Jezu tankam oxem sangunk laglo: Tumkam konnem fottoina zaunk chotraien ravat;

6    kiteak sobar zann, Mhojem nanv gheun, ‘apunnuch to’ mhonnun ietole ani zaiteank fottoitole.

7    Laginch choltolea loddaiancho gollbôll tumi aikotat tednam ani pois pettlolea zhuzanchi ddag tumkam pavta tednam, tumi akantum nakat; hem oxem ghoddonk zai, toripunn ho ozun xevôtt nhoi.

8    Kiteak dês desacher ani raj rajeacher uprastolim, ani hanga-thõi bhuimkamp zatoli ani dukôll poddtolo. Hem sogllem porsuttvenninchi survat.

9    Tumi aple xidduk ravat. Tumkam dhormsobhent dhôrun ditolim ani devsthanamnim tumkam boddoitolim. Mhojê pasot razpalanchea ani razanchea fuddeant, tanchê mukhar tumi govai diunchê khatir, tumkam ube ravchem poddtolem.

10    Xevotta adim sogllea raxttrank Xubhvortoman porgôtt zaunk zai.

11    Ani dhôrun diunk tumkam vhortat tednam, kitem ulounchem tê vixim adim-fuddem huskeum nakat; punn tumchê motint tê ghoddier jem kitem Dev ghaltolo, tench sangat; kiteak uloitole te tumi nhoi, punn Povitr Atmo.

12    Jivexim marunk bhav bhavak ani bapui putak dhôrun ditolo; put-dhuvô avoi-bapaicher kolpun tancho prann kaddunk laitoleô.

13    Mhojea nanva pasot sogllim tumcho dvês kortolim; punn xevottak porian thir ravtit tankam Dev taronn ditolo.

14    Tumi ‘sotianasacho kanttallo’ taka favonaslolea zagear ubo aslolo polletôch (vachtat tãnnim hem somzunchem), tednam Judeiant asloleamnim dongrancher pollun vechem;

15    pattsar asloleamnim aplea ghorantlem kitench vhorunk sokla denvun bhitôr sorchem nhoi;

16    xetam-molleamnim asloleamnim aplem avoronn vhorunk porot ieunchem nhoi.

17    Te dis ietôch gorbhest bailanchem ani dud ditoleanchem kotta!

18    Hinvalleant hem zaina zaunk magat.

19    Devan sonvsar rochla tê meren az porian zaunk na ani hea fuddem zauncho na toslo sontap tea disamnim ietolo.

20    Ani Sorvesporan te dis unne korunk nasle zalear konnuch vattavonchim naslim, punn Apnnem vinchun kaddloleam khatir Tannem te unne keleat.

21    Tednam ‘Polle, Krist hanga asa’ vô ‘Polle, To thõi asa’ mhonn konn-ui tumkam sangtit zalear, tumi tem sotmanum nakat;

22    kiteak kudde Krist ani kudde provadi uprastole ani, zata zalear, vinchun kaddloleank porian fosounk puro tosleô khunna ani ochoriam korun dakhoitole.

23    Mhonnttôch chotrai dhôrat, Hanvem tôr tumkam sogllem adinch sangun dovorlam.

24    Punn tea disamnim, to sontap ietôch, suriacher kallôkh poddtolo ani chondrim’ aplo uzvadd diuncho na,

25    ani noketram mollba velim khala poddtolim ani ontralla veleô xokti kolkoltoleô.

26    Ani tednam sogllê podven ani dobajean kupancher ietolea Mon’xachea Putak dekhtolim.

27    Ani tednam To Aplea dutank dhaddun char-ui dixam veleam, prithumechea ximam thaun ontrallachea ximam porian astolea, Apnnem vinchloleank zomoitolo.

28    Anjirachea zhaddachi hi vopar somzun gheiat. Tacheô khandiô rosbhorit zatat ani tankam panam futt’tat tednam, gim’ lagim pavla mhonn tumkam kollon ieta;

29    têch porim heô vostu ghòddtat mhonn polleun To lagim pavla, darachea umbrear asa mhonn zanno zaiat.

