Dhormdutancho Itihas - Chapter :1
1-2 Jezun Aplo vavr suru kelo tednam thaun Devan Taka sorgar ubarun vhelo tea disa porian Tannem kelem ani xikoilem titleachi-i khobor, mogall Teofila, mhojea poilea pustokar hanvem boroun dovorlea; toxench Apnnem vinchun kaddlolea Dhormdutank Povitr Atmeachea bollan Tannem dil’lea updesanchi-i khobor thõi hanvem dilea.
3 Aplea koxttam-mornna uprant Apunn jivo asa mhonn jin’nosvar purave diun Tannem tankam dakhoilem; challis dis To tankam dixtti poddlo ani Devachea Rajea vixim tanchê kodde uloilo.
4 Tanchê sangatim jevnnar astana, Jeruzaleantle koddsorona zaunk, punn Bapan kel’lê bhasavnnek ravunk Jezun tankam formailem. Jezun sanglem: Hi bhasavnni kosli ti Mhojeach tonddantli tumi aikolea:
5 Juanvan udkan snan dilem, punn thoddeach disamnim tumkam Povitr Atmean snan melltolem.
6 Te zomlole astana, tãnnim Jezu kodde vicharlem: Somia, atam Israel-raxttrachi razvôttki Tum novean sthapun ditoloi b to vêll pavlo kai?
7 Jezun tankam zobab dilo: Bapan Aplea odhikaran nemlole kall c ani ghoddiô zanno zaunk tumkam poddlolem na.
8 Punn tumcher denvun ietolo tea Povitr Atmeachem boll tumi ghetoleat ani Jeruzaleant, ak’khea Judeiant ani Samarient ani sonvsarachea ximam porian tumi Mhoje govai zatoleat.
9 Hem sanglea uprant, te polletat thõich astana, Jezuk Devan voir-voir ubarun vhelo ani tanchea dolleam mukhavelo eka kupan Taka lipoilo.
10 To choddun veta astana, te aple dolle sorgak lavunuch asle. Ovchit dhovim vostram ghalun dog dadle tanchê kuxik ube zale.
11 Tãnnim mhollem: Galileikaramnô, tumi oxe sorgak nodor lavunuch kiteak ube asat? Tumchê modlo Devan voir ubarun vhela toch Jezu, tumi sorgar vetana pollelo tosoch, porto ietolo.
12 Zoitunanchea mhonnlolea dongrar thaun te Jeruzaleak portole; ho dongôr sumar êk kilometr Jeruzalea thaun pois asa.
13 Xarant bhitôr sortôch, apunn ravtale tea unchlea vosreant te gele. Te mhollear he: Pedru, Juanv, Jakob, Andre, Filip, Tomas, Bartolomêv, Matêv, Alfevacho put Jakob, krantikar Simanv ani Jakobacho put Judas.
14 Te soglle ekach monan magnnem korit asle; tanchea vangdda aslo êk bailancho zomo; hanchê modem Jezuchi avoi Maria, ani tea bhair Tachim bhav-bhoinn.
15 Hachê uprant kãi disamnim, sumar ekxem-vis bhavarthiam modem ubo ravun, Pedrun mhollem:
16 Bhavam-bhoinnimnô, Judasa vixim Povitr Atmean Davidachê tonddim adim-fuddench sangun dovorlolem Povitr Pustokantlem utor pallon ieunk zai aslem.
17 To amchea vangdda aslo ani amchea muniarponnant taka-i vantto mell’llolo; (16b) punn Jezuk dhôrunk aile tankam vatt dakhounk to fuddem sorlo.
18 Aplea khotteponnachi mozuri gheun tannem ek xet viktem ghetlolem; ani tondd zomnir apttota toxem to xevttolo, ani pott futton tacheô soglleô antkiddiô bhair sorun ximpoddleô.
19 Jerusaleant ravtolea soglleank hachi khobor pavli, ani oxem hea xetak tanchê khaxa bhaxen ‘Hakeldama’ mhonngê ‘Rogtachem Xet’ mhonn nanv poddlem.
20 Stotranchea Pustokar oxem boroil’lem asa: ‘Tachem ghor padd zaum ani tantum ravunk konnuch urona zaum.’ Hea bhair oxem-i boroil’lem asa: ‘Tachi zutti anink konn gheum.’
22 Dekhun, Somi Jezu punorjivont zala mhonn amchea vangdda sakxi diupi dusro eklo amkam zai. Somi Jezu amchê modem dixtti poddlo ani bhonvlo tea disamnim, mhonngê Juanv snan ditalo tednam-thaun Jezuk amchê thaun Devan ubarun vhelo to dis porian, hea sogllea kallar amchea vangdda asle tea dadleam modlo eklo to zaunk zai.
23 Tednam tãnnim doganchim nanvam suchoilim: Barsab’bas mhonnlolo Juze, addnanvan Nitivont, ani Matias.
24-25 Magir tãnnim oxem magnnem kelem: Somia, soglleanchim kallzam Tum vollkhotai; tôr aplea khaxa zagear vochunk Judasan sôddun dilo to muniarponnacho vavr ani Dhormdutanchem kam’ korunk hea dogam bhitorlea konnak Tunvem vinchun kaddlai to amkam dakhoi.
26 Tednam tãnnim sorti ghaleô ani sort Matiasacher poddli. Ani Ikra Dhormdutam modem taka lêkhlo.
Dhormdutancho Itihas - Chapter :2
1 Pon’nasavea Disachea Utsova chea somoiar tim sogllim êkêch svater zomlolim aslim.
2 Ovchituch zonnzonnit varea sarko sorga velo êk avaz aikunk ailo; hea avazan tim aslim tem ak’khem ghor bhòrlem.
3 Ani ujeacheô koxeô jibô tankam dixtti poddleô; teô fanttleô ani tancher ek-ekleacher bosleô.
4 Tim sogllim Povitr Atmean bhòrlim ani, Atmean tankam dil’lo uloupacho gunn gheun, tim veg-vegllea bhasamnim ulounk laglim.
5 Mollba khala aslolea dor-eka raxttrachim bhoktivont Judev mon’xam Jeruzaleak vostek ail’lim aslim.
6 Ho avaz aikun khub lôk ghuspolo.
7 Thottakon ani ojap zaun to lôk mhonnunk laglo: Him uloitat tim sogllim Galileikaram nhoi?
8 Amchê modlea zonn-ekleachê avoi-bhaxen tim uloitat mhonn ami aikotanv tem koxem tôr?
9 Ami Parthi, Medi ani Elamit; ami Mezopotamientlo, Judeiantlo ani Kapadosientlo lôk; ami Pontusant, Aziechea prantant,
10 Frijient ani Panfilient, Ejiptant ani Sirena bhonvtim aslolea Libiechea prantant raupi; ami Roma thaun-ui ail’lo
11 Judêv lôk ani tanchim novxisam; tea bhair Kretkaram ani Arbi. Tori ami somestãnnim porgôttlolim Devachim xrêxtt kortutvam aikotanv tim ek-eklo ap-aplê khaxa bhaxen aikota: hem koxem?!
12 Tim sogllim tthottaklim ani sarkinch ghuspon ekamekak mhonnunk laglim: Hem anink kitem?!
13 Punn dusrim moskoriô korun mhonnttalim: Him mon’xam novo soro pieun borinch lal zaleant.
14 Tednam Pedru Ikram borabôr ubo ravlo ani tallo ubarun oso uloilo: Judevamnô, ani Jeruzaleant vostek aslolea somestamnô, hem zanno zaiat ani hanv sangtam taka chit diat.
15 Tumi somzotat toxem him mon’xam bebdim zaunk nant, kiteak atam sokallchim nnovuch voram zaleant.
16 Punn Joel provadia vorvim jem Devan sanglolem tem atam ghoddon ieta:
17 ‘Nimannea disamnimuloita to Sorvespor sogllea mon’xakullacher Hanv Mhozo Atmo ghaltolom, tumcheô put-dhuvô sondêx ditolim, tumchim tornnattim dorxonam polletolim, ani tumchim zanntim sopnam sopnetolim.
18 Ani khorench tea disamnim Mhojea gulamancher porian, dadleancher toxem bailancher, Hanv Mhozo Atmo ghaltolom, ani tim sondêx ditolim.
19 Voir mollbar Hanv odbhutam korun dakhoitolom ani sokla prithumer khunna-ojapam: rogot, uzo ani dhunvrachim kupam.
20 Xrêxtt ani tezvont Sorvesporacho Dis udeunchê adim suriacho zatolo kallôkh ani chondrimachem zatolem rogot.
21 Tednam Sorvesporachem Nanv ghetat tea soglleank soddvonn melltoli.’
22 Israel-porjechea bhavam-bhoinnimnô, him mhojim utram chitan aikat! Devan tumchê modem Nazaretkar Jezu Apnnak manovlolo monis mhonn dakhoilo: To tumchê modem aslo tednam, Tachê udexim Devan ochoriam ani vismitam ani khunna kelim hi soglli khobor tumi zannont.
23 Aplê tharail’lê ievzonnê pormannem, sogllem adim-fuddench zanno zaun, Devan Jezuk poradhin kelo, ani tumi Taka Somurt-naslolea mon’xanchê adhin korun khursar umkollailo ani jivexim marlo. Punn Devan Taka mornnachea bandpasantlo soddoun Taka punorjivont kelo.
24 Kiteak Taka aplea chopkeant dhôrunk mornnak koxêch bhaxen podvi asum nozo asli.
25 Tôr Tachê vixim David oxem mhonntta: ‘Hanv Sorvesporak sodanch mhojea dolleam mukhar dovortam, To mhojea uzveak asa mhonnttôch, Hanv kodinch halona.
26 Dekhun mhojem kalliz murgott’ta, mhoji jib ul’lasta, mhoji kudd porian bhorvanxean sust zatoli,
27 kiteak Tum mhozo jiv Norkant sanddcho nãi ani Tujea visvaxi bhoktacho vinas zaunk diuncho nãi.
28 Tum mhaka jivitachi vatt dakhoitoloi, Tujê mukhar mhaka melltoli anondachi bhorti.’
29 Bhavam-bhoinnimnô, hem mhojean tumkam khatren amchea porzapoti Davida vixim sangum-ieta: to melo ani taka purlo ani tachi somadhi aichea disa porian amchê modem asa.
30 Mhonnttôch, provadi zaun, apnnak Devan kel’lê bhasavnnechi Davidak khobor asli: tachê sonstichea ekleak tachea xinvasonar Apunn bosoitolo mhonn khud Devan taka soput dil’lo.
31 Dekhun tannem Kristachem punorjivontponn adim-fuddench pollelem ani oxem porgôtt kelem. Devan Norkant sanddunk na to Hoch! Jicho Devan vinas zaunk diunk na, ti kudd Hachich!
32 Hea Jezuk Devan punorjivont kelo ani ami soglle Tache govai.
33 Devan Taka Aplê podven sorgar ubarun vhelea uprant, bhasail’lo Povitr Atmo Tannem Bapa koddlo ghetlo ani amcher dhaddlo. Tumi polletat ani aikotat tem hench!
34-35 Kiteak David sorgar choddunk na; tori tannem mhollam:‘Mhojea Somiak Sorvesporachem utor hem: Mhojea uzvea hatak bos, tujea dusmanank Hanv tujea pãiam tolla ghaltam.’
36 Mhonnttôch tumi khursar marlo tea Jezuk Devan Isvor ani Krist kelo mhonn Israelachem ak’khem Ghorannem sogllê khatren zanno zaunchem.
37 Him utram aikolim tankam vhôdd khônt bhògli ani Pedruk ani heram Dhormdutank tãnnim mhollem: Bhavamnô, ami kitem korchem?
38 Pedrun zap diun mhollem: Jivit bôdlat, ani tumchea patkanchem bhogsonnem zhoddunk zonn-eklean Jezu Kristachea nanvan Snan gheunchem, ani tumkam Povitr Atmeachem dennem melltolem.
39 Kiteak ji Devan bhasavnni kelea, ti tumchê khatir ani tumchea bhurgeam-ballam khatir ani pois aslolea somestam khatir, amcho Sorvespor Dev Apnna-xim apoun haddtolo titleam-i khatir.
40 Zaitem her sangun tannem apli govaiki dili ani tankam oso ulo kelo: Hê noxttê pinddkentli tumkam soddvonn zoddun gheiat. Tednam tãnnim tachem utor manun Povitr-Snan ghetlem.
41 Tea disa sumar tin hozar lôk tanchea zomeant bhitôr sorlo.
42 Tim Dhormdutanchi xikovnn gheunk, bhavponnacho ektar samballunk, toxench Unddeachê môddnnent ani magnneannim vantto gheunk kodinch chukonaslim.
43 Sogllo lôk thottak zatalo, kiteak Dhormdutam vorvim puskoll vismitam ani khunna ghòddtalim.
44 Bhavarthi sogllim ekvottant jietalim ani tanchem sogllem bhaga aslem;
45 tim aplim bhattam-vit’tam viktalim ani vikrecho duddu zonn-ekleachê gorjê pormannem vantt’talim.
46 Ekach monan dispottim tim Devmondirant vetalim ani Unddo moddunk tanchea eka-eka ghorant ektthãi zatalim, ani khuxalkaien ani kallzachea bholeponnan
47 tim Devak vakhanntalim ani sogllea lokak manovtalim. Zankam taronn mellchem aslem, tankam tanchea vangdda haddun, disan’dis Sorvespor tanchi sonkia choddoitalo.
Dhormdutancho Itihas - Chapter :3
1 Ekdam Pedru ani Juanv sanjechea tin voranchea prarthonak Devmondirant choddun vetale.
2 Tednam eka mon’xak ubarun vhortalim. To zolma thaun opangull aslo; ani Devmondirant bhitôr sortoleam lagim tannem bhik magchê khatir, Devmondirachea Sundôr mhonnlolea Darvonttea sorxim dispottim taka dovortalim.
3 Pedru ani Juanv Devmondirant bhitôr sortat tem polleun tannem tanchê lagim bhik magli. Pedrun ani Juanvan tacher dolle laile ani Pedrun taka mhollem:
4 Amkam polle. Apnnak tanchem kitem-i tori melltolem mhonn chintun, to axen tanchê vatten polleunk laglo.
5 Punn Pedrun mhollem: Mhojê lagim rupem na, bhangar-ui na,
6 punn jem kitem mhojê lagim asa tem hanv tuka ditam: Nazaretkar Jezu Kristachea nanvan utth ani cholunk lag.
7 Tednam Pedrun tachea uzveak hatak dhôrun taka ubo kelo. Thõichê-thõich tache pãi ani khube ghott zale;
8 uddi marun to ubo ravlo ani cholunk laglo; ani cholot ani uddiô marit ani Devak vakhannit to tanchê borabôr Devmondirant bhitôr sorlo.
9 To cholta ani Devak vakhannta mhonn soglleamnim pollelem.
10 Devmondirachea Sundôr Darvonttea sorxem bosun bhik magi to hoch mhonn tãnnim taka vollkholo ani tea mon’xak ghòddlem tê vixim tim ojapun tthottaklim.
11 To monis Pedruchi ani Juanvachi patt sôddinaslo; itlea mhonnosôr, sogllo lôk ojap zaun Solomonachea mhonnlolea Darvonttea sorxim dhanvun-dhanvun ailo.
12 Lokak polleun Pedru oso uloilo: Israel-porjechea bhavam-bhoinnimnô, tumi hachê vixim kiteak mhonn ojap zatat vô kiteak mhonn amcher dolle lavunuch asat? Ami amchê khaxa podven vô bhoktiponnan hea mon’xak cholunk xokti dilea kitem?
13 Abrahamachea, Izaakachea ani Jakobachea Devan, amchea purvozanchea Devan, Aplea sevoka Jezuk mhoimevont kelo; tumi Taka mon’subidarachê adhin kelo ani, Pilatan Taka sôddunk tharail’lem tednam, Jezu apnnank naka mhonn tachê mukhar tumi sanglem.
14 Jezu bhoktivont ani Promannik aslo, tori To tumkam naka zalo; eka khuniak mafi diun soddouncho mhonn tumi apnnank upkar maglo, punn Jivit-Datarak tumi jivexim marlo.
15 Tori Devan Taka mel’leantlo punorjivont kelo ani hache ami govai.
16 Tumi hanga hea mon’xak polletat ani taka boro vollkhotat. Tôr Jezuchea Nanvan, Tacher ami bhavarth dovorlo dekhun, hea mon’xak ghottai dili; Tacher tthevlolea bhavarthan ki hea mon’xak sarko boro kelo mhonn tumi sogllim polletat.
17 Punn hanv zannom, bhavam-bhoinnimnô, jem tumi kelam, tem tumi ani tumchea fuddariamnim nennarponnan kelam.
18 Punn Aplea Kristan koxtt-dogd bhôgunk zai mhonn sogllea provadiam vorvim jem Devan adim sanglolem, tem Tannem hê bhaxen xarti pavoilem.
19 Mhonnttôch, jivit bodlun tumi Deva sorxim portun ieiat; hê porim tumchea patkanchem bhogsonnem tumkam melltolem
20 ani Sorvespora koddsun tumkam xanti-somadhanacho kall ietolo. Tednam Apnnem tumchê khatir nemlolea Kristak, mhonngê Jezuk, To tumchê-xim patthoitolo;
21 kiteak Aplea bhoktivont provadianchê tonddim Devan orombak thaun porgôtt kela to sogllea vostunchê novsornnecho kall ie porian Jezu sorgar asunk zai.
22 Moizesan tôr oxem sanglam: ‘Tumchea bhavam-bhoinnim modlo mhojê sarko êk provadi Sorvespor Dev tumchê khatir upzoitolo; to sangit titlem-i tumi chitan aikunchem.
23 Jim konn tea provadiak aikonant, tankam porjentlim bhairaunchim.’
24 Khorench, Samuela thaun suru korun je soglle provadi uloun geleat, tãnnim hea disanchi khobor sangun dovorlea.
25 Tumich tim provadianchim bhurgim ani Devan amchea purvozam kodde kel’lea korarachim daiji. Kiteak Abrahamak Devan oxem mhollem: ‘Tujê sonsti vorvim prithumechea sogllea kuttumbank axirvad melltolo.’
26 Tôr tumkam soglleank tumchea khotteponnantlim soddoun axirvad diunk Devan Aplea Sevokak punorjivont korun poilo tumchê-xim dhaddlo.
Dhormdutancho Itihas - Chapter :4
1 Pedru ani Juanv loka lagim uloitat thõich astana, iadnik ani Devmondiracho karbhari ani Saduki a tanchê-xim aile.
2 He Dhormdut lokak xikoitale ani mel’leantlo punorjivont zal’lea Jezu vorvim sogllim punorjivont zatolim mhonn te porgôtt’tale dekhun, tankam borench vaitt dislem.
3 Tãnnim tankam dhôrle ani, sanz zali mhonn, dusrea disa porian tankam bondkhonnint dovorle.
4 Punn tanchem utor aikol’lem tantlea zaitea zannamnim bhavarth dhôrlo ani dadleanchich sonkia sumar panch hozarancher pavli.
5-6 Dusrea disa Judevanche fuddari, zannte ani xastri Jeruzaleant zomle ani tanchê borabôr porom’-iadnik An’nas, Kaifas, Juanv, Aleksandr ani porom’-iadnikanchea ghoranneantle soglle.
7 Dhormdutank modem ube korun, tãnnim vicharlem: Konnachê podven vô konnachea nanvan tumi hem kelam?
8 Tednam, Povitr Atmean bhoron, Pedrun tankam mhollem: Porjechea fuddariamnô ani zanntteamnô!
9 Eka piddevonta thãi ami êk doiall kornni keli mhonn tumi aiz amchi zhôddti kortat ani to konnachê podven boro zalo tem tumi zanno zaunk sôdtat.
10 Tôr soglle tumi ani Israelachi ak’khi porza hem zanno zaum: tumi khursar marlo punn Devan mel’leantlo punorjivont kelo tea Nazaretkar Jezu Kristachea nanvan ani Tachêch podven ho monis hanga tumchê mukhar boro zaun ubo asa.
11 Tumi bandpiamnim sôddun dil’lo fatôr To, punn atam khorem mhollear Taka Devan konnxeasondhicho Fatôr kela.
12 Ani dusrea konnachêch vorvim soddvonn mellunk xokona, kiteak amkam soddvonn diunk xokta toslem anink dusrem nanv mollba khala Devan mon’xank diunk na!
13 Pedruchem ani Juanvachem kalljidarponn polleun Sobheche vangddi ojap zatale, kiteak te oxikxit ani chalte monis mhonn te somzotale; punn te Jezu borabôr astale mhonn tankam khobor asli.
14 Punn boro kel’lea ani tanchê modem ubo aslolea mon’xak polleun tanchean kãich add sangunk zainaslem.
15 Tãnnim tankam Mha-Dhormsobhentle bhair ravunk hukum’ ghalo ani magir te apnnam modem oxi bhasabhas korunk lagle:
16 Hea mon’xank ami kitem korum-ia? Tanchê vorvim ghòddlam tem mottem vismit Jeruzaleant ravtolea soglleank kollit zalam ani amchean tem na mhonnunk zaina.
17 Punn hi khobor loka modem anink ximpoddna zaunchê khatir, hea nanvan konnakuch anink uloina zaunk ami tankam dhomkavnni dium-ia.
18 Tankam bhitôr apoun, Jezuchea Nanvan koxêch bhaxen anink uloina zaunk ani xikovnn dina zaunk tãnnim tankam formailem.
19 Punn Pedrun ani Juanvan portipallun mhollem: Tumkam aikun Devak aikona zaunk, hem Devachea dolleam mukhar sarkem zalear tumich nirnnoi diat.
20 Ami kitem dekhlam ani aikolam tem porgôtt korinastana amchean ravunk zaina.
21 Tãnnim tankam anink êk pavtt dhomkaile ani sôddle; khõichêch vatten tankam khast lavunk mellonasli, kiteak sogllo lôk ghòddlam tachê khatir Devak vakhanntalo.
22 Vismitam vorvim boro zal’lo tea mon’xak challis vorsam voir aslim.
23 Pedruk ani Juanvak sôddlea uprant, te aplea zomea-xim gele ani mukhel-iadnikamnim ani zannteamnim tankam sanglolem titlem-i tãnnim tankam kollit kelem.
24 Tem aikolea uprant, tãnnim soglleamnim borabôr aplo tallo Devak ubarun mhollem: Dhonia, sôrg, prithum’, somdir ani tachê bhitôr asa titlem-i Tunvem rochlãi.
25 Ani Povitr Atmea vorvim, amchea bapa Tujea sevoka Davidachê tonddim sanglãi:‘Raxttram kiteak challovtat? Kiteak heô porza bextteô gunngunntat, kunnkunntat?
26 Pritumeche raza uprastat, Sorvesporacher ani Tachea Kristacher kunvor guddmêll kortat.’
27 Khorench, Herod ani Pons Pilat raxttram ani Israelachê porjê borabôr ektthãi zaun, Jezucher, Tunvem makhlolea Sevokacher, add guddmêll kelo,
28 ani oxem, jem ghòddchem mhonn Tujê podven ani zannvaien Tunvem adim-fuddench tharail’leim, tem tãnnim xarti pavoilem.
29 Ani atam, Sorvespora, tancheô dhomkavnniô Tum polle ani sogllea kalljidarponnan Tuzo nirôp porgôttunk Tujea sevokank nirmi;
30 ani Tujea povitr Sevoka Jezuchê nanvim pidda kaddun uddounk ani ochoriam ani vismitam korunk Tujea hatachi podvi dakhoi.