30    Hanv tumkam khoreponnim sangtam: hem sogllem ghòddlea bogor hi pinddka ontorchi na.

31    Sôrg ani prithum’ sortolim, punn Mhojim utram kodinch sorchim nant.

32    Punn ekleach Bapak kaddun, anink konnakuch, sorginchea dutank vô Putak legun, tea disachi vô ghoddiechi khobor na.

33    Chotrai dhôrat, zagrônn korat; tôr vêll kedna pavtolo to tumi nokllot.

34    Provas korunk vetea konn-eklea mon’xa sarkem tem: aplem ghor-dar sanddun to zonn-eklea chakran kitem korunk zai tachi sot’tia tankam dita; ani dar-rakhnneak zagrut rav mhonn sangun bhair sorta.

35    Dekhun tumi zagrut ravat; kiteak ghoracho Dhoni kedna ietolo, tin’sanam, modeanir, kombeachea sadar, ki fantea pahrar, tem tumi nokllot;

36    na zalear, To ovchituch pavot ani tumi Taka nhidlolim mellxat.

37    Tumkam sangtam tem soglleank sangtam: zagrut ravat.

---

Mark - Chapter :14

1    Don disamnim Paskancho ani Fugnaslolea Unddeancho utsôv zauncho aslo; ani mukhel iadnik ani dhormxastri Jezuk koso moslotin dhôrcho ani jivexim marcho tem sôdtale.

2    Tôr te mhonnott: Hem porbechea disa naka, lokachi uchambollai bi zaunk khori.

3    Jezu Betanient Simanv koddkarachea ghorant jevnnak boslolo astana, êk bail unch molachem osôl zottamanxechem pormollit tel eka chondrokanti aidonant gheun aili ani aidon fôddun tinnem tem tel Tachea mathear ôtlem.

4    Thõi aslolea kãi zannamnim apnnam modem tiddun mhollem: Kiteak mhonn hea telacho ibadd?

5    Tôr oslem tel tin’xeam voir dinarank vikunk ani duddu goribank diunk zatem. Ani tika te bexttaitale.

6    Punn Jezun mhollem: Sôddat tika; tika tumi kiteak tras ditat? Tinnem Mhojê sorim êk bori kornni keli.

7    Gorib lôk tumchê modem sodankal asach, ani tumkam zai tednam tumchean tankam borem korunk zata; punn Hanv sodanch tumchea sangata ascho na.

8    Tichê kodde ghòddtalem tem tinnem kelem; adim-fuddem Mhoji kudd tinnem nikhipinnek makhli.

9    Khorench tumkam sangtam, ak’khea sonvsarak hem Xubhvortoman porgôtt zait titleam-i svatanr jem hinnem kelam tem-i tichea ugddasak porgôtt zatolem.

10    Tednam Barantlo eklo, Judas Iskariot, Jezuk mukhel iadnikanchea hatant ghalunk tanchê-xim gelo.

11    Tachem aikun tankam sontôs bhòglo ani taka duddu diunk te kobul zale. Ani Taka tanchea hatant ghalunk êk boro soêg to sôdtalo.

12    Fug-naslolea Unddeanchea poilea disa, Paskacho menddro martat tednam, Jezuchea xisamnim Taka mhollem: Tujem Pask-Jevonn korunk khõi vochun ami toiar kel’lem Tuka zai?

13    Ani Aplea xisantlea dogank dhaddun, Tannem tankam sanglem: Xarant vochat ani udkacho kollso khandar marun veta to tumkam êk monis melltolo; tachê pattlean vochat

14    ani to bhitôr sorta tea ghorachea dhoniak mhonnatt: ‘Mhojea xisam borabôr Hanvem Pask-Jevonn korunk Mhaka diupacho vosro khõi asa?’, oxem Gurujin vicharlam.

15    Ani to tumkam malloier êk vhoddlo, borê bhaxen jevnnak manddlolo vosro dakhoitolo; thõi amkam toiar korat.

16    Xis bhair sorun Xarant voch zalear, Jezun sanglolem toxem tankam mell’lem ani tãnnim Pask-Jevnnachi toiari keli.

17    Sanz zatôch, Barank gheun Jezu ailo,

18    ani te jevnnak boslole astana, Jezun mhollem: Mhojê borabôr jevnnak boslolo, tumchê bhitorlo eklo, Mhozo ghat ghetolo.

19    Te bhov khontibhorit zale ani ek-eklo Taka mhonnunk laglo: Dubavaviret to Hanv nhoich!

20    Ani Tannem tankam sanglem: Barantlo eklo, Mhojê borabôr tattant unddo buddoita to.

21    Mon’xacho Put, Tachê vixim boroil’lem asa tea pormannem, Aplea xevottak veta khoro; punn zo monis Mon’xachea Putacho ghat gheta, tachem kotta! Zolmunkuch naslo zalear tea mon’xak odik borem zatem.

22    Ani tanchem jevonn cholta astana, Jezun unddo hatant ghetlo, Devak dhin’vasun to môddlo ani to tankam dilo ani mhollem: Gheiat, hi Mhoji kudd.

23    Magir patr ghetlem ani Devak dhin’vasun tem tankam dilem ani soglle tantlem piele.

24    Ani Tannem tankam mhollem: Hem Mhojem Rogot, Korarachem Rogot: somest mon’xam pasot Hanvem tem varounchem asa.

25    Hanv tumkam khorench sangtam: Devachea Rajeant Hanv novo soro pie-sôr, hea fuddem dakechea follanchem Hanv anink pieuncho na.

26    Ani stotram gailea uprant, Zoitunanchea Dongrar vochunk te bhair sorle.

27    Tednam Jezun tankam sanglem: Tumi soglle Mhaka sôddun vetoleat. Tôr Povitr Pustokar oxem boroil’lem asa: ‘Hanv gonvlliak jivexim martolom ani xellianchi duspôtt zatoli’,

28    punn Devan Mhaka punorjivont kortôch, Hanv Galileiant vetolom.

29    Pedrun Taka mhollem: Sogllech porian Tuka sôddun gele zalear, hanv kednanch Tuka sôddpak na!

30    Jezun taka zap dili: Hanv tuka sot sangtam: aiz, aichêch rati, kombean don pavtti sad ghalchê adim, tin pavtti tum Mhaka vollkhonãi mhonn sangtoloi.

31    Punn tannem odikuch bhasun sanglem: Tujê borabôr mhaka morunk legun poddlem zalear, hanv Tuka sôddun vochpak na! Heram soglleamnim toxench mhollem.

32    Getsemani mhonnlolea molleant te pavle. Jezun Aplea xisank mhollem: Hanvem magnnem kori-sôr tumi hanga bosat.

33    Ani Pedruk, Jakobak ani Juanvak Apnna borabôr vhorun, To thorthorunk ani middmiddunk laglo.

34    Ani Tannem tankam sanglem: Koslê khontint buddlam Hanv! Ti Mhaka morunk puro! Tumi hangach thambat ani zagrut ravat.

35    Ani matso fuddem vochun To dhornnir poddlo ani ho vêll, zata zalear, Apnna thaun pois vochum mhonn magtalo.

36    Tannem mhollem: Ab’ba, Bapa Mhojea, Tujean kitem-i korunk zata; hem patr Mhojê thaun pois kadd; toripunn Mhaka zai toxem nhoi, Tuka zai toxem zaum-di.

37    Ani portun ie zalear, te Taka nhidlole mell’le. Tednam Tannem Pedruk mhollem: Simanv, tum nhidlai? Êk tas-bhôr tujean zago ravunk zalem na mum?