31 Oxem magnnem korta astana tim zomlolim ti dhornn kampli, tim sogllim Povitr Atmean bhòrlim ani kalljidarponnan Devachem utor porgôttit ravlim.
32 Bhavarthiancho ak’kho somudai eka kallzacho ani eka monacho aslo; apnna lagim kitem aslem tem apnnachench mhonn konn dhôrinaslo, punn tanchê lagim aslem tem sogllem soglleanchem mhonn tim dhôrtalim.
33 Dhormdut vhodda bollan Somia Jezuchea punorjivontponnak govai ditale ani tankam soglleank vhôdd man aslo.
34 Tanchê modem gorjek sampoddlolim konn naslim, kiteak, zanchê lagim bhattam vô ghoram aslim, tim vikun tim tancho vikrecho duddu haddun
35 Dhormdutanchea pãiam-xim dovortalim. Magir zonn-ekleak ap-aplê gorjê pormannem ho duddu vantt’talim.
36 Oxem Juze nanvacho Siprusacho êk Levit aslo; taka Dhormdutamnim Barnabas (mhonngê dhir divpi) mhonn nanv ghalem.
37 Tacho êk bhattacho kuddko aslo to tannem viklo ani vikrecho duddu haddun Dhormdutanchea pãiam-xim dovorlo.
Dhormdutancho Itihas - Chapter :5
1 Ananias mhonnlolo êk monis aslo; tachê bailechem nanv Safira. Tannem aplea bhattacho êk kuddko viklo
2 ani, tachi bail bhedi asun, vikrechea duddvancho êk vantto lipoun dovorlo ani urlolo vantto haddun Dhormdutanchea pãiam-xim dovorlo.
3 Pedrun taka mhollem: Ananias, Soitanak tujea kallzant kiteak itlo rigunk dilai tunvem, ki vikrechea duddvancho êk vantto lipoun dovrun Povitr Atmeak fôtt marunk pavloi?
4 Bhatt vikchê adim tem tujench aslem. Toxem tem viklea uprant, vikrecho duddu-i tuzoch nhoi? Osli khotti kornni tujea kallzant koxi mhonn ievzon aili? Tunvem fôtt marleai ti mon’xank nhoi punn Devak.
5 Him utram aikona fuddem, Ananias bhuim poddlo ani melo. Ani hem aikolem titleancher-ui vhôdd bhirant aili.
6 Uprant kãi tornnatte aile ani tachem pret êkê olin revddailem ani bhair vhorun purlem.
7 Sumar tin voram uprant tachi bail bhitôr aili, punn kitem-kat ghòddlem tachi tika kãi khobor nasli.
8 Pedrun tika vicharlem: Tumi viklam tem bhatt itleach molak viklam? Tinnem zobab dilo: Hôi, titleakuch.
9 Tednam Pedrun tika mhollem: Somiachea Atmeachi porikxa korunk koxem mhonn tumi dogam-i zannam kobul zaleant? Polle, tujea ghovak purun aileat tanche pãi darachea umbrearuch asat ani te tuka-i vhortole.
10 Thõichê thõich ti tachea pãiam-xim poddli ani meli. Tednam tornnatte bhitôr aile ani ti tankam meloli mell’li; ani tika bhair vhorun tichea ghovachê kuxik tãnnim purli.
11 Hi khobor aikun ak’khê Povitr-Sobhecher ani ieram soglleancher vhôdd bhirant aili.
12 Porjê modem Dhormdutamnim khub khunna ani ojapam kelim. Tim sogllim eka monan Solomonachea Tarangnnant ektthãi zatalim.
13 Lôk tankam vakhanntalo, punn anink konnuch tanchea zomeant bhitôr sorunk fuddem soronaslo.
14 Somiacher bhavarth dovortolea dadleam ani bailanchi sonkia choddon-vaddon vetali.
15 Ani oxem zatalem ki, Pedru choltana, tachi savlli punn konna konnancher poddun tim ap-aplê piddentlim borim zaunchim mhonn lôk piddevontank choukancher vhoro ani khattincher ani antrunnancher tankam dovri.
16 Jeruzalea bhonvtonnchea nograntlo-i lôk zomeamnim ietalo ani apnna borabôr piddevontank ani mhelle otme bosloleank haddtalo, ani tim sogllim borim zatalim.
17 Tednam porom’-iadnik ani tache soglle bhageli, mhonngê Sadukinchea pokxache vangddi, nirdukaien bhòrle,
18 ani Dhormdutank dhôrun tãnnim tankam êkê bhovxik bondkhonnint ghale.
19 Punn tê rati Sorvesporachea dutan bondkhonnichim daram ugôddlim ani tankam bhair kaddun oxem mhollem:
20 Vochat ani Devmondirant ube ravat ani porjek hea Jivitachi soglli khobor kolloiat.
21 Tankam sanglolê pormannem, dis uzvaddchê adim te Devmondirant gele ani xikovnn diunk lagle. Porom’-iadnik ani tanche bhageli pavle tednam, tãnnim Mha-Dhormsobha zomoili, mhonngê Israel-porjechea zanntteanchi ak’khi Sobha, ani Dhormdutank bondkhonnintle haddunk laile.
22 Punn subedar bondkhonnint pavle tednam, bhitôr tankam konn mellunk na; dekhun, portun ieun tãnnim sanglem:
23 Amkam bondkhônn sarki dhamploli mell’llea, ani paredar daram mukhar paro korun ube asle; punn ti ugôddtôch bhitôr amkam konnuch mellunk na.
24 Hi khobor aikun, Devmondiracho sordar ani mukhel iadnik tankam kitem ghòddlem kai mhonn chintunk poddle.
25 Tednam konn-eklo hi nigtich khobor gheun ailo: Tumi bondkhonnint ghal’le te monis he polleiat Devmondirant ube asat ani porjek xikovnn ditat.
26 Tednam sordar aplea subedarank gheun gelo, punn, lôk apnnank fatrait mhonn bhieun, boll korinastana tãnnim tankam haddle.
27 Tankam Mha-Dhormsobhê mukhar haddun ube kortôch, porom’-iadnikan tankam oxem vicharlem:
28 Hea nanvan anink xikovnn dina zaunk ami tumkam khôr xiddkavnni dil’li, tori, polleiat, tumchê xikovnnen tumi Jeruzalem bhôrlam ani hea mon’xachea mornnachi zobabdari tumi amcher ghalunk sôdtat.
29 Portipall korun, Pedrun ani Dhormdutamnim oxem mhollem: Mon’xanchi adnia nhoi, punn Devachi adnia ki ami pallunk zai.
30 Eka rukhar umkollavun tumi jivexim marlo tea Jezuk amchea purvozanchea Devan punorjivont kelo.
31 Taka Fuddari ani Soddvonnar korunk ani Tachê vorvim Israelak jivit-bodlop ani patkanchem bhogsonnem diunk, Aplê podven Devan Taka voir ubarlo.
32 Hea sogllea ghòddnnianche ami govai asanv ani Devan Apleô adnia palltoleank zo Povitr Atmo dila, To-i amchê borabôr govai.
33 Hem aikun, tancho rag itlo pettlo ki te tankam nattak korunk sôdtale.
34 Tedea vellar Mha-Dhormsobhecho êk vangddi ubo zalo: to Gamaliel nanvacho êk Farizêv, ani nanv vosto xastri mhonn ak’khi porza taka lekhtali. Tea mon’xank thoddo vêll bhair kaddat mhonn tannem maglem.
35 Magir Mha-Dhormsobhek hea utramnim to uloilo: Israel porjechea mon’xamnô, hea mon’xam vixim tumi kitem korunk sôdtat tachi tumi borich chotrai dhôrat.
36 Tumi zannont, hea adim Teudas nanvacho konn-eklo upzolo ani apunn konn mhotvacho mhonn sangunk laglo; ani sumar charxim monis tachê pattlean gele; punn taka jivexim marlo ani tache pattlavdar ximpoddle ani nanch zale.
37 Uprant, lôkgonnttechea somoiar, Galileikar Judas upraslo ani apnna pattlean zaitea lokak tannem ôddlo; taka-i jivexim marlo ani tache-i xis zollim mollim ximpoddle.
38 Tôr hanv tumkam sangunk sôdtam tem hem: hea mon’xam thaun pois sorat ani tankam sôddat.
39 Kiteak hem kolpon vô hem kam’ mon’xam thaun upzolam zalear, tem apxinch fiskotton vetolem; punn tem Deva thaun ieta zalear, tumchean tem nattak korunk zaunchem na; tea bhair, tumi Devacher add zhuzunk pavxat. Tachem tãnnim manun ghetlem.
40 Tãnnim Dhormdutank apounk dhaddle, tankam mar dilo, Jezuchea Nanvan anink uloina zaunk tankam xiddkaile ani sôddle.
41 Jezuchea Nanva pasot beman sõsunk apnnank bhag mell’lem mhonn khuxal zaun, te Mha-Dhormsobhentle bhair sorle.
42 Te dispottim Devmondirant ani ghoram-ghoramnim xikovnn diit ani Jezu Kristachem Xubhvortoman porgôttit ravle.
Dhormdutancho Itihas - Chapter :6
1 Tednam, xisanchi sonkia vaddot vetana, Grik bhas ulovpi Judev mon’xam Hebrêv bhas ulovpi Judevancher gungunnunk laglim, kiteak dispottim jevonn vaddtana tanchea vidvanchi favo tê fikirin seva zainasli.
2 Hea khatir Bara Zannamnim xisanchea somudaiachi êk zomat apoili ani tankam mhollem: Devachem utor kuxin dovrun, jevonn vaddchi seva amkam bori sobona.
3 Tea pasot tumi, bhavam-bhoinnimnô, tumchê modlea sat dadleank sôdun kaddat: te boro man aslole ani Povitr Atmean ani zannvaien bhòrlole zaunche; ani hi jevnnachi seva ami tanchea hatant sompoitoleanv.
4 Magir ami sogllo amcho vêll prarthon korunk ani Devachem utor porgôttunk bhettoitoleanv.
5 Hi ievzônn sogllê sobhen manun ghetli, ani bhavarthan ani Povitr Atmean bhòrlolea Istevak vinchun kaddlo, ani tachê borabôr Filipak, Prokorak, Nikanorak, Timonak, Parmenasak ani Nikolavak, Antiokiechea novxisak.
6 Hankam tãnnim Dhormdutam mukhar ube kele ani hãnnim magnnem korun tancher hat dovorle.
7 Sorvesporachem utor ximpddot vetalem ani Jeruzaleant xisanchi sonkia vaddot-choddot vetali, ani puskoll iadnikamnim porian bhavarth manun ghetlo.
8 Devachea subham’ denneamnim ani bollan bhòrlolo Istêv loka modem vhoddleô khunna ani vismitam kortalo.
9 Svotontr zal’lea mon’xanchem devsthan, hea nanvachem ek devsthan aslem; hache vangddi asle Sirenache, Aleksandrieche, Silisieche ani Aziechea Prantantle kãi Judev. Tea devsthanantle kãi zann fuddem sorle ani Isteva kodde vad-vivad korunk lagle.
10 Punn to zannvaien ani Atmean bhoron uloitalo dekhun, taka fuddo korunk tanchê lagim ghoddonaslem.
11 Tea pasot, tãnnim thoddea mon’xank sôdun kaddle ani tankam oxem mhonnunk xikoilem: To Moizesacher ani Devacher ninda uloita tem ami aikolam.
12 Oxem tãnnim lokak ani zannteank ani xastriank fuloile. Te soglle aile ani Istevak dhôrun tãnnim taka Mha-Dhormsobhê mukhar vhelo.
13 Ani thõi oxem sangunk lottik sakxidarank tãnnim ube kele:
14 Ho monis hea Povitr Zageacher ani Somurticher add uloit asa. ‘Nazaretkar Jezu hea Povitr Zageachem nisontton kortolo ani Moizesan dil’leô riti-rovisô bodôltolo’ oxem tannem mhonnlolem ami amcheach kanamnim aikolam.
15 Ani tellun tacher nodor mar zalear, neaisobhent boslole tankam tachem mukhamoll eka devdutachem mukhamoll koxem distalem.
Dhormdutancho Itihas - Chapter :7
1 Porom’-iadnikan Istevak vicharlem: Te sangtat tem khorem?
2 Istevan portipall kelo: Mhojea bhavamnô, mhojea vhoddilamnô, mhojem utor aikat: Kharran ganvant tthikann korunk vechê adim, Mezopotamient astana, amchea bapa Abrahamak mhoimecho Dev dixtti poddlo.
3 Tannem taka mhollem: ‘Tuzo dês sôdd, tujea ghoranneantlo bhair sor, ani Hanv tuka dakhoitolom tea desant voch.’
4 Tednam to Kaldeikaranchea desantlo bhair sorlo ani Kharran ganvant ravunk gelo. Ani tacho bapui mortôch, Devan taka thõisorlo bhair kaddlo ani hea tumi atam ravtat tea desant haddlo.
5 Tori hea desant êk vet bhôr porian taka daiz dilem na. Punn taka ozun bhurgo naslo tednam, taka ani tachê uprant tachê sonstik Apunn to dês ditolo mhonn Devan bhasailem.
6 Tôr Dev Abrahama kodde oso uloilo: ‘Tuji sonsôt porkea desant videxi koxi jietoli. To lôk tankam charxim vorsam gulam’ponnant dovrun dogdaitolo.’
7 Sorvesporan anink-ui mhollem: ‘Jem raxttr tankam gulam’ponnant dovortolem, tea raxttrachi Hanv nit kortolom, ani uprant tim thõisorlim bhair sortolim ani hê svater tim Mhaka bhôztolim.’
8 Ani Devan Abrahamak sunoticho korar dilo; ani hê porim Izaak tacho put zolmotôch, atthvea disa tannem tachi sunôt keli: magir Izaakan Jakobachi sunôt keli, ani uprant Jakoban bara porzapotinchi sunôt keli.
9 He porzapoti, aplea bhava Juzechê nattkaien bhoron, taka gulam’ koso viklo ani oso to Ejiptak pavlo, punn Dev tachê sovem aslo;
10 ani Tannem taka sogllea vignantlo vattailo ani Ejiptachea raza Faraoh mukhar itlo taka axirvadan bhôrlo ani xanno kelo, ki Faraohn Ejiptacho ani aplea ak’khea ghoranneacho karbhar tachea hatant ghalo.
11 Tednam ak’khea Ejiptant ani Kanaanant dukôll poddun, lokak zaite hal ani upodre bhògche poddle, ani amchea purvozank jevonn-khann mellona zalem.
12 Punn Ejiptant orôv asa mhonn Jakobachea kanar poddlem tednam, poilê pavtti amchea purvozank tannem thõi patthoile.
13 Dusrê pavtti gele tednam, Juzen aplea bhavank apunn konn to dakhoun dilem, ani Juzechea kuttumbachi soglli khobor Faraohk gomli.
14 Tednam Juzen aplea bapaik Jakobak ani sogllea aplea soiream-dhaireank apounk dhaddlim; tim sogllim mellun ponchastôr zannam aslim.
15 Ani Jakob Ejiptak denvun gelo; ani uprant, to ani amche purvoz mele.
16 Tancheô kuddi Shekem’ ganvant porteô vheleô ani Abrahaman thõi Shekemant kimôt farik korun Hemorachea putam koddli vikti ghetloli tê somadhint teô ghaleô.
17 Devan Abrahamak bhasail’lo kall lagim pavtam-pavtam, Ejiptant porjechi sonkia vaddot-choddot geli.
18 Itlean Ejiptant dusro eklo raza razvôttki cholounk laglo; taka Juzechi khoboruch nasli.
19 Tannem amchê porjek naddbudhin vagoili ani amchea purvozank itli piddapidd dili, ki nigtech zolmol’lea ballank, te vanchche nhoi mhonn, osadd ghalunk tankam hukum’ ghalo.
20 Oslea vellar Moizes zolmolo ani Devak manovlo: tin mhoine porian taka aplea bapaichea ghorant pôslo.
21 Magir, taka osadd ghalchea vellar, Faraohchê dhuven taka apnnailo ani aploch put koso taka lhan-vhôdd kelo.
22 Ejiptkaranchi vidia asli titli-i Moizesak xikoili ani to utramnim ani kornniamnim bollvont zalo.
23 Challis vorsanchê piraier, aplea bhavam-bhoinnink, mhonngê Israelachea putam-dhuvank, bhett diunk tachea monant ailem.
24 Tanchê modlea ekleak konn-eklo Ejiptkar zulum’ kortalo mhonn polleun, Moizes tachea adarak gelo ani, Ejiptkarak jivexim marun, piddapidd bhôgloleacho tannem sudd ghetlo.
25 Apnna vorvim Dev tankam suttka diunk veta mhonn aplim bhavbhoinn somzotolim mhonn Moizes chint’talo; punn khorench mhollear hem tankam somzonk na.
26 Dusrea disa, dog zann Israelkar zhogoddtale tednam, Moizes novean thõi dixtti poddlo, ani tanchê modem xanti korunk mhonn tannem mhollem: ‘Ixttamnô, tumi ekamekache bhav; kiteak tôr ekamekak dukhoitat tumi?’
27 Punn aplea bhavak opman kortalo tea mon’xan Moizesak dhuklun uddoilo ani mhollem: ‘Amchê voir fuddari ani nitidar tuka konnem nemla?
28 Kal tea Ejiptkarak jivexim marloi tosoch mhaka-i bi marunk sôdtai kitem?’
29 Hem aikun Moizes pollun gelo ani Midian ganvant ravlo; thõi taka dog put zolmole.
30 Challis vorsam bhòrlea uprant, Sinai dongra lagchea oronneant, eka zolltea jhilkuttantlea agtteant eka devdutachem taka dorxon mell’llem.
31 Tem polleun Moizesak ojap dislem. Bariksannen polleunk lagim voch zalear,
32 Sorvesporacho tallo taka aikunk ailo: ‘Tujea purvozancho Dev Hanv; Abrahamacho, Izaakacho ani Jakobacho Dev Hanv.’ Moizes koddkoddlo ani tea fuddem mhenotin polleunk taka kalliz zalem na.
33 Tednam Sorvesporan taka mhollem: ‘Tujea pãiancheô vhannô kadd, kiteak tum ubo asai ti svat povitr.
34 Mhoji porza Ejiptant kitli piddapidd bhôgta ti Hanvem dekhlea ani tancheô huieli Hanvem aikoleat ani tika suttka diunk Hanv denvun ailam. Atam ie, Hanv tuka Ejiptant dhaddunk vetam.’
35 ‘Tuka fuddari ani nitidar konnem nemla?’, oxem mhonnun pois kel’lo to konn? Moizes nhoi? Tori jhilkuttant devdut konnak dixtti poddlo? Ani tea devduta vorvim Devan konnak mhonn porjecho fuddari ani soddvonnar zaunk dhaddlo? Teach Moizesak!
36 Ejiptant ani Tambddea Doriant ani challis vorsam bhôr odbhutam ani vismitam korun konnem tankam bhair kaddlim? Teach Moizesan.
37 ‘Tumchea bhavambhoinnim modlo mhojê sarko êk provadi tumchê khatir Dev upzoitolo’, oxem Israel porjek uloilo to konn? Toch Moizes.
38 Sinai Dongrar devdut uloilo to konna kodde uloilo? Moizesa kodde nhoi? Ani oronneant sobha bhòrtali tednam, amchea purvozam borabôr ani devduta borabôr aslo to konn? Ani amkam divpachim jivitachim utram ghetlim to konn? To toch Moizes!
39 Tori amche purvoz taka aikunk kobul na zale, tãnnim taka patt keli, ani portun Ejiptak vochpachi khuxi dakhoun tãnnim Aaronak sanglem:
40 ‘Amchê mukhar vochunk amkam dèv korun di; kiteak amkam Ejiptantlim bhair kaddlim tea Moizesachem kitem zalam tachi amkam khoboruch na.’
41 Tednam tãnnim êk paddkulo kelo ani hê murtik iôdn bhettoilo. Apleanch hatamnim kel’lea kamam pasot tim murgottlim.
42 Punn Devan tankam patt vôll’li ani ontralla velê foujechi puza korunk tankam sôddun dilim. Tôr oxem provadianchea pustokar boroil’lem asa: ‘Israelachea Ghorannea, challis vorsam porian oronneant boliô ani bolidanam tunvem Mhaka bhettoileant? Na.
43 Punn Molokacho tombu ani Refan devachem noketr tumchea khandar tumi vhelim, heôch teô bhôzunk kel’leô murti. Tôr atam, Babiloniê pelean Hanv tumkam pordesant dhaddunk vetam.’
44 Amchea purvozam sangatim oronneant Govaikecho Tombu aslo; Devan Moizesak formail’lem toxem ani taka nomuno dakhoil’lo tea pormannem, to Tombu kel’lo.
45 Magir amchea purvozamnim pinddkê-pinddkent to gheun samball’lo; xekim, jednam amchea purvozank zago korunk Devan tanchea fuddeant raxttrank dhanvddailim ani tea raxttrancho dês ami amchea tabeant kelo, tednam Joshuachea fuddariponna khal to Tombu hea desant bhitôr kaddlo. Davidachea kalla porian to hanga aslo.
46 David Devak manovlo ani Jakobachea Deva khatir ek mondir toiar korunk tannem maglem,
47 punn hem mondir Solomonan Taka bandlem.
48 Toripunn Bhov-Vorto Dev mon’xanchea hatamnim bandlolea mondiramnim ravona, kiteak provadi oxem mhonntta:
49 ‘Sôrg Mhojem xinvason ani prithvi Mhojea pãianchi monnoi: Koslem mhonn mondir tumi Mhaka bandxat? oxem mhonntta Sorvespor. Vô Hanvem visôv gheunchê khatir koslo mhonn zago tumi Mhaka toiar korxat?
50 Heô soglleô vostu Mhojea hatan rochleat ki na?’
51 Tumchem kanttem kitlem mhonn nibor! Tumchim kallzam ani kan Devachea Korarak ovisvaxi! Tumi tôr Povitr Atmeak sodam virôdh kortat; tumchea purvozamnim kelem toxench tumi-i kortat.
52 Khõichea tori provadiak tumchea purvozamnim dhumallo dinastana dovorla? Devak Manovlolo ieuncho asa mhonn adim-fuddem porgôtt’tale tankam tãnnim jivexim marle. Ani atam tuminch, Tacho ghat gheun, Taka jivexim marlo.
53 Devdutam udexim tumi Somurt ghetloli, tori ti pallunk na te tumich!
54 Hem aikun tanchea kallzant rag xiztalo ani te tacher add aple dant korkoraunk lagle.
55 Punn Istêv, Povitr Atmean bhòrlolo zaun, sorgak tellun polleunk laglo ani tannem Devachi mhoima dekhli, ani Devachea uzvea hatak ubo aslolo Jezuk tannem pollelo.
56 Tannem mhollem: Ho polleiat, sôrg ukto zal’lo ani Mon’xacho Put Devachea uzveak gheun ubo aslolo mhaka dixtti poddta.
57 Punn tãnnim vhoddlean huieli marleô, hatamnim aple kan dhample, ani soglle borabôr tachea angar gele.
58 Uprant taka Xara bhair oddun vhelo ani fatramnim marlo. Ani sakxidaramnim aplim avoronnam Saulu nanvachea eka tornnatteachea pãiam-xim dovorlim.
59 Istevak fatramnim martale tednam, tannem oxem magnnem kelem: Somia Jezu, mhozo otmo Tujea hatant ghe.
60 Magir, dimbi ghalun, vhoddlea tallean tannem oxi bob marli: Somia, tankam hea patkache guneanvkar korum naka. Ani hem mhonnun to ontorlo. Hea khunak Sauluchi soglli maniotai asli.