38    Tumi tallnnent poddona zaunk zage ravat ani magnnem korat; otmo raji asa khoro, punn kudd osokt.

39    Ani novean vochun, tinch utram mhonnun Tannem magnnem kelem.

40    Porot ieun te Taka nhidlole mell’le; tanche dolle jemen zodd zal’le ani Taka koxi zap diunchi ti te nokllo asle.

41    Ani Tannem tisrê pavtt ieun tankam mhollem: Ozun nhidun asat tumi? Ozun visôv ghetat? Puro atam. Vêll pavlo. Polleiat, Mon’xachea Putak patkianchea hatant ghalcho zalo.

42    Utthat, chol ia ami. Mhaka poradhin korcho asa to lagim pavlo.

43    Oxem uloita astananch Judas, Barantlo eklo, thõi pavlo ani tachê sangatim torvari ani tonnke gheun mukhel iadnikamnim, dhormxastriamnim ani zannteamnim dhaddlolo lokacho êk zomo.

44    Taka poradhin kortolean tankam oxem mhonnun khunna dil’li: Hanv umo ghetolom polle, toch to; taka dhôrat ani samballun vhorat.

45    Ani pavona fuddem, rokddoch Jezu sorxem ieun Judasan mhollem: Rab’bi! (mhonngê Guruji!) ani Taka hunhunit umo dilo.

46    Ani tãnnim Tachea angar hat ghalun Taka dhôrlo;

47    tednam Tachê borabôr asloleantlea eklean torvar kaddun porom’-iadnikachea chakracher marun tacho kanuch katorlo.

48    Jezun tankam mhollem: Torvari ani tonnke gheun tumi Mhaka dhôrunk ieunk Hanv kitem pundd?

49    Dispotto Devmondirant xikovnn diun tumchê modem Hanv aslom tednam, tumi Mhaka dhôrlo na! Punn Povitr Pustokachim utram pallon ieunk zai.

50    Tea vellar soglle xis Taka sanddun pollun gele.

51    Konn-êk tornnatto, aplem ang fokot êkê olin pangrun, Tachê pattlean vetalo; tãnnim Taka dhôrlo,

52    punn tanchea hatant ôl sôddun diun, to vinglloch pollun gelo.

53    Ani Jezuk porom’-iadnika mukhar haddlo; ani soglle mukhel iadnik, zannte ani dhormxastri thõi ektthovle.

54    Pedru pois thaun Tachê fattlean cholun porom’-iadnikachea razangnnant bhitôr porian gelo, ani sevokam borabôr dhogtteak bosun xektalo.

55    Mukhel iadnik ani ak’khi Mha-Dhormsobha, Jezuk mornnachem formonn diunchê khatir, Tacher firiad korunk konn-ui aropi melltit kai mhonn sôdtale, punn tankam konn mellona zale.

56    Khorem mhollear, sobar zann Tacher add lottik firiad ditale, punn tancheô firiadi ekamekak zomonasleô.

57    Ani kãi zann utthun Tacher oxem boglantt ghaltale:

58    Mon’xanchea hatamnim bandlolem hem Devmondir hanv môddtolom, ani mon’xanchea hatamnim bandunk naslolem dusrem ek tin disam bhitôr bandtolom’, oxem tannem sanglolem ami aikolam.

59    Punn hê-i babtint tanchê firiadichi govaiki êkuch zainasli.

60    Ani porom’-iadnikan modekot ubo ravun Jezu kodde oxem vicharlem: Kãich zap dinãi? He tujer add hi firiad ditat tem kitem?

61    Jezu ogoch ravlo ani Tannem zap kaddli na. Novean porom’-iadnikan Tachê lagim oxem vicharlem: Krist tum? Ami vakhanntanv tea Devacho Put tum?

62    Jezun taka sanglem: Hôi, Hanv to! Ani Mon’xachea Putak dev-podvechea uzvea hatak boslolo ani sorginchea kupancher ailolo tumi dekhtoleat.

63    Tednam aplim vostram pinzun porom’-iadnikan mhollem: Anink sakxidaranchi amkam kosli goroz?

64    Tuminch devninda aikolea. Tôr tumkam kitem dista? Ekmotan tãnnim soglleamnim Jezuk moronn favo mhonn Tacher formonn marlem.