Dhormdutancho Itihas - Chapter :8
1 Tednam Jeruzaleant aslolê Povitr-Sobhecher add êk vhôdd piddapidd suru zali ani sogllim, Dhormdut mat bhairaun, Judeiachê ani Samariechê bhonvtonnchea ganvamnim ximpoddlim.
2 Bhoktivont mon’xamnim Istevak nikhipilo ani tachê pasot motto vilap kelo.
3 Povitr-Sobhechem nisontton korunk Saulu vavurtalo; ghoraghorant bhitôr sorun, dadleank toxem bailank bhair kaddun to bondkhonnint ghaltalo.
4 Punn ximpoddlolim tim zollim-mollim Xubhvortoman porgôttit gelim.
5 Oso Filip Samariechea eka nogrant gelo ani tanchê modem Kristak porgôtt kelo.
6 Tachea vismitanchi khobor aikun vô apnnem khaxa tim pollelim dekhun, sogllea lokan Filip porgôtt’talo to sondêx eka monan manun ghetlo.
7 Zaitea devchar-boslolea thaun mhelle atme bob marun bhair sortale ani puskoll ar zal’lim ani thonttim borim zatalim.
8 Haka lagun tea nogrant vhôdd khuxalkai vostali.
9 Teach nogrant Simanv nanvacho êk monis ravtalo ani ghaddiponnam korun Samariekar lokak bhuloitalo. To apunnuch vhôdd mhonn dakhoun uloitalo.
10 Sogllim, vhoddam toxinch lhanam, tachem chitan aikotalim ani mhonnttalim: Devachi xrêxtt podvi mhonnttat to hoch.
11 Tim taka chitan aikotalim kiteak zaito kall thaun aplê ghaddividien to tankam bhuloitalo.
12 Punn Filipan Devachea Rajeachem ani Jezu Kristachea nanvachem Xubhvortoman porgôttlem tednam, dadleamnim toxem bailamnim bhavarth dhôrlo ani Povitr-Snan ghetlem.
13 Simanvan-ui bhavarth dhôrlo ani, Povitr-Snan ghetlea uprant, to Filipachi patt sôddinaslo. Khunna ani vhoddlim vismitam zalim tim polleun, to ojap zalo.
14 Samariechea lokan Devachem utor manun ghetlem mhonn Jeruzaleant aslolea Dhormdutamnim aikolem; ani Pedruk ani Juanvak tanchê-xim dhaddle.
15 Thõi denvun pavlea uprant, bhavarthiank Povitr Atmo mellum mhonn tãnnim magnnem kelem,
16 karonn tanchê modlea ekleacher porian Povitr Atmo ozun denvunk naslo; tankam fokot Somia Jezuchea nanvan Povitr-Snan dil’lem.
17 Tednam Pedrun ani Juanvan tancher hat dovorle ani tãnnim Povitr Atmo ghetlo.
18 Dhormdutanchê hat-dovornnê vorvim tankam Povitr Atmo mell’llo mhonn Simanvan pollelem tednam, Pedruk ani Juanvak tannem poixe dile
19 ani mhollem: Jea konnancher hanv hat dovrin, tankam Povitr Atmo mellcho mhonn mhaka-i osli podvi diat.
20 Punn Pedrun taka zobab dilo: Tuka ani tujea poixeank uzo lai, kiteak Devan funkea dil’lem dan poixeamnim viktem gheunk zata mhonn tum somzoloi.
21 Hea denneant tuka bhag na, vantto na, kiteak Deva mukhar tujem mon soroll nhoi.
22 Tujea khotteponnak patt kôr ani tujea monant jem kitem tunvem chintlãi tachem Somia lagim bhogsonnem mag.
23 Koddu pintachem vik tunvem ghetlãi ani patkacho gulam’ tum zalai mhonn hanv polletam.
24 Simanvan zobab diun mhollem: Tumi sanglam tantlem kãi mhojer iena zaunk mhojê pasot Somia lagim magat.
25 Apli govaiki dilea uprant ani Somiacho sondêx porgôtt kortôch, te portun Jeruzaleak gele. Ani Samariekaranchea zaitea gramamnim tãnnim Xubhvortoman porgôttlem.
26 Tednam, Sorvesporachea dutan Filipak uloun mhollem: Utth ani dokhinnek Jeruzalea thaun Gaza denvun veta tea margan voch. Hea margan atam konn vochona.
27 Mhonnttôch to utthun aplê vattek laglo. Ovchituch taka êk Ethiopiekar dixtti poddlo; ho êk hizddo ani Ethiopiechê Kandakechea vô Ranniechea ak’khea bhanddaracho odhikari aslo. To Devak bhôzunk Jeruzaleak gel’lo ani
28 aplê gaddier bosun to ghora portotalo. Vatter Izaias provadiachem pustok to vachtalo.
29 Atmean Filipak mhollem: Voch ani gaddiê lagim sor.
30 Filip dhanvlo ani to Ethiopiekar Izaias provadiachem pustok vachta tem aikun tannem vicharlem: Tum vachtai tem somzotai mum?
31 Tannem portipall kelo: Mhaka somzonni diunk konn na zalear, mhojean koxem somzunk zait? Mhonnttôch, gaddient choddun apnna-xim bos mhonn tannem Filipa lagim maglem.
32 Povitr Pustokantlo to vachtalo to ho bhag aslo: Marunk vhortat toslea lhan menddrea sarko, apnnak tastolea mukhar ogich ravtolê xelliê bhaxen, tachea tonddantli zap bhair sorli na!
34 Tachea hinnponnant tachi nit korun ghetolo konn na zalo. Tachem jivit hea sonvsarant veginch tôddun kaddlem; Dekhun tachê pinddkechi khobor konn sangunk xoktolo?
35 Tednam tea hizddean Filipak mhollem: Ho provadi apnnachêch vixim vô dusrea konna vixim uloita, tem tum mhaka sangxi?
36 Tednam aplem tondd ugddun ani Povitr Pustokantlim tinch utram dhôrun Filipan taka Jezucho xubh sondêx porgôttlo.
37 Fuddem vetam-vetam te udka-xim pavle ani hizddean mhollem: Polle, hanga thoddem udok asa; hanvem Povitr-Snan gheunk kosli addkhôll asa?
38 Tannem gaddi thamboili ani te dog-ui, Filip ani hizddo, udkant denvle ani Filipan taka Povitr-Snan dilem.
39 Udkantle voir sortôch, Sorvesporachea Atmean Filipak ubarun vhelo ani hizddean taka anink polleunk na; ani sogllo dhadoxi zaun, tannem aplo fuddlo rosto dhôrlo.
40 Punn Filip Azotak pavlo ani, sogllea nogramnim bhonvun, Sezareiak vocho porian Xubhvortoman porgôttit ravlo.
Dhormdutancho Itihas - Chapter :9
1 Itlea mhonnosôr, Saulu Somia chea xisancho apunn jiv kaddtolo mhonn tankam bhenkddaunk bhonvtalo ani hê axen tacheach jivak thar naslo. To porom’-iadnika-xim gelo
2 ani hê Vattecheam apnnak melltit tea pattlavdarank, dadleank toxench bailank, dhôrun Jeruzaleak haddunk Damaskachea devsthananchea vhoddilank diunchim tannem potram maglim.
3 Damaskachê vatter, xara lagim pavtam-pavtam, ovchit sorga velo êk uzvadd tachê sobhonvtim porzoll’llo.
4 To dhornnir xevttolo ani tednam tannem êk tallo aikolo. To Taka oxem mhonnttalo: Saulu, Saulu, kiteak mhonn tum Mhaka piddapidd ditai?
5 Tannem vicharlem: Tum konn, Saiba? Tallean zap dili: Hanv Jezu, ani Mhakach tum piddapidd ditai.
6 Atam utth ani xarant voch ani tunvem kitem korunk zai tem konn tuka sangtolo.
7 Tachê borabôr provas kortale te thottakun mone zale, kiteak tãnnim tallo aikol’lo khorem, punn konnakuch polleunk naslo.
8 Saulu zomni velo utthlo ani, tache dolle ukte asun-ui, taka kãich disonaslem. Tea pasot Damaska porian tãnnim taka hatak dhôrun vhelo.
9 Tin dis porian tachean kãich polleunk nozo aslem ani to kãi jevlo na ani pielo-i na.
10 Damaskant Ananias nanvacho êk xis aslo. Dorxonant Somi apnna kodde oxem uloita mhonn tannem aikolem: Ananias! Tednam tannem zap dili: Ho polle hanv asam, Somia. Somian taka mhollem:
11 Utth ani Ubo mhonnttat tea rostean voch ani Judasachea ghorant Tarsusachea Saulu mhonnlolea konn-ekleachi khobor kadd; to magnnem korta.
12 Ani apnnak novean nodor mellunk Ananias mhonnlolo konn-eklo bhitôr ieun apnnacher hat dovorta mhonn Saulun dorxonant pollelem.
13 Tednam Ananiasan mhollem: Somia, hea mon’xa vixim ani Jerusaleant Tujea bhoktank tannem kitle koxtt dileat tê vixim zaitea zannam koddchem hanvem aikolam.
14 Ani Tujem nanv ghetolea somestank dhôrunk mhonn mukhel iadnikanchi podvi gheun to hanga aila.
15 Somian taka zobab dilo: Tori astana tum voch, kiteak, raxttram toxench razam mukhar ani Israel-porjê mukhar, Mhojem nanv porgôttunk ho monis Mhojem vinchun kaddlolem hatiar.
16 Mhojea Nanva pasot tannem kitlem sõsunk poddtolem tem Hanv taka dakhoitolom.
17 Tednam Ananias gelo. To ghorant bhitôr sorlo ani rokddench Saulucher aple hat dovrun tannem mhollem: Saulu bhava, tuji nodor tuka porti mellunk ani tum Povitr Atmean bhoronk tum ietaloi tê vatter tuka dixtti poddlo tea Somia Jezun mhaka dhaddla.
18 Thõichê thõich Sauluchea dolleantlim khovollam koxim bhuim poddlim ani taka novean nodor aili; ani utthun tannem Povitr-Snan ghetlem.
19 Jevlea uprant taka novean ghottai mell’li. Damaskant xisam borabôr thodde dis sarlea uprant,
20 Jezu Devacho Put mhonn to devsthanamnim rokddoch porgôttunk laglo.
21 Taka aikotalim tim sogllim ojap zaun mhonnttalim: Hem Nanv uchartoleancho Jeruzaleant bhosm korunk vavurtalo to ani hanga aslolea xisank dhôrun mukhel iadnikam fuddem vhorunk hangasôr ail’lo to monis hoch nhoi?
22 Punn Saulu odik-odik bollixtt zait vetalo ani, Jezu Krist mhonn ruzu korun, Damaskant ravtolea Judevank gondhollak ghaltalo.
23 Zaitea disam uprant, Judevamnim Sauluk jivexim marunk guddmêll kelo;
24 punn hi khobor Sauluk pavli. Tacho prann kaddunk darvonntteam-xim te rat-dis paro korun asle,
25 punn xisamnim taka vhelo ani êkê panttlent ghalun taka ratcho kotta velean denvoilo.
26 Jeruzaleant pavlo tednam, xisanchea zomeak ektthãi zaunk to proitn kortalo, punn tim sogllim taka bhietalim: to khorench êk xis zala mhonn sotmanunk tim pattim sortalim.
27 Barnabasan taka ghetlo ani Dhormdutam-xim vhelo, ani vatter astana Somi Sauluk koso dixtti poddlo ani kitlea kalljidarponnan Saulun Damaskant Jezuchea nanvan Xubhvortoman porgôttlem, hem sogllem Barnabasan tankam sanglem.
28 Tednam Saulu tanchê borabôr Jeruzaleant bhonvunk laglo ani hurben Somiachea nanvan tannem provochon korunk suru kelem.
29 Punn Grik bhas uloupi Judevam kodde uloun vad-vivad zalea uprant, taka jivexim marunk ievjitale.
30 Hem aikun bhavam-bhoinnimnim taka Xezareiak vhelo ani hanga thaun taka porot Tarsusak dhaddun dilo.
31 Ak’khea Judeiant, Galileiant, ani Samarient Povitr-Sobha sovosthaien jietali ani ticho vikas zatalo; ani Somiachi bhokti korun ani Povitr Atmeachê ghottaien bhoron ti vaddot vetali.
32 Ganvam-ganvamnim bhett diunk vochun Pedru xekim Lid’dent ravtolea bhoktam-xim pavlo.
33 Thõi taka Eneias nanvacho êk arkar mell’llo; atth vorsam to khattir poddlolo aslo.
34 Pedrun taka mhollem: Eneias, Jezu Krist tuka boro korta. Utth ani tujem bixannem sarkem kôr. Ani to rokddoch utthlo.
35 Lid’dent ani Sharonant ravtoleamnim taka dekhlo ani tim sogllim Somiachim pattlavdaram zalim.
36 Jop’pa nogrant Tabita nanvachi êk bhoktinn asli (tichea nanvacho ôrth chitoll). Aplea jivitant ti sodanch khub doiall kornniô kortali ani bhik ditali.
37 Tea disamnim ti bori na zali, ani meli; tãnnim tika dhuli ani uprant voilea vosreant dovorli.
38 Lid’da Jop’pak lagim mhonnttôch, Pedru thõi asa mhonn xisamnim aikolem tednam, dogam dadleank tachê-xim patthoile, oxem sangun: Vegim-vegim amchê-xim ie.
39 Pedru utthlo ani tanchê borabôr gelo. Thõi pavona fuddem taka tãnnim unchlea vosreant vhelo. Taka veddho ghalun soglleô vidva roddtaleô ani apnnank Tabitan anglim ani avoronnam kel’lim tim taka dakhounk lagleô.
40 Pedrun tankam soglleank bhair dhaddleô ani dimbier ravun magnnem kelem; uprant mel’lê kuddi vatten porton, tannem mhollem: Tabita, utth! Tinnem aple dolle ugôddle ani Pedruk polleun ti bosli.
41 Hat diun tannem tika ubi keli ani uprant bhoktank ani vidvank apoilim ani tankam ti jivi zal’li dakhoili.
42 Hi khobor sogllea Jop’pak gazli ani zaiteamnim Somiacher bhavarth dovorlo.
43 Ani Pedru konn-eka Simanv chamarager Jop’pant zaite dis ravlo.
Dhormdutancho Itihas - Chapter :10
1 Xezareiant Kornel nanvacho êk monis aslo. Romi loskorachê Italiani mhonnlolê Polttonnecho to xotpoti aslo.
2 To bhoktivont monis aslo ani aplea ghorabeachea sogllea mon’xam borabôr Devak bhôztalo. Lokak to zaito adar ditalo ani sodanch Devak magnnem kortalo.
3 Êk dis, sanjechea sumar tin vorancher, Devacho êk dut aplea ghorant bhitôr sortalo ani Kornel mhonnun apnnak ulo kortalo to tannem dorxonant sarko dekhlo.
4 Devdutak polleun to koddkoddlo. Tannem mhollem: Kitem ga, Saiba? Devdutan portipall kelo: Tujim magnnim ani tujim dhormdanam choddun gelim ani tuzo ugddas koso Deva mukhar asat.
5 Atam Pedru mhonnlolea konn-eka Simanvak apounk Jop’pa nogrant mon’xank dhadd.
6 To eka Simanv chamarager vostek asa ani hachem ghor doriachê kinarer.
7 Tachê lagim uloilo to devdut vetôch, Kornelan dogam chakrank ani aplê sevek asloleantlea eka bhoktivont soinikak apoile,
8 ani, kitem ghòddlolem tem tankam sangun, tankam Jop’pak dhaddle.
9 Dusrea disa, te aplê vatter astana ani nogra lagim pavtana, don’parchea vellar prarthon korunk Pedru pattosar choddlo.
10 Taka bhuk lagli ani to jevnnak ravtalo, punn jevonn toiar zatana, Povitr Atmeacho bhar tacher ailo.
11 Sôrg ukto zal’lo tannem dekhlo ani char-ui konnxeamnim dhôrloli ani sorgar thaun zomni porian denvoil’li êk vhoddli ôl koxi kitem tannem dekhlem.
12 Ticher asleô sonvsarantleô char pãiancheô soglleô mon’zati ani jivannim ani ontralla velim suknnim.
13 Tednam taka oxem mhonnttalo to êk tallo tannem aikolo: Pedru, utth, mar ani kha.
14 Punn Pedrun zobab dilo: Na, Saiba, kodinch na! Opovitr ani mhellem kitench hanvem kednanch khaunk na.
15 Anink êk pavtt tea tallean taka mhollem: Devan xud’dh kelam tem tum opovitr mhonnum naka.
16 Hem oxem tin pavtti ghòddlem ani rokddench sogllem portun sorgar ubaron gelem.
17 Hea dorxonachi somzonni kitem kai mhonn to chintunk poddlo. Itlea mhonnosôr, Kornelan dhaddlole monis pavle. Simavachem ghor khõi kai mhonn vicharunk te darachea umbrear thamble.
18 Ani ulo korun Pedru mhonnlolo Simanv thõi vostek asa kai mhonn tãnnim vicharlem.
19 Pedruchem lokx ozun dorxonacher astana, Atmean taka mhollem: He polle, teg monis tuka sôdtat.
20 Utth, sokol denv ani tanchê borabôr voch; fattim-fuddem sorum naka, kiteak Hanvench tankam dhaddleat.
21 Sokla denvun vochun, Pedrun tea mon’xank mhollem: Tumi sôdtat to monis hanvuch; kiteak aileat tumi?
22 Tãnnim zobab dilo: Kornel xotpoti êk promannik ani Devachi bhokti korpi monis; taka Judevanchi ak’khi porza man dita. Tuka apnnager apoi mhonn ani tunvem taka kitem sangchem asa tem aikun ghe mhonn Devan taka Aplea povitr duta vorvim sanglam.
23 Pedrun tea mon’xank bhitôr apoile ani tankam vostek dovorle. Dusrea disa to tanchê borabôr vattek laglo ani tanchê sangatim Jop’pache thodde bhav-ui gele.
24 Anink eka disan te Sezareiak pavle. Aplea soiream ani lagxileam ixttam sangatim Kornel tankam ravtalo.
25 Ani Pedru ghorachea umbrea-xim pavtôch, Kornel taka mellunk gelo ani pãiam poddun taka nomoskar kelo.
26 Punn Pedrun taka oxem mhonnun utthoilo: Utth, tôr hanv-ui êk monis.
27 Uloit-uloit te bhitôr gele ani hanga ektthãi zal’lo to khub lôk tankam mell’lo.
28 Tannem tankam oxem mhollem: Eka Judêv mon’xan eka videxiak ektthovunk ani tanger ravunk kitlem vittechem tem tumi zannont. Punn khõicheach mon’xak hanvem opovitr ani mhello mhonncho nhoi mhonn Devan mhaka dakhoilam.
29 Heach pasot tunvem mhaka apounk dhaddtôch hanv fattim-fuddem soro-nastana ailam. Tôr hanv tujê lagim vichartam: tunvem mhaka kiteak mhonn apounk dhaddlai?
30 Kornelan zobab dilo: Tin dis zale, hêch ghoddier, mhojea ghorant sanjechea tin voranchem hanv magnnem kortalom; ovchit zhogzhogit vostr ghalun êk monis mhojea fuddeant ubo zalo.
31 Tannem mhaka oxem mhollem: ‘Kornel, Devan tujem magnnem aikun ghetlem ani tujea dhormdanancho Deva mukhar ugddas zalo.
32 Tôr Jop’pak aslolea Simanv mhonnttat tea Pedruk apounk dhadd. To Simanv chamarager ravta ani tachem ghor doriachê kinarer.’
33 Tea pasot hanvem tuka rokddoch apounk dhaddlo ani tunvem ieun borem keleim. Tôr polle, hanga ami tujê mukhar ektthãi zal’lim asanv, Sorvesporan tuka kitem sangunk formailam tem aikunk ami toiar asanv.
34 Tondd ugddun Pedrun ulounk suru kelem. Tannem mhollem: Dev tonddak polleun mon’xam modem ontôr korina: hem sot mhonn mhaka tthavem zalem;
35 punn konn-ui monis, khõichea-i raxttracho to zaum, Devachi bhokti korta ani Devachê khuxê pormannem cholta tôr, to ki Devak manovta.
36 Devan Jezu Krista vorvim xantichem Xubhvortoman porgôttunk Israelachea putam-dhuvank nirôp dhaddlo; Toch soglleancho Somi.
37 Ak’khea Judeiant kitem ghòddlam tem tumi zannont: Juanvan snan porgôttlem tethun thaun, Jezun Galileia-thaun Aplem kam’ suru kelem.
38 Devan hea Nazaretchea Jezuk Povitr Atmean ani xoktin makhlo. Veta thõi Tannem borem kelem ani devcharachê podvê khal asloleank borim kelim, kiteak Dev Tachê sovem aslo.
39 Judeikaranchea prantant ani Jeruzaleant Tannem keleô tea sogllea vostunche ami govai. Eka lankddar umkollaun tãnnim Taka jivexim marlo.
40 Punn tisrea disa Devan Taka punorjivont kelo ani To dixtti poddunk nirmilem:
41 Sogllea lokak nhoi, punn Devan adim-fuddem nemlolea govaiank; amich te govai, To mel’leantlo punorjivont zatôch Tachê borabôr jevleanv ani pielanv te.
42 Jivea ani mel’leancho Mon’subidar Apnnak Devan nemla mhonn lokak porgôttunk ani haka govai diunk Tannem amkam adnia dilea.
43 Tacher bhavarth dovortat tim sogllim Tachea nanvan patkanchem bhogsonnem zôddtat mhonn soglle provadi govai ditat.
44 Pedru oxem uloita thõich astana, tachem utor aikotolea soglleancher Povitr Atmo denvun ailo.
45 Videxiank porian Devan Povitr Atmeachem dennem favo kelem mhonn Pedru borabôr ail’le te sunôt kel’le soglle bhavarthi thottakle.
46 Kiteak tim atveô bhasô uloitalim ani Devak vakhanntalim mhonn tankam aikum ietalem.
47 Tednam Pedrun mhollem: Amkam mell’llo toch Povitr Atmo tankam-i mell’llo mhonntôch, tankam udkachem Povitr-Snan diunk konnachean addaum-ieta?
48 Tannem tankam Jezu Kristachea nanvan Povitr-Snan diunk formailem. Uprant, thodde dis apnnam-xim rav mhonn tãnnim tachê kodde maglem.
Dhormdutancho Itihas - Chapter :11
1 Videxiamnim-i Devachem utor manun ghetlem mhonn Judeiant aslolea Dhormdutamnim ani bhavam-bhoinnimnim aikolem ani,
2 Pedru Jeruzaleak ailo tednam, sunôt kel’leamnim tachi ttika korun mhollem:
3 Sunôt korunk nasloleanger kiteak ravloi tum, ani tanchê borabôr kiteak mhonn jevloi?
4 Tednam, zobab diun, Pedrun ekan-ek iskuttaun sanglem:
5 Êk dis hanv Jop’pa nogrant aslom tednam, magnnem kortam astana Povitr Atmeacho bhar mhojer ailo; tednam eka dorxonant char-ui konnxeamnim dhôrloli sorgar thaun zomni porian denvoil’li êk vhoddli ôl koxi kitem hanvem dekhlem. Hem nitt mhojê-xim denvun ailem.
6 Hanvem tancher barik nodor marli ani sonvsarantleô mon’zati, zonavoram ani jivannim ani varea velim suknnim hanvem pollelim.
7 Tednam oxem mhaka mhonnttalo to êk tallo hanvem aikolo: ‘Pedru, utth, mar ani kha!’
8 Punn hanvem mhollem: ‘Na, Saiba! Koxench na! Opovitr ani mhellem kodinch mhojea tonddant bhitôr sorunk na!’
9 Anink êk pavtt tea sorga velea tallean mhaka mhollem: ‘Devan nitoll kelam tem tum opovitr mhonn lekhum naka.’
10 Hem oxem tin pavtti ghòddlem ani uprant sogllem portun sorgar ubaron gelem.
11 Tednanch ovchit hanv ravtalom tea ghorachea umbrea-xim teg monis ube zale. Xezareia thaun mhaka mellunk tankam dhaddlole.
12 Ani tanchê borabôr vochunk fattim-fuddem soronaka mhonn Povitr Atmean mhaka sanglem. He-i sô bhav mhojê borabôr aile ani ami tea mon’xachea ghora geleanv.
13 Aplea ghorant êk devdut ubo aslolo apnnak dixtti poddlo ani apnnak oxem mhollem mhonn tannem amkam sanglem: ‘Jop’pak Pedru mhonnlolea Simanvak apounk dhadd;
14 to uloitolo tea utram vorvim tuka ani tujea ak’khea kuttumbak taronn melltolem.’
15 Hanvem ulounk suru kelem tednam, survatek amcher denvlolo toch Povitr Atmo tancher denvlo.
16 Tednam mhaka Somiachea hea utrancho ugddas ailo: ‘Juanvan udkan snan dilem, punn tumkam Povitr Atmeachem snan melltolem.’
17 Somia Jezu Kristacher ami bhavarth tthevlo tednam Devan amkam dilam tench dennem Tannem tankam-i dilem zalear, Devak addkhôll ghalunk hanv konn?
18 Hem aikun te oge poddle ani Devak vakhannun tãnnim oxem mhollem: Mhonnttôch, Jivitak pavoita toslem jivit-bodlop videxiank-ui Devan dilem.
19 Isteva pasot piddapidd diunk suru kelem tednam zollim-mollim ximpoddlo to bhavarthi lôk Fenisiek, Siprusak ani Antiokiek porian pavlo, punn, Judevam bhair, tim anink konnankuch Devachem utor porgottinaslim.
20 Tantle thodde Siprusache ani Sirenache dadle Antiokiek gele ani thõi Grikank-ui Somia Jezuchem Xubhvortoman porgôttunk tãnnim suru kelem.
21 Somian tankam adar dilo ani zaitim zannam bhavarth dhôrun Somia-xim portolim.
22 Hi tanchi khobor Jeruzaleachê Povitr-Sobhechea kanar poddli ani tãnnim Barnabasak Antiokiek dhaddlo.
23 Thõi pavtôch, Devachem dennem polleun, to khuxal zalo ani kallzant thaun Somiak visvaxi ravunk tannem tankam hurba dili.
24 Kiteak to êk boro ani Povitr Atmean ani bhavarthan bhòrlolo monis aslo. Ani Somiacho pattlav kortoleanchi sonkia zaiti choddli.
25 Uprant Barnabas Pauluk sôdunk Tarsusak gelo ani,
26 to mell’llea uprant, tannem taka Antiokiek haddlo. Ek ak’khem voros thõichê Povitr-Sobhê modem te jiele ani puskôll lokak tãnnim xikovnn dili. Ani oxem Antiokient xisank poilêch pavtti Kristanv mhonn addnanv poddlem.
27 Tednam thodde provadi Jeruzaleak thaun Antiokiek aile.
28 Tanchê modlo eklo, Agabus mhonnlolo, utthlo ani ak’khea sonvsarar dukôll poddtolo mhonn Atmeachea preronnan sangunk laglo. Ani Klaudius somrazachea kallar toxem ghòddlem.
29 Zonn-ekleak tankta tea pormannem Judeiant ravtolea bhavam-bhoinnink modôt diunchi mhonn xisamnim tharav ghetlo.
30 Ani tãnnim oxem kelem ani Barnabasachea ani Sauluchea hatant ghalun tãnnim zannteank adar pattoun dilo.
Dhormdutancho Itihas - Chapter :12
1 Teach kallar Povitr-Sobhechea thoddea vangddiank Herod raza piddapidd diunk laglo.
2 Jakobak, Juanvachea bhavak, tannem torsadin jivexim marlo.
3 Judevank hem man’lem mhonn polleun, tannem Pedruk-ui dhôrunk lailo. Hem Fug-naslolea Unddeanchea Utsovachea disamnim ghòddlem.
4 Pedruk dhôrlea uprant, tannem taka bondkhonnint ghalo ani chougam-chougam soinikanche char pongodd tacher paro korunk bosoile. Pask-Utsova uprant porjê mukhar to Pedruk ubo korunk sôdtalo.
5 Pedru bondkhonnint aslo titlo-i vêll Povitr-Sobha tachê pasot thambonastana Devak vinoit asli.
6 Herod Pedruk porjê mukhar ubo korunk sôdtalo tea disachê adlê rati, Pedru dogam soinikam modem nhidlolo aslo; taka don sankllimnim bandlolo ani paredar bondkhonnichem dar rakhtale.
7 Ovchituch Sorvesporacho êk dut ubo zalo ani tem kudd uzvaddan bhòrlem. Pedruchea bhuzancher hat marun devdutan taka utthoilo ani mhollem: Vegim utth! Thõichê-thõich tachea hatancheô sanklli bhuim poddleô.
8 Tednam devdutan taka mhollem: Tuzo pott’tto band ani tujeô vhannô ghal. Pedrun toxem kelea uprant devdutan taka mhollem: Tujem avoronn ghal ani mhojê pattlean ie.
9 Pedru tachê pattlean gelo, punn devdut kortalo tem khoreponnim ghòddta mhonn to nokllo aslo, kiteak apunn fokot êk dixttavo polleta mhonn to chint’talo.
10 Pareachi poili ani dusri chouki utrun, Xarant pavoita tea lokhonddachea darvonttea-xim te pavle. To apxinch tankam ukto zalo. Ani bhair sorun te êk ak’kho rosto chol’le ani thõichê-thõich devdut tachê thaun koddsorun gelo.
11 Tednam, soirannar ieun, Pedrun mhollem: Somian Aplea dutak dhaddlo ani Herodichea hatantlo ani Judevancho lôk ravtalo tantuntlo Tannem mhaka vattailo mhonn atam mhaka khorench kollon ailem.
12 Apunn khõi asa tem taka gomlea uprant, to nitt Marku mhonnlolea Juanvachê avoi Mariechea ghora gelo; thõi zaito lôk ektthovl’lo ani magnnem kortalo.
13 Pedrun darar marlem tednam, Rhoda nanvachem ek cheddum’ konn darar marta tem polleunk dara-xim gelem.
14 Tannem Pedrucho tallo vollkholo ani itlem khuxal tem zalem ki dar ugddinastana bhitôr dhanvun vochun Pedru darar ubo asa mhonn tannem sanglem.
15 Tãnnim taka mhollem: Tum pixem zalãi. Punn to khoroch aila mhonn tem portun-portun sangunk laglem tednam, tãnnim mhollem: To tacho devdut zaunk zai.
16 Tea mhonnosôr Pedru darar marit ravlo. Xekim tãnnim dar ugôddlem ani taka polleun tim thottaklim.
17 Ogim ravat mhonn tannem aplea hatan khunna keli ani koxê bhaxen Somian apnnak bonkhonnintlo bhair kaddlo tem sanglem, ani mhollem: Jakobak ani amchea bhavam-bhoinnink hem kollit korat. Magir to bhair sorun dusrê kodden gelo.
18 Sokall zatôch soinikam modem boroch ghuspa-gondhôll zalo. Pedruk kitem ghòddlem tem tankam kãich somzona zalem.
19 Taka sôdun kaddunk Herodin hukum’ ghalo, punn to tankam mellunk na. Hea khatir paro kortoleanchi tãnnim barik vaspus korunk ani tankam jivexim marunk laile. Magir to Judeia thaun sezareiak gelo ani thõi ravlo.
20 Tir ani Sidon’chea lokacher Herod raza tiddlolo aslo dekhun, tantle kãi zann ekmot korun taka mellunk gele. Blastus hea razmhalantlea karbhariachi ixttagôt zôddun, tãnnim xanti korunk magli, kiteak tancho dês Herod razachea desantlo orôv vhortalo.
21 Eka nemlolea disa Herodin aplim raiponnachim vostram ghalim ani eka xinvasonar bosun tannem porjek êk boli keli;
22 Lôk gorozlo: Uloita to êk dêv, to monis nhoi.
23 Punn teach vellar thõichê-thõich Sorvesporachea dutan taka xikxa dili, kiteak tannem Devak man dilo na; ani kiddeamnim khaun to melo.
24 Devachem utor ximpoddtalem ani vaddtalem.
25 Apli seva sompoitôch Barnabas ani Saulu Jeruzalea thaun portole ani Marku mhonnlolea Juanvak tãnnim apnnam borabôr haddlo.
Dhormdutancho Itihas - Chapter :13
1 Antiokiechê Povitr-Sobhent provadi ani xastri asle te he: Barnabas, Kallo mhonnlolo Simanv, Sirenacho Lucius, Herod up-razachea vangdda raznivasant lhan-vhôdd zal’lo Manaen, ani Saulu.
2 Êk dis, te upas kortale ani Somiak bhôzunk ektthãi asle tednam, Povitr Atmean tankam mhollem: Barnabasak ani Sauluk kuxin kaddat: eka kherit kama khatir Hanvem tankam apoileat.
3 Tednam upas ani magnnem korun, tãnnim tancher hat dovorle ani tankam dhaddle.
4 Hê bhaxen Povitr Atmean tankam patthoitôch, te dog-ui Seleusiek gele ani thõi thaun, tarvar bosun, Siprusachi vatt tãnnim dhôrli.
5 Salamisak pavtôch, Judevanchea devsthanamnim Devachem utor tãnnim porgôttlem; aplea vavrant adar diunk tãnnim Juanvak-ui bhaga ghetlolo.
6 Te ak’kho zunvo bhonvle ani Pafosak pavtôch, Bar-Jezu nanvacho êk Judêv tankam mell’llo; to ghaddi ani khotto provadi aslo.
7 To razpalachê sevek aslo. Razpal tednam Sergius Paulus aslo, gineanan huxar monis. Devachem utor aikunk sôdtalo dekhun, hannem Barnabasak ani Sauluk apnna-xim apounk dhaddle.
8 Bar-Jezu ghaddi mhonnun, taka Elimas mhonnttalim (kiteak ghaddi Grik bhaxen Elimas). To tankam addaunk vavurtalo kiteak to razpalak Kristi bhavartha thaun pois dovrunk proitn kortalo.
9 Punn Saulun haka Paulu-i mhonn nanv aslem b — Povitr Atmean bhoron, nitt tea ghaddiak tellun
10 mhollem: Arê todd’ddokia, arê fottinga, devcharachea pora, Devachê sogllê taronnik ievzonnechea dusmana, Sorvesporache nitt roste vankdde korchem kam’ tum sôddchoch nãi?
11 Ani atam Sorvesporachea hatak tum sampoddloi, tum kudd’ddo zatoloi ani thoddo vêll tuka dixtti poddchem na. Teach vellar, tacher kallôkh-gidd poddlo ani apnnak hatak dhôrunk konn mellot kai mhonn to sôdunk laglo.
12 Hem ghòddlem tem polleun, ani Somia vixim ji xikovnn taka mell’lli tichê pasot soglloch ojap zaun, razpalan bhavarth dhôrlo.
13 Paulu ani tache sangati Pafosa thaun tarvar bosun Panfiliechea Pergak gele; punn tankam thõich dovrun, Juanv Jeruzaleak portolo.
14 Her, Pergantlean bhonvun, choltam-choltam Pisidiechê Antiokient pavle. Ani Son’vara disa, devsthanant bhitôr sorun, te thõi bosle.
15 Somurtintlim ani Provadianchea pustokantlim vachpam zatôch, devsthanachea vhoddilamnim tankam oso nirôp dhaddlo: Bhavamnô, porjek dhir diupachim don utram sangunk tumkam khuxi zalear, upkar korun sangat.
16 Paulu ubo ravlo ani, ogim ravunk hatan khunna korun, ulounk laglo:Israelachea mon’xamnô, ani Devachi bhokti kortoleamnô, aikat!
17 Amchê Israel porjechea Devan amchea purvozank vinchun kaddle ani, te Ejiptant pordexi koxe asle tednam, tanchê thaun Tannem êk porza utpon keli; ani vhoddlê podven tankam thõisorlim bhair kaddlim ani
18 challis vorsam oronneant tancho Tannem samball kelo.
19-20 Saddê-charxim vorsam bhòrtat mhonnosôr, Kanaanant sat raxttrancho bhosm korun hanche ganv’ daiz koxem Tannem tanchê adhin kele. Hea uprant, Samuel provadi porian, Tannem tankam fuddari dile.
21 Magir tãnnim êk raza maglo ani Devan Benjaminachea kullacho êk dadlo, Kishacho put Saulu, tankam dilo; hannem challis vorsam razvôtt choloili.
22 Taka nikllailea uprant, Devan Davidak tancho raza zaunk voir kaddlo ani tachê vixim govai diun mhollem: ‘Mhojea Kallza sarko Mhaka David, Jes’secho put, mell’lla; soglleô Mhojeô khuxiô to kortolo.’
23 Aplê bhasavnnê pormannem, Davidachê sonstintlo Devan Israelak Jezu Soddvonnar upzoilo.
24 Juanv ak’khê Israelachê porjek jivit-bodôlpachem snan porgôtt’talo tednam, Jezu ieunchê adim Tachea ienneachi tannem khobor sangli.
25 Aplem kam’ sompounchea vellar, Juanv mhonnttalo: ‘Tumi chint’tat to hanv nhoi; punn, polleiat, mhojê pattlean Konn-Eklo ieta ani Tachea vhannancheô vadiô sôddunk mhaka favona.’
26 Mhojea bhavam-bhoinnimnô, Abrahamachê kulliechea putam-dhuvamnô, ani tumchê modem Devachi bhokti kortoleamnô, ho soddvonnecho nirôp Devan tumkam dhaddla.
27 Jeruzaleachea lokan ani tanchea fuddariamnim Jezuk vollkhonastana, nhoi mhonn Son’varachea Son’vara vachtat tim provadianchim utram somzonastanam, Tacher mornnachem formonn marlem ani tim ghoddon ie-xim kelim.
28 Taka jivexim marunk tankam koslench karonn mellunk na, tori Tacher mornnachem formonn marunk tãnnim Pilata kodde maglem.
29 Tachê vixim boroil’lem aslem titlem-i xarti pavoilea uprant, tãnnim Taka lankdda velo denvoilo ani êkê somadhint dovorlo.
30 Punn Devan Taka mel’leantlo utthoilo.
31 Ani Galileia thaun Tachê borabôr Jeruzaleak gel’lim tankam zaite dis To dixtti poddlo; ani porjê mukhar him ozun Tachim sakxidaram.
32 Bori khobor tumkam ami porgôtt kortanv: ji Devan amchea purvozank bhasavnni kel’li,
33 ti Tannem, Jezuk punorjivont korun, amkam tanchea bhurgeam thãi pallun dili. Khoreponnim oxem Dusrea Stotrant boroil’lem asa: ‘Tum Mhozo put: Hanvem Tuka aichea disa zolm dila.’
34 Taka Devan mel’leantlo punorjivont kelo mhonn ani Tacho kednanch vinas zauncho na mhonn khud Devan hea utramnim adinch sangun dovorlolem:‘Davidak bhasail’lim khorim ani povitr dennim Hanv tumkam ditolom.’
35 Heach khatir anink êkê svater oxem mhonnlolem asa: ‘Tujea visvaxi bhoktacho vinas zaunk diuncho nãi.’
36 Aplea jivitant Devachi ievzônn pall’lea uprant, David melo; tachea purvozank to ektthovlo ani tachê kuddicho vinas zalo.
37 Punn Zaka Devan punorjivont kela, Tacho vinas zaunk na.
38 Tôr, mhojea bhavam-bhoinnimnô, Jezu vorvim tumkam patkanchem bhogsonnem porgôtt zata mhonn tumi zanno zaiat; Moizesachê Somurti vorvim tea sogllea patkanchem bhogsonnem tumchean zôddunk zalem na,
39 punn atam Tacher bhavarth dovortat tim sogllim Devak manovlolim zatat.
40 Jem provadiamnim sanglam tem tumchê-xim ghoddona zaunk chotrai dhôrat:
41 ‘Moskoriô kortoleamnô, polleiat, ojapat, ani nanch zaiat! Tumchea disamnim, Hanv kitem korunk fuddem sorlam, tachi vollokh legun tumkam dilear, tem tumi sotman’cheak nant!’
42 Paulu ani Barnabas devsthanantle bhair sorun vetana, fuddlea Son’varak hea vostum vixim novean uloiat mhonn lokan tanchê lagim maglem.
43 Sobha utthlea uprant, Judêv lokantlim ani Devak bhôzpi novxisantlim zaitim zannam Paulu ani Barnabasa pattlean gelim, ani hãnnim tanchê kodde uloun Devachea denneak visvaxi ravunk tankam nettan ulo kelo.
44 Dusrea Son’vara ogllem unnem ak’khem xar Devachem utor aikunk ektthãi zalem.
45 Itli urpônz polleun Judêv lôk nattkaien bhòrlo ani ninda korun Paulu sangtalo tacher addvem-tiddvem ulounk laglo.
46 Tednam Paulun ani Barnabasan kalljidarponnan mhollem: Devachem utor ami poilem tumkam porgôtt korunk zai aslem, punn tumi tem manun ghenant dekhun ani Sasnnik Jivit tumkam favo nhoi mhonn tumich nivaddo ghetat dekhun, atam ami videxianchê vatten chol’leanv.
47 Kiteak oxem amkam Sorvesporan formailam: ‘Prithumechea ximam porian Mhojem taronn pavchê khatir, raxttrancho uzvadd Hanvem tuka nemla.’
48 Hem aikun videxi khuxal zalim ani Somiachea sondexak lagun tãnnim Taka vakhannlo, ani Sasnnik Jivit zôddunk adim fuddem nemlolim aslim titleamnim bhavarth dhôrlo.
49 Hê porim Somiachem utor sogllea ganvamnim ximpoddtalem.
50 Punn Judevamnim unch kulliechea kãi bhoktivont bail novxisank ani xarantlea vhoddam-vhoddam mon’xank uchambollailim ani Pauluk ani Barnabasak piddapidd diunk fuloilim, ani tankam aplea prantantle bhair ghale.
51 Punn tancher add aplea pãianchi dhul’l fafddun te Ikoniumak gele.
52 Punn xis khuxalkaien ani Povitr Atmean bhòrle.
Dhormdutancho Itihas - Chapter :14
1 Ikoniumant pavtôch, Paulu ani Barnabas borabôr Judevanchea devsthanamnim gele ani itlea nettan uloile ki Judevanchea ani Grikanchea puskôll lokan bhavarth dhôrlo.
2 Punn bhavarth dhôrunk na tea Judevamnim videxiank uchambollailim ani tanchem mon amchea bhavam-bhoinnincher add vikailem.
3 Tori Paulu ani Barnabas borech-xe dis thõi ravle, ani, Somia koddcho dhir gheun, bhiranti vinnem tãnnim apli sakxi dili. Aplea bholeponna vixim tãnnim dil’lo sondêx khoro mhonn dakhounk, Somian tanchê vorvim ojapam ani khunna kelim.
4 Nograntlea loka modem futt poddli: konn-konn Judevanchê vatten ani konn-konn Dhormdutanchê vatten ravlim.
5 Tednam odhikariancho tenko gheun, Dhormdutank piddapidd diunk ani fatraun marunk Judevanchi ani videxianchi uchambollai zali.
6 Dhormdutank hem gomtôch, te Likaoniek pollun gele, ani thõichea Listra ani Derbe nogramnim ani bhonvtonnchea ganvamnim
7 tãnnim Xubhvortoman porgôttlem.
8 Listrant êk opangull monis bosun aslo; to zolman thontto zaun kednanch cholunk naslo.
9 Paulu provochon kortalo tem tannem aikolem. Paulun apli nodor tacher laili ani, boro zaunk taka bhavarth asa to polleun,
10 tannem vhoddlea tallean mhollem: Tujea pãiancher nitt ubo rav! Ani uddi marun to cholunk laglo.
11 Paulun kelem tem lokanchê urponjin pollena fuddem, Likaoniechê bhaxen tãnnim vhoddlean mhollem: Mon’xanchea rupan dèv amchê modem denvleat.
12 Barnabasak tãnnim Zeus b mhonn nanv ghalem ani, Paulu mukhêl ulovpi dekhun, taka Hermes mhonn nanv dilem.
13 Xara fuddem aslolea Zeusachea mondirachea iadnikan har ghalun nettoil’le padde darvonttea-xim haddle ani loka sangatim to iôdn bhettounk sôdtalo.
14 Hem aikun, Barnabas ani Paulu Dhormdutamnim aplim avoronnam pinzlim ani, loka-xim dhanvun vochun, tãnnim arddun mhollem:
15 Ixttamnô, tumi kitem mhonn korunk fuddem sorleat? Ami-i fokot monis, tumchêch mon’xagotiche. Punn tumkam ami bori khobor gheun aileanv; hea polkea vostunk patt korun, jivea Deva-xim tumkam vôllun haddunk ami aileanv: tôr sôrg ani sonvsar ani somdir ani tanchê bhitôr asa titlem-i Tannench rochlam.
16 Tannem adlea pinddkamnim sogllea videxiank ap-apli vatt dhôrunk nirmilem.
17 Tori astana, bholeponnan tumkam zaite upkar korun, Apnnakuch govai dinastana To ravunk na: sorgar thaun To paus dhaddta, somoiam pormannem follam utpon korta, tumkam jevunk-khaunk dita ani tumchim kallzam dhadoxi korta.
18 Itlem sangun-ui, apnnank iôdn korina zaunk lokak addaunk tankam bhov avghodd zalem.
19 Tednam Antiokiê and Ikoniuma thaun kãi Judev aile; lokak khubdaun, tãnnim Pauluk fatrailo ani to melo mhonn somzun taka xara bhair ôddun vhelo.
20 Punn xis ieun tachê bhonvtim ektthovle tednam, to utthlo ani portun xarant gelo. Ani dusrea disa to Barnabasa borabôr Derbek gelo.
21 Tea xarant Xubhvortoman porgôttun zaite xis kelea uprant, Paulu ani Barnabas Listrek, Ikoniumak ani Antiokiek portole.
22 Tãnnim xisank ghottai dili ani bhavarthant thir ravat mhonn sanglem. Devachea Rajeant bhitôr sorunk zaite koxtt-dogd ami sõsunk zai, oxem te mhonnttale.
23 Dôr-êkê Povitr-Sobhek tãnnim zannte nemle ani, magnnim ani upas korun, jea Somiak tãnnim bhavarthan manun ghetlolo, tea Somiachê adhin tankam kele.
24 Pisidia prantantlean te Pamfiliek pavle.
25 Pergant Devachem utor porgôtt’tôch, te Ataliek denvun gele.
26 Ani thõi thaun tarvar bosun te Antokiek pavle. Hea xara thaun te bhair sorlole tednam, thõichea bhavarthianchea zomean Pauluk ani Barnabasak, tãnnim atam sompoil’lea vavra pasot tankam Devachi mozôt magun, Tacheach hatant ghal’le.
27 Hanga pavtôch, thõichi Povitr-Sobha tãnnim zomoili ani apnna vorvim Devan kelem titleachi-i khobor tankam dili, ani koxê bhaxen videxiank Tannem bhavarthachem dar ugôddlem, tem bi tankam sanglem.