65    Tednam kãi zann Tacher thimpi uddounk lagle, ani, Tachem tondd dhampun, Tacher thapttam martale. Te Taka mhonnttale: Sang ga, provadia: konnem marla tuka? Ani sevok Tacher mutti martale.

66    Pedru sokla razangnnant astana, porom’-iadnikachi konn-ekli chakorn aili,

67    ani dhogtteak boslolea Pedruk dekhona fuddem, taka boro korun polleun tinnem mhollem: Tum-i Nazaretkar Jezu borabôr astaloi!

68    Punn na mhonnun tannem sanglem: Tum kitem mhonntai tem hanv nokllom; hanv tem somzo-i na. Ani thõicho koddsorun to fuddlea angnnant bhair sorun gelo. [Tednam kombean sad ghalo.]

69    Taka novean polleun ti chakorn thõi bhonvtim asloleank mhonnunk lagli: Ho tea mon’xantloch!

70    Punn tannem novean na mhollem. Ani matxea vogtan thõi asloleamnim novean Pedruk mhollem: Dubava vinnem tum-i tanchê bhitorlo eklo; tum-i Galileikar mum rê!

71    Punn to apnnacher xirap ghalunk ani soput gheun mhonnunk laglo: Tumi sangtat tea mon’xak hanv vollkhoch na!

72    Tedna rokddoch kombean dusrê pavtt sad ghalo; ani Jezun sanglolea hea utracho Pedruk ugddas ailo: Kombean don pavtti sad ghalchê adim tin pavtti tum Mhaka vollkhonãi mhonn sangtoloi. Ani to dukhamnim roddunk laglo.

---

Mark - Chapter :15

1    Ani sokallim fuddem mukhel iadnikamnim zannteam, xastriam, ani ak’khê Mha-Dhormsobhê borabôr bhasabhas korun aplo tharav ghetlo: tãnnim Jezuk bandlo ani Taka vhorun Pilatachea hatant ghalo.

2    Pilatan Tachê lagim vicharlem: Judevancho raza tum? Ani Jezun taka zap diun mhollem: Oxem tum sangtai.

3    Mukhel iadnik jin’nosvar garannim Tacher ghaltale.

4    Pilatan Tachê lagim portun vicharlem: Tum kãich zobab dinãi? Kitlim garannim, polle, te tujer ghaltat!

5    Punn Jezun anink zap kaddli na mhonn Pilatak ojap dislem.

6    Utsovachê somoim khõichea-i eka koidiak, lôk magit taka, suttka diunchi chal asli.

7    Tednam bonddaient khun kel’lea ani bondkhonnint ghal’lea fituram modem Barab’bas nanvacho êk monis aslo.

8    Lokacho êk zomo voir choddun gelo ani sodanchê chali pormannem apnnam khatir kôr mhonn Pilata lagim magunk laglo.

9    Ani Pilatan zap diun mhollem: Judevanchea razak hanvem suttka dil’li tumkam zai?

10    Mukhel iadnikamnim Taka nattkaien dhorun dila mhonn to tôr borem zanno aslo.

11    Punn anink konnak nhoi bogor Barab’basak tannem sôddun diuncho mhonn magunk mukhel iadnikamnim lokak fuslail’lo.

12    Tednam Pilatan novean zap diun tankam mhollem: Toxem zalear, tumi Judevancho raza mhonnttat taka hanvem kitem korchem?

13    Tãnnim novean huiêl marli: Taka khursar mar!

14    Torui Pilatan tankam mhollem: Tôr tannem kitem vaitt kelam? Punn tim odik vhoddlean huiêl marunk laglim: Taka khursar mar!

15    Mhonnttôch lokak khuxi korunk sôdtalo dekhun, tãnnim maglolem toxem, Pilatan Barab’basak suttka dili ani Jezuk jerbond diun khursar marunk tanchê svadhin kelo.