28 Xisam borabôr te thõi zaito kall ravle.
Dhormdutancho Itihas - Chapter :15
1 Tednam Judeiak thaun kãi monis ieun amchea bhavam-bhoinnink oxem xikounk lagle: Moizesan sthaplolê chali pormannem tumi sunôt kelea xivai, tumi taronn zôddunk xokonant.
2 Hê vixim he monis Paulucher ani Barnabasacher uprasle ani tanchê modem motto vad-vivad zalo. Xekim oso tharav zalo: Paulun ani Barnabasan ani tanchê modlea thoddea zannamnim Jeruzaleak vochun hea tonttea vixim Dhormdutam ani zanntteam kodde bhasabhas korchi.
3 Mhonnttôch Povitr-Sobhen tankam patthoile, ani Fenisientlean ani Samarientlean vetana, koxê bhaxen videxiamnim bhavarth dhôrlo tem te sangit gele; ani hi khobor aikun, sogllea bhavam- bhoinnink vhôdd khuxalkai bhògli.
4 Te Jeruzaleak pavle tednam, tankam Povitr-Sobhen, Dhormdutamnim ani zannteamnim ievkar dilo; ani tãnnim apnna vorvim Devan kelem titleachi-i khobor sangli.
5 Punn Farizevanchea pongddantlea kãi bhavarthiamnim oxi addkhôll haddli: Tanchi-i sunôt korunk zai ani tankam Moizesachi Somurt samballunk launk zai.
6 Hea tonttea vixim bhasabhas korunk Dhormdut ani zannte ektthãi zale.
7 Motto vad-vivad zalea uprant, ubo ravun Pedrun tankam mhollem: Bhavam-bhoinnimnô, videxiamnim mhojea tonddantlem Xubhvortoman aikunk ani bhavarth dhôrunk poilea disam thaun Devan mhaka vinchun kaddlo mhonn tumi zannont.
8 Ani soglleanchim kallzam vollkhota tea Devan amkam dil’lo tosoch tankam-i Povitr Atmo diun, tim-i Apnnak man’tat mhonn dakhoun dilem.
9 Bhavartha vorvim tanchim kallzam nitoll korun, amchê ani tanchê modem koslich ontôr Tannem korunk na.
10 Mhonnttôch amchean, nhoi mhonn amchea purvozamnim, vahunk zaunk na toslem zum xisanchê manir ghalun, tumi kiteak mhonn Devachi porikxa korunk sôdtat?
11 Punn Somia Jezuchea dennean amkam toxench tankam taronn mellta mhonn ami sotmantanv.
12 Zomlolo sogllo lôk vogi ravlo; ani Barnabas ani Paulu apnnam vorvim Devan videxiam modem kel’lea sogllea khunnanchi ani vismitanchi ji khobor sangtale, ti ak’khê sobhen aikoli.
13 Tanchem ulovop zatôch, Jakoban oxem aplem mot sanglem: Bhavam-bhoinnimnô, mhojem aikat:
14 Aplea nanvank bhettoil’li videxiam modli êk porza survatek thaun vinchun kaddunk Devachi khuxi mhonn Simeianvan a tumkam atanch sanglam.
15 Ani hem provadianchea utram pormannem asa, kiteak oxem boroil’lem asa:
16 ‘Hea uprant, Hanv portun ietolom, ani Davidacho moddon poddlolo tombu Hanv novean tanntolom. To Hanv ghorttannantlo ubo kortolom ani novean bandtolom.
17 Tednam sogllim mon’xam Sorvesporak sôdtolim, Mhojea nanvak bhettoil’lim asat tim sorv raxttram.
18 Zannem zaitea kalla thaun hem kollit kelam, to Sorvespor oxem sangta.’
19 Mhonnttôch mhojem mot oxem: Deva-xim portun ietat tea videxianchem jivit ami odik avghodd korchem nhoi.
20 Punn tankam oxem ami boroun dhaddchem: kuddea devank bhettoun bhoxttail’leô vostu tãnnim khauncheô nhoi, Somurtichea kaideam add logn korchem nhoi, ani gomtti pillun marlolê mon’zatichem mas khaunchem nhoi ani rogot xevchem nhoi.
21 Karonn adlea kallar thaun sogllea nogramnim Moizesachi Somurt porgôtt korpi asat ani dôr Son’vara devsthanamnim ti vachtat.
22 Tednam apnna modlea thoddea mon’xank vinchun kaddunk ani Paulu ani Barnabasa sangatim Antiokiek dhaddunk Dhormdutamnim ani zannteamnim ak’khê Povitr-Sobhê borabôr tharav ghetlo. Judas, add-nanvan Barsab’bas ani Silas, hankam tãnnim vinchun kaddle; he bhavarthiam modem mhotvache monis asle.
23 Tanchê kodde diun oxem ek potr tãnnim dhaddlem: Dhormdut ani zannte, tumche bhav, Antiokient, Sirient ani Silisient videxiam modlim amchim bhavbhoinn zaleant tankam noman kortat.
24 Amchê modlea thoddea bhavamnim aplê xikovnnen tumkam ghuspailim ani tumchim monam uchamboll kelim mhonn ami aikolam. Oxem korunk tankam amchi rojia nasli.
25 Dekhun ami êk sobha apoili, ani amchê-modlea thoddeank vinchun kaddun amchea mogachea Barnabasa ani Paulu borabôr tumchê-xim dhaddunk ami soglleamnim tharailem.
26 Jezu Kristachea, amchea Somiachea, nanva khatir Barnabas ani Paulu aplo jiv sonkottant ghalunk pattim sorle nant.
27 Mhonnttôch tanchê borabôr Judasak ani Silasak ami tumchê-xim dhaddtanv: hea potrar ami boroilam tench te tumkam tonddan sangtole.
28 Hea gorjechea kaideam bhair anink koslench vozon tumcher ghalina zaunk Povitr Atmeak ani amkam borem dislem:
29 kuddea devank bhettoil’lem jevonn tumi jevchem nhoi, rogot xevchem nhoi, ani gomtti pillun marlolê mon’zatichem mas khaunchem nhoi; Somurtichea kaideancher add logn korchem nhoi. Hea vostunk patt korun tumi borea rostear astoleat. Noman.
30 Tednam tankam dhaddle ani te Antiokiek gele; hanga sobhek apoun tãnnim tem potr dilem.
31 Sobhen tem vachlem ani tachê vorvim apnnak ghottai mell’lli mhonn khuxal zali.
32 Judasan ani Silasan, apunnui provadi zaun, loka lagim zaitem uloun bhavam-bhoinnink ghottai ani thirai dili.
33 Thõi thodde dis kaddlea uprant, bhavam-bhoinnincho nirôp gheun, apnnank dhaddlole tanchê-xim te xantin portun gele.
35 Punn Paulu ani Barnabas Antiokiek ravle ani thõi zaitea dusream borabôr tãnnim xikovnn dili ani Somiachem utor porgôttlem.
36 Thoddea disamnim Paulun Barnabasak mhollem: Atam ami portun vochun Somiachem utor porgôttlolem tea sogllea nogramnim amchea bhavambhoinnink bhett korum-ia ani tim koxim-kat choltat tem polleum-ia.
37 Apnna borabôr Marku mhonnlolea Juanvak vhorunk Barnabasan khuxi dakhoili.
38 Punn tanchê borabôr vavr sôddun Panfilient tanchê thaun koddsorlolo teach mon’xak novean bhagak gheuncho nhoi mhonn Pauluchem mot aslem.
39 Tôr hê vixim tanchê bhitôr huzôt zali ani te ekameka thaun koddsorle, ani Markuk gheun Barnabas tarvar bosun Siprusak gelo.
40 Paulun Silasak aplea bhagak ghetlo ani, bhavam-bhoinnimnim tachê khatir Somiachi mozôt maglea uprant, to bhair sorlo.
41 Povitr-Sobhank ghottai diun to Sirientlean ani Silisientlan bhonvot gelo.
Dhormdutancho Itihas - Chapter :16
1 Magir Paulu Derbek ani uprant Listrak gelo. Thõi Timot nanvacho êk xis aslo; tachi avoi bhavarth dhôrloli Judêv bail, punn tacho bapui Grik.
2 Listrent ani Ikoniumant aslim tim amchim bhavbhoinn tachem borem uloitalim.
3 Paulun taka apnna borabôr vhorunk ievjilem. Dekhun thõi jietolea Judevam pasot tannem tachi sunôt keli, kiteak tacho bapui Grik mhonn sogllim zanno aslim.
4 Nogram-nogramnim bhonvtana, Jeruzaleak Dhormdutamnim ani zannteamnim tharav ghetlole tanchi khobor tannem tankam dili ani te pallunk zai mhonn sanglem.
5 Hê bhaxen teô Povitr-Sobha odik-odik bhavarthan mozbut zaleô ani disan’dis tanchi sonkia-i vaddon geli.
6 Frijient ani Galasiechea prantant bhonvlea uprant, Devachem utor Aziechea prantant porgôtt korunk Povitr Atmean tankam addvarle.
7 Misiechê ximer te pavle tednam, ti utrun te Bitinient vochunk kortale, punn Jezuchea Atmean tankam vochunk diunk na.
8 Mhonnttôch Misientlean bhonvon te Troasak gele.
9 Ani êkê rati Paulun êk dixttavo dekhlo: Masedoniecho êk monis ubo aslo ani tachê lagim oxem magtalo: Masedoniek ieun amkam adar di.
10 Ho dixttavo dekhlea uprant, rokddench Masedoniek vochunk ami bondabôst keli, karonn tankam Xubhvortoman diunk Dev amkam apoita mhonn amkam khatri zali.
11 Troasa thaun tarvar bosun ami nitt Samotrasiek geleanv ani dusrea disa Neapolik.
12 Ani hanga thaun ami Filipik pavleanv; tea Masedoniechea jilheachem tem mukhel xar aslem ani Romkarancho êk zomo thõi ravtalo. Hea xarant thodde dis ravlea uprant,
13 Son’vara disa ami tea xarachea darvonttea bhair nodi-xim geleanv; kiteak ti magnnem korchi svat mhonn ami aikol’lem. Ami thõi bosleanv ani zomatik ail’lea bailam kodde ulounk lagleanv.
14 Tanchê modem Lidia nanvachi Devak bhôzpi êk bail amkam aikotali; ti Tiatira nograntli asli ani thõi zambllea-rongachea lugttancho dhondo kortali. Paulu sangtalo tem aikunk Somian tichem kalliz ugôddlem.
15 Tika ani tichea kuttumbak Povitr-Snan dilea uprant, tinnem amchê lagim oxem maglem: Hanv khoreponnim Somiacher bhavarth tthevtam mhonn tumi manun ghetlam zalear, amger ravunk ieiat. Ani ami vochunkuch zai mhonn tinnem nêtt kelo.
16 Êk dis ami magnnem korunk vetana, amkam ek gulam’-cheddum mell’llem; hea cheddvak parkhuncho gunn aslo. Ani noxib parkhun aplea dhoniank tannem khub duddu zôddlolo.
17 Pauluchê ani amchê pattlean ieun tem bob marun mhonnunk laglem: He monis Bhov-Vortea Devache chakor. Soddvonnechi vatt te tumkam porgôtt kortat.
18 Zaite dis tem oxem korit aslem. Xekim Paulu bejar zalo ani vollon tea atmeak mhollem: Jezu Kristachea nanvan hanv tuka hukum’ ghaltam, tachê velo bhair sor! Ani teach vellar to bhair sorlo.
19 Tea cheddva vorvim anink duddu zomouncho aplo bhorvanso somplo to polleun, tachea dhoniamnim Pauluk ani Silasak dhôrle ani chouker odhikariam-xim ôddun vhele ani
20 tankam mon’subidaram mukhar ube korun mhollem: He monis Judev ani xarant te uchambollai kortat.
21 Ani ami Romkar mhonnttôch, amchean manun gheunk zainant, nhoi mhonn pallunk zainant, tosleô riti-sonvoiô xikoitat.
22 Urpônz Pauluchea ani Silasachea angar aili; mon’subidaramnim tanchim vostram pinzun kaddlim ani tankam jerbond marunk laile.
23 Khub mar dilea uprant, tankam bondkhonnint ghale ani tanchi borê bhaxen rakhônn korunk bondkhonnichea rakhonndarak formailem.
24 Hukuma pormannem tannem tankam bondkhonnichea bhitorlea kuddant dovorle ani tanche pãi lankdda-khoddeamnim ghalun ghott kele.
25 Sumar modianir Paulu ani Silas magnnem kortale ani gaionam korun Devak vakhanntale tem dusrea koidiamnim aikolem.
26 Ovchit êk vhôdd dhornnkamp zali ani bondkhônn buniadi soit hal’li. Rokddinch sogllim daram uktim zalim ani soglleancheô sanklli poddleô.
27 Bondkhonnicho rakhonndar zago zalo ani bondkhonnichim daram uktim zal’lim polleun ani koidi pollun gele mhonn somzun, torvar bhair kaddun to aplo jiv kaddunk sôdtalo.
28 Punn Paulun vhoddlea tallean mhollem: Tuka kãich vaitt korinaka, ami soglle hangach asanv.
29 Rakhonndaran dive haddunk laile; magir to taktin bhitôr gelo ani soglloch koddkoddun Pauluchea ani Silasachea pãiam poddlo.
30 Ani tankam bhair haddun, tannem mhollem: Saibamnô, mhaka taronn mellunk hanvem kitem korunk zai?
31 Tãnnim taka sanglem: Somia Jezucher bhavarth dovor ani tuka ani tujea kuttumbak taronn melltolem.
32 Tednam taka ani tachea ghorant aslolea soglleank Somiachem utor tãnnim porgôttlem.
33 Ratchea teach vellar tankam vhorun tannem tanchim chovnam dhulim; ani thõichê-thõich tannem ani sogllea tachea kuttumban Povitr-Snan ghetlem.
34 Uprant tannem tankam aplea ghora vhele ani jevonn vaddlem ani, Devacher bhavarth dovrunk apnnak favo zalem dekhun, sogllea aplea kuttumba borabôr khuxali keli.
35 Dusrea disa mon’subidaramnim ho hukum’ diun naikank dhaddle: Tea mon’xank sôddat.
36 Rakhonndaran Pauluk sanglem: Tumkam sôddat mhonn sangun mon’subidaramnim hukum’ dhaddla, mhonnttôch atam bhair sorun tumi xantin vochat.
37 Punn Paulun tankam mhollem: Ami Romi nagrik zaun-ui, tãnnim amkam sobhêmazar mar dilo, nit korinastana amkam bondkhonnint ghale, ani atam guptim amkam sôddunk sôdtat? Oxem zaum nozo! Apunnuch ieun tãnnim amkam bhair kaddche.
38 Naikamnim hem mon’subidarank kolloilem; ani Paulu ani Silas Romi nagrik mhonn tankam gomtôch, te bhiele.
39 Ani, apunn khaxa ieun, tãnnim tankam bondkhonnintle bhair kaddle ani tem xar sôddun vochat mhonn maglem.
40 Bondkhonnintle bhair sorun, Paulu ani Silas Lidiechea ghora gele. Thõi bhavam-bhoinnink te mell’le ani tankam dhir diun tãnnim apli vatt dhôrli.
Dhormdutancho Itihas - Chapter :17
1 Amfipolisentlean ani Apolo nientlean vatt dhôrun, te Tesalonikek pavle; hanga Judevanchem ek devsthan aslem.
2 Aplê sodanchê sonvoiê pormannem, Paulu tanchê zomatik gelo. Ani tin Son’var porian tannem tanchê lagim Povitr Pustok dhôrun bhasabhas keli;
3 ani Kristan sõsunk zai aslem ani To mel’leantlo punorjivont zaunk zai aslo mhonn tankam somzonni diun dakhoilem. To oxem sangtalo: Hanv tumkam porgôtt kortam to Jezu, hoch Krist!
4 Tantlea thoddea zannamnim hem manun ghetlem, ani Pauluk ani Silasak tim ektthovlim; hanchê bhair Devak bhôztolea Grik lokachea eka vhoddlea chombean ani unch kulliechea zaitea bailamnim toxench kelem.
5 Punn Judev nirddukaien bhòrle, rostea veleam kãi noxttea mon’xank tãnnim ektthãi kele ani êk chumbo toiar korun ak’khea nogrant uchambollai ximpddaili. Pauluk ani Silasak sôdunk ani uprant tankam loka fuddem ube korunk mhonn te Jasonachea ghora gele.
6 Punn te tankam thõi mellunk nant dekhun, Jasonak ani thoddea amchea bhavank nograchea mon’subidaram-xim haddle ani oxi bobatt marli: He monis ak’kho sonvsar uchambollaitat ani atam hangasôr pavleat.
7 Tankam Jasonan apnnager biradd dilam, ani Jezu mhonnlolo anink eklo raza asa mhonnun, Somrazache soglle kaide te môddtat.
8 Him utram aikun lôk ani nograche mon’subidar challvole,
9 punn Jasonachi ani heranchi zamin’ki ghetlea uprant tãnnim tankam sôddle.
10 Kallôkh zatôch, bhavam-bhoinnimnim Pauluk ani Silasak rokddech Bereiak dhaddle. Thõi pavtôch te Judevanchea devsthanant gele.
11 Hea ganvcho Judêv lôk Tesalonikechea Judevam poros odik uktea monacho aslo; tãnnim sondêx vhoddê utsuktaien aikolo, ani to khoro zalear polleunk tim dôr-disa Povitr Pustok barkaien topastalim.
12 Tanchê modlea zaitea zannamnim bhavarth dhôrlo ani Grik lokantlea unch kulliechea bailamnim ani puskoll dadleamnim toxench kelem.
13 Bereiant-ui Paulu Devachem utor porgôtt’ta mhonn Tesalonikechea Judevank gomtôch, lokak challvounk ani uchamboll korunk te thõi gele.
14 Tednam bhavam-bhoinnimnim rokddoch Pauluk doriachê kinarer dhaddun dilo, punn Silas ani Timot thõi pattim ravle.
15 Pauluk vatter rakhunk gel’le tãnnim taka Aten porian pavoilo, ani Silasan ani Timotan zata titlê vegim apnna-xim ieunchem mhonn Paulucho nirôp gheun te porot aile.
16 Paulu apunn Atenant tanchi vatt polleun ravlo, ani hem xar kuddea devanchea murtimnim bhòrlolem polleun, to soglloch kanttall’lo.
17 Judevam lagim ani Devak bhôztoleam kodde to devsthanant bhasabhas kortalo;
18 ani toxench chouker thõichean ieteam-veteam kodde vad-vivad kortalo. Thodde Epikuri ani Istoiki totvgineani tachê lagim huzôt kortale. Kãi zann oxem mhonnttale: Ho boddboddio kitem sangunk sôdta? Dusre konn mhonnttale: To eka porkea deva-devichem zoddem porgôtt korta dista. Karonn Paulu Jezucho ani punorjivontponnacho tankam prochar kortalo.
19 Tãnnim Pauluk dhôrun Areiopagachê Mha-Sobhê fuddem vhelo ani tachê lagim vicharlem: Tum novê xikovnnecho prochar kortai: ti kosli ti amkam sangxi?
20 Tum sangtai tantleô thoddeô vostu amkam attveôch lagtat, mhonnttôch ami tancho ôrth kitem to zanno zaunk sôdtanv.
21 Sogllim Aten’karam ani xarant vostek ravpi bhailo lôk novea-novea kolponanchi khobor sangun vô aikun aplo vêll sartalo.
22 Paulu Areiopagachê Mha-Sobhê fuddem ubo ravlo ani oso uloilo: Aten’karamnô, sogllêch vatten tumi ekdom’ dhorm-pallpi mon’xam mhonn hanv polletam.
23 Tôr tumchea xarant bhonvtana ani tumcheô dharmik iadgiri ekan-êk polletana, ‘Onvollkhi devak’ ho boroil’lo namlêkh asloli êk vedi-i hanvem dekhli. Borem tôr: tumi vollkhonastana bhôztat toch Dev hanv tumkam porgôtt kortam.
24 Sonvsar ani tachê bhitôr asa titlem-i rochlam to Dev, sorgacho ani prithumecho Dhoni zaun, mon’xanchea hatamnim bandlolea mondirant ravona,
25 nhoi mhonn kiteachich Apnnak goroz asa mhonn mon’xanchi seva-chakri To ghena; urfattim, soglleank jivit ani svas ani soglleô vostu dita to Toch.
26 Ak’khi prithum’ bhôrunk ekach mon’xa thaun sogllem mon’xakull Tannem utpon kelem. Hea bhair, ek-ek raxttr kitlo kall togchem tem Tannem tharailam ani tea-tea raxttrachea desak ximô ghaleat.
27 Hea vostum vorvim sanspun-sanspun zal’lê porim mon’xamnim Apnnak sôdun kaddunk Devan oxem kelam. Tori To amchê thaun pois na,
28 kiteak ‘Tachê sovem ami jietanv, bhonvtanv ani asanv’. Oxench tumchê-modlea kãi koviamnim sangun dovorlam: ‘Ami sogllim khoreponnim Tachim bhurgim.’
29 Ami Devachim bhurgim mhonnttôch, Dev mon’xanchê kolen ani hikmotin kel’lê bhangarachê, rupeachê ani fatrachê murti sarko mhonn ami somzunk favona.
30 Oslea nennarponnachea kallacher Devan lokx ghalunk na, punn atam sogllê kodden aslolea sogllea mon’xamnim jivit bodôlchem mhonn To porgôtt korta.
31 Kiteak sonvsarachi nitivontponnan nit korunk Tannem êk dis tharaila ani eka Mon’xak Nitidar nemla; ani hea Mon’xak mel’leantlo punorjivont korun, tachi khatri Tannem amkam soglleank dilea.
32 Mel’leanchea punorjivontponnachi khobor aikona fuddem, thoddeamnim tacheô moskoriô keleô, ani dusreamnim mhollem: Hê vixim ami dusrê pavtti tujem aikunk sôdtanv.
33 Oso Paulu tanchê modlo koddsorlo.
34 Tori kãi zannamnim taka ektthovon bhavarth dhôrlo. Hanchê modem aslo Dioniz nanvacho Areiopagachê Mha-Sobhecho êk vangddi, Damaris nanvachi êk bail ani tanchê borabôr anink-ui dusrim.
Dhormdutancho Itihas - Chapter :18
1 Tea uprant, Atenantlo bhair sorun Paulu Korintak gelo.
2 Thõi zolman Pontusacho, Akuila nanvacho, êk Judêv taka mell’lo; to aplê bailê Prisila borabôr niktoch Italiê thaun ail’lo, kiteak soglleam Judevamnim Roma xarantle bhair sorchem mhonn Klaudiusan hukum’ ghal’lo. Paulu tankam bhett diunk gelo.
3 Ani aplea sarko tim dhondo kortalim dekhun, tanchea sangata to ravlo ani tanchê borabôr vavr kortalo, kiteak tim-i tachê bhaxen tombu-korpi.
4 Dôr Son’vara devsthanant to vadvivad choloitalo ani Judevank toxem Grikank bhavarthak zôddun gheunk sôdtalo.
5 Silas ani Timot Masedoniê thaun pavle tednam, sogllo vêll Devachem utor to porgôttit aslo ani Jezu Krist mhonn Judevank govai ditalo.
6 Punn te tacher kolpole ani taka nindechim utram ulounk lagle tednam, aplim vostram fafddun tannem mhollem: Tumi zôr Deva thaun koddsorun poddxat, hi tumchich zobabdari; mhaka zalear, hantum koslich zobabdari na. Atam thaun hanv videxiank sondêx diunk vetolom.