16    Tednam soinikamnim Taka nitixallechea razangnnant vhelo ani ak’khi polttônn zomoili.

17    Taka ek zambllem avoronn ghalem ani, kantteancho êk mukutt vinnun, to Tachea mathear ghalo.

18    Ani te Taka oso noman korunk lagle: Noman tuka, Judevanchea raza!

19    Ani êk boddi gheun Tachê tokler martale, Tacher thimpi uddoitale ani dimbi môddun Taka nomoskar kortale.

20    Tachim khebaddam kelea uprant, zambllem avoronn kaddun, tãnnim novean Taka Tachim khaxachim angavlim ghalim, ani Taka khursar marunk te Taka gheun gele.

21    Konn-eklo Siren’kar Simanv gramantlo ieun tê vatten vetalo; to Aleksandr ani Rufus hancho bapui; taka tãnnim Jezucho khuris vhorunk vettik dhôrlo.

23    Gondhrôs ghalun misoll’lolo soro te Taka ditale, punn Tannem to ghetlo na.

24    Taka khursar marlea uprant, konnak kitem poddta tem polleunk tãnnim sorti ghaleô ani Tachim vostram vanttlim.

25    Taka khursar marlo tednam sumar donparcho vêll zal’lo.

26    Tacho guneanv oso boroun ghal’lo: Judevancho Raza.

27    Ani Tachê borabôr dogam punddank khursar marle, ekak Tachea uzvean ani dusreak davean.

29    Tennem ieto-veto lôk apli tokli haloit Tacheô kenddnniô kortalo oxem mhonnun: Tum rê to?! Devmondir môddun uddoitai ani tem tin disamnim novean bandtai to?!

30    Tuzoch jiv vanchoi atam! Khursa velo denv, polleum-ia!

31    Têch porim xastriam borabôr mukhel iadnik ekameka lagim uloun Tacheô moskoriô kortale: Hannem herank soddoilim khõi, atam tachean apnnakuch sôddounk zaina mum rê!

32    Ho Krist, Israelacho raza khõi! Ami polleun tacher bhavarth dovorchê khatir taka atam khursa velo denvum-di! Tachê borabôr khursar marlole te-i Tacheô kexttaiô kortale.

33    Don’par zatôch tin vazo porian sogllea desacher kallôkh poddlo;

34    ani sumar tin vaztam Jezun vhoddlea tallean mhollem: Eloi, Eloi, lama sabakhtani, mhonngê, Deva Mhojea, Deva Mhojea, kiteak Tunvem Mhaka sanddloi?

35    Hem aikun, thõi ube aslolea kãi zannamnim mhollem: Ho Elijak apoita!

36    Konn-eklo dhanvun gelo ani xirkeant alombem buddoun kaddun ani êkê boddiek lavun Taka pieunk diunk laglo, oxem mhonnun: Ravat, Elija taka denvounk ieta zalear polleum-ia.

37    Tednam vhoddlean arddun Jezun prann sôddlo.

38    Devmondirantlea Gabhareacho podd’do voir thaun sokol doxim fanttlo.

39    Tannem oso prann sôddlo mhonn polleun, Tachea samkar aslolea xotpotin mhollem: Ho monis khoreponnim Devacho Put aslo.

40    Kãi bailô-i pois ravun polletaleô; tanchê bhitôr Magdalachi Maria, dhakttea Jakobachi ani Joshetachi avoi Maria, ani Salome.

41    To Galileiant astana Tacho pattlav korun, teô Tachi seva kortaleô. Tea bhair Tachê sangatim ak choddun ail’leô sobar dusreô bailô.


42-43    Sanz zalea uprant, Arimateiacho Juze ailo; to Mha-Dhormsobhecho êk xrêxtt vangddi aslo ani Devachea Rajeachi vatt polletalo. To Toiarecho Dis dekhun, mhonngê Son’vara adlo dis, dhir dhôrun Pilata-xim vochun tannem Jezuchi kudd magli.