7 Thõisorlo bhair sorun, to Tikus Justus mhonnlolea konn-ekleager gelo. Ho Devak bhôztalo ani tachem ghor devsthana lagim aslem.
8 Krispan, devsthanachea vhoddilan, ani tachea ak’khea kuttumban Somiacher bhavarth dovorlo. Korintkarantlea zaitea zannamnim Pauluchem aikun bhavarth dhôrlo ani Povitr-Snan ghetlem.
9 Êkê rati, Somian Pauluk dorxonant mhollem: Bhieum naka, punn uloi ani ogo ravum naka,
10 kiteak Hanv tujea sangata asam. Hea xarant Mhojê vatten khub lôk asa, mhonnttôch tuka vaitt korunk konn fuddem sorcho na.
11 Oso Paulu Korintant dedd voros ravlo ani Devachem utor tanchê modem porgottit aslo.
12 Punn Galion Akaiecho odhikari aslo tednam, soglle Judev ekmotan Paulucher kolpole ani taka neaisobhê mukhar ubo kelo.
13 Tãnnim mhollem: Ho monis lokak Somurtichea nemancher add Devak bhôzat mhonn aplê xikovnnen ôddta.
14 Paulu ulounk vetalo, punn tea adinch Galionan Judevank mhollem: Judevamnô, aikat: Koslea khotteponnacho vô opradhacho prosn zal’lo zalear, tumcho arôp hanv favo tê porim aikotolom aslom;
15 punn ho tontto utrancho ani nanvancho ani tumchê somurti vixim dekhun, tumich to suttavo korat. Oslea vostunchi nit korunk mhaka khuxi na.
16 Uprant tannem tankam neaixallentle bhair sorunk laile.
17 Tãnnim soglleamnim Sostenesak, devsthanachea vhoddilak, ghôtt dhôrlo ani neaixallê mukhar taka boddoilo. Ani tea gollbollanchi Galionan porva keli na.
18 Borech-xe dis Korintant ravlea uprant, bhavam-bhoinnincho nirôp gheun, Prisila ani Akuila borabôr tarvan Paulu Siriek gelo. Kenkresak pavtôch, apnnem êk angovnn kel’li ti pallunk, Paulun aple kens tasle.
19 Efezak pavtôch, Paulun tankam thõi sanddlim ani devsthanant vochun Judevam kodde to bhasabhas korunk laglo.
20 Thõi anink thodde dis rav mhonn tãnnim tachê lagim maglem tednam, tannem hem manun gheunk na,
21 punn tancho nirôp ghetana mhollem: Devak zai zalear, hanv portun ietolom. Oso to tarvar bosun Efezantlo bhair sorun gelo.
22 Sezareiak pavlo tednam, Povitr-Sobhek bhett kortôch to Antiokiek gelo.
23 Hanga thoddo vêll ravtôch, Galasiechea prantantlean ani Frijientlean bhonvun Paulu sogllea xisank ghottai ditalo.
24 Zolman Aleksandriecho, Apollo nanvacho, êk Judêv tarvan Efezak pavlo. To ulovpant bhov huxar aslo ani Povitr Pustokam vixim provinn.
25 Somiachê Vattechi taka bori xikovnn mell’lloli ani to kallzachê vhoddê hurben uloitalo ani barkaien Jezu vixim xikovnn ditalo; punn taka fokot Juanvachea snanachi khobor asli.
26 Devsthanant to vhodda kalljidarponnan xikounk laglo; Prisilan ani Akuilan taka aikolo tednam, tãnnim taka apnnam-xim vhelo ani Somiachê Vattechi taka odik barik somzonni dili.
27 Akaiek vochunk Apollon khuxi dakhoili tednam, bhavam-bhoinnimnim taka hurba dili ani taka borê bhaxen gheiat mhonn xisank boroilem. To thõi pavlo tednam, Devachea dennean bhavarthi zal’leank tannem khub adar dilo.
28 Sobhêmazar to Judevam kodde bollan vad-vivad choloitalo ani Jezu Krist mhonn to tankam Povitr Pustokantlean dakhoitalo.
Dhormdutancho Itihas - Chapter :19
1 Apollo Korintant astana, Paulu ut’torichea desamnim bhonvun Efezak pavlo; hanga taka thodde xis mell’lle.
2 Tannem tanchê kodde vicharlem: Tumi bhavarth dhôrlo tednam, Povitr Atmo tumi gheunk na? Tãnnim zobab dilo: Na. Povitr Atmo asa mhonn porian ami aikunk na.
3 Tannem tankam vicharlem: Tôr tumi koslem snan ghetlam? Tãnnim portipall kelo: Juanvachem,
4 Paulun mhollem: Juanvan jivit-bodôlpachem snan dil’lem; punn apnna pattlean ieuncho asa Tacher, mhonngê Jezucher, tãnnim bhavarth dovrunk zai mhonn tannem sanglem.
5 Him utram tãnnim aikolea uprant, Somia Jezuchea nanvan tankam Povitr-Snan dilem.
6 Paulun tancher hat dovorle tednam, tancher Povitr Atmo denvlo ani te porkeô bhasô ani Devacho sondêx diunk lagle.
7 Te soglle mellun sumar bara dadle asle.
8 Devsthanant bhitôr sorun, tin mhoine to kalljidarponnan uloit aslo ani Devachea Rajea vixim tanchê lagim vad-vivad kortalo ani khatri diunk vavurtalo.
9 Punn tantuntlim thoddim, aplea vadeachim zaun, bhavarth dhôrunk kobul naslim, punn sobhêmazar hê novê Vattê vixim vaitt ulounk laglim. Hea pasot, Paulun tankam sanddlim ani aplea xisank tanchê modle kuxin kaddle ani tankam gheun konn-eklea Tiranusachê xallent to dispottim vad-vivad kortalo.
10 Hem oxem don vorsam c tannem kelem ani hea pasot Aziechea prantant jietalo to lôk, zaum Judêv, zaum Grik, Somiachem utor aikunk pavlo.
11 Paulu udexim Dev itlim bhov vichitr vismitam kortalo, ki
12 to vaportalo te rumal ani tachê katik laglolim vostram lokan piddevontank lailim tôr, tancheô pidda boreô zataleô ani mhelle atme pollun vetale.
13 Punn bhut kaddpi kãi vattsur Judev mhelle atme bosloleancher Somia Jezuchem nanv gheunk sôdtale; te oxem mhonnttale: Paulu porgôtt’ta tea Jezuchea nanvan tumkam hukum’ ghaltam.
14 Oxench kortale konn-eka Skiva nanvachea Judevanchea mha-iadnikache sat put.
15 Punn mhellea atmean tankam mhollem: Jezuk hanv manun ghetam, Pauluk-ui hanv vollkhotam, punn tumi konn?
16 Ani mhello atmo boslolo to monis tancher upraslo ani eka fattlean ekak tannem tankam domaile ani itlea bollan tankam boddoile ki te sarkech vinglle zaun ani boroch mar khelea uprant tea ghorantle pollun gele.
17 Efezant ravtolea sogllea Judevank ani Grikank hê ghòddnnechi khobor pavli tednam, tim sogllim bhirantin bhòrlim, ani Somia Jezuchea nanvak vhôdd man mell’llo.
18 Bhavarthi zal’lim tantlim puskoll zannam fuddem sorlim ani apunn kosleô-kosleô achari chali palltalim teô sobhêmazar sangunk laglim.
19 Ani jadu kortolea modlea zaitea zannamnim aplim pustokam punzaun haddlim ani soglleam hujir tankam uzo lailo. Hea pustokanchem mol pon’nas hozar rupeache nanne zatole mhonn odmas kelo.
20 Oxem vhodda nettan Somiachem utor odik-odik ximpoddtalem ani ghôtt zatalem.
21 Hea sogllea ghòddnniam uprant, Atmeachea preronnan Paulun Masedonientlean ani Akaientlean Jeruzaleak vochunk ievjilem. Tannem oxem mhollem: Thõi gelea uprant, hanvem Romak-ui bhett korunk zai.
22 Hea pasot tannem aplea dogam adariank, Timotak ani Erastusak, apnna fuddem Masedoniek dhaddle ani apunn thoddo kall Aziechea prantant ravlo.
23 Hea kallar, Somiachê Vattek lagun borech gollboll zale.
24 Demetrius mhonnlolo êk xêtt Artemis devichim rupeachim murti-pettulam kortalo, ani hea tachea dhondea vorvim tachea kamdarank khub faido melltalo.
25 Sogllea aplea kamdarank ani tachê oslo dhondo kortolea herank tannem ektthãi kele ani mhollem: Ixttamnô, amchi zôdd hea dhondea vorvim ieta mhonn tumi zannont.
26 Jem kitem ho Paulu sangta, tem tumi pollelam ani aikolam. Mon’xanchea hatamnim kel’le dèv dèvuch nhoi mhonn sangun, Efezantuch nhoi, punn ak’khê Aziechea prantant Paulun zaitea zannanchem mon bodôl’lam.
27 Amcho dhondoch poddot mhonn nhoi, punn xrêxtt Artemis devichea mondirachi ixim’ buddon vochot mhonn bhirant asa. Ani oxem ak’khê Aziechea prantant ani ak’khea sonvsarant tika vhôdd man asa to ubon vetolo.
28 Hem aikun te ragan bhòrle ani oxeô bobô marunk lagle: Xrêxtt-vorti amchi Efezkaranchi Artemis!
29 Ak’khem xar gollboll’lem. Xarant nattkancho ukto zago aslo; thõi sogllo lôk borabôr lotton gelo, ani Gaius ani Aristark hea dogam Masedoniekarank, Pauluchea bhonvddê-sangatiank, tãnnim thõi porian bollan oddun vhele.
30 Zomlolea loka fuddem vochun, Paulu tankam ulo korunk sôdtalo, punn xisamnim taka addailo. Tannem nattkanchea zagear dixtti poddchench nhoi mhonn budh diun,
31 Aziechea prantachea odhikariam modlea tachea thoddea ixttamnim Pauluk nirôp dhaddlo.
32 Itlea mhonnosôr sobhent gondhôll odikuch vaddtalo: zonn-eklo veg-vegllê bhaxen huiêl martalo, ani tantlim zaitim zannam kiteak ektthovleant tem porian nokllo aslim.
33 Kãi zannam konn-eka Aleksandrak fuddem sorun uloi mhonn suchounk laglim; tednam Judevamnim taka mukhar lôttlo. Aple hat ubarun ogim ravat mhonn to lokak somzaunk sôdtalo.
34 Punn to Judêv mhonn lokak gomtôch, sogllim ekach tallean don voram sumar oxi huiêl marit ravlim: Xrêxtt-vorti amchi Efezkaranchi Artemis!
35 Xevttim xarachea karkunan urponjik somadhan korun oxem mhollem: Efezkaramnô, xrêxtt Artemisichea mondirachi ani sorgar thaun poddlolê tichê murtichi Efezkaranchem xar rakhônn korta mhonn sonvsarant konn nokllo zait?
36 Konnacheanuch hem na mhonnum nozo. Mhonnttôch tumi xant ravat ani uttavollaien kãich korinakat.
37 Hea mon’xank tumi hanga haddleat, punn tãnnim amchim mondiram chorunk nant, nhoi mhonn amchê devicher add kãi ninda te ulounk nant.
38 Demetriusacho ani tachea kolakarancho konnacher virudh arôp asa zalear, neaisobha bhòrtat ani xarache odhikari asat thõi tãnnim arop dakhounche.
39 Hachê bhair tumkam anink kitem vicharpachem asa zalear, kaideaxir sobhent ho prosn tumchean voir kaddum ieta.
40 Aiz ghòddlam tea bonddachi zobabdari amcher poddunk xokta, kiteak ho oslo gollbôll korunk koslench karonn na.
41 Oxem sangun tannem zomlolea lokak portun dhaddlo.
Dhormdutancho Itihas - Chapter :20
1 Uchambollai thambtôch, xisank ektthãi korun ani tankam xiddkavnni diun, Paulun tancho nirôp ghetlo ani Masedoniek vochunk to bhair sorlo.
2 Thõisorlea ganvam-ganvamnim bhonvddi martôch ani zaitem sangun tankam dhir ditôch, to Gresiek portolo ani
3 hanga tin mhoine to ravlo; thõi thaun Siriek tarvan vochunk to toiari korta mhonnosôr, Judev aplo ghat gheunk sôdtat mhonn taka gomlem. Tea khatir tannem Masedonientlean porot vochunk ievjilem.
4 Tachê borabôr gele te he: Bereiecho Sopater, Pirrucho put; Tesalonikeche Aristark ani Sekundus; Derbecho Gaius; Timot; ani Aziechea prantantle Tikikus ani Trofim’.
5 Te amchê mukhar gele ani Troasant amkam ravle.
6 Fug-naslolea Unddeanche dis zatôch, Filipi thaun tarvar bosun ami bhair sorleanv ani panch disam uprant tankam Troasant mell’lleanv; hanga ami ek satollem sarlem.
7 Satolleachea poilea disa a ami Unddeachê môddnnek ektthovleanv. Paulun tankam êk boli keli ani to sokallim vecho aslo dekhun modianir porian tannem aplem ulovop chalu dovorlem.
8 Ami ektthãi zal’leanv tea unchlea vosreant zaiteô ponnttiô lail’leô.
9 Eutikus nanvacho êk tornnatto zonelacher boslolo; Paulu uloitam-uloitam, taka borich nhid poddli ani nhidechê bhormen to tisrê malloier thaun zomnir poddlo ani tankam melolo mell’lo.
10 Paulu sokol denvlo ani tacher add poddun ani taka vengoun mhollem: Bhieum nakat, taka ozun jiv asa.
11 Uprant voir vochun tannem Unddo môddlo ani khelo. Magir tanchê lagim khub uloilo ani fantear thõicho bhair sorun gelo.
12 Jivo kel’lea tornnatteak tãnnim ghora vhelo ani tankam zaiti khuxalkai bhògli.
13 Ani amchi fuddli vatt dhôrun doriantlean ami As’sosak geleanv; hanga Paulu amchea tarvar choddcho aslo, kiteak tannem adim oxem tharail’lem ani to thõi porian ganvantlean cholun ieuncho aslo.
14 To amkam As’sosant mell’llea uprant, taka ami tarvar ghetlo ani Mitilenek vochunk ami bhair sorleanv.
15 Thõi thaun amchem tarum fuddem gelem ani Khiosa mukhar thamblem. Dusrea disa ami Samosak pavun thambleanv, ani tisrea disa Miletus pavleanv.
16 Aziechea prantant thambun vogôt korina zaunk, Efez sôddun Paulun fuddem vochunk tharailem, karonn Pon’nasavea Disachea Utsovak, zata zalear, Jeruzaleak pavunk to takit kortalo.
17 Miletus thaun Paulun Efezachê Povitr-Sobhechea zannteank apounk dhaddle ani,
18 te pavle tednam, tannem tankam oxem mhollem: ‘Aziechea prantant hanvem pãi dovorlo tea poilea disa thaun hanv tumchê modem aslom titlo-i vêll koso vaglam tem tumi zannont;
19 Judevanchea addkam-naddkank lagun mhojer ail’lea koxttam modem dukam golloun, sogllê lhan’vikaien hanvem Somiachi seva kelea.
20 Tumkam boreak poddta tem korunk hanv kednanch fattim sorlo na. Hanvem tumkam dhôrm porgôtt kela ani sobhê mazar ani tumchea ghoramnim hanvem tumkam xikovnn dilea.
21 Deva-xim portun ieiat ani amchea Somia Jezucher bhavarth dovrat mhonn Judevank ani Grikank hanvem ulo marla.
22 Ani atam, polleiat, Atmo mhaka Aplo koidi korun vhorta mhonn hanv Jeruzaleak vetam; thõi mhaka kitem ghòddtolem tem hanvuch nokllom,
23 punn mhaka bondkhônn ani koxtt ravtat mhonn Povitr Atmo dôr-eka xarant mhaka kolloit asa.
24 Punn mhojea jivak koslench mol na mhonn hanv dhôrtam. Devachê doiallaiechea Xubhvortomanak sakxi diunchem muniarponn Somia Jezu koddchem hanvem ghetlam: tem xarti pavounk ani oxem mhojem jivit sompounk hi êkuch mhoji axa.
25 Hanvem tumchê modem bhonvun Raj porgôttlam khorem, tori atam tumi sogllim novean mhojem tondd polleunchim nant mhonn hanv boro zannom.
26 Dekhun aichea disa hanv tumkam khochit sangtam: tumam soglleam modem konnachea-i jivacho zôr nas zalo, hanv zobabdar nhoi,
27 kiteak Devachi ak’khi ievzônn tumkam kollit korunk hanv pattim sorunk na.
28 Devachê Povitr-Sobhecho samball korunk Povitr Atmean tumkam odhikari keleat, tôr tumchê vixim ani ak’khea hindda vixim tumi zagrut ravat; hi povitr-sobha Tannem Apleach Putachea rogta vorvim Apli kelea.
29 Hanv gelea uprant tumchê modem krur landdge rigtole ani hindd ibadd korun sôddtole mhonn hanv borem zannom.
30 Apnnam fattlean xisank oddun vhorchê pasot, khotti xikovnn diunk tumchêch bhitorle monis upzotole.
31 Tea khatir zagrut ravat, ani hanvem dukam varoun tin vorsam porian thambonastana dis-rat tumchê modlea zonn-ekleak budh dilea ani xiddkaila mhonn ugddas dhôrat.
32 Ani atam Devachea hatant tumkam ghaltam ani Tachê doiallaiechea utrak tumkam patietam; tumkam bandun haddunk ani sogllea povitr kel’leam borabôr tumkam daiz diunk tea utrak podvi asa.
33 Hanvem konnacheach rupeachi, vô bhangarachi, vô nhesnnechi axa dhôrunk na.
34 Hea mhojea hatamnim vavr korun mhojea ani mhojea boraborcheanchea gorzank hanv pavlam mhonn tumkam mhaiti asa.
35 ‘Dusream koddchem gheunchê poros dusreank divop odik vhodd bhag’ hea Somia Jezuchea khaxa utrancho ugddas dhôrun, koxtt korun osoktank adar diunk zai mhonn sogllê bhaxen hanvem tumkam dakhoilam.
36 Hem uloilea uprant, tanchê borabôr dimbier ravun Paulun magnnem kelem.
37 Te soglle dukamnim roddunk lagle ani Pauluk veng marun tacho umanv ghetlo.
38 Te anink kednanch tachea tonddar nodor ghalunk pavche nant mhonn tannem sangil’lean, tankam bhov vhôdd khônt bhògli. Uprant tarvar porian te taka pavounk gele.
Dhormdutancho Itihas - Chapter :21
1 Xekim tancho nirôp gheun tankam sanddtôch, tarvar bosun ami nitt geleanv ani Kosak pavleanv; dusrea disa Rodesak pavleanv ani thõi thaun Patarak geleanv.
2 Fenisiek vetalem tem ek tarum hanga amkam mell’llem; tea tarvar choddun ami fuddem geleanv.
3 Siprus dixtti poddtôch, ho zunvo amchea dhaveak sanddun ami Siriek geleanv ani Tirachea bondrar utorleanv: thõi tea tarvantlo mhal denvouncho aslo.
4 Thõisôr thodde xis amkam gavle ani tanchea sangata ek satollem ami ravleanv. Jeruzaleak vochonaka mhonn Atmeachea preronnan tim portun-portun Pauluk sangtalim.
5 Punn amcho vogôt pavtôch, ami amchi fuddli vatt dhôrli. Ami xara bhair pavo porian, dadle aplea bailank-bhurgeank gheun amkam pavounk aile. Veller pavtôch dimbier ravun ami magnnem kelem.
6 Ekamekacho nirôp ghetôch ami tarvar choddleanv ani tim aplea ghora portolim.
7 Tira thaun doriantlean amcho provas somptôch, ami Tolemaisak utorleanv. Hanga ami bhavam-bhoinnink bhettleanv ani tanchê modem êk dis ravleanv.
8 Dusrea disa ami bhair sorleanv ani Sezareiak pavleanv. Thõi Xubhvortoman porgôttnnara Filipager ravleanv; to tea Satam modlo eklo.
9 Taka char ankvar dhuvô asleô ani hankam Devacho sondêx diupacho vorgunn aslo.
10 Ami thõi borech-xe dis ravlea uprant, Agabos nanvacho Judeiantlo êk provadi thõi pavlo.
11 To amchê-xim ailo ani Paulucho pott’tto kaddun tannem aplech hat ani pãi bandle; magir to oso uloilo: Povitr Atmo oxem mhonntta: hea pott’tteachea dhoniak Judev Jeruzaleant oxe bandtole ani taka videxianchê adhin kortole.
12 Hem aikun, ami ani thõisorlea lokan Jerusaleak vochonaka mhonn Paulu kodde vinoti korun maglem.
13 Tednam Paulun oso zobab dilo: Oxem roddun ani mhojem kalliz dukhoun, tumi kitem kortat? Hanv zalear, Somia Jezuchea nanva khatir Jeruzaleant bondkhonnint poddunkuch nhoi, punn morunk porian toiar asam.
14 Amchem aikunk to bilkul kobul zaina mhonn polleun, ami taka somzaupachem sôddlem; ami mhollem: Somiachi khuxi zaum.
15 Thoddea disam uprant, ami amchi toiari korun Jeruzaleak geleanv.
16 Sezareiache thodde xis amchê borabôr aile; ami biddarak vetaleanv tea mon’xager tãnnim amkam pavoile. Ho êk Sipruskar aslo, poilea xisam modlo eklo; tachem nanv Mnason.
17 Ami Jeruzaleak pavleanv tednam, bhavam-bhoinnimnim amkam khuxalkaien ieukar dilo.
18 Dusrea disa, amchê borabôr Paulu Jakobak bhett korunk gelo; soglle zannte thõi zomlole asle.
19 Tankam noman kortôch, aplea vavra vorvim videxiam modem Devan kitem-kitem kelem, tem sogott Paulun tankam sanglem.
20 Hem aikun tãnnim Devak vakhannlo ani Pauluk mhollem: Polle, bhava, Judevam modem hozaramnim bhavarth dhôrla ani tim sogllim Somurt hurben samballpi ani rakhpi mon’xam.
21 Videxiam modem jietolea sogllea Judevamnim Moizesak soddun diuncho, mhonngê aplea putanchi sunôt korchi nhoi ani Judevancheô chali-riti pallcheô nhoi, oxem tum xikoitai mhonn tãnnim tujê vixim aikolam.
22 Tôr atam kitem korum-ia? Lôk ektthãi zalea bogor ravcho na, kiteak tum hanga pavlai mhonn tankam khobor pavtolich.
23 Tôr ami tuka sangtanv toxem tum kôr. Amchê modem apnnam vixim angovnn kel’le choug dadle hanga asat.
24 Tankam tujê borabôr vhor, tanchea sangata tuji xud’dhi kôr ani tãnnim aple kens tasunk tum poixe farik kôr. Tednam tujê vixim tãnnim aikolam tem sarki fôtt mhonn ani tunch tujea kornniamnim Somurt samballtai mhonn soglleank kollon ietolem.
25 Punn bhavarth dhôrla tea videxiamnim kuddea devank bhettoil’lem mas, rogot ani gomtti pillun marloleô mon’zati khauncheô nhoi; Somurtichea kaideam virudh logn korchem nhoi: oxem ami tharailam tachi khobor diun tankam boroun dhaddlam.
26 Tednam Paulun tea chougam dadleank apnna borabôr ghetle ani dusrea disa tanchê sangatim xud’dhichi rit pall’li. Uprant to Devmondirant gelo ani xud’dhiche dis sompoun khõichea disa ek-eklean apnna khatir iôdn somorpunk zai mhonn tannem sanglem.
27 Te sat dis somptat mhollear, Aziechea prantantlea Judevamnim Pauluk Devmondirant pollelo. Tãnnim sogllê urponjik khubdaili ani Pauluk dhôrun bob marli:
28 Israelkaramnô, pavat! Sogllê kodden ani soglleank amchê porjecher, Somurticher ani hea zageacher add xikoita to monis ho! Itlench nhoi, videxiank tannem Devmondirant bhitôr haddle ani ho Povitr Zago bhoxttailo.
29 Tãnnim oxem mhollem, kiteak Trofim’ Efezkarak Paulu borabôr tãnnim Xarant pollel’lo ani Paulunuch taka Devmondirant bhitôr kaddlolo mhonn te somzole.
30 Sogllem Xar uchamboll zalem ani sogllê koddcho lôk dhanvun ailo; tãnnim Pauluk dhôrlo ani taka ôddit-ôddit Devmondira bhair kaddlo ani rokddinch Devmondirachim daram dhamplim.
31 Pauluk jivo marunk toiar zatale tednam, ak’khem Jeruzalem uchamboll zalam mhonn polttonnechea sordarak khobor pavli.
32 Kãi xotpotink ani soinikank gheun sordar porjê-xim dhanvun gelo. Sordarak ani soinikank polleun, Pauluk boddoitale te thamble.
33 Tednam sordar Paulu-xim ailo, tannem taka dhôrlo, ani doddeam sankllimnim taka bandunk lailo; magir to konn ani kitem kelam kai mhonn to vicharunk laglo.
34 Chombeantlo lôk bob marun veg-vegllem sangtalo. Ani hea gondhollant taka sarkich mhaiti mellona zaun, sordaran Pauluk kottant vhorunk formailem.
35 Paulu panvddeancher pavlo tednam, urpônz itli uchambôll zali ki soinikamnim taka uklun vhorcho poddlo.
36 Soglli urpônz tanchê pattlean vetali ani oxi bob martali: Taka jivexim marat!
37 Pauluk kottant bhitôr kaddchê adim, tannem sordarak mhollem: Tujê kodde mhojean ek utor uloum-ieta? Sordaran zobab dilo: Tum Grik bhas zannoi tôr?
38 Thoddo kall adim, ek bondd upzoun, char hozar punddank oronneant vhel’le to Ejiptkar nhoi tum?
39 Paulun zobab dilo: Hanv êk Judêv, Silisientlea Tarsus ganvcho; hea fanki xaracho hanv nagrik. Hea loka kodde ulounk mhaka porvangi di mhonn hanv tujê kodde magtam.
40 Sordaran rojia ditôch, Paulu panvddeancher ubo ravlo ani aplo hat ubarun tannem lokak ogi ravpak khunna keli. Sogllim sarkim ogim ravlim tednam, tannem Hebrêv bhaxen oxem ulounk suru kelem:
Dhormdutancho Itihas - Chapter :22
1 Mhojea bhavam-bhoinnimnô, mhojea vhoddilamnô, mhoji rakhônn korunk tumchê mukhar hanvem atam kitem sangchem asa tem chit diun aikat.
2 To Hebrêv bhaxen uloitalo tem aikun, lôk odikuch ogo ravlo ani Paulun aplem ulovp suru kelem.
3 Hanv êk Judêv; Silisiechea Tarsusant hanv zolmolom, punn hea Xarant hanv lhan-vhôdd zalom. Amchea purvozanchi Somurt Gamalielachea pãiam-xim hanv bariksannen xiklam; zoxem tumi sogllim aiz hurba dakhoitat, toxench hanvem sogllê hurben Devachi seva kelea.
4 Novê Vattechea pattlavdarank hanvem mornnak pavoisôr dhumallo dila; dadleank toxem bailank sankllimnim bandun hanvem bondkhonnint ghaleant.
5 Ani hachêch vixim porom’-iadnik ani zannteancho ak’kho zomo mhaka govai diunk xoktat; kiteak tanchê koddchim Damaskant aslolea Judev bhavank hanvem potram ghetlim ani hea mon’xank khast lavchê pasot tankam dhôrunk ani sankllimnim bandun Jeruzaleant haddunk mhonn hanv Damaskak vetalom.
6 Provas kortana ani Damaskak lagim pavtam-pavtam, don’parchea vellar sorgar thaun ovchit vhôdd uzvadd mhojê bhonvtim porzoll’lo; tednam hanv zomnir poddlom ani oxem sangtalo êk tallo hanvem aikolo:
7 ‘Saulu, Saulu, kiteak mhonn tum Mhaka dhumallo ditai?’
8 Hanvem vicharlem: ‘Saiba, konn ga tum?’ Tannem mhaka zobab dilo: ‘Hanv Nazaretkar Jezu, ani Mhakach tum piddapidd ditai.’
9 Mhojê borabôr asle tãnnim uzvadd pollelo, punn mhojê lagim uloitalo tacho tallo tãnnim aikunk na.
10 Hanvem vicharlem: ‘Somia, kitem korum hanv?’ Somian mhaka sanglem: ‘Utth, Damaskant voch ani tunvem kitem korunk zai tem sogllem konn thõi tuka sangtolo.’
11 Tea uzvaddachea loklokan mhaka kãi ek dixtti poddona zalem, dekhun mhojea sangatiamnim mhaka hatak dhorun Damaskak vhelo.
12 Thõi Ananias mhonnlolo konn-eklo Somurti pormannem bhoktivont monis jietalo ani taka tea xarantlo sogllo Judêv lôk man ditalo;
13 to mhaka bhettunk ailo; mhojê-xim ubo ravun tannem mhollem: ‘Saulu bhava, novean polleunk lag.’ Thõichê-thõich hanv taka polleunk laglom.
14 Uprant tannem mhaka mhollem: ‘Amchea purvozanchea Devan tuka adim-fuddench nivddun kaddla: Apli ievzônn konn ti vollkhunk, Devak Manovloleak polleunk, ani tacheach tonddantlim utram aikunk Devan tuka vinchla.
15 Kiteak tunvem dekhlãi ani aikolãi tem sangun sogllea mon’xam mukhar tum Tacho sakxidar zatoloi.
16 Ani atam anink ravchem kiteak? Utth ani Povitr-Snan ghe ani Tachem Nanv gheun tujim patkam dhuun kadd.’
17 Hanv Jeruzaleak portotôch, Devmondirant magnnem kortana,
18 Povitr Atmeacho bhar mhojer ailo ani hanvem Somiak pollelo. Tannem Mhaka oxem mhollem: ‘Jeruzaleantlo vegim bhair sor; kiteak Mhojê vixim tum govai ditoloi ti tim manun gheunchim nant.’
19 Hanvem zobab dilo: ‘Somia, dôr devsthanant bhonvun, Tujer bhavarth dovortoleank hanv bondkhonnint ghaltalom ani mar-far kortalom mhonn tim borim zannont.
20 Tujea sakxidara Istevachem rogot varoilem tednam, hanv khud thõi aslom, tacho khun hanvem manun ghetlo ani taka jivo martoleanchim angavlim hanvem rakhlim!’
21 Tednam Tannem mhaka mhollem: ‘Voch, Hanv tuka pois aslolea videxiam-xim dhaddtolom.’
22 Itlo vêll porian tãnnim tachem aikolem; uprant, vhoddlea tallean tãnnim oxi huiêl marli: Oslea mon’xak prithumê velo nanch korat! Taka anink jivo dovrunk favona.
23 Lôk bobô huieli martalo ani aplim avoronnam voir kaddun haloitalo ani dhul’l varear uboitalo.
24 Tednam sordaran taka kottant vhorunk formailem ani Judêv lôk oxeô bobô-huieli kiteak martat tem zanno zaunchê khatir, taka soitincho mar ghalun tachi chovkoxi korunk hukum’ ghalo.
25 Taka doramnim bandtôch, thõi ubo aslolea xotpotik Paulun mhollem: Tumchea kaidea pormannem, koslich zhôddti korinastana eka Romi nagrikacher tumchean jerbond marum-ietat?
26 Hem aikun xotpoti sordara-xim gelo ani taka vicharlem: Kitem mhonn kortai tum? To monis êk Romi nagrik!
27 Paulu-xim vochun, sordaran mhollem: Tum Romi nagrik zalear mhaka sang. Paulun zobab dilo: Hôi.
28 Sordaran mhollem: Khub duddu môddun hem nagrikponn mhaka mell’lam. Paulun portun mhollem: Mhaka zalear, zolmanuch tem mhojem.
29 Mhonnttôch vichar korun Pauluchi chovkoxi korche asle te rokddea-rokdde pattim sorle, ani sankllimnim apnnem bandlolo to êk Romi nagrik mhonn lokak gomlea uprant, sordar-ui bhielo.
30 Dusrea disa, Judev Paulucher koslo arôp ghaltat to sarko zanno zaunk sôdtalo dekhun, sordaran Pauluk sôddunk lailo ani mukhel iadnikanchi ani ak’khê Mha-Dhormsobhechi zomat apoili. Uprant Pauluk haddlo ani tanchê mukhar ubo kelo.
Dhormdutancho Itihas - Chapter :23
1 Saulun Mha-Dhormsobhek tellun polleun mhollem: Mhojea bhavamnô, aiz porian Deva mukhar nitoll ontoskornnan hanv chol’lam.
2 Hea vellar Ananias porom’-iadnikan aplea sevokank Pauluchea tonddar thapott marunk lailem.
3 Paulun taka mhollem: Chunno kaddloli vonnôt tum! Dev tuka martoloch! Somurti pormannem mhoji nit korunk tum boslai ani Somurticheruch add mhaka marunk laitai?
4 Sevokamnim taka mhollem Kitem? Devachea porom’ iadnikak okman kortai tum?
5 Paulun zobab dilo: Bhavamnô, to porom’ iadnik mhonn mhaka khobor nasli, kiteak oxem boroil’lem asa: ‘Tujê porjechea fuddariacher tum xirap ghalcho nãi.’
6 Tanchê modem êk pôkx Sadukincho ani dusro Farizevancho aslo mhonn zanno zaun, Paulun Mha-Dhormsobhent mhollem: Bhavamnô, hanv êk Farizêv, Farizevancho put hanv. Mel’lim mon’xam punorjivont zatat mhonn hanv bhorvanso dhôrtam dekhun, mhoji aiz zhôddti zata.
7 Oxem mhonnona fuddem Farizevam ani Sadukim modem vad-vivad suru zalo ani sobha don vantteamnim futtli.
8 Punorjivontponn, devdut ani atmo asat mhonn Saduki sotmaninant, punn Farizev tin-ui manun ghetat.
9 Haka lagun motti bobatt zali ani Farizevam modle thodde xastri ube ravun nettan nixêd marunk lagle: Hea mon’xa sovem amkam kãich vaitt mellona. Tachê kodde êk atmo vô êk devdut uloila zalear konn zanno!
10 Huzôt odikuch vaddli ani Pauluche pinzun kuddkean’- kuddke kortit mhonn sordar bhielo dekhun, aplea soinikank dhaddun, Pauluk tanchê modlo bollan kaddun kottant vhorat mhonn tannem formailem.
11 Dusrê rati, Somi Paulu-xim ieun ubo zalo; Tannem mhollem: Ghôtt rav, tunvem Mhojê vixim Jeruzaleant sakxi dileai, toxich atam Romant-ui diunk zai.
12 Dis uzvaddtôch, Judevamnim guddmêll kelo ani Paulucho jiv kaddlea xivai apunn jevche nant, nhoi mhonn pieunche nant mhonn tãnnim soput ghetlo.
13 Ho soput ghetlole te sumar challisam voir asle.
14 Uprant mukhel iadnikam-xim ani zannteam-xim vochun, tãnnim mhollem: Pauluk jivexim marlea xivai ami kãich chakche nanv mhonn ami khôr soput ghetla.
15 Pauluchi sarki topasnni korchê khatir taka tumchê-xim dhadd mhonn tumi Mha-Dhormsobhê borabôr sordarak sangunk dhaddat. To hanga pavchê adinch tacho jiv kaddunk ami amchê pallien toiar asanv.
16 Punn Pauluchê bhoinnichea putan hi moslôt aikoli ani kottant vochun soglli khobor Pauluk sangli.
17 Tednam Paulun eka xotpotik apnna-xim apounk dhaddlo ani taka mhollem: Hea tornnatteak sordara-xim vhor, to taka kitem sangunk sôdta.
18 Xotpotin taka sordara-xim vhorun mhollem: Bondkhonnint aslolea Paulun mhaka apounk dhaddlo ani hea tornnatteak tujê-xim vhor mhonn mhojê lagim maglem; ho tuka kitem sangunk sôdta.
19 Sordaran tachea hatak dhôrlo ani kuxin vhorun vicharlem: Kitem sangunk sôdtai tum mhaka?
20 Tannem mhollem: Pauluchi odik bori choukoxi korchi mhonn nib dhôrun, taka faleam Mha-Dhormsobhê fuddeant tunvem dhaddun diuncho mhonn tujê lagim magunk Judevamnim tharailam.
21 Punn tum tanchem aikum naka, kiteak tanchê modem challisam voir monis tacho ghat gheunk sôdtat ani taka jivexim marlea xivai apunn jevche nant nhoi mhonn pieunche nant mhonn tãnnim soput ghetla. Hem korunk te toiar asat ani tujê maniotaiek ravtat.
22 Apnnak gomoilea ti khobor anink konnakuch tannem sangchi nhoi mhonn sordaran taka formailem ani taka dhaddlo.
23 Magir sordaran dogam xotpotink apoile ani mhollem: Ratchea tin vorancher thaun, Sezareiak vochunk don’xim soinikank, sot’tôr ghoddesvarank ani don’xim bhalekarank toiar korat.
24 Pauluk bosunk thodde ghodde toiar korat ani taka Feliks razpala fuddeant borê bhaxen vhorat.
25 Ani tannem oxem ek potr boroilem:
26 Klaudius Lisias xrêxtt Feliks razpalak noman korta.
27 Judevamnim hea mon’xak dhôrlo ani te taka jivexim marunk asle. To êk Romi nagrik mhonn mhaka khobor pavli mhonnun, mhojea soinikank gheun hanv taka tanchea hatantlo sôddunk gelom.
28 Te tacher kosle arop ghaltale te hanv zanno zaunk sôdtalom dekhun, hanvem tanchê Mha-Dhormsobhê mukhar taka vhelo.
29 Tacher mornnachem formonn marunk vô taka bondkhonnint ghalunk koslench karonn na mhonn mhaka gomlem; tacher arôp aslo to fokot tanchê Somurtichea prosnam vixim.
30 Taka jivexim marunk Judev moslôt kortat mhonn mhaka khobor pavli, dekhun taka tujê-xim dhaddun diunk hanvem tharailem. Tacher koslem garannem asa zalear, tem tujê mukhar dokhol korat mhonn tanchea aropiank-ui hanvem sanglam. Noman.
31 Apnnank ghal’lo hukum’ soinikamnim pall’lo. Ratiam tãnnim Pauluk Antipatris porian vhelo.
32 Dusrea disa ghoddesvarank Paulu borabôr vochunk dovrun soinik porte kottant aile.
33 Sezareiak pavtôch tãnnim tem potr razpala kodde dilem ani Pauluk tachea fuddeant ubo kelo.
34 Razpalan potr vachlem ani to khõichea prantantlo kai mhonn Paulu kodde vicharlem; to Silisiecho mhonn taka gomtôch,
35 tannem taka mhollem: Tuje aropi ietôch hanv tuka aikotolom. Ani Pauluk Herodin bandlolea razvaddeant dovrunk tannem formailem.
Dhormdutancho Itihas - Chapter :24
1 Panch disam uprant, Ananias porom’-iadnik kãi zannteank ani Tertullus mhonnlolea konn-eka vokilak gheun Sezareiak gelo. Te razpala mukhar gele ani Paulucher add tãnnim aple arop manddle.
2-2 Pauluk bhitôr haddlo ani Tertullusan tacher add hea utramnim garannem suru kelem: Bhov xrêxtt Feliksa, tuka ani tujea huxar karbharak lagun nirontôr xanti ami bhôgunk pavleanv. Ani amchea raxttra khatir kel’leô khub sudharnniô teô tujeach durdorxiponnak lagun amkam favo zaleat. Hea sogtta pasot, sodanch ani sogllê kodden, ami tuka bhov abhari asanv.
4 Tuzo chôdd vêll hanv kaddunk sôdina ani dekhun mhojim donuch utram upkar korun aik mhonn magtam.
5 Ho monis êk noxtti pidda mhonn amkam gomun ailam. Ak’khea sonvsarar ximpoddlolea sogllea Judevam modem to bonddai upzoita ani Nazaretanchea pongddacho to mukhêl fuddari.
6 Devmondir porian bhoxttaunk tannem proitn kele tednam, taka ami dhôrlo. [Ami amchê Somurti pormannem tachi nit korunk sôdtaleanv, punn
7 Lisias sordar hea tontteant bhitôr sorlo ani bollan amchea hatantlo taka kaddun ghetlo;
8 tacher arôp ghaltat tãnnim tujê mukhar ieunk zai mhonn tannem hukum’ ghalo]. Tunch tachê lagim vicharxi zalear, amchea aropant sot asa mhonn tuka gomtolem.
9 Judevamnim Tertullusak palôv dilo ani hem sogllem khorem mhonn sanglem.
10 Paulun uloum-ieta mhonn razpalan khunna keli tednam, tannem mhollem: Khub vorsam thaun hea raxttracher mon’subidaracho odhikar tum choloit ailai mhonn hanv zannom, dekhun tujê mukhar visvasan mhozo khottlo manddtam.
11-12 Bara dis zaunk nant, Devak bhôzunk hanv Jeruzaleak gel’lom, ani Devmondirant vô devsthanamnim vô Xarant konnachêch kodde vad-vivad kortana vô lokak khubddaitana hanv tankam sampddonk na: hem sogott tujean ruzu korum-ieta.
13 Mhojer atam thaptat tea guneanvanche legun tuka purave diunk te xokonant.
14 Punn ek mat khorem mhaka sangchem asa: Xastracher virodhi pôkx mhonn te sangtat tê Vattecho pattlav korun amchea purvozanchea Devak hanv bhôztam. Somurtint ani provadianchea pustokamnim boroun dovorlolem asa tem sogllem hanv sotman’tam.
15 Ani borea toxench vaitt mon’xanchem punorjivontponn astolem mhonn tanchê bhaxen hanv Devacher bhorvanso dovortam.
16 Hea pasot Deva ani mon’xam mukhar sodanch nitoll ontoskornnan bhonvunk hanv bharim vavurtam.
17 Atam khub vorsamnim mhojê porjek dhormdanam diunk ani iôdn bhettounk hanv ail’lom.
18 Hench hanv kortalom tednam, hanv tankam Devmondirant mell’llom; mhoji xud’dhi hanvem kel’li; mhojê bhonvtim konn lôk naslo ani kosloch gollbôll zaunk naslo.
19 Aziechea prantantle kãi Judev thõi asle. Tankam mhojer kitem-i aslem zalear, tech hanga tujê mukhar mhojer arôp ghalunk asche asle.
20 Hanv Mha-Dhormsobhê mukhar aslom tednam, mhojê vixim koslo guneanv tankam mell’lla zalear, hanga hajir asat tãnnim sangchem.
21 Tanchê modem aslom tednam, bob marun hem mat hanvem mhollem: ‘Mel’lim mon’xam punorjivont zatolim mhonn hanv sotman’tam dekhun, aiz tumi mhoji nit kortat.’
22 Feliksak hê novê Vattechi ekdom’ bori vollokh asli; tannem khottlo sthogit kelo ani mhollem: Lisias sordar hanga ietôch, hanv tumcho khottlo topastolom.
23 Pauluk bondkhonnint dovorcho, punn ili sot’tia taka diunchi ani tachea ixttantlea konnakuch tachi seva korunk addauncho nhoi mhonn Feliksan xotpotik hukum’ ghalo.
24 Thoddea disam uprant, Feliks aplê bailê Drusilechea sangata ailo. Ti êk Judêv bail asli. Tannem Pauluk apounk lailo ani Jezu Kristacher bhavartha vixim Paulu uloilo tem tannem aikolem.
25 Punn promannik jivitachi chal, apdomavnni ani ieunchi asa ti zhôddti, hanchê vixim Paulu sangtalo tem aikun, Feliks bhielo. Tannem mhollem: Borem, sod’deak puro, tujean vochum-ieta; mhaka borem dista tednam, hanv tuka novean apounk dhaddtolom.
26 Teach borabôr, Paulu apnnak duddu-i ditolo mhonn to ravtalo ani heach khatir sobar pavtti to taka apounk dhaddtalo ani tachê lagim gozal kortalo.
27 Don vorsam somplea uprant, Feliksachê svater Porsius Festus ailo. Judevank manunk sôdtalo dekhun, tannem Pauluk bondkhonnintuch dovorlo.
Dhormdutancho Itihas - Chapter :25
1 Prantant pavtôch tin disam uprant, Festus Sezareik thaun Jeruzaleak choddun gelo.
2 Thõi mukhel iadnik ani Judevanche fuddari Paulucher add apli firiad gheun aile.
3 Pauluk Jeruzaleak dhaddun diun apnnank upkar kôr mhonn tãnnim Festusa lagim maglem. Khorem mhollear, ghatkeponnim vatteruch te tacho jiv kaddunk sôdtale.
4 Festusan oso zobab dilo:Pauluk Sezareiak koidi koso dovrunk zai ani hanvuch thoddea disamnim thõi portun vetolom.
5 Tumchea fuddariank mhojê-xim ieum-di ani tea mon’xacho koslo guneanv asa zalear, tãnnim arôp manddcho.
6 Tanchê modem Festusan anink atth vô dha dis sarle ani uprant to Sezareiak gelo. Dusrea disa to neaisobhent aplê sodrer boslo ani Pauluk bhitôr haddunk lailo.
7 Paulu pavlo tednam, Jerusaleak thaun ail’lea Judevamnim taka veddho ghalo ani te tacher sobar gombhir guneanv thapunk lagle, punn hea guneanvanche tanchean purave diunk zaunk na.
8 Tednam apli rakhônn korunk Paulun mhollem:Judevanchê Somurticher, Devmondiracher vô Somrazacher koslich chuk hanvem korunk na.
9 Festus Judevank manan lekhunk sôdtalo dekhun, tannem Pauluk mhollem:Hanvem hea aropam vixim tuji nit korunk Jeruzaleak vechi tuka khuxi asa?
10 Punn Paulun zobab dilo:Somrazachea fuddeant hanv ubo ravtam, thõi ki mhoji nit zaunk zai. Judevank hanvem koslench vaitt korunk na mhonn tum borem zannoi.
11 Hanv khoro guneanvkar zalear, vô moronn favo toslo koslo-i opradh hanvem kela zalear, hanv morunk fattim sorona. Mhojer thaptat tea aropamnim sot na zalear, fokot tankam man’chê pasot konnacheanuch mhaka tanchê adhin korum nozo. Hanv Somrazacho nirnnoi magtam.
12 Tednam, aplea budhvontanchê monddolli lagim gozal kortôch, Festusan zobab dilo:Tunvem Somrazacho nirnnoi maglai, tôr Somraza fuddeant tum ubo ravtoloi.
13 Thoddea disam uprant, Festusak bhett korunk Agripa raza ani Bernis Sezareiak ailim.
14 Tim hanga zaite dis ravlim ani Festusan Paulucho prosn raza fuddean ghalun oxem mhollem:Hanga Feliksan koidi korun dovorlolo êk monis asa.