44    Itlo vegim melo mhonn Pilatak ojap dislem ani, xotpotik apoun haddun, To melo zalear tannem vicharun ghetlem.

45    Xotpoti koddchi sarki khobor ghetôch, Juzek tannem kudd vhorunk dili.

46    Juzen êk ôl vikti gheun haddli ani Taka denvoun tê olin revddailo ani khoddpant khonnlolê êkê somadhint Taka dovorlo; magir êk fatôr ghunvddaun somadhichea tonddak laili.

47    Magdalachi Maria ani Josetachi avoi Maria Taka khõi dovortat tem polleun asleô.

---

Mark - Chapter :16

1    Son’var sorlea uprant, vochun Jezuchê kuddik lavunk, Magdalachi Maria, Jakobachi avoi Maria ani Salome, hãnnim pormôllit mosalo vikto gheun haddlo.

2    Ani satolleachea poilea disa bhov sokallim, suria udetana, teô somadhi-xim aileô.

3    Teô eka-mekak mhonnttaleô: Somadhichea tondda veli fatôr konn amkam dhuklun ditolo?

4    Punn nodor mar zalear, ti fatôr, borich vhoddli asun-ui, dhukol’loli tãnnim dekhli.

5    Somadhint bhitôr vochun, dhovem anglem neslolo êk tornnatto uzvean boslolo tãnnim dekhlo ani teô kampleô.

6    Punn tannem mhollem: Bhieum nakat; khursar marlolea Nazaretkar Jezuk tumi sôdtat; Devan Taka punorjivont kelo; To hanga na. Taka dovorlolo ti svat polleiat.

7    Punn atam vochun Tachea xisank ani Pedruk oxem sangat: ‘To tumchê adim Galileiak veta, ani Tannem sanglolê pormannem, tumi Taka thõi dekhtoleat.’

8    Bhair sorun, teô bailô somadhi thaun pollun geleô; tancher suttlolo bhõi ani kampero; ani tãnnim konnakuch kãi sanglem na, kiteak teô bhiel’leô.

9    Satolleachea poilea disa, sokallim punorjivont zaun, Jezu poilo Magdalachê Mariek dixtti poddlo; tichê vele Tannem sat devchar kaddlole.

10    Tinnem vochun Tachê borabôr astalim ani atam dukh korun roddtalim tankam kollit kelem.

11    Punn To jivo asa ani tika dixtti poddla mhonn tãnnim aikun-ui sotman’lem na.

12    Hachê uprant tanchê bhitorle dog zann eka ganvant cholun vetale; dusrem ek rup gheun To tankam dixtti poddlo.

13    Tãnnim ieun herank sanglem, punn hanchem-i tãnnim sotman’lem na.

14    Xekim, Ikra Zann jevta astana, tankam To dixtti poddlo. Apnnak punorjivont zal’lo dekhlolo tanchem tãnnim sotmanun ghetlem na dekhun, bhavarth dhôrchê svater aplench khorem korun ravle mhonnun Tannem tankam bexttaile.

15    Ani Tannem tankam sanglem: Ak’khea sonvsarak vochat, sogllê rochnnek Xubhvortoman porgôttat.

16    Bhavarth dhôrtit ani Povitr-Snan ghetit tim soddvônn zôddtolim; punn bhavarth dhôrina zatit tim khastichem formonn ghetolim.

17    Bhavarth dhôrtoleam sovem heô khunna dixtti poddtoleô: Mhojea Nanvan devchar kaddtolim, noveô bhasô uloitolim,

18    sorop dhôrtolim, ani jiv kaddpachem kitem-i tim pietit bi, tankam tem vaitt zaunchem na, piddevontancher hat dovrun tim tankam borim kortolim.

19    Ani Somia Jezun tanchê kodde uloun sompoitôch, Devan Taka voir sorgar ubarun vhelo ani thõi To Devachea uzveak bosla.

20    Tãnnim vochun sogllê kodden Xubhvortoman porgôttlem. Somi tanchem utor thiraitalo.

---