15 Hanv Jeruzaleak aslom tednam, Judevanchea mukhel iadnikamnim ani zannteamnim tacher arop ghale ani khastichem formonn mar mhonn mhojê lagim maglem.
16 Guneanvkar ani aropi ekamekak mell’lea bogor ani zacher guneanv thaptat te sid’d korunk guneanvkarak sondhi dilea bogor, taka khastichem formonn diunk Romkaram modem sonvoi na mhonn hanvem tankam sanglem.
17 Mhonnttôch, te hanga mhojê boglek aile ani, vêll ibaddinastana, dusrea disa neai-sodrer bosun hanvem tea mon’xak bhitôr haddunk lailo.
18 Tachea aropiamnim taka veddho ghalo, punn hanv ravtalom tosle arop tãnnim tacher thapunk nant.
19 Punn tanchea dhorma vixim ani Jezu mhonnlolea konn-eklea mel’lea vixim tachê kodde tanchi huzôt zali, kiteak ho Jezu jivo asa mhonn Paulu khatren sangtalo.
20 Ho tontto koso suttavo korcho to nokllo zaun, hê vixim Jerusaleak vochun thõi nit korun gheunchi khuxi asa gai mhonn hanvem Paulu kodde vicharlem.
21 Punn bhov-xrêxtt Somrazan apnna vixim choukoxi korun nirnnoi diuncho mhonn Paulun maglem dekhun, taka Somraza-xim dhaddi-sôr bondkhonnint dovrunk hanvem formailem.
22 Agripan Festusak mhollem:Hea mon’xak aikunk mhaka-i khuxi asli. Festusan zobab dilo:Tum taka faleam aikotoloi.
23 Tôr dusrea disa Agripa ani Bernis vhodda dobajean ailim ani, sordaram ani nograchea mukhel mon’xam borabôr, neaisobhent bhitôr sorlim. Festusan Pauluk bhitôr haddunk lailo
24 ani mhollem:Agripa Raza, ani sogllea amchê borabôr asloleamnô, tumi hanga polletat tea mon’xa vixim Jerusaleak toxem hangasôr-ui Judevancho ak’kho somudai firiad gheun mhojê-xim ailo. Taka anink jivo dovrunk favona mhonn tãnnim huieli marun maglem.
25 Punn mornnachem formonn favo toslem tannem kel’lem kãi ek mhaka mellunk na. Punn bhov-xrêxtt Somraza mukhar apli nit zaunchi mhonn tannem maglem dekhun, hanvem taka Somraza-xim dhaddun diunk ievjilem.
26 Tachê vixim sarkem kitem-kat amchea bhov-xrêxtt Dhoniak borounchem mhollear mhaka kãich na: hea pasot hanvem taka tumchê mukhar ani kheritponnim, Agripa Raza, tujê fuddean haddla; tachi choukoxi kelea uprant, mhaka kitem-i tori borounk melltolem mhonn hanv ravtam.
27 Eka koidiacher arop ghaltat te dakhoinastana taka dhaddun divop, hem ginean-naslolea mon’xachem kam’ mhonn mhaka dista.
Dhormdutancho Itihas - Chapter :26
1 Agripan Pauluk mhollem: Tuji rakhônn korunk tujean atam uloum-ieta. Tednam, aplo hat sôddun, Paulu apnna khatir ulounk laglo:
2 Judev mhojer arop ghaltat tancher add az tujê mukhar, Agripa Raza, mhoji rakhônn korunk mhaka darzonnem mhonn hanv somzotam.
3 Kiteak Judevancheô chali ani tanche vad-vivad tum ekdom’ boro vollkhotai; tea pasot mhojem sonsnnikaien aik mhonn hanv tujê lagim prarthun magtam.
4 Bhurgeponnar thaun mhojem jivit koslem zalem tem, ani survatek thaun mhojea khaxa loka modem ani uprant Jeruzaleant hanv koso jielom tem, soglle Judev bore zannont.
5 Zaitim vorsam porian tãnnim mhaka vollkhola ani amchea dhormachea soglleam poros odik khôr pokxa pormannem êk Farizêv koso hanv jielom mhonn tanchean govai diunk zata.
6-7 Devan amchea purvozank kel’lê bhasavnnecher hanvem bhorvanso dovorlo dekhun, hanv hanga zhôddtek ubo asam. Amchim bara kullam, hi bhasavnni xarti pavtoli mhonn bhorvanso dhôrun, sogllê fikirin dis-rat Devak bhôztat. Bhov-xrêxtt Raza, hea bhorvanxea pasot Judev mhojer arop ghaltat!
8 Mel’leank Dev punorjivont korta, hem koxêch bhaxen sotmanunk zaina mhonn kiteak dista tumkam?
9 Nazaretkara Jezuchea nanvacher add zata titlem zhuzunk mhozo kaido mhonn hanv ekdam somzotalom.
10 Jeruzaleant astana hench hanvem kelam. Mukhel iadnikancho hukum’ gheun hanvem zaitea bhoktank bondkhonnint ghaleant ani, tancher mornnachem formonn martale tednam, hanvem tancher virudh mot dilam.
11 Toxench khub pavtti sogllea devsthanamnim gelam ani, tankam piddapidd diun, Jezucher dovortalim to bhavarth sôddunk hanvem tankam boll kelam. Tancher mhozo rag itlo pettlolo ki porkea nogramnim porian hanv tanchea pallank laglolom.
12 Oso êk pavtt mukhel iadnikancho odhikar ani rojia gheun, hanv Damaskak vetalom.
13 Ani don’parchea vellar, hanv mhojê vatten choltana, Bhov-xrêxtt Raza, suria poros loklokit sorgar thaun êk uzvadd hanvem pollelo; mhojê ani mhojea sangatianchê bhonvtonnim to jhigjhiglo.
14 Ami soglle zomnir xevttoleanv; tednam hanvem êk tallo aikolo, to mhojê kodde Hebrêv bhaxen oxem uloilo: Saulu, Saulu, kiteak mhonn tum Mhaka piddapidd ditai? Eka kantteacher khôntt marun tunch dukhovtai.
15 Hanvem vicharlem: ‘Tum konn Saiba?’ Somian zobab dilo: ‘Hanv Jezu, ani Mhakach tum piddapidd ditai.
16 Punn utth atam ani tujea pãiancher ubo rav! Hea dorxonant tunvem Mhaka pollelai ani fuddleam-i dorxonamnim tum Mhaka polletoloi, tôr Mhozo sevôk ani sakxidar tuka nemchê khatir, Hanv tuka dixtti poddlam.
17 Hea raxttram-xim Hanv tuka dhaddunk vetam:
18 kallokhantlim bhair sorun tim uzvaddak ieunchim ani Soitanachea rajeantlim sutton Deva-xim portun ieunchim mhonn, tanche dolle ugddunk Hanv tuka dhaddtam: Mhojer bhavarth dovrun ki tim aplea patkanchem bhogsonnem zôddtolim ani bhoktanchem daiz bhôgunk pavtolim.’
19 Mhonnttôch, Agripa Raza, hea sorginchea dorxonak pallo dinastana mhojean ravunk zaina zalem.
20 Dekhun, poilim Damaskachea lokak, uprant Jeruzaleant ravtoleank ani Judeiachea ak’khea prantachea lokak, ani toxench videxiank hanv ho sondêx porgôttunk laglom. Tãnnim jivit bodôlchem ani Deva-xim portun ieunchem ani bodôl’lolea jivitachim purtim kamam korchim mhonn hanv tankam updês ditalom.
21 Hea pasot Judevamnim mhaka Devmondirant dhôrlo ani te mhozo jiv kaddunk sôdtale.
22 Punn Devacho adar mhaka favo zal’lean, aiz porian lhanank toxem vhoddank hanv sakxi diit asam ani provadiamnim ani khud Moizesan ghòddtolem mhonn sanglam, tachê bhair hanv kãich sanginam:
23 mhonngê Krist koxtt sôstolo aslo ani, mel’leantlo soglleam-vôn poilo punorjivont zaun, amchê porjek ani videxi raxttrank-ui uzvadd fanklo mhonn to porgôtt kortolo aslo.
24 Oxi Paulu apli rakhônn kortana, Festusan vhoddlean mhollem: Paulu, tum piso zalai. Chôdd xiklai mhonn tuji môt firlea.
25 Paulun zobab dilo: Bhov-xrêxtt Festusa, hanv piso zaunk na, punn sot tem uloitam, ok’kolechim utram mhojim.
26 Kiteak raza heô vostu boro zanno ani dekhun sogllea visvasan hanv tachê lagim uloitam; hantlem kitench taka liplolem na mhonn mhaka khatri asa, kiteak heô vostu khõichea eka konnxeak ghoddonk nant.
27 Agripa Raza, provadiancher tum bhavarth dovortai? Tum dovortai mhonn hanv zannom.
28 Agripan Pauluk mhollem: Thoddea bhitôr tum mhaka Kristanv kortoloi mhonn dista tuka? Paulun zobab dilo:
29 Thoddea bhitôr mhonn vô chodda bhitôr mhonn, tukach nhoi, tôr aiz mhaka aikotolea soglleank Dev mhojê sarkim korum; punn mhojeô sanklli mat konnak sõsunk poddcheô nhoi!
30 Tednam raza, razpal ani Bernis, ani tanchê borabôr bosun aslim tim utthlim.
31 Ani kuxin sorun, apnnam modem tim oxem ulounk laglim: Moronn vô bondkhônn favo zaunk hea mon’xan kãich korunk na.
32 Agripan Festusak mhollem: Hea mon’xan Somrazak ulo marunk naslo zalear, taka sôddum-ietalo.
Dhormdutancho Itihas - Chapter :27
1 Tarvar bosun ami Italiek vechem mhonn tharav zatôch, Pauluk ani hera thoddea koidiank Juliusachê adhin kele. Ho Somrazachê mhonnlolê polttonnecho xotpoti aslo.
2 Adramitiuma thaun ail’lea tarvar ami choddleanv ani vattek lagleanv; hem tarum Aziechea prantachea bondrank lagchem aslem. Amchê borabôr Tesalonikecho Masedoniekar Aristark aslo.
3 Dusrea disa ami Sidonak pavleanv. Juliusan Pauluk moipas dakhoilo ani aplea ixttank mellunk vochunk ani tanchi seva-chakri gheunk tannem Pauluk rojia dili.
4 Thõiche bhair sortôch, amcher virudh varo martalo dekhun, ami Siprusachê asro ditolê kinarê vatten fuddem geleanv;
5 tea uprant, Silisia ani Pamfilia hea prantanchê kinarê bhailea doriantlean vochun, Lisiechea prantachea Mairak ami pavleanv.
6 Thõi ek Aleksandriechem tarum xotpotik gavlem, tem Italiek vetalem; tantum amkam tannem choddoile.
7 Khub dis amchem tarum bhov sovkas chol’lem ani oxem Snidusachea bondra samkar porian pavunk amkam kotthin zalem. Varo amkam fuddem vochunk dinaslo dekhun, Salmona samkar pavtôch ami Kretachi asro-ditoli kinari dhôrun fuddem chol’leanv,
8 ani vhoddê avghoddaien kinari dhôrunuch Laseia nogra-xim Surokxit Bondram mhonnlolea zagear ami pavleanv.
9 Oxem amcho khub vêll ibaddon gel’lo, ani tarvar bosun poinn korop hea kallar surokxit nhoi aslem, kiteak patkanchem bhogsonnem zôddchê khatir bhettoil’lo Judevancho upas porian bollandlolo: voros itlem fuddem pavlolem. Dekhun Paulun tankam oxe xiddkaile:
10 Ixttamnô, hem poinn atam amkam chodd sonkoxttachem mhonn hanv polletam; amchea samonak ani amchea tarvakuch nhoi, punn amchea jivak porian mottem nuksann zatolem.
11 Punn xotpotin Pauluchê xiddkavnnê poros kopitacher ani tarvacher odik visvas dovorlo.
12 Ani hinvallo sarunk tem bondir upkaronaslem dekhun, Feniksak hinvallo kaddunk zatolem mhonn bhorvanso dhôrun, fuddem vechem mhonn chôdd lokachem mot zalem. Feniks bondir Kretachê dokhinn-ostomtek ani ut’tôr-ostomtek fuddo korun aslem.
13 Oxem dokhinnechem xitoll varem suttlem tednam, apli ievzônn xarti pavtolich mhonn somzun, nangor uklun tãnnim tarum sôddlem ani tem Kretachê kinarê kuxik vochunk laglem.
14 Punn rokddem tea zunveantlean Ut’tôr-Udenticho Varo nanvachem ek mottem vadoll suttlem.
15 Tarum vadollak sampoddlem, ani oslea vareak amchean fuddo korunk zaina zaun, tarum ami vadollak sôddun dilem, ani varean amkam lottun vhelim.
16 Kauda mhonnlolea eka dhakttea zunveachê kuxik ami dhanvleanv ani kotthin proitn korun tarvacho ponêll ghôtt dhôrunk ami pavleanv.
17 To tãnnim tarvacher voir kaddlo ani tarva bhonvtonnim razu ghott bandle. Libiê samkar renvechea battiamnim tarum rombon xirkon urot mhonn te bhiele ani xiddam denvoun tãnnim tarvak varean lotton vochunk dilem.
18 Tufan tarvak itlea bollan lottun vhortalem dekhun, tantlem thoddem samon doriant uddoilem ani
19 tisrea disa apleanch hatamnim tarvachim thoddim autam legun doriant uddoilim.
20 Zaite dis porian suria ani noketram dixtti poddonaslim ani varem têch khoraien martalem; xekim jivim urpacho sogllo bhorvanso ami sôddlo.
21 Zaite dis porian tãnnim kãich jevunk-khaunk na; tednam tanchê modem ubo ravun, Paulun mhollem: Ixttamnô, tumi khorench mhojem aikunk zai aslem ani Kreta thaun tarum sôddunk favo naslem. Oxem ho sogllo sonkoxtt ani nuksann tumchean vattaunk zatalem.
22 Punn zalem tem zalem, atam hanv tumkam sangtam tem aikat, kalliz sôddum nakat. Tumchê modlea konnacheach jivacho ibadd zauncho na, punn fokot tarvacho.
23 Jea Devacho hanv bhôkt ani Zachi hanv seva kortam, Tachea dutan kal rati mhaka dixtti poddun sanglem:
24 Paulu, bhieum naka, Somraza fuddean tum ubo ravunk zai. Tujê borabôr poinn kortolea soglleancho jiv Devan tujê pasot vhoddê korunnaien samball’lla.’
25 Tôr, ixttamnô, kalliz ghott dhôrat, mhaka sanglam toxem zatolem mhonn mhaka Devacher bhavarth asa.
26 Punn ami eka zunvear poddche asanv.
27 Chovdavê rati hevtten-tevtten ami Adriatik doriant lottot asleanv tednam, sumar modianir eka ganvak apunn lagim pavtat mhonn tarvottiank dubav poddlo.
28 Tãnnim kholaiecho tthav ghetlo ani sumar sat’tis metr mell’lle; ile fuddem vetôch, novean tthav gheun sumar otth’tthavis metr mell’lle.
29 Ami êkê khoddpi kinarer vochun poddunk asanv mhonn bhieun, tãnnim tarvachê pattlê vatten char nangor sôddle ani dis vegim uzvaddum mhonn te axetale.
30 Jednam tarvotti, tarvachê fuddlê vatten nangor ghaltat mhonn nib diun, tarvacho ponêll denvoun pollun vochunk sôdtale, tedna
31 Paulun xotpotik ani tachea soinikank sanglem: He monis tarvar ravonant zalear, tumi vattaunchech nant.
32 Tednam soinikamnim ponellachim doram katorlim ani ponêll poddunk sôddlo.
33 Fantoddear, soglleamnim kitem-i khaunchem mhonn Paulun oxem prarthun maglem: Chovda dis legun tumi zagrut ravleat, kãich khainastana tumi upas kela.
34 Hea pasot hanv tumchê lagim magtam, tumi kitem-i tori jevat, kiteak tem tumche jiv vanchounk gorjechem. Konnachêch toklecho êk kens porian ibadd zauncho na.
35 Hem mhonnun, tannem unddo ghetlo, soglleam hujir Devak dhin’vaslo ani to môddun to khaunk laglo.
36 Tankam boll mell’llem ani te-i jevunk lagle.
37 Tea tarvar soglleank dhôrun ami don’xim xeastôr (276) lôk asleanv.
38 Zai titlem jevlea uprant, gonv doriant uddoun tem tarum tãnnim hollu kelem.
39 Dis uzvaddtôch to ganv konn to tãnnim vollkhunk na, punn vêll asloli doriachi êk khaddi tankam dixtti poddli.
40 Ani thõi ghòddta zalear tarum toddik kaddunk tãnnim ievjilem. Tea khatir tãnnim nangor doriant sôddun dile, teach borabôr vereanchim doram sôddlim. Magir mukhailem xidd vareak voir kaddun tarum kinarechê vattek lailem.
41 Punn tarum renvechê êkê battient romblem ani zomnik laglem. Tarvacho fuddlo bhag ghôtt rombon halona zalo, punn tacho pattlo bhag futt’tolea lharamnim boddovon-boddovon mòddlo.
42 Koidi penvun pollun vochtit mhonn soinikamnim tankam jivexim marunk ievjilem.
43 Punn xotpoti Paulucho jiv samballunk sôdtalo dekhun, tanchi ievzônn fiskottli. Penvunk zata tãnnim poili doriant uddki marchi ani thoddik vechem mhonn tannem hukum’ ghalo.
44 Punn urlolea konnkonn mòddlolea tarvachea veg-vegllea kuddkeancher bosun toddik vechim mhonn tannem formailem; hê porim sogllim solamoti toddik pavlim.
Dhormdutancho Itihas - Chapter :28
1 Ami surokxit suttlea uprant hea zunveachem nanv Malta mhonn amkam gomun ailem.
2 Tea ganvchea lokan amkam khub moipas dakhoilo. Paus poddtalo ani hinv khatalem dekhun, tãnnim ek agttem pettoilem ani tachê bhonvtonnim amkam soglleank soniman kelo.
3 Paulun xirputtancho êk bhoro haddun ujeant ghaltalo tednam, gormek lagun tantlem ek furxem bhair sorlem ani tachea hatak chablem.
4 Tachea hata thaun tem jivannem umkolltalem tem polleun, tea ganvchea mon’xamnim ekamekak mhollem: Khorench, ho monis êk khuni; to doriantlo suttlo khoro, tori Devachi nit taka jieunk dina.
5 Punn tannem tem ujeant fafuddlem ani taka kãich vaitt zaunk na.
6 To suztolo vô ovchit bhuim poddun mortolo mhonn tim somzotalim. Punn zaito vêll ravlea uprant ani taka kãich vaitt zaina tem polleun, tãnnim aplem mot bodôl’lem ani to êk dêv mhonn tim sangunk laglim.
7 Thõi laginch tea zunveachea odhikariachim bhattam-vittam aslim. Tachem nanv Publius. Tannem amkam soniman kelo ani tin dis porian ixttagotin amcho poramôs kelo.
8 Publiusacho bapui zoran foddfoddtalo ani taka rogtachim bhairam zatalim. Paulun taka bhett keli ani magnnem korun tacher hat dovorle ani taka boro kelo.
9 Tea uprant tea zunveachim sogllim piddevontam ailim ani tim borim zalim.
10 Tea lokan amkam zaitea bhasamnim man dakhoilo ani tarvan provas korchea vellar goroz teô vostu tãnnim amkam dileô.
11 Tin mhoineam uprant, ami eka tarvar choddleanv; hem tarum tea zunvear hinvallo sartalem; tem Aleksandriechem aslem ani tacher asli Zonvllea Devanchi khunna.
12 Ami Sirakusak thambleanv ani tin dis thõi ravleanv.
13 Uprant, kinarê bhonvtonnim vochun, ami Rejiumak pavleanv; eka disa uprant dokhinnchem varem marlem ani don disamnim ami Puteoliak pavleanv.
14 Hanga amkam amchim thoddim bhav-bhoinn mell’llim ani apnnanchea sangata sat dis ravunk amchê lagim maglem.
15 Thõi amchea bhavam-bhoinnink amchi khobor mell’lli ani tim Appiusacho Bazar ani Tin Khannavolli hanga porian amkam mellunk ailim. Tankam polleun Paulun Devak argam dilim ani dhir ghetlo.
16 Ami Romak pavtôch eka khasgi ghorant ravunk Pauluk rojia mell’lli ani taka rakhunk êk soinik dovorlo.
17 Tin disam uprant, tannem Judevanchea fuddariank apoile. Te ektthãi zatôch tannem tankam mhollem: Bhavamnô, amchea lokacher ani amchea purvozanchea chalim-ritincher add hanvem kãich korunk na, tori Jeruzaleant mhaka koidi kelo ani Romkaranchea hatant ghalo.
18 Tãnnim mhoji choukoxi kortôch mhojer mornnachem formonn marunk mhojê sovem tankam kãich mellunk na dekhun, te mhaka sôddunk sôdtale.
19 Punn Judevamnim ozun virôdh kelo; dekhun, zori mhojê porjecher add mhojem koslench garannem naslem, tori hanvem mhoji zhôddti korunk Somrazak ulo marcho poddlo.
20 Ani heach pasot tumkam polleunk ani tumchê kodde ili-xi gozal mhaka korunk diat mhonn hanvem maglem, kiteak Israelachea bhorvanxeak lagun hea sankllimnim hanv bandlolo asam.
21 Tãnnim taka zobab dilo: Judeiak thaun tujê vixim amkam koslinch potram ieunk nant ani amchea bhavam-bhoinnim modlea konnench thõi thaun hanga ieun tujê vixim kosloch vaitt nirôp haddunk na vô koslich vaitt gozal amkam sangunk na.
22 Toripunn tujea monant asa titlem-i amkam sang: tem tujê koddchem ami aikunk axetanv, kiteak hea pokxacher veta thõi virôdh asa, hem ami zannonv.
23 Tednam tãnnim êk dis tharailo and Paulu ravtalo tea ghorant zaitim zannam taka mellunk ailim. Tanchê kodde uloun, tannem Devachea Rajeak sakxi dili ani Moizesachê Somurtint ani provadianchea pustokancher jem Jezu vixim boroil’lem asa, tachi to sokallim thaun sanjê porian tankam khatri diunk proitn korit ravlo.
24 To sangtalo tem thoddeamnim manun ghetlem, punn heramnim tem manun ghetlem na.
25 Tanchê modem ek mot zaunk na; dekhun, tim bhair sortana, Paulun tankam hem nimannem utor sanglem:Izaias provadia vorvim Povitr Atmean tumchea purvozank sangleant tim utram khorench sarkim asat:
26 ‘Hê porjê-xim voch ani tankam sang: Aikat, aikot ravat, punn tumkam kãi somzochem na; polleiat, pollet ravat, punn tumkam kãich dixtti poddchem na. Hê porjechem kalliz nibor zalam.
27 Dolleamnim tankam disona zaunk, kanamnim tankam sarkem aikona zaunk, monan tankam somzon iena zaunk, ani tim Mhojê-xim portun ieun Hanvem tankam borim korina zaunk, tanche kan bhere zaleat, tãnnim aple dolle ghott dhampleat.’
28 Mhonnttôch hem zanno zaiat: Aplea taronnacho nirôp Devan videxiank dhaddla. Tim to aikotolim.
30 Don ak’khim vorsam Paulu bhaddeachea ghorant ravlo, apnnak mellunk ietalim titleank-ui to borê bhaxen ghetalo ani
31 kalljidarponnan ani koslich addkhôll nastana Devachem Raj porgôtt’talo ani Somia Jezu Krista vixim xikovnn ditalo.
